Cadi gunítiluʼ tiempu para güíneluʼ binni de Reinu
1. Xi rusiidiʼ ejemplu stiʼ David laanu.
1 Qué nudii rey David lugar nucueeza ca guendanagana stiʼ laa de ñuni ni na Dios. Quíxhenu ti ejemplu, laabe gucaláʼdxibe nucuibe ti yoo para ñaca adorar Jiobá, peru qué ninácabe ñúnibe ni. Ngue runi, bichaabe ni naguixhe íquebe ne guluube listu guiráʼ ni chiguiquiiñeʼ Salomón, xiiñibe, para gucuí yuʼduʼ que (1 Rey. 8:17-19; 1 Crón. 29:3-9). Lugar de niníʼ íquebe maʼ gastiʼ qué zanda gúnibe la? biyúbibe xi zanda gúnibe. Ximodo zanda chinándanu ejemplu stibe ora guyúbinu modo güínenu binni de Reinu yaʼ.
2. Xi zacané laanu guʼyaʼ chaahuinu pa zanda gúninu jma lu xhiiñaʼ Dios.
2 Biʼniʼ biaʼ gándatiʼ. Stale xpinni Cristu maʼ bichaacaʼ modo nabánicaʼ ti ganda gácacaʼ precursor auxiliar o regular (Mat. 6:22). Ñee zanda guʼnuʼ casi rúnicabe la? Biʼniʼ orar Jiobá ne biiyaʼ chaahuiʼ xi zanda guʼnuʼ; zándaca gudiiluʼ cuenta «zuxale ndaga [ti] puerta» para guʼnuʼ jma lu xhiiñaʼ Dios. Pa zacá ni la? cadi gunítiluʼ tiempu para guʼnuʼ ni (1 Cor. 16:8, 9).
3. Pa qué ganda gácanu precursor, xiruʼ zanda gúninu para gucheechenu diidxaʼ.
3 Peru, pa qué ganda gácanu precursor yaʼ. Galán guyúbirunu modo gucheechenu diidxaʼ. Casi pa ridxaaganu binni ni cadi Testigu ra rúninu dxiiñaʼ la? cadi naquiiñeʼ gunítinu tiempu para güínenu laacaʼ de Jiobá. O pa huaraluʼ la? zanda güíneluʼ doctor cayuni tender lii de stiidxaʼ Dios ne zaqueca cani runiné dxiiñaʼ. Casi cani maʼ nagola o cani napa xiixa guendahuará malu zanda guni informarcaʼ quince minutu. Ora guchaluʼ informe stiuʼ cada beeu, cadi guiaandaʼ lii gucaaluʼ panda hora bicheecheluʼ diidxaʼ ra tiica nuuluʼ, laaca galán gucaaluʼ panda libru ne revista bisaananeluʼ binni dede né ca tratadu o invitación rudiʼnu ora rietenaláʼdxinu guendaguti stiʼ Cristu ne ora rápanu asamblea regional. Zadxagayaaluʼ ora gúʼyaluʼ pabiáʼ stale guiʼchiʼ bisaananeluʼ binni neca huaxiéʼ hora biʼnuʼ.
4. Xi maʼ naguixhe íquenu gúninu.
4 Neca gadxé gadxé modo nabáninu, cadi gunítinu tiempu para güínenu binni de ca diidxaʼ nacubi ne galán. Pa gúninu zacá, zadxá tipa ladxidoʼno purtiʼ nánnanu cayúninu biaʼ gándatiʼ pur Reinu (Mar. 14:8; Luc. 21:2-4).