¿Ñee zabániluʼ nayecheʼ pa guni estudiarluʼ ne gápaluʼ bueltu la?

Stale binni riníʼ ique ca ni biʼniʼ estudiar ne napa bueltu zabánicaʼ nayecheʼ. Riníʼ íquecabe ca binni ni guzá scuela roʼ zúnicaʼ dxiiñaʼ sticaʼ jneza, zabáninecaʼ familia sticaʼ galán ne zanda gueeda gácacaʼ tuuxa risaca ndaaniʼ xquídxicaʼ. Nuu tu ná pa guni estudiar la? zabani jma nayecheʼ purtiʼ zapa ti dxiiñaʼ galán ra guni ganar stale bueltu.

NI RICÁ IQUE STALE BINNI GUNI

Ti hombre de China ni láʼ Zhang Chen, guníʼ: «Guníʼ iqueʼ pa naa chaaʼ scuela roʼ, zareeʼ lu guendapobre ne zapaʼ ti dxiiñaʼ ra guiaxaʼ galán ne zabaneʼ nayecheʼ».

Stale binni riníʼ ique para ganda guibani nayecheʼ caquiiñeʼ guni estudiar ndaaniʼ ti scuela roʼ neca napa xidé checaʼ sti guidxi. Ne cadi nagana gúcani ante chuʼ COVID-19. Lu ti informe ni bidii ti organización lu iza 2012, ná: «Biaʼ 52% de ca estudiante de Asia, yeguni estudiarcaʼ scuela roʼ ni nuu sti guidxi».

Stale padre de familia ruyúbicaʼ ximodo guseendacaʼ xiiñicaʼ scuela roʼ sti guidxi. Ti hombre de Taiwán ni láʼ Qixiang, guníʼ: «Neca qué gapa bixhozeʼ ne jñaaʼ stale bueltu. Peru biseendacabe tapa de laadu chiguni estudiardu Estados Unidos. Peru para ganda quíxecabe estudiu stidu la? gupa xidé gudiiñecabe bueltu ne bizaabicabe stale».

NI RIBEENDÚ BINNI

Zuba tobi de ca baʼdudxaapaʼ riʼ ne cayuni dxiiñaʼ lu ti computadora, maʼ huaxhinni ne rihuinni maʼ bidxágabe. — Stale binni ni ricá ique cheʼ scuela roʼ ne gapa bueltu qué ribánicaʼ nayecheʼ.

Ora runi estudiar binni randa racané ni laa, peru stale maʼ bidii cuenta qué rireendú guiráʼ ni rúnicaʼ. Nuu tu laa riguiiñeʼ stale bueltu para guni estudiar, peru despué qué ridxela ti dxiiñaʼ de ni biʼniʼ estudiar. Lu ti informe ni bidii ti periodista ni láʼ Rachel Mui para Business Times de Singapur, bizeeteʼ: «Stale de ca ni biʼniʼ estudiar universidad qué ridxélacaʼ dxiiñaʼ ni racaláʼdxicaʼ». Jianjie, ti binni nabeza Taiwán, ni napa ti doctorado, guníʼ: «Stale de ca ni biʼniʼ estudiar universidad rúnicaʼ ti dxiiñaʼ gadxé de ni bíʼndacaʼ».

Nuu tu laa ridxela dxiiñaʼ de ni biʼniʼ estudiar, peru qué rugaandacabe guiráʼ ni guníʼ íquecabe. Guzéʼtenu ni bizaaca Niran, ti hombre de Tailandia ni yeguni estudiar universidad ndaaniʼ guidxi Reino Unido. Dxi biguétabe xquídxibe la? bidxélabe ti dxiiñaʼ de ni biʼniʼ estudiarbe. Laabe guniʼbe: «Pur ca ni bineʼ estudiar, bidxelaʼ ti dxiiñaʼ ra riaxaʼ galán. Peru para ganda guneʼ ganar stale bueltu la? napa xidé guneʼ stale dxiiñaʼ. Ne qué nindaa, ra cayuneʼ dxiiñaʼ que la? guleecabe stale de ca ni runi dxiiñaʼ raqué, dede né naa guleecabe. Raqué nga bidieeʼ cuenta gastiʼ nin ti dxiiñaʼ ni nuu seguru».

Ca binni ni napa bueltu ne ruluíʼ «nabani galán» laaca rápacaʼ guendanagana ndaaniʼ familia sticaʼ, raca huaracaʼ ne riuucaʼ xizaa pur bueltu sticaʼ. Ti hombre de Japón ni láʼ Katsutoshi, guníʼ: «Neca gupaʼ stale bueltu qué nibaneʼ nayecheʼ, purtiʼ bidieeʼ cuenta stale tu gupa envidia naa ne pur ngue qué nibaneʼ galán». Lam, ti gunaa de Vietnam, guníʼ: «Huayuuyaʼ stale binni runi stipa pur gapa ti dxiiñaʼ galán ti cadi guiaadxaʼ laacaʼ gastiʼ. Peru lugar de guibánicabe nayecheʼ, rápacabe guendanagana ne raca huarácabe».

¿ÑEE CAQUIIÑEʼ GUNI ESTUDIAR BINNI NE GAPA BUELTU LA?

Ora rié binni scuela roʼ ne runi ganar bueltu rapa ni iquiiñeʼ ne rudii ni caquiiñeʼ familia stiʼ. Peru cadi ngasi caquiiñeʼ para guibáninu nayecheʼ. ¿Xiñee yaʼ? Guidúʼyanu xi ná Stiidxaʼ Dios de ni caninu riʼ.

¿ÑEE ZABÁNINU NAYECHEʼ PA GUNI ESTUDIARNU LA?

«Cadi guiráʼ diʼ ora runi ganar tuuxa ni ruxooñeʼ reciu, [...] nin ni riene cadi guiráʼ ora napa cosa risaca, nin ca ni nanna cadi guiráʼ diʼ ora rireendú ni rúnicaʼ, purtiʼ guiranu rizaacanu cosa ni cadi caníʼ íquenu ne ora cadi cabézanu ni» (ECLESIASTÉS 9:11).

Stale biaje dede ca ni guzá scuela roʼ qué ribani nayecheʼ purtiʼ rizaacacaʼ xiixa ni cadi cabézacaʼ. Nuu de laacabe nuu tiru qué gápacabe bueltu, rizaacacabe cosa malu ne runi binni menu laacabe ne pur nga maʼ qué rugaandacabe ni cá íquecabe gúnicabe.

TI DXI STI DXI ZANDA GUNÍTINU GUIRÁʼ NI NÁPANU.

«Cadi guibániluʼ para si gápaluʼ cosa risaca. Guleza ne bisihuinni nácaluʼ ti binni ni riene. Ora guuyadxiluʼ laacaʼ zanitilucaʼ, purtiʼ zaree xhiaacaʼ casi xhiaa bisiá ne zapapacaʼ guibáʼ» (PROVERBIOS 23:4, 5).

Neca risaca bueltu zanda guirá ni. Casi ora chuʼ ti crisis ndaaniʼ ti guidxi la? nagueendaca zanda guiráʼ bueltu ni napa binni. Ne ora rizaaca ti desastre natural casi ti xu roʼ, ti huracán o guicaguí ti lugar la? zanda guiaana binni sin lidxi ne sin bueltu.

RAPA BINNI GUENDANAGANA ORA RAPA COSA RISACA.

«Ti binni ricu qué randa rasi pur guiráʼ ni napa» (ECLESIASTÉS 5:12).

Nga peʼ nga ni bizaaca Franklin, ti binni nabeza Hong Kong. Guyebe universidad, gúpabe ti dxiiñaʼ ra biʼniʼ ganarbe galán ne gúcabe gerente. Laabe guniʼbe: «Pur dxiiñaʼ que gupaʼ estrés, biʼniʼ huará ni naa ne dede maʼ qué ñanda ñaseʼ». Pur guiráʼ ndiʼ, biree Franklin gana ne dede guníʼ: «Cumu nabé nagana ra cadideʼ que la? ngue bicaa naa guiníʼ iqueʼ xi pur nabaneʼ».

«Cadi guibániluʼ para si gápaluʼ cosa risaca» (PROVERBIOS 23:4)

Cásica Franklin, stale binni ni guzá scuela ne ni napa bueltu maʼ bidiicaʼ cuenta cadi caquiiñecaʼ ca cosa riʼ para guibánicaʼ nayecheʼ. Nga runi, nuu tu laa lugar de guicá ique gapa cosa risaca, runi stipa gaca binni nachaʼhuiʼ ne gacané xcaadxi para guibani galán. Peru ¿ñee zacané ndiʼ laanu guibáninu nayecheʼ la? Lu sti artículo ca zacábinu pregunta ca.