Ni bizaaca binni

◼ Australia. John, ti hombre ni guzá scuela roʼ, nabé guyé yuʼduʼ dxi nahuiiniʼ; peru despué beeda gácabe ti binni ni qué lica ñuni cré Dios. Ti dxi bisaanané ti precursor laabe folletu ni láʼ ¿Es la vida obra de un Creador?, ne sti biaje bisaanané laabe folletu El origen de la vida. Para gacané precursor que laabe chuuláʼdxibe guiziidibe jma la? guiráʼ beeu rusaanané laabe ca revista stinu ne ruluíʼ laabe ca tema ni cusiene modo bizáʼ Dios guiráʼ cosa ne ra zeeda ca diidxaʼ riguixhená stiʼ Biblia. Ne bisaanané precursor que laabe libru La Biblia... ¿la Palabra de Dios, o palabra del hombre? ora biʼyaʼ maʼ zanda gudii ni laabe. Biindaʼ si John libru que, guníʼ zándaca guni cré nuu ti Dios pa gucaa ique guiziidiʼ jma de laabe. Despué biluíʼ precursor que laabe párrafo 8 ni zeeda lu yaza 20 stiʼ libru Xipeʼ ndiʼ cusiidiʼ Biblia, de raqué maʼ biindacabe párrafo 13 dede 16 stiʼ yaza 23 ne 24. Nabé guyuulaʼdxiʼ John ni cusiidiʼ ca textu que, ngue runi guníʼ: «Zándaca naquiiñeʼ guuyaʼ xii nga rusiidiʼ Biblia».

◼ Méjicu. Ti biaje gudxi ti hombre ti Testigu qué runi cré diʼ pa Biblia ca nga Stiidxaʼ Dios. Ora gudxi Testigu que laabe pa zanda guluíʼ laabe caadxi textu ni rusihuinni dxandíʼ zeeda Biblia de Dios la? guniʼbe zanda. Despué de guniʼné Testigu que laabe chupa chonna biaje, bihuinni yendá ni cayuundabe lu Biblia ndaaniʼ ladxidoʼbe. Dede qué nidxélabe xi niniʼbe ora bíʼyabe ximodo na Biblia naquiiñeʼ guibani binni. Laapebe guniʼbe: «Dxi nacubi bizuludu que la? guníʼ iqueʼ zeeda gaca ca conseju que casi cani reeda lu intiica libru, ngue runi qué nizaaladxeʼ cani. Peru yanna, cada biaje guidúʼndadu Biblia, jmaruʼ si ora guidúʼndadu ra ruzeeteni ximodo na Dios guibani binni, runeʼ sentir maʼ ruchiiñaʼ xquendabiaaneʼ naa».

◼ Estados Unidos. Dxi cucheeche ti guendaxheelaʼ diidxaʼ cueʼ ti exhibidor ni bizuhuaacabe ti lugar ra jma rizá binni, bidxiña ti gunaa de Taiwán ra nuucabe ne gudxi laacabe runi cré Dios peru riníʼ ique gucuá Biblia para ca binni si de occidente. Neca zaqué riníʼ íquebe zándaca gacané Biblia laabe para gánnabe xi pur nabánibe, purtiʼ nuube triste ne runi sentirbe cayaadxaʼ xiixa laabe, neca nápabe guiráʼ ni caquiiñebe. Bizulú biindané guendaxheelaʼ que laabe libru Xipeʼ ndiʼ cusiidiʼ Biblia ne lugar de ñuundacabe guiropa capítulo stiʼ libru riʼ la? biindanécabe laabe tema ni láʼ «Una guía para toda la humanidad», ni zeeda lu folletu Cómo hallar paz y felicidad duraderas. Biindasicabe xhoopa párrafo stiʼ tema que, nabé bidxagayaa gunaa que ora biʼyaʼ gadxepeʼ ni rusiidiʼ Biblia né ni rusiidiʼ xcaadxi libru ni riníʼ de religión. Ne ora bíʼndacabe ca diidxaʼ riguixhená ni maʼ guca ni zeeda lu Biblia la? guniʼbe: «¡Gástiruʼ sti libru casi Biblia, purtiʼ biaʼsi guiráʼ ni zeeda luni!».

◼ Japón. Ti biaje guniʼné ti Testigu ti señor ni qué runi cré Dios. Peru qué nusaana de niganna Testigu que laabe ne biluíʼ laabe tema ni láʼ «¿Casualidad o diseño?», ni reeda lu revista ¡Despertad! Chaahuiʼ chaahuiʼ bizulú bichaa señor que ne maʼ guníʼ ique zándaca nuu ti Dios. Yanna maʼ runi crebe dxandíʼ nuu Dios, ne maʼ cayuundané Testigu que laabe folletu Ca diidxaʼ sicarú ni zeeda de Dios.

◼ Canadá. Ti gunaa ni deruʼ biree de ra lidxi bisaanané ti xpinni Cristu laabe ti revista órapeʼ chichíbabe lu xcárrube. Ora biguetaʼ Testigu que ra nuube sti biaje, gudxi gunaa que laa qué racalaʼdxiʼ ganna gastiʼ de Dios purtiʼ qué runi cré pa nuube. Qué ñabayú Testigu que ne gudixhe ique chiné folletu Cómo lograr una vida llena de satisfacción ra nuube. Ora bíʼyabe gunaa que sti biaje, gúdxibe laa maʼ nánnabe qué runi cré Dios, peru bietenaláʼdxibe stubi cusiniisi ca xiiñiʼ ne rápabe gana gacanebe laa. Primeru biluiʼbe gunaa que párrafo 6 ni zeeda lu yaza 4, ra caníʼ pabiáʼ nagana guidxela binni conseju galán ca dxi riʼ. De raqué gunabaʼ Testigu que laabe gúʼndabe ca conseju ni zeeda lu guiropa ndaa, ni caníʼ ximodo zanda gusiniisi binni xiiñiʼ. Nabé guyuulaʼdxiʼ gunaa que folletu riʼ ne biaanané ni.