Ñee zúniluʼ dxiiñaʼ né stale gana tiempu raca Conmemoración cásica Jiobá ne Jesús la?
1. Xi stipa naroʼbaʼ runi ca testigu stiʼ Jiobá tiempu raca Conmemoración.
1 Runi Jiobá ni riguixhe ique né stale gana. Nga runi, ora ruzeeteʼ Biblia caadxi de ca ndaayaʼ guedané Reinu stibe, Isaías 9:7 riníʼ zúnibe cani né stale gana. Jesús, xiiñibe, laaca biʼniʼ adorar laabe né stale gana (Juan 2:13-17; 4:34). Tiempu raca Conmemoración, millón de Testigu rúninu stipa naroʼbaʼ para gucheechenu diidxaʼ jma ne zacá rinándanu ejemplu stiʼ Jiobá ne Jesús, purtiʼ laacaʼ rúnicaʼ xhiiñacaʼ né stale gana. Ñee zúniluʼ zacá iza riʼ la?
2. Xi chiguzulú gúninu 7 stiʼ marzo ne xi zabeendunu pa gúninu ni né stale gana.
2 Zaguíʼzinu invitación para cheʼ binni Conmemoración. Sábadu 7 stiʼ marzo zuzulú zaguíʼzinu invitación para cheʼ binni Conmemoración iza riʼ. Dede ca yanna naquiiñeʼ quixhe chaahuinu xi gúninu para quíʼzinu invitación riʼ né stale gana. Guizáʼ zaca dxiiñaʼ ndaaniʼ ca congregación, purtiʼ zúnicaʼ stipa guiníʼnecaʼ guiráʼ binni nuu lu territorio sticaʼ. Gúninu stipa gudiʼnu ti invitación ca binni rúʼndanenu Biblia, cani rigánnanu gatigá, cani runinenu dxiiñaʼ, cani rinenu scuela ne ca binnilídxinu o guluinu ni laacaʼ lu sitiu jw.org.
3. Xi naquiiñeʼ gúninu ti ganda gucheechenu diidxaʼ jma lu beeu marzo ne abril.
3 Gácanu precursor auxiliar. Zusihuínninu cayúninu dxiiñaʼ né stale gana ora gucheechenu diidxaʼ jma. Stale de laanu zácanu precursor auxiliar lu beeu marzo ne abril, purtiʼ dede zanda gúninu 30 hora cada beeu. Pa chigápanu adoración en familia o pa chiguidúʼndanu stúbinu la? galán guinábanu Dios lu oración gacané laanu gánnanu ximodo gúninu ni (Prov. 15:22). Ora quíʼzinu invitación riʼ né stale gana zacanenu xcaadxi gúnicaʼ casi cayúninu. Pa quixhe chaahuinu tiempu stinu para gucheechenu diidxaʼ jma ne gúninu ni né stale gana la? zusihuínninu zinándanu ejemplu stiʼ Jesús (Mar. 6:31-34).
4. Xi zabeendunu pa chinándanu ejemplu stiʼ Jiobá ne Jesús.
4 Zabeendunu stale cosa galán pa chinándanu ejemplu stiʼ Jiobá ne Jesús tiempu raca Conmemoración. Primé la? jma stale binni ni nuu lu territorio stinu zucaadiaga stiidxaʼ Dios. Laaca ziuʼnu nayecheʼ purtiʼ cayúninu ni na Jiobá ne cayacanenu sti binni (Hech. 20:35). Ne ni jma risaca nga zusiéchenu Jiobá ne Xiiñiʼ.