Ñee cusaanuʼ ni para sti ora la?
Xi laani yaʼ. Pa maʼ bichaluʼ DACP (Directriz anticipada y carta poder para atención médica) ni ricaa guiráʼ ca Testigu ni maʼ guyuunisa. Cumu qué gánnanu «xi chi aca ixíʼ» la? caquiiñeʼ guininu dede ante modo iquiiñeʼ ca doctor ca rini stinu ne xi remediu ni qué gapa rini zanda guicaanu pa xa ora gácanu xiixa, de racá la? naquiiñeʼ gucaʼnu ni (Sant. 4:14; Hech. 15:28, 29). Para gánnanu xi zanda gúninu la? xquidxi Dios maʼ gulee ti videu ni láʼ Asistencia médica sin transfusiones. Necesidades y derechos del paciente. Primé biiyaʼ videu ca, ne despué de guni orarluʼ, bicabi ca guendarinabadiidxaʼ zeeda raríʼ. (Cayábidu cani napa xiiñiʼ, gápacaʼ cani nahuiiniʼ ca purtiʼ luni zeeda ra cayuni operárcabe.)
1) Xiñee nuu doctor cazalaʼdxiʼ ganna pa dxandíʼ nga caquiiñeʼ guicá binni rini. 2) Bizeeteʼ chonna operación ni nagana gúnicabe, peru randa rúnicabe ni sin iquiiñecabe rini. 3) Panda doctor na zuni operar binni huará sin rini. Xiñee nácabe zanda gúnicabe ni yaʼ. 4) Lu guiráʼ ni maʼ biindacabe de rini ca ndaaniʼ gadxé gadxé hospital, xi huahuinni de laani. 5) Gunáʼ ndiʼ ca riesgu ni nuu ora guicá binni rini. 6) Xi riníʼ ca doctor ca yanna ra huayuuyacaʼ modo huayacané gudiicaʼ gadxé remediu binni lugar de nucaacaʼ binni rini. 7) Xi pur nuu stale binni qué gapa rini (anemia). Pabiáʼ ndiʼ zanda guni huantar binni chuʼ zacá. Xi zanda gaca ti guibiguetaʼ chuʼ rini ca galán. 8) Ximodo zanda guidale ca glóbulo xiñá (eritrocitos) ca lu rini stiʼ binni huará. 9) Xii nga cani caquiiñecabe yanna para cadi guxhiipeʼ binni rini ora gaca operar. 10) Zanda guicaa cani nahuiiniʼ ca sti remediu lugar de rini o pa binni ca cuxooñeʼ riesgu gati la? 11) Xii ndiʼ ni nabé risaca maʼ biziidiʼ ca doctor ca para ganda guni tendércabe binni huará jneza yaʼ. 12) Xiñee naquiiñeʼ guininu dede ante xi remediu ni qué gapa rini zanda guicaanu. Ximodo zanda gúninu ni.
Cada tobi nga naquiiñeʼ guiníʼ ique pa zuni cani gudiʼdiʼ lu videu ca o coʼ casi modo maʼ biziidiʼ de lu Biblia. Maʼ guníʼ íqueluʼ xi remediu guicaaluʼ lii ne ca xiiñiluʼ la? Pa racaláʼdxiluʼ gánnaluʼ xi zanda gúniluʼ la? biiyaʼ ra ná «Ni rinabadiidxaʼ cani ruundaʼ» (Preguntas de los lectores) stiʼ revista La Atalaya 15 stiʼ junio 2004 ne 15 stiʼ octubre 2000, ne laaca zanda gúʼyatu ni rizaané Xhiiñaʼ Reinu ni Rúninu stiʼ beeu noviembre 2006 ra na: «Ñee racalaʼdxeʼ gusiándacabe naa ne xcaadxi cosa ni jma nahuiiniʼ zeeda lu rini ne zaa iquiiñeʼ ca doctor ca rini stinneʼ modo rúnicabe para guianda binni la?». Ca binni ni guliluʼ para guiníʼ pur lii ora qué ganda gúniluʼ ni ne ca binnilídxiluʼ ni cadi naca Testigu naquiiñeʼ gánnacaʼ xii nga racaláʼdxiluʼ ne xiñee.