Guyuu listu pa málasi iquiiñeʼ cheluʼ ra nuu doctor nagueenda

¿Xiñee caquiiñeʼ chuʼnu listu? Ziuu ora málasi naquiiñeʼ chuunu ra nuu doctor nagueenda ca o gaca internarnu ra hospital. Nga runi, dede ca yanna guyúbinu ni zacané laanu chuʼnu listu pa racaláʼdxinu guni tendércabe laanu jneza. Zacá zusihuínninu runi respetarnu guendanabani ne ley ni bidii Jehová de rini (Hch 15:28, 29).

¿Ximodo chuʼluʼ listu?

• Despué de guiníʼ íqueluʼ ne guni orarluʼ, bichá directriz médica stiluʼ o tarjeta (DPA).a Zanda guinabaʼ ca publicador ni maʼ guyuunisa tarjeta riʼ siervu de publicación, ne ca ni napa xiiñiʼ nahuiiniʼ la? zanda guinábacaʼ Tarjeta de identidad (ic) para laacabe.

• Pa nacaxiiñiluʼ la? gunabaʼ ca ancianu documentu Información para mujeres embarazadas (S-401). Zacaneni lii gánnaluʼ xi gúniluʼ pa gueeda guizaacaluʼ xiixa ora nacaxiiñiluʼ ne ora maʼ chigápaluʼ baʼduʼ.

• Pa caquiiñeʼ gaca operarluʼ o guicaaluʼ ti tratamientu ra guinábacabe lii guicaluʼ rini o gaca internarluʼ ra hospital la? dede ante guniʼné ca ancianu ne laaca biʼniʼ avisar ra hospital ziganna ti representante stiʼ ca testigu stiʼ Jehová lii.

¿Ximodo zanda gacané ca ancianu? Zanda gacanécabe lii guchaluʼ tarjeta DPA, peru cadi laacabe nga chiguicaacabe decisión pur lii ne qué zábicabe lii xi ñúnicabe (Ro 14:12; Gál 6:5). Ora gábiluʼ ca ancianu zándaca zucaacabe lii rini, ca hermanu riʼ zaniʼnécabe Comité de Enlace né ca Hospital (CEH).

¿Ximodo zanda gacané CEH? Ca hermanu nuu lu comité riʼ ricaacabe capacitación para gusiénecabe ca doctor ne ca abogadu xiñee qué ricanu rini. Zanda gábicabe ca doctor ca xi sti tratamientu nuu para cadi guicaluʼ rini. Laaca zanda gacanécabe lii guidxélaluʼ ti doctor ni guni respetar decisión stiluʼ.

DESPUÉ DE GÚʼYALUʼ VIDEU NI LÁʼ XIMODO ZANDA CUINU XI TRATAMIENTU JMA JNEZA GUICAANU, ZANDA GUICÁBILUʼ PREGUNTA RIʼ:

• ¿Xi caquiiñeʼ gúniluʼ para chuʼluʼ listu pa málasi gueeda guizaacaluʼ xiixa ne guinábacabe guicaluʼ rini?

  Bicaa respuesta stiluʼ