Ñee cusaanuʼ ni para sti ora la?

Xi laani yaʼ. Laani nga Directriz anticipada y carta poder para atención médica (DACP) ni ricaa guiráʼ ca Testigu ni maʼ guyuunisa. Cumu qué gánnanu xi zándaca gueeda guizaacanu sti dxi la? caquiiñeʼ guininu dede ante modo iquiiñeʼ ca doctor ca rini stinu ne xi remediu ni qué gapa rini zanda guicaanu pa málasi gueeda guizaacanu xiixa, ne gucaʼnu ni lu guiʼchiʼ (Sant. 4:14; Hech. 15:28, 29). Para gánnaluʼ xi zanda gúniluʼ la? maʼ guca ti videu ni láʼ Asistencia médica sin transfusiones. Necesidades y derechos del paciente. Primé biiyaʼ videu ca, ne despué de guni orarluʼ, bicabi ca guendarinabadiidxaʼ zeeda raríʼ. (Cayábidu cani napa xiiñiʼ chuʼcaʼ cuidadu ora gúʼyacaʼ videu riʼ ne ca xiiñicaʼ, purtiʼ rihuinni ra cayuni operárcabe binni luni.)

1) Xiñee nuu doctor cazaalaʼdxiʼ ganna pa dxandíʼ nga caquiiñeʼ guicá binni rini. 2) Bizeeteʼ chonna operación nagana ni randa rúnicabe sin iquiiñecabe rini. 3) Panda doctor ne cirujanu maʼ guniʼcaʼ zanda guni tendercaʼ o guni operarcaʼ binni sin iquiiñecaʼ rini. Xiñee nácabe zanda gúnicabe ni. 4) Xi huadii ca doctor ca cuenta lu guiráʼ ni maʼ biindacaʼ de rini ndaaniʼ gadxé gadxé hospital. 5) Xi zándaca guizaaca binni pa guicá rini. 6) Xi huaníʼ ca doctor ca de modo huayacané xcaadxi remediu binni, lugar de gucaacabe rini laacaʼ. 7) Xiñee raca huará stale binni de anemia. Pabiáʼ ndiʼ zanda guni huantar binni chuʼ zacá. Xi zanda gaca ti gapa binni rini sti biaje. 8) Ximodo zanda guidale ca eritrocito (glóbulo xiñáʼ) ca lu rini stiʼ binni huará. 9) Xii nga cani caquiiñecabe yanna para cadi guxhiipeʼ binni rini ora gaca operar. 10) Ñee zanda guicaa cani nahuiiniʼ sti clase remediu lugar de guicacaʼ rini ne ora cuxooñeʼ riesgu gati la? 11) Xii nga ni nabé risaca maʼ biziidiʼ ca doctor ca para ganda guni tendércabe binni huará jneza. 12) Xiñee naquiiñeʼ guininu dede ante xi remediu ni qué gapa rini zanda guicaanu. Ximodo zanda gúninu ni.

Cada tobi nga naquiiñeʼ guiníʼ ique pa zuni cani gudiʼdiʼ lu videu ca o coʼ casi modo maʼ biziidiʼ lu Biblia. Ñee maʼ guníʼ íqueluʼ ximodo racaláʼdxiluʼ gusianda ca doctor ca lii ne ca xiiñiluʼ la? Ñee maʼ bichaluʼ tarjeta DACP stiluʼ la? Canábadu laatu guʼndaʼ chaahuitu guidubi capítulo 7 stiʼ libru Cadi guixélenu de Dios ni nadxii laanu ne laguyubi xcaadxi ni zeeda luni. Laaca zanda gúʼyaluʼ ni rizaané Xhiiñaʼ Reinu ni Rúninu stiʼ noviembre 2006 ra na «Ñee racalaʼdxeʼ gusiándacabe naa ne xcaadxi cosa ni jma nahuiiniʼ zeeda lu rini ne zaa iquiiñeʼ ca doctor ca rini stinneʼ modo rúnicabe para guianda binni la?». Últimu la? biiyaʼ chaahuiʼ pa maʼ bicaaluʼ guiráʼ cani racaláʼdxiluʼ lu tarjeta DACP stiluʼ. Ca binni ni guliluʼ para guiníʼ pur lii ora qué ganda gúniluʼ ni, ne ca binnilídxiluʼ ni cadi naca Testigu la? naquiiñeʼ gánnacaʼ xii nga racaláʼdxiluʼ ne xiñee.

[Ni caníʼ yaza 3]

• Ñee maʼ guníʼ íqueluʼ ximodo racaláʼdxiluʼ gusianda ca doctor ca lii ne ca xiiñiluʼ la?

• Ñee rizaneluʼ tarjeta DACP stiluʼ guiráʼ ladu cheluʼ, para iquiiñeluʼ ni ora málasi guizaacaluʼ xiixa la?