Ximodo zanda gudiʼnu conseju galán

1. ¿Tuu nga caquiiñeʼ gudii conseju xcaadxi binni, ne xiñee?

NUU binni la? qué raca nagana para laa gudii conseju ne xcaadxi la? qué ridxélacaʼ ximodo gúnicaʼ ni. Peru guiranu nga ziuu biaje zudiʼnu conseju. ¿Xiñee yaʼ? Purtiʼ Jesús guníʼ cani dxandíʼ xpínnibe zusihuínnicaʼ dxandíʼ nadxiisaacaʼ (Juan 13:35). Ne ti modo zanda gusihuínninu nadxiinu ca hermanu stinu nga ra gudiʼnu laacaʼ conseju ora peʼ caquiiñecaʼ ni. Stiidxaʼ Dios ná: «Nabé sicarú nga conseju ni ricaa binni de ti xhamigu» (Prov. 27:9).

2. ¿Xi caquiiñeʼ ganna ca ancianu gúnicaʼ, ne xiñee? (Laaca zanda gúʼyaluʼ cuadru ni láʼ «Ximodo zanda gudiiluʼ conseju lu reunión ni raca ndaaniʼ semana»).

² Naquiiñeʼ gana ca ancianu ximodo gudiicaʼ conseju galán purtiʼ maʼ bidii Jehová ne Jesús laacaʼ dxiiñaʼ de gápacaʼ ca dendxuhuiiniʼ ndaaniʼ congregación (1 Ped. 5:2, 3). ¿Ximodo rúnicabe dxiiñaʼ riʼ? Ti modo rúnicabe ni nga ra gudiicabe discursu ni napa conseju ni zeeda lu Biblia. Sti modo rúnicabe ni nga ra gudiicabe conseju cada tobi de ca dendxuhuiiniʼ ni nuu ndaaniʼ congregación dede né ca ni maʼ bixeleʼ de xquidxi Dios. ¿Ximodo zanda gudii ca ancianu, ne guiráʼ xixenu conseju galán ora peʼ caquiiñeʼ tuuxa ni?

3. a) ¿Ximodo zanda guizíʼdinu gudiʼnu conseju galán? (Isaías 9:6; laaca zanda gúʼyaluʼ cuadru ni láʼ «Chinándanu ejemplu stiʼ Jesús ora gudiʼnu conseju»). b) ¿Xi zadúʼyanu lu artículo riʼ?

³ Zanda guizíʼdinu ximodo gudiʼnu conseju galán ra guni estudiarnu ejemplu stiʼ ca binni ni riete lu Biblia. Ejemplu ni jma galán ni nápanu nga stiʼ Jesús ne Biblia ná laabe nga «ni jma nanna gudii conseju (biindaʼ Isaías 9:6). Lu artículo riʼ, zadúʼyanu xi gúninu ora guinabaʼ tuuxa laanu conseju ne ximodo zanda gudiʼnu ti conseju ora cadi canábacabe ni laanu. Laaca zadúʼyanu pabiáʼ risaca gudiʼnu ti conseju ora peʼ caquiiñeʼ gúninu ni ne modo jma jneza gúninu ni.

ORA GUINABAʼ TUUXA GUDIʼNU LAA TI CONSEJU

4, 5. ¿Xi caquiiñeʼ guiníʼ íquenu ora guinabaʼ tuuxa laanu ti conseju? Bizeeteʼ ti ejemplu.

⁴ ¿Xii nga ni naquiiñeʼ gúninu ora guinabaʼ tuuxa gudiʼnu laa ti conseju? Zándaca guizáʼ guiéchenu ne nagueendaca gacaláʼdxinu gábinu laa xi guni. Peru ni jma galán gúninu nga guiníʼ íquenu: «¿Ñee nannaʼ guiráʼ ni cazaaca para gudieeʼ ti conseju galán la?». Nuu biaje ni jma galán zanda gúninu nga gacanenu binni ca guidxela tuuxa ni huadiʼdiʼ ra cadíʼdibe para gudii laabe conseju ni caquiiñebe.

⁵ Guzéʼtenu ti ejemplu. Guiníʼ íquenu napa ti xhamígunu ti guendahuará malu. Ti dxi gúdxibe laanu maʼ biiyabe xi tratamientu nuu para guendahuará stibe ne gunabadiidxabe laanu xi tratamientu jma galán guicaabe. Zándaca laanu maʼ nánnanu xi tratamientu nicaanu. Peru cumu cadi doctor laanu la? qué gánnanu stale cosa de guendahuará ca, ni jma galán zanda gúninu nga gacanenu xhamígunu guidxela tuuxa ni nanna de laani.

6. ¿Xiñee nuu biaje jma galán cuézanu ante gudiʼnu ti conseju?

⁶ Zándaca guiníʼ íquenu maʼ nánnanu xi gúninu o xi guininu para gudiʼnu ti conseju tuuxa. Neca zacá, zándaca guiníʼ íquenu cuézanu ante gudiʼnu conseju ca. ¿Xiñee yaʼ? Purtiʼ casi ná Proverbios 15:28, «ladxidóʼ binni ni runi ni jneza la? riníʼ ique ante guicabi». Nga runi neca guiníʼ íquenu nánnanu xi gábinu laabe la? galán cueenu tiempu guni investigarnu, guni orarnu ne guiníʼ íquenu de laani. Zacá ca conseju ni gudiʼnu zusihuínnicani modo riníʼ ique Jehová. Yanna guidúʼyanu ni bizaaca profeta Natán.

7. ¿Xi rusiidiʼ ejemplu stiʼ Natán laanu?

⁷ Ora gudxi rey David Natán racalaʼdxiʼ gucuí ti templu para gaca adorar Jehová, nagueendaca gudxi Natán laabe galán ni cá íquebe gúnibe. Peru cadi nga diʼ nga ni racalaʼdxiʼ Jehová. Ni jma galán ñuni Natán nga ninabadiidxabe Jehová ante nicábibe David (1 Crón. 17:1-4). Rusiidiʼ relatu riʼ laanu, ora guinabaʼ tuuxa laanu ti conseju, galán cadi casi ziuunu gundaa ruaanu xiixa diidxaʼ (Sant. 1:19).

8. ¿Gunáʼ nga sti razón nápanu para gápanu cuidadu ora gudiʼnu ti conseju tuuxa?

⁸ ¿Gunáʼ nga stiʼ razón nápanu para gápanu cuidadu ora gudiʼnu ti conseju tuuxa? Pa cadi jneza conseju ni gudiʼnu tuuxa laaca zápanu donda pa guizaaca xiixa ni cadi jneza pur yenándabe conseju ca. Nga runi risaca guiníʼ ique chaahuinu ante gudiʼnu ti conseju tuuxa.

XIMODO ZANDA GUDIʼNU TI CONSEJU ORA CADI CANÁBACABE NI LAANU

9. ¿Xi caquiiñeʼ ganna dxichi ca ancianu ante gudiicaʼ conseju ti hermanu? (Gálatas 6:1).

⁹ Nuu biaje ca ancianu ca nga naquiiñeʼ guidxíñacaʼ ne gudiicaʼ ti conseju ti hermanu ni cayuuyacaʼ cuchee casi riete lu Gálatas 6:1 (biindaʼ ni). Ti nota de estudiu stiʼ versículo riʼ cusiene raríʼ caniʼni de ti binni ni cadi jneza modo canazá peru caʼruʼ guni ti pecadu grave. Ni racalaʼdxiʼ ca ancianu ca nga gacanecaʼ laabe sabe lu neza ni ziné laabe lu guendanabani ni qué zaluxe (Sant. 5:19, 20). Primé, caquiiñeʼ guʼyaʼ ca ancianu pa dxandíʼ cuchee hermanu ca o sin gucheené Dios gucuaa ti decisión ni cada xpinni Cristu naquiiñeʼ guicaa. Cadi guianda laanu, maʼ bidii Jehová laanu derechu de cuinu xi zanda gúninu pur ni maʼ bizíʼdinu de lu Biblia (Rom. 14:1-4). Peru, pa guʼyaʼ ca ancianu dxandíʼ cucheebe, ¿ximodo nga jma jneza gudiicabe conseju laabe yaʼ?

10-12. ¿Xi caquiiñeʼ guni ca ancianu ora gudiicaʼ conseju tuuxa ni cadi canabaʼ ni laacaʼ? Bizeeteʼ ti ejemplu (laaca zanda gúʼyaluʼ ca imagen ca).

¹⁰ Nuu biaje raca nagana para ca ancianu gudiicaʼ conseju tuuxa ni cadi canabaʼ ni laacaʼ. ¿Xiñee yaʼ? Purtiʼ apóstol Pablo guníʼ zándaca guchee ti binni si gudii cuenta ne pur nga zándaca guiníʼ ique cadi caquiiñeʼ gudiicabe laa conseju. Nga runi ante gudii ca ancianu laabe conseju la? caquiiñeʼ gúnicaʼ caadxi cosa para cadi gaca nagana para binni ca guicaa conseju ni cudiicabe laa.

¹¹ Guzéʼtenu ti ejemplu. Para ganda guzulú gudxiibaʼ ti campesinu semiá lu ti layú naguidxi, primé rutiidibe aradu lu layú ca para ganda iguudxini ne chuʼni listu para ganda gaca dxiiñaʼ luni, despué rudxiibabe semiá ca ne últimu la? ruzeebe ni. Zacaca nga ora gudii ti ancianu ti conseju tuuxa ni cadi canabaʼ ni laabe, naquiiñeʼ gúnibe caadxi cosa para cadi gaca nagana para hermanu ca guicaa conseju casi ñaca «caguube listu layú ca». Ne ora guʼyaʼ ancianu ca zanda guiniʼné laabe la? zabi laabe pabiáʼ rusisaca dxiiñaʼ ni rúnibe ne pabiáʼ rizaalaʼdxiʼ laabe ne racalaʼdxiʼ guiniʼné laabe de xiixa. Pa ancianu ni chigudii conseju ca runibiáʼcabe laa casi ti binni ni riníʼ né stale cariñu ne nachaʼhuiʼ qué zaca nagana para binni chigudiibe conseju ca gucaadiaga laabe.

¹² Ora maʼ caníʼnebe hermanu ca zuyúbibe cadi gaca nagana para laa chinanda conseju ni cudiibe laa ra gusietenaláʼdxibe laa, guiranu nga rucheʼnu ne ziuu biaje caquiiñeʼ gudiicabe laanu conseju, zacá nga casi xa ñaca «cucuudxibe layú ca» (Rom. 3:23). Zaquiiñebe Biblia para gábibe laa para cuchee peru zúnibe ni né diidxaʼ nadóʼ ne stale respetu. Ora maʼ bidii hermanu ca cuenta paraa cuchee la? zusiénebe laa xi caquiiñeʼ guni para gusaana de guchee, zacá nga casi xa ñaca «cudxiibabe semiá que». Ne últimu la? zaguube gana hermanu ca pur ca cosa galán ni cayuni ne zuni orárcabe juntu, zacá nga casi xa ñaca «cuzeebe semiá que» (Sant. 5:15).

13. ¿Xi zanda guni ca ancianu para gánnacaʼ pa biene chaʼhuiʼ binni ca conseju ni bidiicabe laa?

¹³ Zándaca ziuu biaje zudii ti ancianu ti conseju tuuxa hermanu peru gadxé ni guiene hermanu ca. ¿Xi zanda guni ca ancianu para cadi guizaaca ndiʼ yaʼ? Né diidxaʼ nadóʼ zanda gúnicabe caadxi pregunta binni ca para gúʼyacabe pa cayene chaahuiʼ conseju ni cudiicabe laa ne nanna ximodo chinanda ni (Ecl. 12:11).

GUDIʼNU CONSEJU ORA PEʼ CAQUIIÑECABE NI NE MODO JMA JNEZA GÚNINU NI

14. ¿Xiñee cadi naquiiñeʼ gudiʼnu ti conseju ora cadxiichinu?

¹⁴ Cumu guiranu nácanu binni ruchee la? zúninu o zaninu xiixa ni guchiichi xcaadxi binni (Col. 3:13). Ruzeeteʼ Biblia ziuu biaje zuni binni xiixa o zaníʼ xiixa ni zuchiichi laanu (Efes. 4:26). Peru naquiiñeʼ gucueezanu laanu ne cadi gudiʼnu ti conseju ora cadxiichinu. ¿Xiñee yaʼ? Purtiʼ «ora cadxiichi binni la? qué zanda guni ni riuulaʼdxiʼ Dios» (Sant. 1:20). Pa gudiʼnu ti conseju ora cadxiichinu zándaca lugar de guni chaahuinu guendanagana ca jmaruʼ si zusiroobanu ni. Peru nga qué riníʼ diʼ qué lica zábinu binni ni bichiichi laanu ca ximodo cayuni sentirnu. Ni jma galán nga cuézanu ora maʼ cadi cadxiichinu oracaruʼ guinínenu laabe. Guidúʼyanu xi zanda guizíʼdinu de Elihú, ti hombre ni bidii conseju galán Job.

15. ¿Xi rusiidiʼ ejemplu stiʼ Elihú laanu? (Laaca zanda gúʼyaluʼ imagen ca).

¹⁵ Stale dxi bicaadiaga Elihú ximodo nuu Job gusihuinni qué gapa donda pur ca cosa ni caníʼ ca ni ná xhamigu laabe. Neca biá Elihú Job peru laaca bidxiichinebe laa purtiʼ para gusihuinni qué gapa donda guníʼ caadxi cosa ni cadi dxandíʼ de Jehová. Neca zacá, gulézabe né stale paciencia dede ora guca caber laabe guiniʼbe, óraque ruʼ né stale paciencia ne respetu bidiibe conseju Job (Job 32:2; 33:1-7). Rusiidiʼ ejemplu stiʼ Elihú laanu ti cosa nabé risaca, gudiʼnu conseju ora jma galán gúninu ni ne gúninu ni jneza, ni caninu nga: né respetu ne guendarannaxhii (Ecl. 3:1, 7).

CADI GUSAANA DE GUICAANU NE GUDIʼNU CONSEJU GALÁN

16. ¿Xi rusiidiʼ Salmo 32:8 laanu?

¹⁶ Textu stiʼ artículo riʼ ruzeeteʼ rudii Jehová laanu conseju ne qué raxhalú luguianu (biindaʼ Salmo 32:8). Ndiʼ riníʼ ora rudiibe laanu conseju qué rusaana de gacanebe laanu para chinándanu ni. ¡Guizáʼ galán ejemplu stiʼ Jehová! Ora gudiʼnu conseju tuuxa gúninu casi runi Jehová ne cadi gusaana de gacanenu binni ca ti ganda chinanda conseju ca.

17. ¿Ximodo zeeda gaca ca ancianu ora rudiicaʼ conseju ni peʼ caquíʼñenu ne ni zeeda lu Biblia? (Isaías 32:1, 2).

¹⁷ Tiempu riʼ nga jma caquiiñeʼ gudiʼnu ne guicaanu conseju galán (2 Tim. 3:1). Ca ancianu ni rudii conseju ni peʼ caquíʼñenu ne ni zeeda lu Biblia zeeda gácacaʼ «casi nisa ziguxooñeʼ ndaaniʼ ti guidxi ra gastiʼ nisa» (biindaʼ Isaías 32:1, 2). Nabé rudiʼnu xquixe peʼ Jehová purtiʼ nápanu xhamígunu neca nánnacaʼ xii nga racaláʼdxinu gucaadiáganu peru rábicaʼ laanu xi caquiiñeʼ gúninu. Nabé risaca ca diidxaʼ ni rábicabe laanu zeeda gácacani «casi manzana de oro ni nuu ndaaniʼ ti adorno de plata» (Prov. 25:11). Nga runi cadi gusaana de guizíʼdinu gácanu binni nuu xpiaaniʼ ora gudiʼnu ne guicaanu conseju galán.