Ñee maʼ nánnaluʼ xi zanda gúniluʼ la?

Ndaaniʼ stale hospital ni nuu lu guidubi naca Guidxilayú zeʼ dxi jma stale binni raca operar sin rini. Yanna lii pue, ñee maʼ nánnaluʼ xi guiráʼ modo napa ca doctor ca para guni operarcaʼ ti binni sin rini la? Naquiiñeʼ gánnaluʼ ximodo rúnicabe ni ti gúʼyaluʼ pa zuni operárcabe lii zacá. Galán gúniluʼ pa gúʼyaluʼ primeru videu La negativa a la sangre. La medicina acepta el reto. De racá biʼniʼ orar Jiobá ti gacané lii guyúbiluʼ xii nga jma jneza gúniluʼ de cani zeeda raríʼ. Naquiiñeʼ gánnatu rihuinni ra cayuni operárcabe binni lu videu riʼ, nga runi riquiiñeʼ gápatu cani nahuiiniʼ ca ora gúʼyatu ni.

1) Xi razón jma risaca napa ca testigu stiʼ Jiobá para cadi guicacaʼ rini. 2) Ximodo racalaʼdxiʼ ca testigu stiʼ Jiobá guiándacaʼ. 3) Xi derechu napa ti binni huará. 4) Xiñee jneza nga cuí cada tobi de laanu ximodo guianda. 5) Ora guxhii tuuxa stale rini, xi chupa cosa naquiiñeʼ guni ca doctor ca nagueendaca. 6) Xi tapa cosa nga runi ca doctor ca para cadi gucaacaʼ rini binni. 7) Xi zanda guni ca doctor ca para, 1) cadi guxhii binni ziaʼ rini, 2) cadi guniti binni glóbulo naxiñáʼ, 3) gucaacabe cuerpu stiʼ binni guni rini nagueenda, ne 4) guibiguetaʼ rini bixhii binni cayaca operar ca. 8) Bisiene ximodo rusianda ca doctor ca binni ne 1) hemodilución ne 2) ora rudxiguétacabe rini stiʼ binni. 9) Xi naquiiñeʼ gánnaluʼ ora gabi ti doctor lii modo guiándaluʼ. 10) Ñee zanda gaca operar ti binni sin rini neca guindaa operación ca ne gácani nagana la? 11) Xi cayuni ca doctor ca para cadi iquiiñecaʼ rini ora guni operarcaʼ.

Cada tobi de laanu nga naquiiñeʼ guʼyaʼ pa zuni cani gudiʼdiʼ lu videu ca o coʼ, ne guni ni na xquendabiaaniʼ casi modo maʼ biziidiʼ lu Biblia. Ñee maʼ guníʼ íqueluʼ ximodo racaláʼdxiluʼ gusianda ca doctor ca lii ne ca xiiñiluʼ la? Ñee maʼ bicaaluʼ ximodo racaláʼdxiluʼ guiándaluʼ lu tarjeta DACP la? Ante gúniluʼ ni, biindaʼ chaahuiʼ guiráʼ ni cá lu La Atalaya 15 stiʼ junio 2004 ne 15 stiʼ octubre 2000 ra na «Preguntas de los lectores». De racá bicabi ca guendarinabadiidxaʼ ni zeeda lu ni rizaané Xhiiñaʼ Reinu ni Rúninu stiʼ noviembre 2006 ra na «Ñee racalaʼdxeʼ gusiándacabe naa ne xcaadxi cosa ni jma nahuiiniʼ zeeda lu rini ne zaa iquiiñeʼ ca doctor ca rini stinneʼ modo rúnicabe para gusiándacabe binni la?» Ora maʼ guníʼ íqueluʼ xi gúniluʼ la? bicaani lu tarjeta DACP. Ca binnilídxiluʼ ni cadi naca Testigu ne binni ni guiníʼ pur lii ca naquiiñeʼ gánnacaʼ ximodo racaláʼdxiluʼ gusianda ca doctor ca lii.

[Box on page 3]

• Ñee maʼ guníʼ íqueluʼ ximodo racaláʼdxiluʼ gusianda ca doctor ca lii ne ca xiiñiluʼ la?

• Ñee rizaneluʼ tarjeta DACP ca guiráʼ ladu cheluʼ para iquiiñeluʼ ni ora málasi guizaacaluʼ xiixa la?