Gacanenu ca ciegu guiziidicaʼ de Jiobá
1. Ximodo bisihuinni Jesús rizaalaʼdxiʼ ca ciegu.
1 Mayaca guiree Jesús ndaaniʼ guidxi Jericó. Málasi cucaa chupa ciegu ridxi laa ne nacaʼ: «Señor, [...] biá laadu». Neca nuu Jesús xizaa purtiʼ maʼ xhupa xhonna gubidxa si cayaadxaʼ para gatiʼ. Peru bizuhuaadxibe, gurídxibe laacaʼ ne bisiándabe laacaʼ (Mat. 20:29-34). Ximodo zanda guianu ca ciegu cásica biʼniʼ Jesús yaʼ.
2. Ora guidxaaganu tuuxa ciegu lu calle, ximodo zanda gusíʼdinu laa de Biblia.
2 Gacanenu laacabe. Pa guidxaaganu tuuxa ciegu lu calle, galán gábinu laa tu laanu ne pa zanda gacanenu laa. Zándaca cadi casi zebe zápabe confianza laanu, purtiʼ nuu binni ribaʼnaʼ stiʼ ca ciegu ne runiná laacabe. Peru pa gácanu nachaʼhuiʼ ne gusihuínninu dxandíʼ rizaaláʼdxinu laabe la? qué zadxíbibe laanu. Laaca cadi guiaandaʼ laanu nuu binni huaxiéʼ ruuyaʼ ne nuu tu qué lica ruuyaʼ, nga zacané laanu gánnanu ximodo gacanenu laa. Ora maʼ gucanenu laabe, zanda gábinu laabe rusíʼdinu binni de Biblia. Guidúʼndanenu laabe ti textu zeeda lu Biblia, casi Salmo 146:8 o Isaías 35:5, 6. Laaca zanda guluinu laabe ximodo guindétebe ca archivu de audio nuu lu sitiu ni nápanu lu Internet jw.org. Pa nánnabe gúʼndabe braille la? guinabadiidxanu laabe pa riuuláʼdxibe gápabe xiixa publicación biree lu Biblia ni nuu lu braille. Pa napa binni ca computadora ni napa ti programa para guʼndaʼ xiixa guiʼchiʼ lu pantalla la? zándaca laaca zacané ca tema nuu lu jw.org laabe ne ca publicación ni zanda guindétebe lu formatu RTF. Lu diidxastiá si nuu guiropaʼ formatu bizéʼtenu riʼ ne lu xcaadxi diidxaʼ ni jma riníʼcabe lu Guidxilayú. (Biiyaʼ cuadru «Ora gacaneluʼ ti ciegu...».)
3. Ximodo zanda guidxélanu ca ciegu ni nuu lu territorio stinu.
3 Guyúbinu ca ciegu. Huaxiéʼ ridxélanu binni ni qué ruuyaʼ ora maʼ ziuunu de yoo pur yoo, purtiʼ stale biaje qué rinacaʼ guxhélecaʼ puertaʼ lídxicaʼ ora qué runibiaʼcaʼ binni. Nga runi, naquiiñeʼ guyúbinu modo guidxélanu laacabe ne guinínenu laacabe de Biblia (Mat. 10:11). Ñee nuu tuuxa binni ni qué ruuyaʼ ra riuunu scuela o ra rúninu dxiiñaʼ la? Pa zacá ni, guinínenu laabe de Dios. Pa nuu scuela para ciegu lu territorio stinu la? guinabadiidxanu director stini pa zanda gudiʼnu laa xiixa publicación ni nuu lu diidxaʼ braille para gápacaʼ ndaaniʼ biblioteca sticaʼ. Ñee runibiaʼnu tuuxa binni ni napa binnilidxi ciegu la? Ñee nuu xiixa organización ni racané ca ciegu lu territorio stinu o xiixa residencia para binni huará ra nabeza ciegu la? Gusiénenu binnilidxi ciegu ca, recepcionista stiʼ residencia o director stiʼ scuela ca, racalaʼdxiʼ ca testigu stiʼ Jiobá gacanecaʼ ca ciegu ne nápanu publicación lu braille para laacabe ne grabación ni gucaadiágacabe. Iquiiñenu Biblia para guluinu laabe cudii stiidxaʼ Dios zusianda lú cani qué ruuyaʼ ne maʼ qué ziuuruʼ dxi chuʼ ciegu. Laaca zanda guluinu laabe videu ni láʼ «No sé qué haría sin ella», ni nuu lu jw.org. Lu videu riʼ zeeda experiencia stiʼ ti hermanu ciegu ni maʼ guleendú stale cosa purtiʼ napa Biblia lu diidxaʼ braille. Pa gusiénenu laacabe xi pur zigánnanu ca binni ni qué ruuyaʼ la? zándaca qué zaca nagana para laanu guidxélanu ca ciegu.
4. Xi rusiidiʼ experiencia stiʼ ti hermana láʼ Janet laanu.
4 Ti hermana ni qué ruuyaʼ láʼ Janet, guyé ndaaniʼ ti residencia ra nabeza binni ciegu ne byuiʼné ti baʼdudxaapaʼ diidxaʼ. Gudxi Janet laabe: «Dxi guyuu Jesús lu Guidxilayú bisianda chupa chonna binni ni qué ruuyaʼ para gusihuinni ximodo chigusianda guiráʼ ciegu despué». Oraqueruʼ biindané Janet laabe Apocalipsis 21:3, 4, ne gudxi laabe ximodo chiguni Reinu stiʼ Dios ni na textu ca. Gulezadxí baʼdudxaapaʼ que ti ratuhuiiniʼ, oraqueruʼ na: «Qué huayuu dxi gunadiagaʼ guiníʼ tuuxa ni qué ruuyaʼ ca diidxaʼ riʼ. Stale binni ni ruuyaʼ riníʼ íquecaʼ qué ridúʼyadu purtiʼ caguíxedu ni bínidu o ni biʼniʼ ca binnilídxidu». Biseendaʼ Janet ti correu electrónicu ra nuube, luni zeeda ti dirección ra zanda guidxélabe libru Xipeʼ ne yanna maʼ ruundané laabe Biblia chupa biaje lu ti semana.
5. Neca qué zanda gusiándanu ca ciegu, xi zabeenducaʼ pa guizaaláʼdxinu laacaʼ.
5 Dxandíʼ, qué zanda diʼ gusiándanu ca ciegu cásica biʼniʼ Jesús. Peru nuu xiixa ni zanda gúninu. Maʼ bisicahui dios stiʼ guidxilayú riʼ xquendabiaaniʼ stale binni, ne ládecabe nuu ca ciegu. Zanda gacanenu guirácabe gánnacabe xipeʼ rusiidiʼ Stiidxaʼ Dios (2 Cor. 4:4). Bisianda Jesús chupa ciegu gaxha de guidxi Jericó purtiʼ biabe laacaʼ (Mat. 20:34). Pa guizaaláʼdxinu ca ciegu cásica biʼniʼ Jesús la? zanda gacanenu laacaʼ gunibiaʼcaʼ Jiobá, Dios ni zacané laacaʼ gúʼyacaʼ sti biaje ne ni zudii laacaʼ guendanabani ni qué zaluxe.