«¡Guizáʼ galán pa gácaluʼ precursor!»
1. Xi guníʼ ti gunaa de modo runi sentir purtiʼ precursora laa.
1 «Qué ñanda diʼ nidxelaʼ sti dxiiñaʼ ni jma nusiecheʼ naa, ra nicaa stale ndaayaʼ stiʼ Jiobá.» Zacá guníʼ Kathe B. Palm, ti precursora ni bicheeche diidxaʼ stale iza guidubi naca Chile, ti guidxi nuu Sudamérica. Zándaca huayuu tu maʼ gudxi lii: «¡Guizáʼ galán pa gácaluʼ precursor!», ne gúdxibe lii zacá purtiʼ nánnabe stale ndaayaʼ ricaa ca precursor.
2. Bisiene xiñee ridxátipa ladxidóʼ binni de guendanayecheʼ ora runi xhiiñaʼ Dios.
2 Ti dxiiñaʼ ni ruchátipa ladxidóʼ binni. Jesús nga ejemplu stinu, ne ora bíʼnibe ni na Bixhózebe gúcani casi guendaró stibe, purtiʼ bidiini stale stipa laabe (Juan 4:34). Ngue runi nánnabe xidé ngue caniʼbe ora gúdxibe ca discípulo stibe ridxá ladxidóʼ binni de guendanayecheʼ ora runi xhiiñaʼ Jiobá. Zacá nga laani, ora riquiiñeʼ binni guendanabani stiʼ para guni ni riuulaʼdxiʼ Dios la? riuu nayecheʼ. Ne ora jma iquiiñeʼ binni tiempu stiʼ, stipa stiʼ ne cani napa para gacané sti binni la? jmaruʼ si riuu nayecheʼ (Hech. 20:31, 35).
3. Xi guiráʼ ndaayaʼ zacaanu pa cueenu jma tiempu para gucheechenu diidxaʼ.
3 Ora nabé rucheeche binni diidxaʼ la? jma ridxela modo guzulú guʼndané binni de Biblia, ne nabé rusiecheʼ nga laa. Zándaca ora guzululuʼ zuuyaluʼ ruluíʼ nga huaxiéʼ riuulaʼdxiʼ binni gucaadiaga lii. Peru cadi guireeluʼ gana. Purtiʼ ra gucheecheluʼ diidxaʼ jma ne guiziidiluʼ ximodo gúniluʼ ni la? zadxélaluʼ jma binni ni gucaadiaga lii. Ora maʼ bisaaluʼ biaʼ ti iza de precursor la? zanda cheluʼ Scuela stiʼ ca Precursor Regular, racá zaziidiluʼ stale cosa ni zanda gacané lii ora gucheecheluʼ diidxaʼ (2 Tim. 2:15). Ora maʼ cucheecheluʼ diidxaʼ la? zeeda gácani casi ora nudxiibaluʼ biidxiʼ lu ti layú. Nga runi, pa qué gusaana de gucheecheluʼ diidxaʼ la? zuuyaluʼ guiráʼ ni cueenduluʼ de dxiiñaʼ ca ora tiidiʼ tiempu (Ecl. 11:6).
4. Xi naquiiñeʼ guiníʼ ique cani mayaca guiluxe scuela.
4 Hombrehuiiniʼ ne dxaapahuiiniʼ, laquixhe ique xi gúnitu. Pa mayaca guireeluʼ de secundaria, ñee maʼ gudixhe íqueluʼ xi guʼnuʼ la? Cumu canazaluʼ scuela yanna la? zándaca huaxiéʼ tiempu nápaluʼ pur guiráʼ ca tariá rúniluʼ. Yanna, paraa iquiiñeluʼ guiráʼ tiempu ca ora maʼ guilúxeluʼ scuela yaʼ. Lugar de guicá íqueluʼ cheluʼ scuela roʼ, xiñee qué guni orarluʼ Dios ne gúʼyaluʼ pa zanda gácaluʼ precursor regular. Zaziidiluʼ stale cosa ni zanda gacané lii biaʼ dxi guibániluʼ, casi guiníʼneluʼ guiráʼ clase binni, zannuʼ xi guʼnuʼ ora gapuʼ guendanagana, zaziidiluʼ gúniluʼ ca cosa ca jneza ne zánnaluʼ gusiidiluʼ jneza.
5. Ximodo zanda gacané cani napa xiiñiʼ ne ca binni ridagulisaa xcaadxi xpinni Cristu para gácacaʼ precursor.
5 Laatu cani napa xiiñiʼ, ñee cayacanetu ca xiiñitu quixhe íquecaʼ gácacaʼ precursor la? Cani gábitu laacabe ne ejemplu galán stitu zacanécani para quixhe íquecabe gúnicabe xhiiñaʼ Reinu primé lu guendanabani stícabe (Mat. 6:33, NM). Sicaríʼ guníʼ Ray, ti xpinni Cristu ni guca precursor biluxe si scuela: «Jñaaʼ nabé guníʼ riuu binni nayecheʼ ora raca precursor». Peru ca binni ridagulisaa laaca zanda uguucaʼ gana xcaadxi xpinni Cristu ti gácacaʼ precursor, ne rúnicabe ni pur ni gábicabe laacaʼ ne pur modo gacanécabe laacaʼ. José de España cusiene: «Neza binni ridagulisaa ra nuaaʼ ruuyacaʼ galán quixhe ique cani nahuiiniʼ ca gácacaʼ precursor, ne laani nga ni jma galán gúnicabe. Pur ni riníʼcabe, pur modo rusisácacabe dxiiñaʼ stiʼ ca precursor, ne modo racanécabe laacaʼ, gucanécani naa para gudixheʼ iqueʼ gacaʼ precursor».
6. Xi zanda guʼnuʼ pa ruluíʼ huaxiéʼ riuuláʼdxiluʼ gácaluʼ precursor yanna.
6 Xi guʼnuʼ pa ruluíʼ qué zanda gácaluʼ precursor. Zándaca chuʼ tu guiníʼ: «Peru huaxiéʼ riuuladxeʼ gacaʼ precursor». Pa laaca ngaca nga primé ni ridiʼdiʼ ndaaniʼ íqueluʼ la? gudxi Jiobá xi runi sentirluʼ ne guníʼ: «Zuluaʼsiaʼ qué zanda diʼ gacaʼ precursor, purtiʼ ruluíʼ cadi para naadiáʼ ni, peru rapaʼ gana guneʼ ni riuuláʼdxiluʼ» (Sal. 62:8; Pro. 23:26). De racá biiyaʼ xi conseju cudii Stiidxaʼ Dios ne xi conseju cudii xquídxibe. Stale precursor regular primeru biiyacaʼ pa zanda gúnicaʼ ni ora gúcacaʼ precursor auxiliar, ne cumu nabé nayecheʼ biʼniʼ sentírcabe la? biyúbicabe ximodo gácacabe precursor regular (Sal. 34:8).
7. Xi zanda guʼnuʼ pa ruluíʼ qué zanda gusaaluʼ setenta hora guiráʼ beeu.
7 Sti cosa ni ribee gana binni de gaca precursor nga ora riníʼ ique qué zanda gusaa setenta hora guiráʼ beeu. Xiñee qué guiníʼneluʼ ca xpinni Cristu ni nuu cásica modo nuuluʼ, peru neca zacá nácacaʼ precursor yaʼ (Pro. 15:22). Gudixhe caadxi modo rábiluʼ zanda gusaaluʼ ca hora ca. Zándaca zudiiluʼ cuenta cadi nagana diʼ para gusaaluʼ ca hora ca pa cueeluʼ tiempu lu xcaadxi cosa ni huaxiéʼ risaca ne iquiiñeluʼ ni para gucheecheluʼ diidxaʼ (Efe. 5:15, 16).
8. Xiñee galán guidúʼyanu modo nuunu gatigá.
8 Guníʼ ique xiruʼ zanda guʼnuʼ. Cumu nabé nga ruchaa modo nabáninu la? nga runi galán gúninu pa gatigá guidúʼyanu ximodo nuunu. Ñee mayaca gaca jubilarluʼ la? Randy bisaana dxiiñaʼ stiʼ ante gaca jubilar, ne guníʼ: «Ni bineʼ riʼ gucaneni naa para gunda gucaʼ precursor ne xheelaʼ, ne guyuudu sti lugar ra jma caquiiñeʼ guireeche diidxaʼ. Guizáʼ maʼ stale ndaayaʼ gucuaaʼ pur ni gudixheʼ iqueʼ guneʼ, peru ndaayaʼ jma naroʼbaʼ napaʼ nga nayá nuu xquendabiaaneʼ».
9. Xi naquiiñeʼ guʼyaʼ ca guendaxheelaʼ ca.
9 Stale guendaxheelaʼ, despué de gúʼyacaʼ ximodo nuucaʼ, rudiicaʼ cuenta cadi caquiiñepeʼ guni guirópacaʼ dxiiñaʼ guidubi dxi. Para ganda guni ti familia zacá la? naquiiñeʼ guiziidiʼ guibani sin stale cosa, peru stale nga ni zabeenducaʼ pa gúnicaʼ stipa ca. Guzéʼtenu de xheelaʼ John, laabe rúnibe dxiiñaʼ guidubi dxi, peru bisaanabe ni para ganda gucheechebe diidxaʼ jma. John guníʼ: «Nabé riecheʼ ora gannaʼ cayuni xheelaʼ xhiiñaʼ Jiobá guidubi dxi».
10. Xi rucaa ca xpinni Cristu guiníʼ íquecaʼ gácacaʼ precursor.
10 Rusihuínninu nadxiinu Dios ne nápanu fe. Gastiʼ sti dxiiñaʼ jma risaca gúninu que gucheechenu diidxaʼ, purtiʼ nga nga ni na Jiobá. Maʼ cadi candaa diʼ para guinitilú guidxilayú malu riʼ, peru zalá «guiráʼ tu iquiiñeʼ lá Jiobá» (Rom. 10:13, NM). Pa nadxiinu Jiobá de guidubi ladxidoʼno ne rudiʼnu xquíxepeʼ laabe pur ni maʼ bíʼnibe pur laanu la? ziuuláʼdxinu gucheechenu diidxaʼ, ne zacá zusihuínninu cayúninu ni biʼniʼ mandar Xiiñibe laanu (Mat. 28:19, 20; 1 Juan 5:3). Ne cumu nánnanu nabáninu lu ca últimu dxi la? zucaa nga laanu gúninu biaʼ gándatiʼ para gucheechenu diidxaʼ laga nuuruʼ tiempu, lugar de gúninu guiráʼ ni cayuni binni guidxilayú (1 Cor. 7:29-31).
11. Xi zanda guiníʼ ique tuuxa pa gábicabe laa zanda gaca precursor.
11 Qué rácadinu precursor regular purtiʼ si cayabi xquidxi Dios ni laanu; rúninu ni purtiʼ riuuláʼdxinu guni adorarnu Dios. Nga runi, pa chuʼ tu gabi lii: «¡Guizáʼ galán pa gácaluʼ precursor!» la? guníʼ ique jneza nga ni cayábibe lii. Biʼniʼ orar Jiobá ne biiyaʼ pa zanda gácaluʼ precursor cásica cayuni xcaadxi xpinni Cristu purtiʼ laani nga ti dxiiñaʼ ni ruchátipa ladxidóʼcabe.
[Ni caníʼ yaza 4]
Laatu cani napa xiiñiʼ, ñee cayacanetu ca xiiñitu quixhe íquecaʼ gácacaʼ precursor la?
[Ni caníʼ yaza 5]
Gastiʼ sti dxiiñaʼ jma risaca gúninu que gucheechenu diidxaʼ, purtiʼ nga nga ni na Jiobá.