Modo gucheecheluʼ diidxaʼ jma jneza: bicaa lá ca binni ni jma riuulaʼdxiʼ guiziidiʼ

«Biiya ibani lu jneza ne zaqueca biiya usiidi lu ni jneza.» (1 Tim. 4:16.) Conseju ni bidii apóstol Pablu Timoteu riʼ rusihuínnini caquiiñeʼ gucheechenu diidxaʼ jma jneza neca maʼ xadxí rúninu ni o nacúbinu. Nga runi, lu Xhiiñaʼ Reinu ni Rúninu zaree ti tema ni láʼ «Modo gucheecheluʼ diidxaʼ jma jneza». Cada tobi de ca tema ca zusiene ximodo zanda gucheechenu diidxaʼ jma jneza ne laaca zusiéneni laanu ximodo zanda gúninu ni. Caguucabe gana laanu gucaʼnu lá ca binni ni riuulaʼdxiʼ guiziidiʼ jma de Biblia lu beeu riʼ. Ra guiluxe beeu ca zanda guininu xi guleendunu lu dxiiñaʼ riʼ lu Guendaridagulisaa stiʼ Dxiiñaʼ Stinu. Lu primé tema riʼ caguucabe gana laanu gucaʼnu lá ca binni ni riuulaʼdxiʼ guiziidiʼ.

Xiñee risaca gúninu ni. Dxiiñaʼ stinu, qué riníʼsini gucheechenu diidxaʼ: sínuque chigánnanu ca binni ni riuulaʼdxiʼ guiziidiʼ sti biaje ne gusíʼdinu laaca ni dxandíʼ, zacá nga casi ñaca nuzeʼnu ca semiá ni maʼ bidxíʼbanu (Mat. 28:19, 20; 1 Cor. 3:6-9). Para ganda gúninu ni maʼ bizéʼtenu ca, naquiiñeʼ guibiguétanu ra nuu ca binni ca sti biaje ne guinínenu laacabe de xiixa ni nacubi bíʼndanu de tema ni riuuláʼdxicabe. Nga runi, caquiiñeʼ gucaʼnu lá ca binni ni riuulaʼdxiʼ guiziidiʼ jma de Dios.