Ximodo zanda guicábinu
1. Xiñee naquiiñeʼ chinándanu ejemplu stiʼ Jesús ora guinabadiidxacabe laanu xiixa.
1 Dede yanna ridxagayaa guiráʼ binni pabiáʼ jneza modo bicabi Jesús cani gunabadiidxacabe laa ne ora bidii conseju. Galán ejemplu bisaanabe para gánnanu ximodo guicábinu cani rinabadiidxaʼ binni laanu ora maʼ cucheechenu diidxaʼ (1 Ped. 2:21).
2. Ximodo zanda gánnanu xi guicábinu.
2 Primé naquiiñeʼ gucaadiáganu. Ora gunabadiidxacabe Jesús xiixa la? laabe gúnnabe xipeʼ ngue racalaʼdxiʼ binni ganna. Para ganda gúninu zacaca ziuu ora zanabadiidxanu xcaadxi cosa para gánnanu xipeʼ nga racalaʼdxiʼ binni ganna. Casi pa tuuxa guinabadiidxaʼ laanu: «Ñee runi cretu Jesús la?», zándaca ni racaláʼdxibe gánnabe nga xiñee qué rúninu Navidad. Pa gudiiluʼ cuenta xipeʼ nga racalaʼdxiʼ binni ganna la? jma nagueenda zacaneluʼ laabe guiénebe ni (Luc. 10:25-37).
3. Xi zanda gacané laanu para gánnanu xi guicábinu.
3 Iquiiñenu Stiidxaʼ Dios. Jma jneza nga iquiiñenu Biblia para guicábinu (2 Tim. 3:16, 17; Heb. 4:12). Libru Razonamiento ne «Temas bíblicos para consideración» ni zeeda lu Traducción del Nuevo Mundo de las Santas Escrituras zanda gacané laanu para gánnanu xi textu iquiiñenu. Ne pa tuuxa qué runi cré cani zeeda lu Biblia, zanda guyúbinu ximodo guluinu laabe xiná ni sin guidxiichibe. Gudxi laabe galán guiníʼ íquebe pabiáʼ jneza ca conseju zeeda luni, ne dede maʼ xadxí huahuinni dxandíʼ cani cá luni. Pa chinándanu ejemplu stiʼ Jesús la? zeeda gaca cani guicábinu «casi manzana de oro ndaaniʼ xiixa de plata», purtiʼ jneza cani, ziuulaʼdxiʼ binni cani ne zacanécani laacaʼ (Pro. 25:11).
4. Pora nga cadi naquiiñeʼ guicábinu guirá ni guinabadiidxacabe laanu.
4 Ñee naquiiñeʼ guicábinu guiráʼ ni la? Pa qué gánnaluʼ xi guicábiluʼ ora guinabadiidxacabe lii xiixa la? galán guiniʼluʼ: «Qué gánnadiaʼ ni nagasi, peru zanda guundaʼ de laani ne zabiguetaʼ para guicabeʼ lii». Ora guicábiluʼ zacá zusihuínniluʼ qué rudxiibaluʼ laca lii ne zuuyaʼ binni rizaaláʼdxiluʼ laa, zándaca zacá zaná binni chigannuʼ laa sti biaje. Peru pa rihuínnica cucaalú si binni ca ne cuyubi tinde diidxaʼ si la? biʼniʼ casi Jesús: bichuuguʼ lu stiidxaluʼ (Luc. 20:1-8). Ngaca nga ni naquiiñeʼ gúninu ne tuuxa ni cadi dxandíʼ racalaʼdxiʼ guiziidiʼ de Dios ne nuu tinde diidxaʼ si, naquiiñeʼ guyúbinu ximodo guchúʼgunu lu diidxaʼ. Jma jneza nga iquiiñenu tiempu ca para guyúbinu ca binni ni dxandíʼ rapa gana guiziidiʼ (Mat. 7:6).
5. Xi maʼ bizíʼdinu de ejemplu stiʼ Jesús para guicábinu cani guinabadiidxacabe laanu.
5 Jesús gunna caquiiñeʼ gacané Jiobá laa para ganda guni dxiiñaʼ stiʼ de gusiidiʼ binni «xii nga ni dxandíʼ», ne guicábibe ca binni ni dxandí napa gana guiziidiʼ (Juan 18:37). Nga runi zanda guininu, ¡guizáʼ galán ejemplu bisaananebe laanu para guicábinu ni rinabadiidxaʼ cani «maʼ nuu listu para icaa guendanabani ni qué zaluxe»! (Hech. 13:48.)