Modo gaca Guendaridagulisaa stiʼ Dxiiñaʼ Stinu
Ora maʼ guzulú guiuundaʼ guiʼchiʼ riʼ maʼ zadxaa caadxi diidxaʼ ra na ximodo gaca Guendaridagulisaa stiʼ Dxiiñaʼ Stinu. Tema riʼ chigusiene chaahuiʼ laanu caadxi cosa ni naquiiñeʼ gánnanu ne caadxi cosa ni bidxaa ni beeda lu tema ni láʼ «Guidúʼndanu dede ante ni chitiidiʼ lu Guendaridagulisaa stiʼ Dxiiñaʼ Stinu», ni biree lu Xhiiñaʼ Reinu ni Rúninu mayo 2009.
◼ Libana. Lu libana riʼ ridiʼdiʼ tuuxa para gusiene de ti tema ni biree lu xiixa guiʼchiʼ stinu. Qué ricabi diʼ ca binni ridagulisaa luni. Ni gudii libana ca zuzeeteʼ xii nga ni jma naquiiñeʼ ganna ca binni ridagulisaa.
◼ Gunabadiidxaʼ ne guicábicabe. Rácani casi modo riuundaʼ Torre stiʼ ni Rapa, lu cada párrafo rinabadiidxacabe para guicabi binni. Ni gutiidiʼ libana ca zanda guiníʼ caadxi diidxaʼ ora guzulú ne ora guiluxe, peru cadi naquiiñeʼ diʼ guiníʼ stale. Nga runi galán gúnibe stipa para cadi gutálepebe diidxaʼ. Zanda guiuundaʼ ca textu ni jma cusiene de tema ca, pa gudii tiempu. Cadi naquiiñeʼ diʼ guiuundaʼ ca párrafo ca, peru ziuundacani pa cá lu guiʼchiʼ ca gácani.
◼ Libana ra zanda guicabi cani cucaadiaga. Lu libana riʼ zanda guicabi cani cucaadiaga. Qué zadiʼdiʼ guidubi ni casi ti libana, sínuque zanda guinabadiidxaʼ ni cutiidiʼ libana ca xiixa cani cucaadiaga.
◼ Ora tiidiʼ modo gusaananu xiixa guiʼchiʼ ne ora guinabadiidxacabe tuuxa. Ora cá lu guiʼchiʼ ca naquiiñeʼ tiidiʼ ximodo gusaananu xiixa guiʼchiʼ la? ni chigudii libana ca naquiiñeʼ guyubi tu laa zanda gúnini. Naquiiñeʼ guyúbibe ni rucheeche diidxaʼ ni naca ejemplu lade ca binni ridagulisaa ne ganda guni ni galán. Ne ora ganda la? naquiiñeʼ guiníʼnebe ca binni ni chitiidiʼ ca dede ante. Pa ganda la? cadi iquiiñebe cani nacubi para tiidicaʼ ni, peru pa rápabe gana iquiiñebe laacaʼ la? zanda tiidicaʼ casi binni ni chigucheechecabe diidxaʼ ra nuucaʼ. Ca binni ni tiidiʼ para guluíʼ ximodo gusaananu xiixa guiʼchiʼ la? cadi naquiiñeʼ gudxiidéchecaʼ ca binni ni cucaadiaga. Yanna, ora cá lu guiʼchiʼ ca guinabadiidxacabe tuuxa la? naquiiñeʼ tiidiʼ binni ca lu plataforma ne cadi guicabi dede ra zuba. Guiráʼ biaje tiidiʼ ti xpinni Cristu para guluíʼ ximodo gusaananu ti guiʼchiʼ ne ora guinabadiidxacabe tuuxa la? naquiiñeʼ guni ensayárcabe. Yanna guzéʼtenu de tuuxa ni chigudii ti libana ra zanabadiidxabe ti binni o ra zadiʼdiʼ ximodo gusaananu ti guiʼchiʼ. Xi naquiiñeʼ gúnibe pa maʼ cará tiempu stibe yaʼ. Naquiiñeʼ guchuugube lu libana stibe ne cadi guiníʼ íquebe maʼ qué zadiʼdiʼ ca binni ca. Ora guyubi ca siervu ministerial tuuxa para tiidiʼ lu libana sticaʼ la? naquiiñeʼ guiníʼnecaʼ binnigola ni ruuyaʼ dxiiñaʼ ni runi grupu de binnigola o sti binnigola ni nuu lu grupu ca.
Pa lu guiʼchiʼ ca zeeda ximódopeʼ tiidiʼ ti libana la? naquiiñeʼ gúnicabe módopeʼ cá luni. Ribézadu gacané cani cusiene tema riʼ laanu para gaca Guendaridagulisaa stiʼ Dxiiñaʼ Stinu jneza (1 Cor. 14:40).