ARTÍCULO DE ESTUDIU 28
CANCIÓN 88 Bisiidiʼ naa ca neza stiluʼ
Xiñee naquiiñeʼ guinábanu conseju
«Ti binni nuu xpiaaniʼ rinabaʼ gudiicabe laa conseju» (PROV. 13:10).
TEMA
Xi naquiiñeʼ gúninu para cueendunu ni galán ora gudiicabe laanu conseju.
1. ¿Xi zacané laanu guicaanu decisión jneza ne guiree guiráʼ ni gúninu jneza? (Proverbios 13:10; 15:22).
GUIRANU racaláʼdxinu guicaanu decisión jneza ne guiree guiráʼ ni gúninu jneza. Ne para ganda gácani la? Stiidxaʼ Dios cayabi laanu naquiiñeʼ guinábanu conseju (biindaʼ Proverbios 13:10; 15:22).
2. ¿Xi maʼ guníʼ Jehová zuni?
2 Jehová, Bixhózenu ni nuu guibáʼ, laasi nga zanda gudii laanu conseju ni gacané laanu. Nga runi, nabé risaca nga guni orarnu laabe ne guinábanu laabe gudiibe laanu guendabiaaniʼ. Ne laapebe maʼ guniʼbe: «Zudieeʼ conseju lii ne qué zaxhaluáʼ luguialuʼ» (Sal. 32:8). Ndiʼ riníʼ rizaalaʼdxiʼ Jehová laanu ne nuucabe listu para gudiibe laanu conseju ni peʼ caquíʼñenu ne ora peʼ caquíʼñenu ni, ne racanebe laanu chinándanu ni.
3. ¿Xi chiguicábinu lu artículo riʼ?
3 Lu artículo riʼ zaquíʼñenu Stiidxaʼ Dios para guicábinu tapa pregunta ni zándaca huaníʼ íquenu: primé, «¿xi cualidad naquiiñeʼ gapaʼ pa racalaʼdxeʼ gacané ca conseju galán ni gudiicabe naa?», guiropa, «¿tu laa zanda gudii conseju galán naa?», guionna, «¿xiñee galán gusihuinneʼ dxandíʼ peʼ racalaʼdxeʼ chinandaʼ conseju galán ni gudiicabe naa?» Ne guidapa, «¿xiñee cadi naquiiñeʼ gudieeʼ lugar guicaa xcaadxi decisión pur naa?».
«¿XI CUALIDAD NAQUIIÑEʼ GAPAʼ?»
4. ¿Xi cualidad naquiiñeʼ gápanu pa racaláʼdxinu gacané ca conseju ni gudiicabe laanu?
4 Pa racaláʼdxinu gacané ca conseju galán ni gudiicabe laanu, caquiiñeʼ gácanu humilde. Caquiiñeʼ gánnanu ziuu biaje jma jneza ca decisión zacaanu pa guinábanu conseju ti binni ni jma napa experiencia o ni jma nanna que laanu. Pa cadi humilde laanu, qué zanda gacané Jehová laanu ne qué zinándanu ca conseju ni guidúʼndanu lu Stiidxaʼ (Miq. 6:8; 1 Ped. 5:5). Peru, pa nácanu humilde la? ziuʼnu listu para gucaadiáganu ne chinándanu ca conseju ni zeeda lu Biblia.
5. ¿Xi ñándaca nuuca rey David ñaca orgulloso?
5 Guidúʼyanu xi zanda guizíʼdinu de ejemplu stiʼ rey David, laa guca humilde neca biʼniʼ stale cosa galán ne ni bidxagayaa binni. Ante gácabe rey, maca nácabe músicu ne nabé runibiáʼ binni laabe pur modo ruxhídxibe, ne dede guyebe nezalú rey Saúl para guxhídxibe (1 Sam. 16:18, 19). Dxi gulí Jehová laabe para gácabe rey, bidii Jehová laabe espíritu stiʼ para gápabe stipa (1 Sam. 16:11-13). Ne nabé bisisaca ca binni guidxi que David purtiʼ biʼniʼ ganarbe stale de ca enemigu sticaʼ, casi Goliat, ti gigante filisteu (1 Sam. 17:37, 50; 18:7). Pa ñaca David orgulloso la? ñándaca niníʼ ique: «Laguuyaʼ guiráʼ ni maʼ bineʼ, cadi caquiiñeʼ gudiicabe naa conseju». Peru qué niníʼ ique David zacá purtiʼ guca humilde.
6. ¿Ximodo nánnanu rinanda David conseju ni gudiicabe laa? (Laaca zanda gúʼyaluʼ imagen ca).
6 Dxi maʼ naca David rey, gulibe caadxi hombre para gudiicaʼ conseju laabe (1 Crón. 27:32-34). Ne qué ridxagayaanu ni biʼniʼ David purtiʼ maca dede ante gácabe rey, siempre guyuube dispuestu gucaadiágabe conseju ni gudiicabe laabe, gastiʼ naca pa bidii ti hombre ni laabe o ti gunaa. Casi dxi bidii Abigaíl conseju laabe, Abigaíl nga xheelaʼ Nabal ti hombre qué iquiiñeʼ ni ruyubi puru para laasi ne qué runi respetar binni. Guca David humilde ne bicaadiaga conseju ni bidii gunaa riʼ laa ne pur yenándabe conseju que maʼ qué ñúnibe ti cosa feu (1 Sam. 25:2, 3, 21-25, 32-34).
Guca David humilde ne yenanda conseju ni bidii Abigaíl laa. (Biiyaʼ párrafo 6).
7. ¿Xi rusiidiʼ ejemplu stiʼ David laanu? (Eclesiastés 4:13; laaca zanda gúʼyaluʼ ca imagen ca).
7 ¿Xi rusiidiʼ ejemplu stiʼ David laanu? Primé, pa nápanu xiixa gracia o autoridad cadi guiníʼ íquenu nánnanu guiráʼ cosa ne cadi caquiiñeʼ gudiicabe laanu conseju. Guiropa, naquiiñeʼ chuʼnu dispuestu gucaadiáganu conseju galán ni gudiicabe laanu gastiʼ naca tu gudiini laanu (biindaʼ Eclesiastés 4:13). Pa gúninu ca ni bizéʼtenu riʼ zacanécani laanu cadi gúninu xiixa cosa malu ni guniná laanu o ni guniná xcaadxi binni.
Caquiiñeʼ chuʼnu dispuestu gucaadiáganu intiica conseju galán gudiicabe laanu, gastiʼ naca tu gudiini laanu. (Biiyaʼ párrafo 7).c
«¿TU LAA ZANDA GUDII NAA CONSEJU GALÁN?»
8. ¿Xiñee biaʼsi peʼ Jonatán nga binni ni caquiiñeʼ gudii conseju David?
8 Guidúʼyanu xiruʼ zanda guizíʼdinu de ejemplu stiʼ David. Primé, bicaadiágabe conseju stiʼ ca binni ni naca xhamigu Jehová ne guiropa, bicaadiágabe conseju stiʼ ca binni ni nanna ne riene ni cazaacabe que. Guzéʼtenu ti ejemplu, ora gucaláʼdxibe gánnabe pa maʼ zanda guidxíñabe rey Saúl para gacachaahuiʼ guendanagana ni nápacabe, biyúbibe gudii Jonatán, xiiñiʼ Saúl, laabe conseju. ¿Xiñee biaʼsi peʼ Jonatán nga binni ni caquiiñeʼ gudii laabe conseju que yaʼ? Purtiʼ naca Jonatán xhamigu Jehová ne laaca runibiáʼ chaahuiʼ Saúl (1 Sam. 20:9-13). ¿Ximodo zanda chinándanu ejemplu stiʼ David yaʼ?
9. Ora caquíʼñenu ti conseju, ¿tu laa zanda guinábanu ni? Bizeeteʼ ti ejemplu (Proverbios 13:20).
9 Ora caquíʼñenu ti conseju la? galán guinábanu ni, primé, ti binni ni naca xhamigu Jehová ne guiropa, guinábanu ni ti binni ni zanda gacané laanu o ni huadiʼdiʼ ra cadídinu (biindaʼ Proverbios 13:20).a Guzéʼtenu ti ejemplu, guiníʼ íquenu ti hermanu ni racalaʼdxiʼ guichaganáʼ. ¿Tu zanda gudii conseju laabe yaʼ? Zanda gudii ti xhamígube solteru ni laabe pa zeeda ni lu Biblia. Peru pa guinábabe conseju ti guendaxheelaʼ ni nuu gaxha de Jehová, ni runibiáʼ laabe ne maʼ zinecaʼ ti tiempu de bichaganacaʼ ne nabánicaʼ nayecheʼ la? zándaca zudiicaʼ laabe conseju ni peʼ caquiiñebe ne ni zacané laabe.
10. ¿Xi chiguidúʼyanu?
10 Maʼ bidúʼyanu ti cualidad ni caquiiñeʼ gápanu ne tu laa gudii laanu conseju galán ora caquíʼñenu ni. Yanna, guidúʼyanu xiñee galán gusihuínninu dxandíʼ peʼ racaláʼdxinu chinándanu conseju galán ni gudiicabe laanu ne pa jneza nga gudiʼnu lugar guicaa xcaadxi binni decisión pur laanu.
«¿XIÑEE GALÁN GUSIHUÍNNINU DXANDÍʼ PEʼ RACALÁʼDXINU CHINÁNDANU CONSEJU GALÁN NI GUDIICABE LAANU?»
11, 12. a) ¿Xi cadi naquiiñeʼ gúninu? b) ¿Xi biʼniʼ Rehoboam ora gucuaa ti decisión risaca?
11 Nuu biaje ziuu tu zanabaʼ gudiicabe laa conseju. Peru ni dxandíʼ la? mápeca gucuaa ti decisión ne ni cabeza nga guni apoyárcabe laa né decisión ni gucuaa. Ti binni ni runi ni bizéʼtenu riʼ la? qué rusihuinni dxandíʼ peʼ racalaʼdxiʼ chinanda conseju galán ni gudiicabe laa. Ne ejemplu ni cadi jneza stiʼ rey Rehoboam zacané laanu gatananu para cadi gúninu ni.
12 Guca Rehoboam rey stiʼ guidxi Israel despué de guti Salomón, bixhoze. Tiempu que, guizáʼ galán nuu guidxi que, peru guca quejar ca israelita ne guniʼcaʼ guizáʼ stale dxiiñaʼ gunabaʼ Salomón laacaʼ gúnicaʼ. Ngue runi gunábacabe Rehoboam cuee caadxi dxiiñaʼ rúnicabe. Bicabi rey que laacabe caquiiñeʼ tiempu para guiníʼ ique ni. Ne galán ni biʼniʼ rey que, purtiʼ gunábabe conseju ca ancianu ni maca gucané, bixhózebe, Salomón (1 Rey. 12:2-7). Peru despué qué ninabe ninándabe ca conseju ni bidiicabe laabe. ¿Xiñee yaʼ? ¿Ñee maca gucuaabe decisión xi gúnibe ne cuyúbibe chuʼ tu guni apoyar laabe la? Pa zacá ni, nga racané laanu gánnanu xiñee despué gunabadiidxabe ca xhamígube ni jma nahuiiniʼ ne laacaʼ gúdxicaʼ laabe gúnibe ni peʼ racaláʼdxibe gúnibe (1 Rey. 12:8-14). Cumu yenanda Rehoboam ni gúdxicabe laa que la? ngue runi stale de ca binni guidxi que maʼ qué ninacaʼ nuzuubacaʼ diidxaʼ ne tiempu biʼniʼ mandar Rehoboam guizáʼ stale guendanagana gupa guidxi que (1 Rey. 12:16-19).
13. ¿Xi zacané laanu gánnanu pa dxandíʼ peʼ racaláʼdxinu guicaanu conseju ni gudiicabe laanu?
13 ¿Xi rusiidiʼ ni bizaaca Rehoboam laanu? Pa guinábanu ti conseju, naquiiñeʼ gusihuínninu dxandíʼ peʼ racaláʼdxinu guicaanu conseju ca, ni caninu raríʼ nga cadi naquiiñeʼ guinábanu conseju pa maʼ gucuaanu ti decisión. Galán guiníʼ íquenu: «Pa guinabaʼ gudiicabe naa ti conseju ne qué gábicabe naa ni peʼ racalaʼdxeʼ gunadiagaʼ, ¿ñee nagueendaca rucaanaʼyaʼ conseju ca la?». Guzéʼtenu ti ejemplu.
14. ¿Xi cadi naquiiñeʼ guiaandaʼ laanu? Bizeeteʼ ti ejemplu (laaca zanda gúʼyaluʼ imagen ca).
14 Guníʼ ique cudiicabe ti hermanu ti dxiiñaʼ ra zaguíxecabe laa galán peru pur dxiiñaʼ que naquiiñeʼ chebe sti lugar ne xadxí zusaanabe familia stibe. Ante guiniʼbe pa zacaabe dxiiñaʼ que, gunábabe conseju ti ancianu. Biquiiñeʼ hermanu riʼ Biblia para gusietenalaʼdxiʼ laabe pabiáʼ risaca gacanebe familia stibe chuʼ gaxha de Jehová (Efes. 6:4; 1 Tim. 5:8). Qué ñuuláʼdxibe ni gudxi ancianu que laabe ne gunabadiidxarube xcadxi hermanu dede ra biree tobi ni gudxi laabe zaa guicaabe dxiiñaʼ que. ¿Ñee canábabe ti conseju la? o ni racaláʼdxibe nga gabi tuuxa laabe ni maca gudixhe íquebe gúnibe? Cadi guiaandaʼ laanu riguite ladxidóʼ binni laa (Jer. 17:9). Nuu biaje, conseju ni jma peʼ caquíʼñenu, nga nga ni qué racaláʼdxinu gábicabe laanu.
¿Ñee ti conseju nga cuyúbibe la? o ni racaláʼdxibe nga gabi tuuxa laabe ni maca gudixhe íquebe gúnibe? (Biiyaʼ párrafo 14).
«¿ÑEE GALÁN NGA GUINABAʼ TUUXA GUICAA DECISIÓN PUR NAA LA?»
15. ¿Xi cadi naquiiñeʼ gúninu, ne xiñee?
15 Ribeza Jehová cada xpinni Cristu nga guicaa decisión stiʼ (Gál. 6:4, 5). Casi maʼ bidúʼyanu, ante guicaanu xiixa decisión galán chinándanu ni ná Biblia ne zaqueca ni gabi ca hermanu ni maʼ biniisi lu Stiidxaʼ Dios laanu. Peru ti cosa ni cadi naquiiñeʼ gúninu nga guinábanu laacabe guicaacabe decisión pur laanu. Nga runi qué ziuudinu ra nuu ti binni ni nápanu confianza ne gábinu laa: «Pa ñácaluʼ naa, ¿xi decisión nicaaluʼ?». Laaca qué zúninu ni runi xcaadxi sin guiníʼ íquenu xi decisión ñuuláʼdxinu nicaanu.
16. ¿Xi decisión naquiiñeʼ guicaa ca xpinni Cristu de guidxi Corinto? (1 Corintios 8:7, 10:25, 26).
16 Guidúʼyanu ni bizaaca lu primé siglu, ndaaniʼ congregación ni guyuu ndaaniʼ guidxi Corinto. Caquiiñeʼ guicaa ca xpinni Cristu que ti decisión pa zocaʼ beela ni zándaca guca sacrificar para ca bidóʼ. Bicaa Pablo ra nuu ca xpinni Cristu que: «Laanu nánnanu qué risaca ti bidóʼ ndaaniʼ guidxilayú, ne tobi lucha si Dios nga nuu» (1 Cor. 8:4). Pur ngue, caadxi de ca xpinni Cristu que guníʼ íquecaʼ zanda gocaʼ beela ni sicaʼ ra luguiaa neca zándaca maʼ guca sacrificarni para ca bidóʼ. Xcaadxi gudixhe íquecaʼ cadi gocaʼ beela que purtiʼ zuchiiñaʼ conciencia sticaʼ laacaʼ (biindaʼ 1 Corintios 8:7, 10:25, 26). Gúcani ti decisión ni cada tobi de laacabe naquiiñeʼ guicaa. Gudxi Pablo ca xpinni Cristu de Corinto cadi guicaacaʼ decisión pur xcaadxi ne laaca cadi casi zecaʼ chinándacaʼ ni cayuni xcaadxi. Sicaríʼ bicaabe lu Romanos 14:10-12: «Cada tobi de laanu zabidxi Dios cuenta».
17. ¿Xi zándaca guizaacanu pa puru si ni runi xcaadxi nga rúninu? Bizeeteʼ ti ejemplu (laaca zanda gúʼyaluʼ ca imagen ca).
17 ¿Ñee laaca zándaca gueeda guizaacanu xiixa zacá tiempu riʼ la? Guiníʼ íquenu de ca cosa jma nahuiiniʼ zeeda lu rini. Guiráʼ xpinni Cristu naquiiñeʼ cuicaʼ pa zacaacaʼ ca cosa jma nahuiiniʼ zeeda lu rini o pa coʼ.b Zándaca gaca nagana para laanu guiene chaahuinu ni, peru decisión riʼ cada xpinni Cristu napa xidé guicaani (Rom. 14:4). Pa puru si ni runi xcaadxi nga gúninu la? qué zácanu ti binni nuu xpiaaniʼ. Para ganda gácanu ti binni nuu xpiaaniʼ caquiiñeʼ chinándanu ni ná Biblia ora guicaanu xiixa decisión (Heb. 5:14). Nga runi, pa caquiiñeʼ guicaanu xiixa decisión, primé ni naquiiñeʼ gúninu nga guyúbinu principiu ni zeeda lu Biblia ni zacané laanu gánnanu xi decisión guicaanu. Ne despué, pa guidúʼyanu caquiiñeruʼ gánnanu jma de laani, galán guinábanu conseju ti hermanu ni maʼ biniisi lu Stiidxaʼ Dios.
Despué de maʼ biʼniʼ investigarnu, oracaruʼ zanda guinábanu conseju tuuxa. (Biiyaʼ párrafo 17).
CADI GUSAANA DE GUINABANU CONSEJU
18. ¿Xi guiráʼ maʼ biʼniʼ Jehová pur laanu?
18 Rudii Jehová lugar laanu nga guicaanu decisión stinu, ne zacá rusihuínnibe nápabe confianza laanu. Para gacanebe laanu guibáninu galán maʼ bidiibe laanu Stiidxabe ne zaqueca rudiibe laanu xhamígunu ni maʼ biniisi lu Stiidxabe, ni racané laanu guiene chaahuinu ni ná ca principiu zeeda lu Biblia. Zacá rusihuinni Jehová rapa laanu casi runi ti hombre ni nadxii xiiñiʼ (Prov. 3:21-23). ¿Ximodo zanda gusihuínninu rudiʼnu xquixe peʼ laabe pur guiráʼ ni maʼ bidiibe laanu yaʼ?
19. ¿Ximodo zanda gusiéchenu Jehová?
19 Guizáʼ riecheʼ ca ni napa xiiñiʼ ora gúʼyacaʼ naca ca xiiñicaʼ xpinni Cristu ni maʼ biniisi lu Stiidxaʼ Dios, nuu xpiaanicaʼ ne nuuca listu para gacanecaʼ xcaadxi. Zacaca nga runi sentir Bixhózenu ni nuu guibáʼ, guizáʼ riéchebe ora ruuyabe ziniisinu lu Stiidxabe, rinábanu conseju ne ricaanu decisión ni rusisaca laabe.
CANCIÓN 127 Ximodo naquiiñeʼ gacaʼ
a Zándaca ziuu biaje galán nga guinábanu conseju binni ni cadi naca xpinni Jehová, zanda gacanécabe laanu guiénenu xiixa tema ni caníʼ de bueltu, medicina o sti cosa casi laacani.
b Zadxélaluʼ jma información ni caníʼ de laani lu libru ¡Zanda guibániluʼ nayecheʼ!, lección 39, punto 5 ne sección «Biiyaʼ xiruʼ zanda guiziidiluʼ».
c NI RIHUINNI LU CA IMAGEN RIʼ: Cudii ti ancianu conseju sti ancianu pur xiixa ni guníʼ lu reunión.