XI GÚNINU TI CADI GACA NANALÁʼDXINU BINNI

4 | Gunabaʼ Dios gacané lii

Biblia ná:

«Binni ni napa ca cualidad stiʼ espíritu la? rannaxhii, nuu nayecheʼ, nexhedxí ladxidóʼ, napa paciencia, amable laa, nachaʼhuiʼ, napa fe, nadóʼ, rucueeza laca laa» (GÁLATAS 5:22, 23).

¿Xi riniʼni?

Zanda gacané Dios laanu para cadi gacananaláʼdxinu sti binni. Zacané espíritu santu stiʼ Dios laanu para guchaʼnu modo nácanu ne gúninu ni jneza neca rábinu qué ñuu dxi ñúninu ni pa ñaca qué ñacané Dios laanu. Pa gúninu ni, zanda gúninu ni biʼniʼ apóstol Pablo. Sicaríʼ guniʼbe: «Napaʼ stipa para guneʼ intiica cosa purtiʼ rudii Dios poder naa» (Filipenses 4:13). Ne laaca zanda guininu: «Jehová nga racané naa» (Salmo 121:2).

Biʼniʼ stipa gúniluʼ ndiʼ:

«Dxiqué nabé gudindeniáʼ binni [...]. Peru [Jehová] gulee naa de ra nuaaʼ que ne gucanebe naa gacaʼ ti binni nadóʼ» (WALDO).

De guidubi ladxidoʼloʼ gunabaʼ Dios gudii lii espírutu santu stiʼ para gácaluʼ ti binni nachaʼhuiʼ (Lucas 11:13). Zanda gusihuinniluʼ nácaluʼ ti binni ni rannaxhii, ni qué ridinde, ni napa paciencia ne ni rucueeza laca laa, zacá nga naquiiñeʼ gácanu para cadi guidaʼnu xiana ne para cadi gaca nanalaʼdxinu binni. Biiyaʼ ximodo ná Biblia zanda gácanu zacá ne biʼniʼ stipa gácaluʼ ti binni ni napa ca cualidad ca. Laaca risaca nga guieeguluʼ binni ni runi stipa gaca zacá, purtiʼ zacanécabe lii gannaxhiiluʼ binni ne gúniluʼ cosa galán pur stobi (Hebreos 10:24).

Historia stiʼ ti binni—WALDO

Bisaana de gaca nanaláʼdxibe ne de tíndebe

Nagana guca xpida Waldo dxi nahuiiniʼ ne ngue nga bicaa laabe gaca nanaláʼdxibe binni. Sicaríʼ nabe: «Gatigá nabé gudindeniáʼ ca ni rutoo guixi [...]. Ti dxi gudixe ti pandilla ti hombre ni ruuti binni para guuti naa. Bizaa hombre que ti gudxíu naa peru gunda bixooñeʼ lu nabe».

Qué ñuulaʼdxiʼ Waldo guʼndané ca testigu stiʼ Jehová xheelabe Biblia. Sicaríʼ guniʼbe: «Nabé guca nanaladxeʼ laacabe ne stale biaje gudxeʼ laacabe diidxaʼ guidxa. Peru qué nuxuiʼluáʼ pa nicábicabe naa né diidxaʼ nadóʼ».

Ra gudiʼdiʼ tiempu, laaca maʼ bizulú Waldo caziidiʼ de Biblia. Ndiʼ nga ni guniʼbe: «Guca nagana para naa guneʼ ni caziideʼ. Guníʼ iqueʼ qué ziuu dxi gucueezaʼ naa para cadi guidxiicheʼ». Peru bichaabe modo nácabe pur ni biziidibe lu Biblia.

Sicaríʼ bisiénebe ni: «Ti dxi gunabaʼ Alejandro, Testigu ni rusiidiʼ naa de Biblia que guundaʼ Gálatas 5:22, 23 [...]. Ne de raqué bisiénebe naa qué zanda diʼ gapaʼ ca [cualidad] ca naasiáʼ, sínuque naquiiñeʼ gacané espíritu santu stiʼ Dios naa. Ni guniʼbe que bixhéleni luáʼ».

Bisaana Waldo de gacananalaʼdxiʼ binni purtiʼ bidii lugar gacané Dios laa. Sicaríʼ nabe: «Ca ni guca xhamiguaʼ dxiqué ne ca binnilidxeʼ nabé ridxagayaacaʼ modo maʼ bichaaʼ». Ne guníʼrube: «Dxiqué nabé gudindeniáʼ binni [...]. Peru [Jehová] gulee naa de ra nuaaʼ que ne gucanebe naa gacaʼ ti binni nadóʼ».