Gápanu cuidadu ora maʼ canagucheechenu diidxaʼ
1. Xiñee naquiiñeʼ gápanu cuidadu ora maʼ canagucheechenu diidxaʼ.
1 Ca dxi stinu riʼ, ca xpinni Dios zeeda gácacaʼ casi «dendxu lade gueuʼ» ne rucheechecaʼ diidxaʼ «lade binni ni runi ni na ique sin gapa xpiaʼ» (Mat. 10:16; Fili. 2:15). Maʼ guiráʼ ladu ridúʼyanu cadinde binni ndaaniʼ ca guidxi ca, huayasa grupu de binni ni rucaalú ne ribáʼnacaʼ binni para gáxhacaʼ bueltu laacabe. Nga rusihuinni «ze dxi jma rusi zinitilú» binni (2 Tim. 3:13). Xi conseju zeeda lu Biblia zanda gacané laanu ora gucheechenu diidxaʼ yaʼ (Mat. 10:16).
2. Pora nga jma jneza gusaananu ra cucheechenu diidxaʼ ne chuunu sti lugar.
2 Gusihuínninu nácanu binni nuu xpiaaniʼ. Lu Proverbios 22:3 rieeteʼ xi runi ti binni nuu xpiaaniʼ. Laa rucaachilú ora guʼyaʼ maʼ zeeda xiixa guendanagana ni zuniná laa. Ca dxi stinu riʼ naquiiñeʼ gatananu ora tiisi, purtiʼ ruluíʼ nuudxí binni xiixa lugar málasi guchaa modo nabánicaʼ. Zándaca málasi gueeda stale pulicía o cuí zisi binni lu calle. O zándaca tuuxa binni gabi laanu guireʼnu de ti lugar para cadi guizaacanu xiixa. Lugar de guiaananu para gúʼyanu xi cayaca la? jma galán guireʼnu de raqué nagueendaca ne chigucheechenu diidxaʼ stiʼ lugar (Pro. 17:14; Juan 8:59; 1 Tes. 4:11).
3. Ximodo zanda gúninu ni na conseju ni zeeda lu Eclesiastés 4:9 ora maʼ canagucheechenu diidxaʼ.
3 Cadi chuunu stúbinu. Eclesiastés 4:9 na: «Jma galán chuʼ chupa binni que tobi». Zándaca gastiʼ huazaacanu ora maʼ canagucheechenu diidxaʼ stúbinu, peru ñee dede yanna zacá ni la? Nuuruʼ lugar ra randa rizá binni stubi, peru nuu xcaadxi lugar ra qué randa rucheecheʼ ti gunaa o ti hombrehuiiniʼ diidxaʼ de yoo pur yoo stubi, jmaruʼ si huaxhinni. Ne pur cani cayaca yanna riʼ, rihuinni jma galán sánenu sti xpinni Cristu ni zanda gacané laanu pa málasi guizaaca xiixa (Ecl. 4:10, 12). Guiranu naquiiñeʼ gapasaanu laanu ora maʼ canagucheechenu diidxaʼ ne naquiiñeʼ gábinu tuuxa pa maʼ chuunu.
4. Xi naquiiñeʼ gúninu para gapasaanu laanu ora maʼ canagucheechenu diidxaʼ.
4 Ca binnigola ni nuu ndaaniʼ neza binni ridagulisaa nga rápacaʼ laanu, nga runi laacabe nga naquiiñeʼ gúʼyacabe ximodo nuu neza ra rucheechenu diidxaʼ ti gusiénecabe laanu xi naquiiñeʼ gúninu (Heb. 13:17). Pa gusihuínninu nánnanu nuu cosa ni qué zanda gúninu, qué rudxíʼbanu laca laanu ne racanésaanu la? zaguu Jiobá ndaayaʼ laanu pur stipa ni gúninu (Miq. 6:8; 1 Cor. 10:12). Galán gucheechenu diidxaʼ guidubi ra nexheʼ gúninu ni, peru naquiiñeʼ gápanu stale cuidadu.