Guzeʼnu biidxiʼ ca ti guindani ni
1. Xiñee naquiiñeʼ chigánnanu binni sti biaje.
1 Ora gudxiibaʼ binni ti biidxiʼ la? caquiiñeʼ guzee ni ti guindani ni. Zacaca nga naquiiñeʼ gúninu né ca binni ni nabeza neza ra rucheechenu diidxaʼ para guicaa xcu stiidxaʼ Dios ndaaniʼ ladxidoʼcaʼ (1 Cor. 3:6). Nga runi, naquiiñeʼ chigánnanu binni sti biaje para gacanenu laacaʼ guiziidicaʼ jma de Stiidxaʼ Dios, ne zeeda gaca nga casi ora nuzeʼnu biidxiʼ ni bidxíʼbanu. Zacá zanda guicaa xcu ni caziidicabe ndaaniʼ ladxidóʼcabe, guiniisicabe lu stiidxaʼ Dios ne gacanécabe xcaadxi binni guiziidiʼ de Dios.
2. Xi caquiiñeʼ gúninu para ganda chigánnanu binni sti biaje.
2 Gunabadiidxaʼ laabe xiixa ni guicábiluʼ sti dxi. Ora maʼ caguíxheluʼ xi zanda gábiluʼ binni nabeza neza ra rucheecheluʼ diidxaʼ, galán guiníʼ íqueluʼ xi zanda guinabadiidxaluʼ laabe para chuuláʼdxibe guiziidibe jma ne ganda chigánnaluʼ laabe sti biaje. Galán guʼnuʼ zacá ora maʼ chiguiluxe guiníʼneluʼ laabe de Dios, ne biaanané laabe guibiguétaluʼ sti dxi para guicábiluʼ guendarinabadiidxaʼ ca. Stale de cani rucheeche diidxaʼ huabeenducaʼ ni galán ora rinabadiidxacaʼ xiixa ni zeeda lu libru Xipeʼ ndiʼ cusiidiʼ Biblia ne nga racané laacaʼ guzulú gúʼndanecaʼ binni de Biblia.
3. Xi zanda gucaʼnu de ti binni ni riuulaʼdxiʼ guiziidiʼ.
3 Cani naquiiñeʼ gucaaluʼ de binni ca. Ora chigánnaluʼ tuuxa binni primé biaje, galán gucaaluʼ tu labe cásipeʼ guiluxe guiníʼneluʼ laabe, pa neza ralídxibe, fecha, ora yegánnaluʼ laabe, xi tema guníʼneluʼ laabe, ne pa bisaananeluʼ laabe xiixa libru o revista. Laaca galán gucaaluʼ pa nápabe xiixa religión, pa nápabe binnilídxibe, pa nuu xi naguu xizaa laabe o pa riuuláʼdxibe gánnabe de xiixa tema. Cani gucaaluʼ ca zacanécani lii chuʼluʼ listu ora maʼ chigánnaluʼ laabe sti biaje. Cadi guiaandaʼ lii gucaaluʼ xi dxi biaananeluʼ laabe guibiguétaluʼ ne xi guendarinabadiidxaʼ chiguicábiluʼ laabe.
4. Xiñee cadi naquiiñeʼ guireʼnu gana pa racaláʼdxinu gacanenu binni guiziidiʼ de Dios.
4 Cadi guireeluʼ gana. Binidxabaʼ zuni guiráʼ ni gándatiʼ para cuee de «ndaani ladxidóʼ» binni guiráʼ ni maʼ biziidiʼ de Dios (Mar. 4:14, 15). Nga runi, cadi guireeluʼ gana pa maʼ qué guidxélaluʼ ca binni ni guyuulaʼdxiʼ guiziidiʼ de Biblia. Zanda gucaaluʼ xiixa lu ti guiʼchiʼ huiiniʼ ne gusaanaluʼ ni ralídxicabe o guseendaluʼ ti carta ra nuucabe. Ti precursora bizulú cayuundané ti gunaa ra puertaʼ lidxi, peru maʼ qué nidxélarube laa, ni bíʼnitibe biseendabe ti carta ra nuu. Despué beeda guidxélabe gunaa que, ne laa gudxi laabe ni bíʼnibe que biniibi ni ladxidóʼ. Pa guibiguetaʼ chigánnanu ti binni ni guyuulaʼdxiʼ guiziidiʼ de Biblia, zadúʼyanu guiniisibe lu stiidxaʼ Dios, ni zeeda gaca casi ora nindani ti biidxiʼ ni bidxíʼbanu, nidúʼyanu niroobaʼ ni ne nudiini stale casi layú «ni bidii treinta carreta» ne «ni bidii sesenta» ne «ni bidii dede ti gayuaa» (Mar. 4:20).