Biquiiñeʼ sitiu jw.org para gusiidiluʼ xiiñiluʼ
1. Xi para guca ndaa ra na «Niños» ni nuu lu jw.org.
1 Sitiu jw.org ni nápanu lu Internet, nuuni para ganda iquiiñeʼ guiráʼ binni ni. Casi ndaa ra na «Niños» (diidxastiá si nuuni; guyé ra na Enseñanzas bíblicas > Niños) racaneni para ganda chuʼ xiiñiʼ binni tobi si né bixhoze ne jñaa ne laaca racaneni para gaca xhamígucaʼ Jiobá (Deut. 6:6, 7). Ximodo zanda iquiiñeluʼ ni bizéʼtenu riʼ para gusiidiluʼ xiiñiluʼ.
2. Ximodo zanda gannuʼ xipeʼ nga caquiiñeʼ guiziidiʼ cada tobi de ca xiiñiluʼ.
2 Guca naguudxi. Gadxé gadxé nga ni riquiiñeʼ cada baʼduhuiiniʼ (1 Cor. 13:11). Yanna, ximodo zanda gannuʼ xipeʼ nga caquiiñeʼ guiziidiʼ cada tobi de ca xiiñiluʼ. Primeru guníʼ ique panda iza nápabe ne xi riuuláʼdxibe. Laaca naquiiñeʼ guʼyuʼ pabiáʼ zanda guiénebe ne pabiáʼ tiempu zanda gucaadiágabe lii sin guireebe gana. Lu jw.org zeeda ti ndaa ra na «Mis primeras lecciones de la Biblia» ni zanda iquiiñeʼ para ca baʼduhuiiniʼ ni napa ti iza hasta chonna iza. Ca historia stiʼ Biblia ni zeeda ra na «De padres a hijos» nabé galán cani ne guizáʼ riuulaʼdxiʼ ca xcuidi ni. Yanna, guidúʼyanu xcaadxi cosa nuu lu sitiu riʼ ni zanda iquiiñenu.
3. Ximodo jma jneza iquiiñeluʼ ca historia ne cani zeeda lu yaza ra na «Ideas para la adoración en familia».
3 Ni zanda iquiiñetu para guni adorartu Dios né binnilídxitu. Cani napa xiiñiʼ zanda iquiiñecaʼ ndaa ra na «Ideas para la adoración en familia» para gusiidicaʼ laacabe. Bidii clic ra na «Descargar» ne guyé ra na «Guía para los padres» ti ganna chaahuiluʼ ximodo jma jneza iquiiñeluʼ ca historia ne guiráʼ ni zeeda luni. Para cani jma nahuiiniʼ zanda iquiiñeluʼ ra na «Actividades ilustradas», ra zeeda caadxi dibuju para gutieebe. Peru pa jma maʼ huaniisihuiiniʼ xiiñitu la? zanda gacanetu laabe gúnibe cani zeeda ra na «Proyectos de investigación». Guiráʼ cani zeeda lu yaza ra na «Guía para los padres» cusiénecani de ti historia si ni zeeda lu Biblia. Guca ni zacá para ganda gacaneni guidubi familia stiuʼ guiníʼ xi caziidiʼ ora maʼ cayuni adorartu Dios.
4. Xi guiráʼ zeeda lu ndaa ra na «Hazte amigo de Jehová».
4 Guca xhamigu Jiobá. Lu jw.org laaca zeeda ti ndaa ra na «Hazte amigo de Jehová», raríʼ nuu videu, saa ne xcaadxi cosa ni zanda iquiiñetu para uguutu Stiidxaʼ Dios ndaaniʼ ladxidóʼ ca xiiñihuiinitu (Deut. 31:12). Ca videu ni guca para ca baʼduhuiiniʼ riʼ, rusiidicani laacabe stale cosa sicarú, ne ca juegu ni zeeda lu yaza riʼ, zacaneni laacabe para cadi gusiaandacabe ni cusiidiʼ ca videu riʼ. Stale baʼduhuiiniʼ nabé riuulaʼdxiʼ guʼndaʼ, ne ora gunadiágacabe ti canción, racaneni laacabe guietenaláʼdxicabe ni maʼ biziidicabe. Nga runi, gatigá riree diidxaʼ riuundaʼ stiʼ Reinu lu yaza riʼ ne canción para ca baʼduhuiiniʼ.
5. Xiñee naquiiñeʼ guinabaʼ cani napa xiiñiʼ gacané Jiobá laacaʼ.
5 Racalaʼdxi Jiobá gacané laatu ti ganda gusiiditu xiiñitu ni cá lu Biblia. Nga runi, laguinabaʼ laabe guluiʼbe laatu xi caquiiñeʼ gúnitu ne cadi guiníʼ íquetu ni chupa biaje (Juec. 13:8). Zacá zanda gacanetu ca xiiñitu gácacaʼ binni nuu xpiaaniʼ ti ganda guilacaʼ «ra guni [crecaʼ] Cristu Jesús» (2 Tim. 3:15; Prov. 4:1-4).