ARTÍCULO DE ESTUDIU 49
¿Ñee rucaadiaga Jehová ca oración stinneʼ la?
«Laatu zucaarídxitu naa, zeedatu para guni orartu naa, ne naa zucaadiagaʼ laatu» (JER. 29:12).
CANCIÓN 41 Bixhozeʼ, bicaadiaga naa
NI ZAZÍʼDINUa
1, 2. ¿Xiñee zándaca guiníʼ íquenu qué ricabi Jehová ca oración stinu?
«Guyuu nayecheʼ ora guʼnuʼ ni ná Jehová, ne laa zudii lii guiráʼ ni guinabaʼ ladxidoʼloʼ» (Sal. 37:4) ¡Guizáʼ sicarú promesa riʼ! Peru ¿ñee riníʼ nga nagueendaca zudii Jehová laanu guiráʼ ni guinábanu laa la? Galán guiníʼ íquenu nga. ¿Xiñee yaʼ? Guníʼ ique ca ejemplu chiguzéʼtenu riʼ. Cayabi ti hermana soltera Jehová racalaʼdxiʼ cheʼ Escuela para Evangelizadores del Reino, peru ridiʼdiʼ iza ne cadi cayuni invitárcabe laa. Huará ti hermanu joven ne canábabe Jehová guiándabe para ganda gúnibe jma dxiiñaʼ ndaaniʼ congregación, peru zaquesi nuube. Cayuni orar ti guendaxheelaʼ para cadi gusaana xiiñicaʼ xquidxi Dios, peru bixeleʼ xiiñicabe riʼ de Jehová.
2 Zándaca gunábaluʼ Jehová xiixa peru caʼruʼ gudiibe ni lii. Ne pur nga zándaca guiníʼ íqueluʼ ricabi Jehová oración stiʼ xcaadxi binni peru stiluʼ coʼ, o zándaca guiníʼ íqueluʼ cadi cacábibe lii purtiʼ bíʼniluʼ xiixa ni cadi jneza. Zaca peʼ biʼniʼ sentir ti hermana láʼ Janice.b Laabe ne xheelabe gúdxicabe Jehová racaláʼdxicabe chécabe Betel. Janice guníʼ: «Guníʼ iqueʼ qué zandaa zaniʼnécabe laadu». Peru gudiʼdiʼ beeu, gudiʼdiʼ iza ne qué nicaacabe nin ti invitación. Laabe guniʼbe: «Nabé triste guyuaaʼ ne qué ñeneʼ xiñee cazaaca ngue. Guníʼ iqueʼ pa bicheeniáʼ Jehová. Gudxeʼ Jehová xi peʼ ngue ni racalaʼdxeʼ, peru qué ñeneʼ xiñee caʼruʼ guicábibe naa».
3. ¿Xi zadúʼyanu lu artículo riʼ?
3 Zándaca nuu biaje riníʼ íquenu pa rucaadiaga Jehová ca oración stinu. Laaca zacá guníʼ ique caadxi xpinni Dios ni bibani dxiqué (Job 30:20; Sal. 22:2; Hab. 1:2). ¿Xi zanda gacané lii guni creluʼ ricabi Dios ca oración stiluʼ yaʼ? (Sal. 65:2). Primé, zadúʼyanu chonna cosa ni zacané laanu guicábinu pregunta ca: 1) xi ribézanu guni Jehová, 2) xi ribeza Jehová gúninu ne 3) xiñee nuu biaje caquiiñeʼ guchaʼnu ni rinábanu lu oración stinu.
NI ZANDA CUÉZANU GUNI JEHOVÁ
4. Casi ná Jeremías 29:12, ¿xi cayuni prometer Jehová laanu?
4 Cayuni prometer Jehová zucaadiaga ca oración stinu (biindaʼ Jeremías 29:12). Nadxii Dios stinu ca xpinni ne qué ziuu dxi gusaana de gucaadiaga ca oración stícabe (Sal. 10:17; 37:28). Peru qué riníʼ diʼ nga zudiibe laanu guiráʼ ni guinábanu laabe. Zándaca caquiiñeʼ cuézanu purtiʼ nuu caadxi de ca cosa ni canábanu Jehová yanna, zudiibe ca ni laanu dede ora maʼ nuunu ndaaniʼ guidxilayú cubi.
5. ¿Xi qué rusiaandaʼ Jehová ora rucaadiaga ca oración stinu?
5 Ora ricabi Jehová ca oración stinu qué rusiaandaʼ ni naguixhe ique guni (Is. 55:8, 9). Tobi de ca cosa ni racaláʼdxibe nga guibani hombre ne gunaa ni guzuubaʼ stiidxabe lu Guidxilayú riʼ, chuʼcaʼ nayecheʼ ne chuʼcaʼ tobi si ra gúnicaʼ ni nabe. Peru Binidxabaʼ guníʼ zabani binni jma galán pa guni ni ná ique (Gén. 3:1-5). Para guihuinni cadi dxandíʼ ni guníʼ Binidxabaʼ la? cudii Jehová lugar guni mandarsaa binni laa ne pur nga nuu stale guendanagana (Ecl. 8:9). Nánnanu qué zuni chaahuiʼ Jehová guiráʼ guendanagana ca yanna. Pa ñúnibe ni la? nuu tu niníʼ ique zanda guni mandarsaa binni laa ne zanda guni chaahuicaʼ ca guendanagana nuu lu Guidxilayú riʼ.
6. ¿Xiñee nanna dxíchinu jneza modo ricabi Jehová laanu ne rúnibe ni né guendarannaxhii?
6 Gadxé gadxé modo ricabi Jehová ca oración stinu. Guzéʼtenu ni bizaaca rey Ezequías, guca huarabe ne guizáʼ malu guyuube, gunábabe Jehová gusianda laabe ne laa bisianda laabe (2 Rey. 20:1-6). Peru ora gunabaʼ apóstol Pablo Jehová gaxhaʼ ti guichi ni daabi lu beela ladi, zándaca gúcani ti guendahuará ni gúpabe, qué ñaxha Jehová ni (2 Cor. 12:7-9). Cadi guiaandaʼ laanu ni bizaaca apóstol Santiago ne Pedro. Gucalaʼdxiʼ rey Herodes ñuuti laacabe. Neca biʼniʼ orar ca hermanu que pur Pedro ne zándaca laaca biʼniʼ orárcabe pur Santiago, peru Santiago biiticabe laa ne Pedro bilá pur ti milagru ni biʼniʼ Jehová (Hech. 12:1-11). Zándaca guiníʼ iquenu, ¿xiñee tobi si de laacabe bilá Jehová pue? Neca qué ruzeeteʼ Biblia gastiʼ de laani, peru nanna dxíchinu naca Jehová ti Dios «ni qué runi cosa malu» ne cásica gunnaxhiibe Pedro zaqueca gunnaxhiibe Santiago (Deut. 32:4; Apoc. 21:14).c Zándaca guicabi Jehová ca oración stinu de ti modo ni cadi cabézanu. Peru modo tiica si guicabi Jehová laanu, qué ridxiichinenu laabe purtiʼ nánnanu jneza modo ricábibe laanu ne rúnibe ni né guendarannaxhii (Job 33:13).
7. ¿Xi qué rúninu ne xiñee?
7 Rúninu stipa cadi guchaaganu guendanagana stinu né stiʼ xcaadxi. Zándaca guinábanu Jehová gacané laanu lu xiixa ra cadídinu peru cadi cacábibe laanu. Ne despué gúnnanu zacá gá ni gunabaʼ sti binni laabe ne ruluíʼ bicábibe laa. Nga peʼ nga ni bizaaca ti hermana láʼ Anna. Napa Matthew, xheelabe, cáncer ne biʼniʼ orarbe Jehová para guinábabe guianda. Laaca ca dxi que nuu xhupa hermana ni maʼ huaniisi ne laaca napacaʼ cáncer, nabé biʼniʼ orar Anna pur guiónnacabe. Bianda guiropaʼ hermana que, peru Matthew guti. Nacubi gá que, guníʼ ique Anna pa Jehová ngue gucané ca hermana que para biándacaʼ, ne pa zacá ni, xiñee qué ñanda xheelabe. Qué gánnanu xiñee bianda ca hermana riʼ, peru nuu ti cosa ni nánnanu: maʼ cadi candaa zunitilú Jehová guiráʼ ni cayuniná laanu yanna ne dxandi peʼ racaláʼdxibe guindísabe ca xpínnibe ni maʼ guti (Job 14:15).
8. a) Casi ná Isaías 43:2, ¿xi runi Jehová para gacané laanu? b) ¿Ximodo racané oración laanu ora rápanu guendanagana? (Biiyaʼ videu ni láʼ Racané oración laanu gudxíʼlunu ca guendanagana ni rápanu).
8 Qué zusaana Jehová de gacané laanu. Nadxii Jehová, Bixhózenu, laanu ne qué riuulaʼdxiʼ guʼyaʼ laanu cayacananu (Is. 63:9). Peru qué rulabe laanu de guiráʼ guendanagana rápanu, ni ruchaaga Biblia casi guiiguʼ ne bele (biindaʼ Isaías 43:2). Ni cayuni prometerbe laanu nga zacanebe laanu tídinu intiica guendanagana gápanu ne qué zudiibe lugar guniná ca ni laanu stale. Laaca rudii Jehová laanu espíritu stiʼ para gacané laanu guni huantarnu (Luc. 11:13; Filip. 4:13). Nga runi, nanna dxíchinu siempre zápanu ni caquíʼñenu para guni huantarnu ne cadi guixélenu de Jehová.d
NI RIBEZA JEHOVÁ GÚNINU
9. ¿Ximodo racané Santiago 1:6, 7 laanu gápanu confianza zacané Jehová laanu?
9 Ribeza Jehová gápanu confianza laa (Heb. 11:6). Nuu biaje ruluíʼ guizáʼ naroʼbaʼ ca guendanagana stinu dede riníʼ íquenu qué zacané Jehová laanu. Peru Biblia cayabi laanu zanda gacané poder stiʼ Dios laanu quíbanu ti muru (Sal. 18:29). Nga runi, cadi guiníʼ íquenu qué zacané Jehová laanu, sínuque naquiiñeʼ guni orarnu de guidubi ladxidoʼno ne gápanu fe ne confianza zacábibe ca oración stinu (biindaʼ Santiago 1:6, 7).
10. Bizeeteʼ ti ejemplu para gusiéneluʼ xi caquiiñeʼ gúninu despué de guni orarnu.
10 Ribeza Jehová gúninu xiixa despué de guinínenu laa. Guiníʼ íquenu ti hermanu ni racalaʼdxiʼ cheʼ asamblea regional ne canábabe Jehová ganda guicaabe permisu ra dxiiñaʼ. ¿Xi zanda guni Jehová para guicabi oración stibe yaʼ? Zándaca gudii laabe valor para guiníʼnebe jefe stibe. Peru naquiiñeʼ guni hermanu riʼ xiixa, naquiiñeʼ guiníʼnebe jefe stibe ne zándaca naquiiñeʼ gúnibe ni chupa chonna biaje. Dede zanda gábibe jefe stibe pa zanda guchaanebe tuuxa compañeru stibe de dxi. Ne pa caquiiñeʼ peʼ la? zanda gábibe laa cadi quixe laabe ca dxi qué zúnibe dxiiñaʼ.
11. ¿Xiñee cadi naquiiñeʼ gusaana de guni orarnu?
11 Ribeza Jehová cadi gusaana de gábinu laa guiráʼ ni riguu xizaa laanu (1 Tes. 5:17). Bisihuinni Jesús cadi nagueendaca zacabi Dios guiráʼ ni guinábanu laa (Luc. 11:9). ¡Nga runi cadi guireʼnu gana! Cadi gusaana de guni orarnu (Luc. 18:1-7). Ora qué rusaana de guni orarnu pur xiixa ni caquíʼñenu la? cadi cayábidinu Jehová guni ni purtiʼ si racaláʼdxinu gúnibe ni, sínuque zacá rusihuínninu nápanu fe zanda gacanebe laanu.
XIÑEE NUU BIAJE CAQUIIÑEʼ GUCHAʼNU NI CANÁBANU LU ORACIÓN STINU
12. a) ¿Xi naquiiñeʼ guiníʼ íquenu, ne xiñee? b) ¿Xi naquiiñeʼ gúninu para gusihuínninu nápanu respetu Dios ora runi orarnu? (Biiyaʼ cuadru ni láʼ «¿Rusihuinneʼ napaʼ respetu Dios pur ni rinabaʼ lu ca oración stinneʼ la?»).
12 Pa caʼruʼ gudii Jehová laanu ni gunábanu laa, galán guiníʼ íquenu lu guionna pregunta riʼ. Primé pregunta ca nga «¿Ñee biaʼsi ndiʼ ni canabaʼ riʼ la?». Stale biaje riníʼ íquenu maʼ nánnanu xii nga ni jma caquíʼñenu. Peru zándaca ti tiempu si zacané ni canábanu ca laanu. Zándaca cayuni orarnu para guinábanu gaca chaahuiʼ ti guendanagana ni nápanu modo rábinu, peru zándaca nuu sti modo jma galán gaca chaahuiʼ ni. Ne zándaca qué riuulaʼdxiʼ Jehová chupa chonna de ca ni canábanu ca (1 Juan 5:14). Guiníʼ íquenu sti biaje guendaxheelaʼ ni bizéʼtenu lu primé párrafo que. Gunábacabe Jehová guni xiixa para cadi guixeleʼ xiiñicabe de laa. Ruluíʼ galán ni canábacabe ca. Peru ni dxandíʼ la? qué runi obligar Jehová binni guni ni ná, sínuque racaláʼdxibe guiranu, dede né ca xiiñinu, guni adorarnu laabe purtiʼ nga nga ni racaláʼdxinu gúninu (Deut. 10:12, 13; 30:19, 20). Yanna, ¿xi zanda guinabaʼ guendaxheelaʼ riʼ Jehová yaʼ? Zanda guinábacabe Jehová gacané laacabe chindá ni cusiidicabe xiiñicabe ndaaniʼ ladxidóʼ ti gannaxhii Jehová ne gaca xhamigu laabe (Prov. 22:6; Efes. 6:4).
13. Casi ná Hebreos 4:16, ¿pora racané Jehová laanu?
13 Guiropa pregunta, «¿Ñee ruuyaʼ Jehová yanna peʼ nga naquiiñeʼ guicabi naa la?». Zándaca guiníʼ íquenu naquiiñeʼ guicabi Jehová ca oración stinu nagueenda. Peru ni dxandíʼ la? laabe maʼ nánnabe pora jma galán gacanebe laanu (biindaʼ Hebreos 4:16). Pa qué guicabi Jehová laanu nagueenda la? zándaca guiníʼ íquenu ni nabe nga «Coʼ». Peru zándaca ni nabe nga «Guleza xcaadxi». Guzéʼtenu sti biaje ejemplu stiʼ hermanu joven ni canabaʼ guianda que. Pa ñuni Jehová ti milagru para nusianda laabe, ñándaca niníʼ Binidxabaʼ cayuni joven riʼ ni ná Jehová purtiʼ si bianda (Job 1:9-11; 2:4). Peru nánnanu maʼ gudixhe Jehová dxi para cuee guiráʼ guendahuará nuu yanna (Is. 33:24; Apoc. 21:3, 4). Nga runi, cadi cuézanu guni Jehová milagru tiempu riʼ. Yanna, ¿xi zanda guinabaʼ joven riʼ Jehová yaʼ? Zanda guinábabe Jehová gudii laabe stipa ne quixhedxí xquendabiaanibe para cadi guireebe gana ne cadi gusaana de gúnibe ni ná neca huarabe (Sal. 29:11).
14. ¿Xi rusiidiʼ ejemplu stiʼ Janice lii?
14 ¿Rietenaláʼdxiluʼ de Janice, xa hermana ni cayuni orar para cheʼ Betel que la? Gupa xidé gudiʼdiʼ gaayuʼ iza para biénebe xi biʼniʼ Jehová para bicabi oración stibe. Laabe guniʼbe: «Lu ca iza que bisiidiʼ Jehová naa ne gucané naa gaca ca cualidad stinneʼ jma galán. Casi gapaʼ jma confianza Jehová, guneʼ estudiar jma jneza ne guiziideʼ guibaneʼ nayecheʼ intiica si guizaaca». Ra gudiʼdiʼ tiempu guca invitar xheelaʼ Janice para gaca superintendente de circuito. Laabe guniʼbe: «Ni dxandíʼ la? bicabi Jehová ca oración stinneʼ, peru cadi modo cabezaʼ gúnibe ni. Gupa xidé gudiʼdiʼ tiempu para guuyaʼ pabiáʼ sicarú modo bicábibe naa. Guizáʼ rudieeʼ xquixe peʼ Jehová purtiʼ bidii lugar guneʼ sentir pabiáʼ nachaʼhuiʼ ne nadxiibe naa».
Pa riníʼ íqueluʼ caʼruʼ guicabi Jehová oración stiluʼ, ¿xiñee qué quixhe íqueluʼ guinábaluʼ sti cosa yaʼ? (Biiyaʼ párrafo 15).f
15. ¿Xiñee nuu biaje cadi galán guinábanu ni peʼ caquíʼñenu? (Biiyaʼ ca imagen ca).
15 Guionna pregunta que nga «¿Ñee ni peʼ caquiiñeʼ nga canabaʼ la?». Neca nuu biaje galán guinábanu ni peʼ caquíʼñenu lu ca oración stinu la? nuu biaje cadi galán gúninu ni, ti gánnanu xii nga ni racalaʼdxiʼ Jehová para laanu. Guiníʼ íquenu xa hermana soltera ni cayuni orar purtiʼ napa gana cheʼ Escuela para Evangelizadores del Reino que. Racaláʼdxibe chebe scuela riʼ para gacanebe ra jma caquiiñeʼ tu guni predicar. Neca guzeeterube de laani lu ca oración stibe, peru ¿xiruʼ zanda guinábabe Jehová yaʼ? Zanda guinábabe laa gacané laabe guidxélabe xcaadxi modo para gúnibe jma lu xhiiñaʼ (Hech. 16:9, 10). Despué de guni orarbe, zanda guinabadiidxabe superintendente de circuito pa nuu xiixa congregación gaxha ra caquiiñeʼ jma precursor. Laaca zanda gucaabe ra sucursal para gábicaʼ laabe paraa nuu jma caquiiñeʼ tu guni predicar.e
16. ¿Xi nanna dxíchinu runi Jehová?
16 Casi maʼ bizíʼdinu, nanna dxíchinu jneza modo ricabi Jehová ca oración stinu ne rúnibe ni né guendarannaxhii (Sal. 4:3; Is. 30:18). Zándaca nuu biaje guicabi Jehová laanu de ti modo ni cadi cabézanu gúnibe ni, peru nánnanu zucábibe ca oración stinu. Guizáʼ nadxiibe laanu ne qué ziuu dxi gusaanabe laanu (Sal. 9:10). Nga runi, gápanu confianza Jehová «guiráʼ hora», ne ora guni orarnu la? guxhélenu ladxidoʼno nezalube (Sal. 62:8).
CANCIÓN 43 Ti oración para gudiʼnu xquíxepeʼ Dios
a Zacané artículo riʼ laanu guiénenu jneza modo ricabi Jehová ca oración stinu ne rúnibe ni né guendarannaxhii.
b Maʼ bidxaa lá caadxi binni.
c Biiyaʼ artículo ni láʼ «¿Ñee nápanu confianza jneza guiráʼ ni runi Jehová la?», ni biree lu Torre stiʼ ni rapa febrero de 2022, párrafo 3 hasta 6.
d Lu videu ni zeeda lu jw.org ni láʼ Racané oración laanu gudxíʼlunu ca guendanagana ni rápanu, zuuyaluʼ ximodo racané Jehová laanu para gudxíʼlunu ca guendanagana stinu.
e Pa racaláʼdxiluʼ gánnaluʼ xi naquiiñeʼ gúniluʼ para chigacaneluʼ lu territorio stiʼ sti sucursal la? biiyaʼ libru ni láʼ Organizados para hacer la voluntad de Jehová, capítulo 10, párrafo 6 hasta 9.
f NI RIHUINNI LU CA IMAGEN RIʼ: Cayuni orar chupa hermana ante guchacaʼ solicitud para guinábacaʼ checaʼ Escuela para Evangelizadores del Reino. Ra gudiʼdiʼ tiempu guca invitar tobi de laacabe, peru stobi que coʼ. Lugar de nireebe gana purtiʼ si qué ñeeda invitación stibe, biʼniʼ orarbe Jehová ne gunábabeʼ laa gacané laabe para guidxélabe xcaadxi modo gúnibe jma lu xhiiñaʼ. Despué bicaabe ti carta ra sucursal para gábibe laacaʼ zanda chigacanebe ra nuu jma necesidad.