Ni jma risaca para laanu nga gucheechenu diidxaʼ
1. Ximodo bisihuinni Jesús risaca para laa gucheeche diidxaʼ.
1 Qué ñuu diʼ sti cosa ni jma risaca para Jesús que gucheeche diidxaʼ. Bíʼnibe dxiiñaʼ que de guidubi ladxidoʼbe, ngue runi guzabe gayuaa de kilómetru guidubi naca Palestina para ganda guiníʼnebe stale binni. Ne pur ngaca qué ninádibe ñápabe stale cosa, ti ganda gápabe jma tiempu para gucheechebe diidxaʼ ne gúnibe dxiiñaʼ que jma jneza (Mat. 8:20). Ngue runi, ora gucalaʼdxiʼ stale binni nucueezacaʼ laabe para gusiándabe ca binni huará nuu ládecaʼ la? gúdxibe laacaʼ: «Napa xidé chaa xcaadxi guidxi. Chi güe nia binni modo runi mandar Dios, purti para nga bendáʼ» (Luc. 4:43).
2. Xiñee nabé bisaca para Jesús gucheeche diidxaʼ.
2 Xiñee nabé bisaca para Jesús gucheeche diidxaʼ. Primé la? purtiʼ racaláʼdxibe gusisácabe lá Bixhózebe (Mat. 6:9, NM). Laaca bíʼnibe ni purtiʼ nadxiibe Bixhózebe ni nuu guibáʼ, ngue runi bíʼnibe ni na ne bizuubabe stiidxaʼ (Juan 14:31). Ne sti razón nga purtiʼ bizaaláʼdxibe binni ne guyuuláʼdxibe gacanebe laacaʼ (Mat. 9:36, 37).
3. Ximodo zanda gusihuínninu risaca para laanu gucheechenu diidxaʼ.
3 Ximodo zanda guʼnuʼ casi biʼniʼ Jesús. Zándaca gaca nagana para laanu gucheechenu diidxaʼ cásica biʼniʼ Jesús ni. Xiñee yaʼ. Purtiʼ raxha guidxilayú riʼ stale tiempu stinu ne rucaani laanu gúninu stale cosa, casi chizanu o xcaadxi casi laani (Mat. 24:37-39; Luc. 21:34). Nga runi, naquiiñeʼ ganna chaahuinu gunáʼ nga ca cosa ni jma risaca ne quixhe chaahuinu tiempu stinu para gucheechenu diidxaʼ gatigá ne cueenu tiempu para guidúʼndanu ante chuunu (Fili. 1:10). Laaca cadi naquiiñeʼ diʼ guicá íquenu gápanu stale cosa ne cadi guibáninu para si iquiiñenu guiráʼ ni nuu ndaaniʼ guidxilayú riʼ (1 Cor. 7:31).
4. Xiñee naquiiñeʼ gánnanu xii nga ni jma risaca gúninu.
4 Ti binni nuu xpiaaniʼ la? nanna xii nga ni jma risaca guni ora huaxiéʼ tiempu napa. Casi pa gánnabe chiguizaaca xiixa desgracia ni zuniná binni la? jma zaquiiñebe tiempu ne stipa stibe para gúʼyabe xi gúnibe para cadi gacaná binnilídxibe ne quixhenabe ca vecinu stibe. Cadi dxandíʼ nusaanabe xcaadxi cosa ni huaxiéʼ risaca para sti hora la? Laaca maʼ huaxiéʼ tiempu nga cayaadxaʼ para gueeda Armagedón (Sof. 1:14-16; 1 Cor. 7:29). Nga runi, pa racaláʼdxinu guilanu ne guilá cani gucaadiaga laanu la? naquiiñeʼ guuyaʼ chaahuinu ximodo nabáninu ne gucáʼ íquenu gusíʼdinu jneza, ora maʼ nuunu lade ca binni ridagulisaa o sti lugar (1 Tim. 4:16). Para ganda guilanu la? naquiiñeʼ gusihuínninu dxandíʼ risaca para laanu gucheechenu diidxaʼ.