Ndaa Ra Rinabadiidxaʼ

◼ Xi naquiiñeʼ guiziidiʼ cani nahuiiniʼ ti guiniisicaʼ lu stiidxaʼ Dios

Ca xpinni Cristu ni napa xiiñiʼ rúnicaʼ stipa pur gusiniisicaʼ xiiñicaʼ modo rinabaʼ Jiobá laacaʼ gúnicaʼ ni (Efes. 6:4). Ti modo rúnicabe ni nga, ruundanécabe laacaʼ guiráʼ siadóʼ textu ni raca caber dxi ca, purtiʼ ruuyacabe stale ni ribeendúcabe ora gúnicabe ni. Nuu familia ruuyacaʼ ti videu ne riniʼcaʼ xiixa ni biziidicaʼ luni dxi nexheʼ guni adorarcaʼ Dios né binnilídxicaʼ o ruyúbicaʼ sti hora para ganda gúnicaʼ ni, ne laaca ruiʼcaʼ diidxaʼ de xiixa tema ni ribicaʼ lu libru Los jóvenes preguntan, rúnicaʼ modo bizaaca xiixa relatu ni zeeda lu Biblia o runi ensayarcaʼ ni zanda gúnicaʼ ora guidxaagalucaʼ xiixa guendanagana. Peru para ganda guiziidiʼ xiiñiʼ binni de Dios dede guiniisicaʼ lu stiidxabe la? laaca naquiiñeʼ guiziidicaʼ ca cosa ni jma nagana zeeda lu Stiidxabe (Heb. 6:1).

Cueenu tiempu ti ratuhuiiniʼ para guiníʼ íquenu cani rusíʼdinu binni ora maʼ zigucheechenu diidxaʼ. De primé biaje chigánnanu binni o xcaadxi biaje gúninu ni la? ruyúbinu modo guzulú gúʼndanenu laacaʼ libru Xipeʼ ndiʼ cusiidiʼ Biblia. Guiluxe si gúʼndanenu laacabe libru ca ruzulunenu laacabe libru Cadi guixélenu de Dios ni nadxii laanu. Xiñee rúninu zacá yaʼ. Purtiʼ libru Xipeʼ racaneni binni guiziidiʼ ca cosa ni cadi nagana zeeda lu Biblia, peru libru Dios ni nadxii laanu racaneni laacabe gúnicabe guiráʼ ca conseju ni rudii Biblia laacabe lu xquendanabánicabe. Ora guidúʼndanenu cani nacubi guiropaʼ libru ca zacanécani laacaʼ guicaa xcucaʼ lu stiidxaʼ Cristu ne guzuhuaa dxiichicaʼ lu ni runi crecaʼ (Col. 2:6, 7). Ñee cadi laaca galán gusíʼdinu ca xiiñinu zacá la? Laaca naquiiñeʼ guiziidicabe xiñee guti Jesús pur laanu, gánnacabe de Reinu stiʼ Dios ne ximodo nuu ca gueʼtuʼ. Sti cosa ni naquiiñeʼ gánnacabe nga xiñee rudii Dios lugar gacaná binni ne ximodo nánnanu maʼ nabáninu lu ca últimu dxi. Naquiiñeʼ chúʼcabe seguru ca testigu stiʼ Jiobá nga rusíʼdinu ni dxandíʼ, guiénecabe ca conseju rudii Biblia ne gánnacabe «uná nga jneza ne uná nga ni cadi jneza» (Heb. 5:14). Peru naquiiñeʼ ganna cani napa xiiñiʼ xii nga ni zanda gusiidicaʼ laacabe biaʼ iza nápacabe ne biaʼ ganda guiénecabe. Neca zacá stale xcuidihuiiniʼ randa riénecaʼ ca cosa ni jma nagana zeeda lu Biblia neca nahuiinicaʼ (Luc. 2:42, 46, 47).