¿Ñee racané ca conseju ni rudiiluʼ binni la?

1, 2. ¿Xi cosa nabé risaca biziidiʼ ti ancianu ra bidii conseju ti hermana?

RACA chupa chonna iza, yeganna chupa ancianu ti hermana ni maʼ napa tiempu qué huayé reunión. Tobi de laacabe biindané laabe caadxi textu ni caníʼ pabiáʼ risaca cadi guiáʼdxanu reunión. Guníʼ ique ancianu que guluu gana hermana riʼ, peru ora maʼ chécabe sicaríʼ gudxi hermana riʼ laacabe: «Qué lica gánnatu xi cazaacaʼ». Bidii ca hermanu que laabe conseju sin ninabadiidxacaʼ laabe xi cazaacabe. Ngue runi biʼniʼ sentir hermana riʼ qué ñacanécabe laa.

² Sicaríʼ guníʼ ancianu ni biindané ca textu que hermana que: «Ora guniʼbe zaqué guníʼ iqueʼ qué gápabe respetu laadu. Peru despué bidieeʼ cuenta, lugar de ñuundaniáʼ laabe ca textu que, jma galán ninabadiidxaʼ laabe “¿ximodo nuuluʼ?”, “¿xi cayuni sentirluʼ?”, “¿ximodo zanda gacaniáʼ lii?”». Biziidiʼ ancianu riʼ ti cosa nabé risaca, ne yanna riénebe ca hermanu ne racanebe laacaʼ.

3. ¿Tuu nga ca ni zanda gudii conseju ndaaniʼ congregación?

³ Napa ca ancianu responsabilidad de gudiicaʼ conseju ca hermanu ni caquiiñeʼ ni. Peru nuu biaje zándaca caquiiñeʼ gudii xcaadxi hermanu de congregación conseju tuuxa. Guzéʼtenu ti ejemplu, zándaca caquiiñeʼ iquiiñecabe Biblia para gudiicabe conseju ti xhamígucabe (Sal. 141:5; Prov. 25:12). O zándaca caquiiñeʼ gudii ti hermana ni maʼ huaniisi conseju ti hermana ni jma nahuiiniʼ de ca cosa ni riete lu Tito 2:3-5. Ne laaca naquiiñeʼ gudii ca padre conseju ca xiiñicaʼ ne guni corregircaʼ laacabe. Nga runi neca gucuá artículo riʼ para ca ancianu, guiranu zanda guni estudiarnu ni para guizíʼdinu gudiʼnu conseju ni gacané purtiʼ nga «nga ni rusiecheʼ ladxidóʼ binni» (Prov. 27:9).

4. ¿Gunáʼ nga ca pregunta ni zacábinu lu artículo riʼ?

⁴ Lu artículo riʼ zacábinu tapa pregunta ni zusiidiʼ laanu ximodo naquiiñeʼ gudiʼnu conseju: ¿xi rucaa laanu gudiʼnu conseju?, ¿ñee dxandíʼ caquiiñeʼ binni ca conseju ca la?, ¿tu laa naquiiñeʼ gudii conseju? ne ¿ximodo zanda gudiʼnu conseju ni gacané?

¿XI RUCAA LAANU GUDIʼNU CONSEJU?

5. ¿Xiñee jma nagueenda guicaa tuuxa conseju pa gudiicabe ni laa purtiʼ nadxiicabe laa? (1 Corintios 13:4, 7).

⁵ Nadxii ca ancianu ca hermanu. Nga runi, nuu biaje rudiicabe conseju tuuxa ni maʼ careechú (Gál. 6:1). Ora chigudii ti ancianu conseju tuuxa, naquiiñeʼ guiníʼ ique ximodo naquiiñeʼ gusihuinni guendarannaxhii ni bizeeteʼ apóstol Pablo: «Ti binni ni napa amor la? napa paciencia ne nachaʼhuiʼ. […] Runi soportar guiráʼ cosa, runi cré guiráʼ cosa, ribeza guiráʼ cosa, runi huantar guiráʼ cosa» (biindaʼ 1 Corintios 13:4, 7). Pa guiníʼ ique ti ancianu ni ná ca versículo riʼ, zacané ni laa gudii cuenta pur nadxii binni nga chigudii conseju. Ne jma nagueenda guicaa ti binni conseju ora gudii cuenta dxandíʼ cazaaláʼdxicabe laa (Rom. 12:10).

6. ¿Xi ejemplu galán bisaana Pablo pur modo bidii conseju?

⁶ Bisaana apóstol Pablo ti ejemplu galán para ca ancianu. Guzéʼtenu ti ejemplu, bidiibe conseju ca hermanu de Tesalónica purtiʼ biiyabe caquiiñecaʼ ni. Peru lu ca carta ni bicaabe ra nuucaʼ, primeru biʼniʼ felicitarbe laacaʼ pur dxiiñaʼ ni rúnicaʼ, pur nadxiicaʼ Dios ne pur runi huantarcaʼ. Laaca guníʼ íquebe xi cazaaca ca hermanu que ne gúdxibe laacaʼ nánnabe canazananda binni laacaʼ ne xi guendanagana cadíʼdicaʼ (1 Tes. 1:3; 2 Tes. 1:4). Ne dede gúdxibe laacaʼ nácacaʼ ti ejemplu galán para xcaadxi xpinni Cristu (1 Tes. 1:8, 9). ¡Guizáʼ biecheʼ ca hermanu que pur ni gudxi Pablo laacaʼ! Gunna dxíchicaʼ guizáʼ nadxiibe laacaʼ. Ngue runi gucané ca conseju ni bidii Pablo laacabe lu guiropaʼ carta ni biseendaʼ ra nuucabe (1 Tes. 4:1, 3-5, 11; 2 Tes. 3:11, 12).

7. ¿Xiñee zándaca guidxiichi tuuxa ora guicaa ti conseju?

⁷ Pa gudiʼnu ti conseju, peru cadi cayúninu ni purtiʼ dxandíʼ racaláʼdxinu gacanenu binni ca la? zanda guizaaca ni bizeeteʼ ti ancianu ni napa experiencia, sicaríʼ guniʼbe: «Nuu tu laa ridxiichi ora rudiicabe laa ti conseju, peru cadi pur cadi jneza conseju ni bidiicabe laa, sínuque purtiʼ qué ñúnicabe ni né cariñu». ¿Xi rusiidiʼ ndiʼ laanu yaʼ? Jma nagueenda nga guicaa tuuxa conseju ora rúninu ni né guendarannaxhii, ne cadi ora cadxiichinu.

¿ÑEE DXANDÍʼ CAQUIIÑEʼ BINNI CA CONSEJU CA LA?

8. ¿Xi naquiiñeʼ guiníʼ ique ti ancianu ante gudii conseju tuuxa?

⁸ Cadi nagueenda ca naquiiñeʼ gudii ca ancianu conseju tuuxa. Ante gudii ti ancianu conseju tuuxa, naquiiñeʼ guiníʼ ique: «¿Ñee dxandíʼ caquiiñeʼ gudieeʼ laabe conseju la? ¿Ñee dxandíʼ cayúnibe xiixa cosa malu la? ¿Ñee cayúnibe xiixa ni ná Biblia cadi jneza la? o cayúnibe xiixa ni qué riuuladxeʼ la?». Ti ancianu ni nuu xpiaaniʼ cadi casi zeʼ riníʼ (Prov. 29:20). Pa caníʼ ique ti ancianu pa caquiiñeʼ peʼ gudii conseju tuuxa, zanda guiníʼnebe sti ancianu para gúʼyacabe xi ná Biblia ne pa dxandíʼ peʼ caquiiñeʼ hermanu ca conseju ca (2 Tim. 3:16, 17).

9. Ora gudii ca ancianu conseju tuuxa de modo naquiiñeʼ gacuʼ lari ne guzuchaahuiʼ, ¿ximodo zanda chinándacaʼ ejemplu stiʼ Pablo? (1 Timoteo 2:9, 10).

⁹ Guzéʼtenu ti ejemplu. Guiníʼ íquenu nuu ti ancianu xizaa pur modo racu ti hermanu lari. Zándaca guiníʼ íquebe: «¿Ñee cuzeeteʼ Biblia xiixa para ganda gudieeʼ conseju laabe la?». Cumu qué racaláʼdxibe gúnibe ni riuuláʼdxibe la? zanda guinabadiidxabe sti ancianu o sti hermanu ni napa experiencia. Guirópacabe zanda gúʼndacabe ni bicaa Pablo ora bizeeteʼ de lari ne modo naquiiñeʼ guzuchaahuiʼ ca xpinni Cristu (biindaʼ 1 Timoteo 2:9, 10). Qué ñuni diʼ Pablo ti lista de xi naquiiñeʼ gácunu ne xi cadi naquiiñeʼ gácunu, sínuque bizeetebe principiu ni zacané laanu cuinu xi lari gácunu ne gúninu ni né guendabiaaniʼ. Nánnabe zanda cuí ca xpinni Cristu xi lari gácucaʼ ne modo guzuchaahuicaʼ, peru naquiiñeʼ gápacaʼ cuidadu cadi gucheenecaʼ ni ná Biblia. Nga runi, ante guʼyaʼ ca ancianu pa naquiiñeʼ gudiicaʼ conseju tuuxa, naquiiñeʼ gúʼyacaʼ pa rúnibe stipa gácube lari jneza ne pa rúnibe ni né guendabiaaniʼ.

10. ¿Xi zacané laanu guni respetarnu decisión ni guicaa xcaadxi?

¹⁰ Cadi guiaandaʼ laanu, gadxé gadxé decisión zanda guicaa chupa hermanu de xiixa cosa. Peru qué riníʼ diʼ nga, tobi ca nuu biaʼsi ne stobi ca coʼ. Nga runi cadi naquiiñeʼ gucaʼnu xcaadxi hermanu guiníʼ íquecaʼ modo riníʼ íquenu ne quíxhenu xii nga ni jneza ne xii nga ni cadi jneza (Rom. 14:10).

¿TU LAA NAQUIIÑEʼ GUDII CONSEJU?

11, 12. Pa caquiiñeʼ guicaa tuuxa ti conseju, ¿xi naquiiñeʼ guiníʼ ique ti ancianu, ne xiñee?

¹¹ Maʼ bidúʼyanu naquiiñeʼ gudiicabe conseju tuuxa, peru ¿tu laa naquiiñeʼ gúnini yaʼ? Guzéʼtenu ti ejemplu, ante gudii ti ancianu conseju ti hermana ni maʼ bichaganáʼ o ti menor de edad, primeru naquiiñeʼ guiníʼnebe xaíque stiʼ familia ca. Zándaca guiníʼ xaíque ca laa gudii conseju familia stiʼ o zanda chuʼbe ora guni ancianu ca ni.b O, pa ti hermana joven nga caquiiñeʼ guicaa conseju, zándaca jma jneza nga gudii ti hermana ni maʼ huaniisi ni laabe, casi biete lu párrafo 3.

¹² Ndiʼ nga sti cosa ni naquiiñeʼ guiníʼ ique ti ancianu: «¿Ñee naa nga naquiiñeʼ gudieeʼ conseju ca la? o jma galán guni stobi ni?». Guzéʼtenu ti ejemplu, zándaca ti binni ni raca nagana para laa guieeguʼ xcaadxi ne natuíʼ jma nagueenda guicaa conseju stiʼ ti ancianu ni gudiʼdiʼ lu ni cadíʼdibe, purtiʼ jma ziene laabe. Peru guiráʼ ca ancianu nga naquiiñeʼ gacanecaʼ ca hermanu para guchaacaʼ ne guibánicaʼ modo ná Biblia. Pa caquiiñeʼ tuuxa guni corregírcabe laa la? naquiiñeʼ gúnicabe ni.

¿XIMODO ZANDA GUDIʼNU CONSEJU NI GACANÉ?

13, 14. ¿Xiñee naquiiñeʼ ganna ca ancianu gucaadiágacaʼ?

¹³ Naquiiñeʼ gucaadiágaluʼ. Ora maʼ cayuu ti ancianu listu para gudii ti conseju, naquiiñeʼ guiníʼ ique: «¿Ñee nannaʼ xi cazaaca hermanu ca la? ¿Ñee nannaʼ xi problema cadíʼdibe la? ¿Xii nga ni jma caquiiñebe yanna yaʼ?».

¹⁴ Ni zeeda lu Santiago 1:19 racané ni ca hermanu ni rudii conseju. Sicaríʼ bicaa Santiago: «Naquiiñeʼ chuʼtu listu para gucaadiágatu, cadi casi zetu gundaa ruaatu xiixa diidxaʼ ne cadi casi zetu guidxiichitu». Cadi naquiiñeʼ guiníʼ ique ti ancianu maʼ nanna guiráʼ ni cazaaca ti hermanu ni chigudii conseju. Proverbios 18:13 ná: «Ora guicabi tuuxa xiixa cosa ante gucaadiaga zusihuinni nahuati ne zatuilú». Ni jma jneza nga guinabadiidxanu binni ca xi cazaaca, ne gucaʼdiáganu laa ante guininu. Nga nga ni biziidiʼ ancianu ni bizéʼtenu ra bizulú artículo riʼ. Bidiibe cuenta, ante ñuundanebe laa ca textu que, jma galán ninabadiidxabe hermana que «¿ximodo nuuluʼ?», «¿ximodo cayuni sentirluʼ?», «¿ximodo zanda gacaniáʼ lii?». Pa guizaalaʼdxiʼ ca ancianu ximodo nuu ca hermanu, jma zacanécabe ne zaguucabe gana laacaʼ.

15. ¿Ximodo zanda chinanda ca ancianu principiu ni zeeda lu Proverbios 27:23?

¹⁵ Binibiáʼ chaahuiʼ ca dendxuʼ stiʼ Jehová. Casi bidúʼyanu ra bizulú artículo riʼ, para ganda gacanenu tuuxa ora gudiʼnu conseju laa, cadi caquiiñeʼ si guidúʼndanenu laabe chupa chonna textu ne gudiʼnu caadxi sugerencia laabe. Naquiiñeʼ gudii ca hermanu ca cuenta dxandíʼ rizaaláʼdxinu laacaʼ, riénenu ni cazaacacaʼ ne racaláʼdxinu gacanenu laacaʼ (biindaʼ Proverbios 27:23). Nga runi naquiiñeʼ guni ca ancianu ca stipa gaca xhamígucaʼ ca hermanu ne ca hermana.

16. ¿Xi naquiiñeʼ guni ca ancianu para gacané conseju ni gudiicaʼ tuuxa hermanu?

¹⁶ Qué ribeza ca ancianu guiníʼ ique ca hermanu ridxíñacabe laacaʼ ora si caquiiñeʼ gudiicabe conseju laacaʼ. Lugar de nga la? naquiiñeʼ gapa ca ancianu costumbre guiníʼnecaʼ ca hermanu ne guizaaláʼdxicaʼ laacabe ora nápacabe guendanagana. Ti ancianu ni napa experiencia guníʼ pa gúnicabe zacá, zaca xhamígucabe ca hermanu. Ne laaca bizeetebe: «Ne ora caquiiñeʼ gudiicabe conseju tuuxa la? maʼ qué zaca ni nagana para laacabe». Ne laaca qué zaca nagana para hermanu ca guicaa conseju ni gudiicabe laa.

17. ¿Pora nga naquiiñeʼ gusihuinni ca ancianu nápacaʼ paciencia ne nacháʼhuicaʼ?

¹⁷ Gupa paciencia ne guca nachaʼhuiʼ. Nabé risaca gapa ca ancianu paciencia ne gácacaʼ nachaʼhuiʼ ora gaca nagana para tuuxa hermanu chinanda conseju ni zeeda lu Biblia ni bidiicabe laa. Cadi naquiiñeʼ guidxiichi ca ancianu pa guizaaca ndiʼ. Naquiiñeʼ chinándacabe ejemplu stiʼ Jesús, purtiʼ sicaríʼ biete de laa lu ti profecía: «Qué zagúzabe ti ubaguí ni maʼ caluuza, ne qué zusuiʼbe ti mecha ni mayaca guizuíʼ» (Mat. 12:20). Nga runi, caquiiñeʼ guinabaʼ ca ancianu ca Jehová lu oración sticaʼ, gacané binni ca guiene xiñee caquiiñeʼ conseju ca ne xiñee naquiiñeʼ chinanda ni. Zándaca caquiiñeʼ hermanu ca tiempu para guiníʼ ique conseju ni bidiicabe laa. Pa napa ancianu ca paciencia ne nachaʼhuiʼ, zacaa binni conseju bidiibe laa ne qué zaníʼ ique ximodo bidiibe ni laa. Naquiiñeʼ gudii ca ancianu conseju ni zeeda lu Stiidxaʼ Dios.

18. a) ¿Xi cadi naquiiñeʼ guiaandaʼ laanu ora gudiʼnu conseju? b) Casi rihuinni lu imagen ne cuadru ca, ¿xi naquiiñeʼ guiníʼ ique ca padre ante gudiicaʼ conseju xiiñicaʼ?

¹⁸ Biziidiʼ de ca cosa ni cadi jneza ni bíʼniluʼ. Cumu cadi perfectu laanu la? nuu biaje zaca nagana para laanu chinándanu guiráʼ sugerencia ni biete lu artículo riʼ (Sant. 3:2). Ziuu ora zucheʼnu, peru naquiiñeʼ gúninu stipa guizíʼdinu de laacani. Pa guʼyaʼ ca hermanu nadxiinu laacaʼ, qué zaca nagana para laacaʼ guni perdonarcaʼ laanu ora guininu o gúninu xiixa ni guchiichi laacaʼ. (Biiyaʼ cuadru ni láʼ «Ni naquiiñeʼ ganna ca padre»).

¿XI MAʼ BIZÍʼDINU?

19. ¿Ximodo zanda gusiéchenu ladxidóʼ ca hermanu stinu?

¹⁹ Casi maʼ bidúʼyanu, nuu biaje zaca nagana para laanu gudiʼnu conseju ni gacané. Guiranu nácanu binni ruchee, cásica ca ni rudii conseju ne zaqueca ca ni ricaa ni. Nga runi, cadi guiaandaʼ laanu ca ni maʼ bizíʼdinu lu artículo riʼ. Ora gudiʼnu conseju tuuxa la? gúninu ni purtiʼ nadxiinu laa. Laaca naquiiñeʼ guidúʼyanu pa dxandíʼ caquiiñebe ni ne tuu nga naquiiñeʼ gudii conseju laabe. Ante gudiʼnu ti conseju, guinabadiidxanu binni ca ne gucaadiaga chaahuinu laa para gánnanu xi guendanagana cadiʼdiʼ. Gúninu stipa guiénenu ca hermanu stinu. Gácanu nachaʼhuiʼ né laacaʼ ne gácanu xhamígucaʼ. Cadi guiaandaʼ laanu racaláʼdxinu gudiʼnu conseju ni gacané ne ni gusiecheʼ ladxidóʼ ca hermanu (Prov. 27:9).