«Bicaa ique güi lu stiidxa Cristu»
1. Xi ejemplu bisaana apóstol Pablu para gucheechenu diidxaʼ.
1 «Bicaa ique güi lu stiidxa Cristu.» (2 Tim. 4:5.) Qué liica nidxibi apóstol Pablu ora gudxi Timoteo ca diidxaʼ ca, purtiʼ laa biʼniʼ zacá. Ne Pablu biʼniʼ guionna biaje stiʼ lu iza 47 dede 56 d. J. Lu libru stiʼ Hechos nabé rieeteʼ byuiʼbe stiidxaʼ Dios (Hech. 23:11; 28:23). Ximodo zanda gúninu casi bíʼnibe ca yaʼ.
2. Ximodo zanda gusihuínninu cucaa íquenu gucheechenu diidxaʼ ora maʼ ziuunu de yoo pur yoo.
2 De yoo pur yoo. Cumu racaláʼdxinu guidxélanu ca binni ni qué huayuu dxi gucaadiágacaʼ ca diidxaʼ nacubi ne galán stiʼ Reinu stiʼ Dios, naquiiñeʼ chiyúbinu laacabe gadxé hora. Ca hombre ni naca xaíque stiʼ ti familia zándaca guidxélanu laacaʼ ralídxicaʼ ca huadxí ca o sábadu ne domingu. Naquiiñeʼ gúninu stipa pur guinínenu binni cada yoo, ne zanda gúninu ni pa guibiguetaʼ chigánnanu ca binni ni qué nidxélanu laacaʼ ralídxicaʼ. Yanna, pa qué ganda guidxélaluʼ tuuxa yaʼ. Ni zanda gacané lii guidxélaluʼ laacabe nga gucaaluʼ carta ra nuucabe o guiníʼneluʼ laacabe pur teléfono.
3. Xi zanda gúniluʼ para gucheecheluʼ diidxaʼ ra nuu stale binni ne ora tiica.
3 Gucheechenu diidxaʼ ra nuu stale binni ne ra tiica nuucaʼ. Yanna riʼ, ca xpinni Jiobá rusiidicaʼ ca binni ni rucaadiaga laacaʼ ximodo zanda gácacaʼ binni nuu xpiaaniʼ. Ne zanda gúninu nga lu calle o ndaaniʼ luguiaa (Prov. 1:20, 21). Ñee rietenaláʼdxinu guininu de Dios guiráʼ dxi la? Ñee zanda guininu qué rusaananu de güinu stiidxa Dios la? (Hech. 18:5.) Pa zacá ni la? cusihuínninu dxandíʼ cucaa íquenu güinu stiidxaʼ Dios (Hech. 10:42; 17:17; 20:20, 21, 24).
4. Ximodo racané oración ne ora rúʼndanu Stiidxaʼ Dios stúbinu para ganda gucheechenu diidxaʼ.
4 Peru nuu biaje raca nagana para laanu gucheechenu diidxaʼ purtiʼ rábinu qué zanda gúninu ni o natuinu. Peru nanna dxíchinu nanna Jiobá xii nga raca nagana laanu gúninu (Sal. 103:14). Nga runi, ora guni sentirnu zacá la? zanda guinábanu Jiobá guni laanu nadxibalú ti ganda guininu (Hech. 4:29, 31). Ne ora maʼ cayúʼndanu Stiidxaʼ Dios stúbinu ne guiníʼ íquenu ni nani, zacané nga laanu jma gusisácanu ca diidxaʼ nacubi ne galán ca (Filip. 3:8). Ndiʼ zucaa laanu gucheechenu diidxaʼ né stale gana.
5. Ximodo zanda gúninu ni na ca diidxaʼ ni guníʼ Joel, ni riguixhená que.
5 Joel, ni riguixhená que, guníʼ ora guedandá dxi stiʼ Jiobá gastiʼ ni zucueeza ca xpinni Dios de gucheechecaʼ diidxaʼ (Joel 2:2, 7-9). Ñee naguixhe íquenu gucheechenu diidxaʼ, dxiiñaʼ ni qué zabiguetaʼ gaca ca la?