¡Yanna nga tiempu ucheechenu diidxaʼ!
1. Xiñee yanna nga tiempu ucheechenu diidxaʼ.
1 «Laidxibi Dios ne lausisaca laa». Ndiʼ nga ca diidxaʼ ni cayacané ca ángel stiʼ Jiobá ireeche «irá ladu, de irá guidxi, ni riníʼ adxé adxé idioma». Xiñee yaʼ. «Purti ma bidxiña dxi cuidxi [Dios] cuenta binni». Cumu maʼ nabézanu ca dxi naguixhe Dios cuidxi cuenta binni ne zalúxeni ora unitilube iráʼ cosa malu nuu yanna riʼ la? riquiiñepeʼ iráʼ binni nga guni «adorar ni bizáʼ ibá ne guidxilayú ne nisadóʼ ne ra rindani nisa». Ireeche ca diidxaʼ nacubi ne galán ca nga ti dxiiñaʼ ni jma risaca ne riquiiñeʼ aca nagueendaca. Dxandíʼ, ¡yanna nga tiempu ucheechenu diidxaʼ! (Apo. 14:6, 7.)
2. Ximodo rusihuinni ca xpinni Jiobá nánnacabe riquiiñeʼ ácacabe nagueenda tiempu riʼ.
2 Lu ca últimu chii iza udiʼdiʼ ca, ca xpinni Jiobá bíʼnicabe biaʼ doce mil millón de hora lu endarucheeche stiidxaʼ Reinu ne ra yeguundanécabe binni dede ralidxi. Stale maʼ huachaa modo nabani para guni jma lu xhiiñaʼ Jiobá (Mat. 9:37, 38). Casi udubiza guyuu jma de xhono gayuaa cincuenta mil precursor cada beeu. Ca precursor regular ca rúnicabe setenta hora ti beeu. Ca precursor auxiliar ca rúnicabe cincuenta hora.
3. Xii ndiʼ zanda guni cani rucheeche diidxaʼ para ácacaʼ precursor.
3 Ñee racalaʼdxuʼ ácaluʼ precursor la? Cumu nánnacaʼ maʼ huaxiéʼ tiempu riaana la? ca precursor ca rúnicaʼ stipa pur usixieʼcaʼ ni rúnicaʼ lu xquendanabánicaʼ (1 Cor. 7:29, 31). Para cadi guni xhaatacabe dxiiñaʼ para laacabe, ruyúbicabe ximodo cadi sícabe intiisi si. Zacá runi stale ne rindézacaʼ ndaaniʼ sti yoo jma nahuiiniʼ, ne stuudxi rutoocaʼ xiixa ni qué zaquiiñepeʼcaʼ (Mat. 6:19-21). Stale tiru rucueezacabe laacabe de gúnicabe ni maʼ gudixhe íquecabe ne xquendanabánicabe. Iráʼ ndiʼ rúnicabe para gúnicabe jma tiempu lu xhiiñaʼ Dios ne gúnicabe ni jma jneza (Efe. 5:15, 16). Stale ni rucheeche diidxaʼ maʼ bidxélacaʼ modo ácacaʼ precursor purtiʼ nabé uníʼ íquecaʼ ni, racanecaʼ ratiica caquiiñecabe laacaʼ ne runi orarcaʼ Jiobá para acané laacabe.
4. Xi zanda gúniluʼ ni zacané lii ugaandaluʼ ácaluʼ precursor.
4 Lii yaʼ, ñee zanda ácaluʼ precursor la? Xiñee qué iníʼneluʼ cani maʼ xadxí naca precursor para gannuʼ ximodo gúniluʼ ni yaʼ. Yegucheechené laacabe diidxaʼ ne guyuu nayecheʼ casi laacabe. Biindaʼ ca tema ni caníʼ de precursor ni zeeda ndaaniʼ ca revista ca o ca libru nápanu. Udixhe ique xi zanda gúniluʼ ne zanda ugaandaluʼ ti ácaluʼ precursor. Pa yanna riʼ nuu xiixa ni cucá lii para ácaluʼ precursor, uníʼneni Jiobá ne unabaʼ laabe acanebe lii para ireeluʼ lu endanagana stiluʼ (Pro. 16:3).
5. Ximodo racané ora ácanu precursor ca gánnanu ucheechenu diidxaʼ jma jneza.
5 Ndaayaʼ ne endanayecheʼ. Ora raca binni precursor la? jma riziidiʼ iquiiñeʼ Biblia, ne nga rusiecheʼ laa. Ti precursora nahuiiniʼ uníʼ sicaríʼ: «Maca ti ndaayaʼ nga iquiiñenu Stiidxaʼ Dios jneza. Ora nácaluʼ precursor nabé riquiiñeluʼ Biblia. Ora maʼ zuhuaa ra puertaʼ stiʼ ca binni ca reeda ndaaniʼ iqueʼ textu nipeʼ caquiiñeʼ para cada binni chiguinieniáʼ.» (2 Tim. 2:15.)
6. Xi iráʼ riziidiʼ binni ora raca precursor.
6 Ácanu precursor laaca rusiidiʼ ni laanu para gánnanu ibáninu jneza. Cani nahuiiniʼ ca zanda iziidicabe quixhe chaahuicabe stiémpucabe ne endabiaaniʼ, gánnacabe modo cadi gunitipéʼcabe xpuéltucabe ne modo chuʼnécabe binni galán. Stale de cani raca precursor racané ni laacaʼ jma para gúʼyacaʼ ca cosa ca casi modo ruuyaʼ Jiobá cani (Efe. 4:13). Stale de laacabe jma ruuyacabe modo ruzaabi ndaayaʼ Jiobá laacabe (Hech. 11:21; Fili. 4:11-13).
7. Ximodo racané ácanu precursor ca laanu idxíñanu jma gaxha de Jiobá.
7 Peru ni dxandíʼ la? ndaayaʼ ni jma galán rápanu ora rácanu precursor nga, ridxíñanu jma gaxha de Jiobá ne nga zanda acané laanu para udxiilunu ca endanagana rápanu. Ti bizánanu ni gupa stale endanagana uníʼ: «Ra guyuaa gaxha de Jiobá laga nacaʼ precursora ucané ni naa para biʼneʼ huantar iráʼ endanagana gupaʼ». Ne uníʼrube: «Nayechepeʼ nga nuaa purtiʼ bidiéʼ tiempu stinneʼ para guneʼ iráʼ ni na Jiobá, purtiʼ bidiibe lugar naa ucaniáʼ sti binni casi qué ñuu dxi niníʼ iqueʼ ñúneni» (Hech. 20:35). Laanu laaca ribézanu icaanu stale ndaayaʼ ra gúninu stipa pur ganda gúninu dxiiñaʼ ni nabé risaca riʼ de ucheechenu diidxaʼ (Pro. 10:22).