Rietenaláʼdxiluʼ dxi gúcaluʼ precursor regular la?
1. Xi dxiiñaʼ sicarú huayuni stale xpinni Cristu. Xi bizaaca né chupa chonna de laacabe.
1 Maʼ stale iza, qué huasaana mil de ca xpinni Cristu de gácacaʼ precursor regular para rusiidicaʼ binni ne gucheechecaʼ diidxaʼ nacubi ne galán de yoo pur yoo (Hech. 5:42). Peru chupa chonna de laacaʼ bisaanacaʼ dxiiñaʼ ni nabé bisiecheʼ laacaʼ riʼ pur xiixa razón ni gúpacaʼ. Pa zacaca nga bizaacaluʼ, ñee maʼ biiyaluʼ pa maʼ zanda gácaluʼ precursor sti biaje la?
2. Xiñee galán nga guiníʼ ique tuuxa ni guca precursor dxiqué pa maʼ zanda gaca precursor stiʼ biaje.
2 Ruchaa modo nabani binni. Zándaca maʼ qué gápacabe guendanagana ni gúpacabe dxi bisaanacabe de gácacabe precursor. Zándaca razón ni gúpacabe para bisaanacabe ni nga purtiʼ maʼ qué ñanda nusaacabe noventa hora, yanna, ra maʼ setenta si hora runi ca precursor ca, ñee zanda gácaluʼ precursor stiʼ biaje la? O zándaca maʼ qué gápaluʼ stale gastu casi dxiqué o maʼ cadi stálepeʼ dxiiñaʼ nápaluʼ né ca binnilídxiluʼ. Ti gunaa xpinni Cristu ni bisaana de gaca precursora purtiʼ guca huará, gunda gúcabe precursora sti biaje dxi maʼ nápabe 89 iza. Cumu maʼ raca jma de ti iza de maʼ qué riebe ra hospital la? guníʼ íquebe maʼ zanda gácabe precursora sti biaje.
3. Ximodo zanda gacané ca binnilídxitu para gaca tobi de laatu precursor.
3 Zándaca qué huayuudxí gácaluʼ precursor, peru tuuxa de ca binnilídxiluʼ gúcacaʼ ni dxiqué ne gupa xidé bisaanacaʼ ni. Zándaca bisaanabe ni purtiʼ biiyabe tobi de ca binnilídxibe ni maʼ huaniisi, casi bixhózebe o jñaabe (1 Tim. 5:4, 8). Ñee zanda gacaneluʼ laabe o tobi de ca binnilídxiluʼ la? Xiñee qué güitu diidxaʼ ne gúʼyatu pa zanda gúnitu ni yaʼ (Pro. 15:22). Ora ca binnilídxitu gacanecaʼ para gaca tobi de laatu precursor la? zanda guiniʼtu né stale razón laaca cayacanetu cayaca dxiiñaʼ ca.
4. Xi zanda gúniluʼ pa qué ganda guibiguetaʼ gácaluʼ precursor.
4 Cadi guireeluʼ gana pa qué ganda gácaluʼ precursor stiʼ biaje. Ra gusihuínniluʼ riuuláʼdxiluʼ gúniluʼ xhiiñaʼ Jiobá zusiécheluʼ ladxidoʼbe (2 Cor. 8:12). Laga caʼruʼ guibiguetaʼ gácaluʼ precursor la? cadi gusaana de iquiiñeluʼ cani biziidiluʼ dxi gúcaluʼ precursor ora maʼ zigucheecheluʼ diidxaʼ. Cadi gusaana de guzeeteluʼ ni lu ca oración stiluʼ, ne naquiiñeʼ chuʼluʼ listu ti ganda gúʼyaluʼ pora maʼ zanda gácaluʼ precursor sti biaje (1 Juan 5:14). Zándaca despué, casi ñaca nuxhaleʼ ndaga Jiobá ti puertaʼ para ganda gácaluʼ precursor regular sti biaje ne zacá gápaluʼ ca guendanayecheʼ ni gúpaluʼ dxi gúcaluʼ precursor (1 Cor. 16:9).