Ñee zanda quixhe íquenu gúninu jma lu xhiiñaʼ Jiobá la?
1. Xii nga zeeda gaca casi ti puertaʼ ni bixeleʼ nezalunu para gúninu jma dxiiñaʼ.
1 Dxi biiyaʼ apóstol Pablu naquiiñeʼ guni jma lu xhiiñaʼ Jiobá la? guniʼbe casi ora ñácani ti puertaʼ ni zuxaleʼ ndaga nezalube, ne qué nunítidibe tiempu, sínuque bíʼnibe xhiiñaʼ Reinu neca guyuu tu bicaalú laabe (1 Cor. 16:9). Ca dxi stinu riʼ, biaʼ 642,000 ni rucheeche diidxaʼ stiʼ Reinu stiʼ Dios maʼ gudixhe íquecaʼ gácacaʼ precursor regular ne zacá casi ora nidíʼdicabe ra ti puertaʼ ni zuxaleʼ ndaga.
2. Xiñee galán guiníʼ íquenu gatigá ximodo nuunu.
2 Ruchaa modo nabáninu. Zándaca raca nagana para laanu gúninu jma lu xhiiñaʼ Dios pur modo nabáninu, peru nuu tiru ruchaa modo nabáninu. Nga runi, galán guiníʼ íquenu gatigá ximodo nuunu ne guidúʼyanu pa zanda gúninu jma lu xhiiñaʼ Jiobá ne cadi cuézanu chuʼnu galán para gúninu ni nabe (Ecl. 11:4). Ñee nápaluʼ biaʼ dieciocho iza ne mayaca gunduuxeluʼ scuela la? Ñee mayaca cheʼ ca xiiñihuiiniluʼ scuela la? Ñee mayaca gaca jubilarluʼ la? Pa zacá ni, zapuʼ jma tiempu ne dede zándaca gácaluʼ precursor regular. Ti gunaa Testigu de 89 iza ni nabé huayaca huará gudixhe ique gaca precursora regular. Xiñee yaʼ. Cumu maʼ zinebe jma de ti iza qué huayebe ra hospital la? guníʼ íquebe maʼ cadi huarápebe ne zanda gácabe precursora.
3. Xi huayuni caadxi xpinni Cristu para ganda gácacaʼ precursor.
3 Ti biaje, gudixhe ique Pablu niganna ca xpinni Cristu ni nabeza guidxi Corinto, peru maʼ qué ñebe purtiʼ caquiiñeʼ gucheechebe ca diidxaʼ nacubi ne galán stiʼ Dios. Ca dxi stinu riʼ, stale xpinni Cristu huachaacaʼ modo nabánicaʼ para ganda gácacaʼ precursor. Nuu de laacabe huaguixhe chaahuicabe modo nabánicabe para cadi sícabe xiixa ni cadi caquiiñepécabe, laaca rúnicabe dxiiñaʼ galaa dxi ne rugaanda biaʼ riáxacabe ca para guibaninécabe. Ne yanna nabánicabe nayecheʼ purtiʼ cayúnicabe xhiiñaʼ Dios (1 Tim. 6:6-8). Nuu guendaxheelaʼ huayuuyacaʼ pa zanda guibaninecaʼ biaʼ runi ganar si hombre ca ti ganda gaca gunaa ca precursora.
4. Xi zanda gúninu pa riníʼ íquenu qué zanda gusaʼnu hora runi ti precursor regular.
4 Cadi guiníʼ íquenu qué zanda gácanu precursor purtiʼ qué zusaʼnu hora ni nexheʼ gudiʼnu ti beeu. Pa gúninu jma de chupa hora guiráʼ dxi zanda gusaʼnu hora stinu. Pa riníʼ íquenu qué zanda gusaʼnu hora runi ti precursor regular la? galán gácanu precursor auxiliar ti beeu o chupa beeu ti cadi gácapeʼ nagana para laanu gusaʼnu setenta hora. Pa gúninu zacá la? ziuʼnu nayecheʼ casi ca precursor (Sal. 34:8). Galán guinínenu xcaadxi precursor, purtiʼ zándaca bidxagalúcabe guendanagana ni cadxaagalunu (Pro. 15:22). Guinábanu Jiobá cuʼ ndaayaʼ stipa ni cayúninu pur gúninu jma lu xhiiñabe (1 Juan 5:14).
5. Xi guiráʼ ndaayaʼ zacaanu pa gácanu precursor regular.
5 Zabeendunu ni galán pa gácanu precursor regular. Stale ndaayaʼ nga ricaa ca precursor regular. Tobi de laacani nga jma riuucaʼ nayecheʼ purtiʼ jma racanecaʼ binni (Hech. 20:35). Riziidicaʼ iquiiñecaʼ Stiidxaʼ Dios jma jneza (2 Tim. 2:15). Ruuyacabe ximodo racané Jiobá laacabe lu xquendanabánicabe (Hech. 11:21; Fili. 4:11-13). Gaca binni precursor laaca racaneni laa gapa ca guenda ni rudii espíritu stiʼ Dios casi ganna guni huantar ne chuʼ jma gaxha de Jiobá (Sant. 4:8). Ñee zanda quixhe íquenu gácanu precursor regular la?