¿Ximodo rabi Dios laanu ca promesa stiʼ?

Dede dxi guyáʼ binni, riquiiñeʼ Dios ni bizáʼ laanu profeta ne ángel para guiniʼné binni. Laaca gudixhe íquebe guicá mensaje ne ca promesa stibe. Cayuni prometer Dios laanu zabáninu nayecheʼ lu ca dxi ni zeeda ca, peru zándaca guinabadiidxanu: «¿Paraa zeeda ca promesa ca yaʼ?».

Lu Biblia nga zeeda mensaje stiʼ Dios (2 Timoteo 3:16). ¿Ximodo biquiiñeʼ Dios ca profeta stiʼ para gucaacaʼ mensaje stibe yaʼ? Gucanebe ca hombre riʼ para gucaacaʼ ni riníʼ íquebe (2 Pedro 1:21). Guzéʼtenu ti ejemplu: pa guinabaʼ ti jefe secretariu stiʼ gucaa ti mensaje, qué zaníʼ íquenu stiʼ secretariu ca mensaje riʼ, sínuque stiʼ jefe ca ni purtiʼ laa guníʼ xi guicá luni. Zacaca nga Dios, neca biquiiñebe hombre para gucaa mensaje stibe la? laabe nga guniʼbe xi guicá lu Biblia.

ZANDA GUICAA GUIRÁʼ BINNI MENSAJE STIʼ DIOS

Nabé risaca mensaje stiʼ Dios, nga runi racaláʼdxibe guʼndaʼ ne guiene guiráʼ binni ni. Tiempu riʼ, «binni de guiráʼ nación, tribu, idioma ne guidxi» zanda gunadiágacaʼ ca «noticia galán ni qué ziuu dxi guinitilú» ni zeeda de Dios (Apocalipsis 14:6). Né ndaayaʼ stiʼ Dios, cayaca traducir guidubi Biblia o ti ndaa de laani lu jma de chonna mil idioma, ne laani nga libru ni jma raca traducir que xcaadxi libru.