Ñee maʼ huaquiiñeluʼ últimu yaza stini la?

Ñee huayuuyaluʼ xi runi binni ora rusaananenu laa ti revista la? Cadi dxandíʼ primeca yaza stini nga ruuyabe cásipeʼ guicaabe ni, ne nagueendaca rutiixibe ni para gúʼyabe xi cá lu últimu yaza stini la? Lu últimu yaza stiʼ revista Torre stiʼ ni rapa ni rusaananenu binni, zeeda caadxi guendarinabadiidxaʼ ni rucaa binni guiníʼ ique, ne laaca zeeda xi yaza naquiiñeʼ guʼndaʼ binni para ganna xi ricábini.

Zanda iquiiñenu cani zeeda lu yaza ca para gánnanu xi guinabadiidxanu binni ti ganda guzulú guinínenu laa. Laaca zanda iquiiñenu ni pa gatigá ridídinu ralidxi ca binni ni nuu neza ra rucheechenu diidxaʼ, purtiʼ zacaneni laanu guchaʼnu modo rinínenu laacabe ne guinabadiidxanu laacabe gadxé gadxé cosa lu guionnaʼ beeu iquiiñenu revista ca. Ne pa nabé nuu xhiiñaʼ ti binni la? zanda guinínenu laabe nagueenda ra iquiiñenu tobi de ca guendarinabadiidxaʼ zeeda lu últimu yaza ca ne gábinu laabe: «Pa riuuláʼdxiluʼ gánnaluʼ modo ricabi revista riʼ ni bizeeteʼ ca la? zanda gusaananiáʼ cani lii ne zadideʼ sti dxi ora maʼ napuʼ jma tiempu para guininu de laani». Caadxi de cani rucheeche diidxaʼ ruzulú riníʼnecaʼ binni ora ruluíʼcabe laa últimu yaza stiʼ revista ca ne rinábacabe laa cuí tobi de ca guendarinabadiidxaʼ ni jma chuulaʼdxiʼ. De racá rábicabe binni paraa zeeda ni lu revista ca ne ruundanécabe laa ti textu ni maca gulícabe dede ante. Ñee zanda guidxeʼluʼ xcaadxi modo iquiiñeluʼ últimu yaza stiʼ revista Torre stiʼ ni rapa para gucaaluʼ binni chuulaʼdxiʼ guʼndaʼ ni la?