Ni rinabadiidxaʼ ca ni ruundaʼ

Ora bicaa David ca diidxaʼ ni zeeda lu Salmo 61:8 ra guníʼ qué ziuu dxi gusaana de gusisaca lá Dios, ¿ñee caníʼ íquebe qué ziuu dxi gátibe la?

Coʼ. Ni bicaa David ca dxandíʼ ni ne biaʼsi ni.

Guiníʼ íquenu ni bicaabe lu versículo riʼ ne lu xcaadxi. Sicaríʼ guniʼbe: «Qué ziuu dxi gusaanaʼ de guundaʼ para gusisacaʼ laluʼ, laga caguixeʼ ca voto stinneʼ guiráʼ dxi», «Rusisacaʼ lii de guidubi ladxiduáʼ, Jehová, Dios stinneʼ, ne qué ziuu dxi gusaana de gusisacaʼ laluʼ» ne «Zusisacaʼ laluʼ ne qué ziuu dxi gusaanaʼ de guneʼ ni» (Sal. 61:8; 86:12; 145:1, 2).

Ora bicaa David ca diidxaʼ ca qué niníʼ íquebe qué ziuu dxi gátibe. Gúnnabe ziuu ti dxi zátibe, purtiʼ pur pecadu rati binni. Ne laaca gunna David naca pecador (Gén. 3:3, 17-19; Sal. 51:4, 5). Ne qué ñaandaʼ laabe dede ca hombre ni bizuubaʼ stiidxaʼ Jehová —casi Abrahán, Isaac ne Jacob— gúticaʼ. Ngue runi bidiibe cuenta ra tidiʼ tiempu zátibe (Sal. 37:25; 39:4). Peru ca diidxaʼ ni zeeda lu Salmo 61:8, rusihuínnini gudixhe íquebe cadi gusaana de gusisácabe Dios biaʼ dxi guibánibe (2 Sam. 7:12).

Guyuu biaje bicaa David cosa ni bizaaca lu xquendanabani, casi ridúʼndanu lu encabezamientu stiʼ capítulo 18, 51 ne 52 stiʼ Salmos. Lu Salmo capítulo 23 ruzeetebe naca Jehová casi ti pastor ni rabi laabe pa neza sabe, rudii stipa laabe ne rapa ca dendxuʼ stiʼ. Zaqué nga rapa David ca dendxuʼ stiʼ ne pur ngue racaláʼdxibe gúnibe xhiiñaʼ Jehová biaʼ dxi guibánibe (Sal. 23:6).

Cadi guiaandaʼ laanu, Dios nga gucané David para ganna xi gucaa. Lade guiráʼ ni bicaa David zeeda profecía ni zaca cumplir ra tidiʼ tiempu. Guzéʼtenu ti ejemplu, lu Salmo 110, guníʼ David zedandá ti dxi zabí Señor stiʼ ladu derechu stiʼ Dios guibáʼ ne zacaa stale poder. Né poder ni gucuaabe cayuni mandarbe lade ca enemigu stiʼ Dios ne zuni ganarbe ra gunitilube laacaʼ. Zá Mesías de David, ne Mesías zuni mandar dede guibáʼ ne qué zusaana de gaca sacerdote (Sal. 110:1-6). Jesús bizeeteʼ de laa ngue caníʼ profecía ni zeeda lu Salmo 110 ne zaca cumplir ni luguiabe despué (Mat. 22:41-45).

Casi maʼ bidúʼyanu, gucané Jehová David para gucaa cosa ni bizaaca tiempu bibánibe ne ni zazaaca despué ora guiásabe de lade gueʼtuʼ ne qué zusaanabe de gusisácabe Jehová. ¿Ximodo racané ndiʼ laanu guiénenu ni cá lu Salmo 37:10, 11, 29 yaʼ? Ni ná ca versículo ca guca cumplir ca ni tiempu bibani ca israelita dxiqué ndaaniʼ guidxi Israel ne ximodo zaca cumplir ca ni despué lu guidubi Guidxilayú ora guni cumplir Dios ca promesa stiʼ (biiyaʼ lu revista riʼ párrafo 8 stiʼ artículo ni láʼ «Ziuuneluʼ naa ndaaniʼ Paraísu»).

Nga runi, Salmo 61:8 ne xcaadxi versículo casi laa ni, racané ca ni laanu gánnanu gucalaʼdxiʼ David gusisaca Jehová ndaaniʼ guidxi Israel laga nabani. Ne nga nga ni zúnibe despué, dxi guindisaʼ Jehová laabe de lade gueʼtuʼ.