Biiyacabe pabiáʼ nadxii ca hermanu laacabe

YOMARA, Marcelo ne Hiver bizaʼnaʼ guiónnacaʼ ne qué ruuyacaʼ, nabézacaʼ ndaaniʼ ti guidxihuiiniʼ de Guatemala. Bizulú Yomara biʼniʼ estudiarné ca Testigu, ne despué laaca biʼniʼ estudiar ca bizáʼnabe. Peru gúpacabe ti guendanagana, nin tobi de laacabe qué gánnacabe gúʼndacabe braille. Ngue runi hermanu ni bidii estudiu laacabe ruundané laacabe ca párrafo ne ca textu ni zeeda lu Biblia.

Guca nagana para laacabe chécabe reunión. Yoo stiʼ Reinu ni nuu jma gaxha de laacabe riaana ni 40 minutu ne qué zanda chécabe stúbicabe. Ngue runi guca turnar ca hermanu de congregación para chicaa ne chiné laacabe reunión. Ne dxi maʼ gucuaa guiónnacabe asignación lu reunión ni rápanu ndaaniʼ semana gucané ca hermanu laacabe guiziidicabe de memoria ni chiguiníʼcabe.

Lu beeu mayo iza 2019, bizulú gupa ca Testigu reunión ndaaniʼ guidxihuiiniʼ ra nabézacabe, ne ca dxi que yendeza ti guendaxheelaʼ de precursor raqué. Gudixhe ique guendaxheelaʼ riʼ gusiidiʼ guiónnacabe gucaacabe ne gúʼndacabe braille, neca qué gánnacaʼ. Ngue runi guyécabe ra ti biblioteca para guiziidicabe braille ne ximodo zanda gusiidicabe ni.

Lu chonna beeu maʼ nanna guiónnacabe gúʼndacabe braille ne ngue gucané laacabe guni progresárcabe jma nagueenda.a Yanna maʼ precursor regular Yomara, Marcelo ne Hiver, ne Marcelo la? maʼ naca siervu ministerial. Ne guiráʼ semana riquiiñecabe stale tiempu para gúnicabe xhiiñaʼ Jehová. Ne rúnicabe ni né stale gana dede riguucabe gana xcaadxi.

Guiónnacabe rudiicabe xquixe peʼ ca hermanu de congregación pur huayacanecaʼ laacabe ne rusihuínnicaʼ nadxiicaʼ laacabe. Yomara guníʼ: «Dede dxi binibiaʼdu ca hermanu dxandíʼ rusihuínnicabe nadxiicabe laadu». Ne sicaríʼ guníʼ Marcelo: «Nápadu xhamígudu ndaaniʼ congregación, ne nuudu ndaaniʼ ti familia ni nuu lu guidubi Guidxilayú ni nuu tobi si purtiʼ nadxiisaadu». Yomara ne ca bizaʼnaʼ guizáʼ maʼ racaláʼdxicaʼ guedandá dxi gaca Guidxilayú riʼ ti paraísu (Sal. 37:10, 11; Is. 35:5).