ARTÍCULO DE ESTUDIU 30
CANCIÓN 36 Gapa chaahuinu ladxidoʼno
Ni rizíʼdinu de ca rey stiʼ Israel
«Ne laatu zabiguetaʼ zuuyatu maʼ gadxé nga ti binni runi ni jneza ne maʼ gadxé nga binni malu, zuuyatu tuu nga ni runi ni ná Dios ne tuu nga ni qué runi ni nabe» (MAL. 3:18).
TEMA
Ra guidúʼndanu ximodo biiyaʼ Jehová ca rey stiʼ Israel zacaneni laanu guiénenu xi naquiiñeʼ gúninu yanna para gusiéchenu Jehová.
1, 2. ¿Xi ruzeeteʼ Biblia de caadxi rey stiʼ Israel?
RUZEETEʼ Biblia lá jma de 40 hombre ni guca rey stiʼ guidxi Israel ne qué rucaachiʼ diʼ ni ora caniʼni xi bizaaca lu xquendanabani caadxi de laacabe.a Ruzeeteni guyuu rey nachaʼhuiʼ ni biʼniʼ cosa malu. Guininu de David. Nánnanu gúcabe ti rey nachaʼhuiʼ, purtiʼ guníʼ Jehová yenándabe laa de guidubi ladxidoʼbe ra bíʼnibe puru si ni jneza nezalú (1 Rey. 14:8). Peru gutané David ti gunaa ni maʼ bichaganáʼ ne biyúbibe modo guuticabe xheelaʼ gunaa riʼ lu guerra (2 Sam. 11:4, 14, 15).
2 Peru laaca guyuu rey malu ni biʼniʼ cosa galán. Guidúʼyanu ni bizaaca Rehoboam. Nánnanu biiyaʼ Jehová Rehoboam casi ti rey ni bicheené laabe, purtiʼ guníʼ Jehová «bíʼnibe cosa malu» (2 Crón. 12:14). Peru bizuubabe diidxaʼ ora gudxi Jehová laabe cadi tindenebe chii tribu stiʼ Israel ne gudiibe lugar cuicaʼ rey sticaʼ. Ne laaca bíʼnibe stale cosa para gápabe ca guidxi ni runi mandarbe de ca enemigu sticaʼ (1 Rey. 12:21-24; 2 Crón. 11:5-12).
3. ¿Xi zándaca guinabadiidxanu, ne xi zadúʼyanu lu artículo riʼ?
3 Yanna, pa guiráʼ ca rey ca bíʼnicaʼ cosa galán ne cosa malu, ¿xiñee guníʼ Jehová guyuu de laacabe qué nixeleʼ de laabe ne guyuu tu laa bíʼnini yaʼ? Ra gánnanu respuesta stiʼ pregunta riʼ zacaneni laanu guiénenu xi naquiiñeʼ gúninu para gusiéchenu Jehová. Lu artículo riʼ zadúʼyanu chonna cosa ni biʼyaʼ Jehová de ca rey stiʼ Israel para guiníʼ pa nachaʼhuiʼ ti rey o pa malu laa: pa gunnaxhiicaʼ laabe de guidubi ladxidoʼcaʼ, pa guca arrepentircaʼ de ca pecadu sticaʼ ne pa biʼniʼ adorarcaʼ laabe jneza.
GUNNAXHIICABE JEHOVÁ DE GUIDUBI LADXIDÓʼCABE
4. ¿Xi bisihuinni maʼ gadxé ca rey ni qué nucheené Dios ne ca ni bicheené laabe?
4 Ca rey ni qué nucheené Jehová gunnaxhiicaʼ laabe de guidubi ladxidoʼcaʼ.b Casi Jehosafat la? gúcabe ti rey nachaʼhuiʼ «ni biyubi Jehová de guidubi ladxidóʼ» (2 Crón. 22:9). Ne Josías la? sicaríʼ ruzeeteʼ Biblia de laabe: «Qué ñuu sti rey casi laabe, ni nibiguetaʼ ra nuu Jehová de guidubi ladxidóʼ» (2 Rey. 23:25). Ne laaca riete de Salomón, ra maʼ ziluxe tiempu cayuni mandarbe bíʼnibe cosa malu ne «qué ñúnibe ni ná Jehová, Dios stibe, de guidubi ladxidoʼbe» (1 Rey. 11:4). Ne laaca riete de Abiyam, sti rey ni bicheené Jehová, ne laaca ngaca nga ni riníʼ Biblia de laabe: «Qué ñúnibe ni ná Jehová, Dios stibe, de guidubi ladxidoʼbe» (1 Rey. 15:3).
5. ¿Xi riníʼ gúninu ni ná Jehová de guidubi ladxidoʼno?
5 ¿Xi riníʼ gúninu ni ná Jehová de guidubi ladxidoʼno yaʼ? Riniʼni guni adorarnu laabe purtiʼ nadxiinu laabe ne guizáʼ runi respetarnu laabe, ne cadi purtiʼ cucaacabe laanu gúninu ni o purtiʼ para laanu nga nga ni jneza. Laaca riniʼni cadi gusaana de gannaxhiinu laabe biaʼ dxi guibáninu.
6. ¿Ximodo zanda gannaxhiinu Jehová de guidubi ladxidoʼno? (Proverbios 4:23; Mateo 5:29, 30).
6 ¿Xi naquiiñeʼ gúninu para cadi gácanu casi ca rey ni bichee ne gannaxhiinu Jehová de guidubi ladxidoʼno yaʼ? Naquiiñeʼ gucáʼnanu intiica cosa ni zanda gucaa laanu gápanu chupa ladxidoʼno ne guianda guendarannaxhii ni nápanu Jehová, caadxi de laani nga naquiiñeʼ gápanu cuidadu né ca cosa ni ridúʼyanu o ni rúninu ora maʼ caziiláʼdxinu. Laaca naquiiñeʼ gápanu cuidadu tu binni guidxaaganu ne cadi naquiiñeʼ guiníʼ íquenu gaca binni ricu nga ni jma risaca lu xquendanabáninu. Pa cadúʼyanu maʼ cayúninu ca cosa riʼ, naquiiñeʼ guchaʼnu nagueendaca (biindaʼ Proverbios 4:23; Mateo 5:29, 30).
7. ¿Xiñee naquiiñeʼ chuʼnu cuidadu né ca cosa malu stiʼ guidxilayú?
7 Cadi naquiiñeʼ gudiʼnu lugar chuʼ xiixa ni gucaa laanu gápanu chupa ladxidoʼno. Pa qué chuʼnu cuidadu, zándaca quítenu laca laanu ora guiníʼ íquenu tisi caquíʼñenu tiempu stinu para gúninu xhiiñaʼ Jehová qué zanda chuʼ xiixa ni guxheleʼ laanu de laabe. Para guiénenu ni, guiníʼ íquenu ti dxi reciu nuu bi, ¿cadi dxandíʼ zuzeeguluʼ ra puertaʼ lídxiluʼ para cadi guidxá yú ndaanini ne gaca biidini la? Ndiʼ rusiidiʼ laanu, para chuʼnu gaxha de Jehová cadi caquiiñeʼ si iquíʼñenu tiempu stinu para gúninu xhiiñabe, laaca naquiiñeʼ «guséʼgunu puertaʼ ladxidoʼno» para cadi chuʼ «bi» ne yu o ca cosa malu stiʼ guidxilayú riʼ ndaanini ne gucaacani laanu gusaana de gannaxhiinu Jehová (Efes. 2:2).
GUCA ARREPENTÍRCABE DE CA PECADU STÍCABE
8, 9. ¿Xi biʼniʼ rey David ne Ezequías ora guluu jnézacabe laacaʼ? (Biiyaʼ imagen ni zeeda lu).
8 Casi maca bidúʼyanu, biʼniʼ rey David ti pecadu guizáʼ malu. Peru ora guyé Natán ra nuube para guiniʼné laabe de ni bíʼnibe que la? guca David humilde ne guca arrepentir (2 Sam. 12:13). Ca diidxaʼ ni bicaabe lu Salmo 51 rusihuínnicani dxandíʼ guca arrepentirbe. Qué nusiguiibe ora guniʼbe nuube arrepentidu para si guiaanabe bien né Natán o para si cadi guiaba castigu luguiabe (Sal. 51:3, 4, 17, encabezamiento).
9 Laaca bicheené rey Ezequías Jehová. Biblia ná «guca ladxidoʼbe orgulloso ne pur nga bidxiichiné Dios laabe, ne laaca bidxiichiné Judá ne Jerusalén» (2 Crón. 32:25). ¿Xiñee gúcabe orgulloso yaʼ? Zándaca purtiʼ biʼniʼ Jehová laabe ricu, gucané laabe guni ganarbe ca asiriu o purtiʼ bisianda laabe de ti guendahuará ni ñuuti laabe. Zándaca orgullo stibe nga bicaa laabe guluiʼbe ca cosa risaca stibe ca binni de Babilonia para gusisácacaʼ laabe. Ne pur nga gupa xidé guluu jneza profeta Isaías laabe (2 Rey. 20:12-18). Peru cásica David, guca Ezequías humilde ne guca arrepentir (2 Crón. 32:26). Ne ora biʼyaʼ Jehová guiráʼ ni bíʼnibe lu xquendanabánibe la? biiyaʼ laabe casi ti rey ni qué nixeleʼ de laabe. Biblia ná bíʼnibe ni jneza nezalú Jehová (2 Rey. 18:3).
Guca rey David ne rey Ezequías humilde ne guca arrepentircaʼ ora guluu jnézacabe laacaʼ pur ca pecadu ni bíʼnicaʼ. (Biiyaʼ ca párrafo 8 ne 9).
10. ¿Xi biʼniʼ rey Amasías ora guluu jnézacabe laa?
10 Peru rey stiʼ Judá ni láʼ Amasías biʼniʼ ni jneza, peru qué ñúnibe ni de guidubi ladxidoʼbe (2 Crón. 25:2). ¿Xiñee yaʼ? Despué de gucané Jehová Amasías guni ganar ca edomita, bizulú biʼniʼ adorarbe ca dios stiʼ guidxi que.c Ne ora guyé ti profeta stiʼ Jehová ra nuube para uguu jneza laabe la? gúcabe tercu ne qué ninabe nucaadiágabe laa (2 Crón. 25:14-16).
11. Casi ná 2 Corintios 7:9, 11, ¿xi naquiiñeʼ gúninu para guni perdonar Jehová laanu? (Biiyaʼ ca imagen ca).
11 ¿Xi rizíʼdinu de ca rey riʼ yaʼ? Rizíʼdinu naquiiñeʼ gaca arrepentirnu de ca pecadu stinu ne gúninu stipa cadi guibiguetaʼ gúninu cani. ¿Ne pa uguu jneza ca ancianu laanu neca para laanu ruluíʼ cadi tan malu ni bíninu yaʼ? Cadi naquiiñeʼ guiníʼ íquenu maʼ qué riuulaʼdxiʼ Jehová ni rúninu o cuyubi si ca ancianu paraa cucheʼnu. Purtiʼ dede ca rey nachaʼhuiʼ stiʼ Israel biquiiñecaʼ tu gudii conseju laacaʼ ne tu uguu jneza laacaʼ (Heb. 12:6). Yanna, ¿xi naquiiñeʼ gúninu pa uguu jnézacabe laanu yaʼ? Primé, naquiiñeʼ gácanu humilde. Guiropa, guchaʼnu ra naquiiñeʼ gúninu ni. Ne guionna, cadi gusaana de gúninu ni ná Jehová de guidubi ladxidoʼno. Pa gaca arrepentirnu de ca pecadu stinu, zuni perdonar Jehová laanu (biindaʼ 2 Corintios 7:9, 11).
Ni naquiiñeʼ gúninu pa uguu jnézacabe laanu 1) gácanu humilde, 2) guchaʼnu ra caquiiñeʼ gúninu ni ne 3) cadi gusaana de gúninu ni ná Jehová de guidubi ladxidoʼno. (Biiyaʼ párrafo 11).f
BIʼNIʼ ADORÁRCABE JEHOVÁ JNEZA
12. ¿Xi biʼniʼ ca rey ni qué nucheené Jehová?
12 Ca rey ni biʼyaʼ Jehová qué rucheené laa biʼniʼ adorarcaʼ laabe jneza ne guluucaʼ gana xcaadxi gúnicaʼ zaqueca. Dxandíʼ guyuu ora qué ñúnicabe ni jneza casi bidúʼyanu ca. Peru biʼniʼ adorárcabe Jehová si ne bíʼnicabe dxiiñaʼ nadipaʼ para gunitilúcabe ca bidóʼ ni guyuu ndaaniʼ xquidxi Dios.d
13. ¿Xiñee biiyaʼ Jehová rey Acab casi ti rey ni bicheené laabe?
13 ¿Xi zanda guininu de ca rey ni biʼyaʼ Jehová rucheené laa yaʼ? Dxandíʼ, cadi puru cosa malu si bíʼnicabe. Purtiʼ dede né rey malu Acab guyuu ora gúcabe humilde ne gucaná ladxidoʼbe ora gúnnabe biiticabe Nabot pur donda stibe (1 Rey. 21:27-29). Ne cadi ngasi, bicuibe stale guidxi ne biʼniʼ ganar guidxi Israel ca enemigu stiʼ dxi nácabe rey (1 Rey. 20:21, 29; 22:39). Peru biʼniʼ Acab xiixa guizáʼ malu ne qué ñaca arrepentir, bicaa xheelabe laabe gucaabe binni guni adorar dios falsu (1 Rey. 21:25, 26).
14. a) ¿Xiñee biiyaʼ Jehová Rehoboam casi ti rey ni bicheené laabe? b) ¿Xi biʼniʼ stale de ca rey ni bicheené Dios?
14 Guininu de sti rey ni bicheené Dios: Rehoboam. Casi maʼ bidúʼyanu que, bíʼnibe stale cosa galán. Peru dxi maʼ zuhuaa dxiichiʼ gobiernu stibe bisaana de ninándabe Ley stiʼ Jehová ne bizulú biʼniʼ adorarbe dios falsu (2 Crón. 12:1). Ne dede dxi que, guyuu ora biʼniʼ adorarbe Jehová ne guyuu ora biʼniʼ adorarbe bidóʼ (1 Rey. 14:21-24). Ne cadi Rehoboam ne Acab si nga ca rey ni bisaana de guni adorar Jehová. Ni dxandíʼ nga stale de ca rey ni bicheené Dios biʼniʼ adorárcabe dios falsu ne bicaacabe binni gúnini. Rihuinni dxíchica ti cosa ni ruuyaʼ Jehová para guiníʼ pa nachaʼhuiʼ o pa malu ti rey nga pa runi adorar rey ca laabe jneza.
15. ¿Xiñee nabé risaca para Jehová guni adorárcabe laa jneza?
15 ¿Xiñee nabé risaca para Jehová modo guni adorárcabe laa yaʼ? Primé la? purtiʼ ca rey que nga naquiiñeʼ gacanecaʼ guidxi que guni adorarcaʼ Dios jneza. Guiropa, ora runi adorar ca binni que ca dios falsu, rúnicaʼ cosa ni cadi jneza ne runi cometercaʼ pecadu ni guizáʼ malu (Os. 4:1, 2). Ne guionna, ca rey que ne ca israelita que nácacaʼ binni ni maʼ bireechú para Jehová. Nga runi, ora runi adorárcabe ca dios falsu que, Biblia ná casi ñaca nácacabe ti binni ni maʼ bichaganáʼ ne riuuné ni cadi xheelaʼ (Jer. 3:8, 9). Ti binni ni rucheené xheelaʼ guizáʼ runiná ladxidóʼ xheelaʼ. Zaqueca nga tuuxa ni maʼ guca dedicar Jehová ne despué runi adorar dios falsu, rucheenebe Jehová ne laaca guizáʼ runinabe ladxidóʼ (Deut. 4:23, 24).e
16. ¿Xii nga ruuyaʼ Jehová para guiníʼ tuu nga ti binni ni runi ni jneza ne tuu nga ti binni malu?
16 ¿Xi rizíʼdinu yaʼ? Rizíʼdinu naquiiñeʼ gucáʼnanu guiráʼ ni runi ca religión ni qué rusiidiʼ ni dxandíʼ. Ne cadi ngasi; naquiiñeʼ guni adorarnu Jehová jneza ne cadi gusaana de gúninu xhiiñabe. Nayani dxindxi modo bisiene profeta Malaquías xii nga ruuyaʼ Jehová para guiníʼ tuu nga ti binni nachaʼhuiʼ ne tuu nga ti binni malu, guniʼbe: «Ne laatu zabiguetaʼ zuuyatu maʼ gadxé nga ti binni runi ni jneza ne maʼ gadxé nga ti binni malu, zuuyatu tuu nga runi ni ná Dios ne tuu nga ni qué runi ni nabe» (Mal. 3:18). Nga runi, cadi gudiʼnu lugar chuʼ xiixa ni cueeʼ gana laanu —casi guiníʼ íquenu lu ca cosa ra maʼ bicheʼnu— ne pur nga gusaana de gúninu ni ná Dios. Ti pecadu guizáʼ malu nga gusaananu Jehová.
17. ¿Xiñee naquiiñeʼ chuʼnu cuidadu ora cuinu tu binni guichagananu?
17 Pa caníʼ íqueluʼ guichaganaluʼ, zanda gacané ca diidxaʼ ni guníʼ Malaquías lii cuí chaahuiluʼ tu guichaganaluʼ. Guníʼ ique ndiʼ: zanda gapa ti binni stale cualidad galán; peru, pa qué rúnibe ni ná Jehová, ¿ñee rábiluʼ ruuyaʼ Jehová laabe casi ti binni ni runi jneza la? (2 Cor. 6:14). Pa guichaganaluʼ laabe, ¿ñee zacanebe lii chuʼluʼ jma gaxha de Jehová la? Cadi guiaandaʼ lii, ca gunaa de sti guidxi ni bichaganáʼ rey Salomón zándaca gúpacabe cualidad galán, peru xi si la? qué ñúnicabe ni ná Jehová. Ne, chaahuiʼ chaahuiʼ bicaacabe laabe guni adorarbe xcaadxi dios (1 Rey. 11:1, 4).
18. Ca ni napa xiiñiʼ, ¿xi naquiiñeʼ gusiiditu ca xiiñitu?
18 Laatu ca ni napa xiiñiʼ, zanda iquiiñetu ca relatu stiʼ ca rey ni riete lu Biblia para gacanetu ca xiiñitu chuuláʼdxicaʼ gúnicaʼ ni ná Jehová. Nabé risaca guiénecabe ni biiyaʼ Jehová para guiníʼ pa nachaʼhuiʼ ti rey nga, pa runi adorar rey ca laabe jneza ne pa racanebe xcaadxi gúnini. Pur ni guiniʼtu ne pur ni gúnitu lagusiidiʼ ca xiiñitu gúnicaʼ primé lu xquendanabánicaʼ ca cosa ni guchiña laacaʼ gaxha de Dios, casi gúʼndacabe Biblia, chécabe reunión ne guni predicárcabe (Mat. 6:33). Pa qué gúnitu ni la? zándaca guiníʼ ique ca xiiñitu naquiiñeʼ gácacaʼ testigu stiʼ Jehová purtiʼ jñaacaʼ ne bixhózecaʼ nácacaʼ Testigu. Ne, ra tidiʼ tiempu, zándaca gusaana de gúnicabe ni ná Jehová primé lu xquendanabánicabe o dede guixélecabe de laa.
19. Pa tuuxa maʼ bisaana de guni ni ná Jehová, ¿ñee riníʼ nga maʼ qué zanda guibiguetaʼ gaca xhamígube laa sti biaje la? (Biiyaʼ cuadru ni láʼ «Zanda guibiguétaluʼ ra nuu Jehová»).
19 Pa tuuxa maʼ bisaana de guni ni ná Jehová. ¿Ñee riníʼ nga maʼ qué zanda guibiguetaʼ gaca xhamígube laa sti biaje la? Coʼ, purtiʼ zanda gaca arrepentirbe ne gaca xhamígube Dios sti biaje. Ne para ganda gaca nga la? zándaca naquiiñeʼ gusaana de gácabe orgulloso ne gudiibe lugar gacané ca ancianu laabe (Sant. 5:14). Guizáʼ risaca intiica sacrificiu ni guni tuuxa para guyubi chuulaʼdxiʼ Jehová ni runi sti biaje.
20. Pa chinándanu ejemplu stiʼ ca rey ni qué nixeleʼ de Jehová, ¿ximodo zuuyaʼ Jehová laanu?
20 Yanna, ¿xi rizíʼdinu de ca rey stiʼ Israel yaʼ? Zanda gácanu casi ca rey ni qué nucheené Jehová pa gannaxhiinu laabe de guidubi ladxidoʼno. Guizíʼdinu de ca cosa ra bicheʼnu, gaca arrepentirnu ne guchaʼnu ra naquiiñeʼ gúninu ni. Ne cadi naquiiñeʼ guiaandaʼ laanu, risaca stale peʼ nga guni adorarnu tobi lucha si Dios ni dxandíʼ. Pa cadi guixéleluʼ de Jehová, laaca zaniʼbe nácaluʼ ti binni ni runi ni jneza nezalube.
CANCIÓN 45 Riníʼ iqueʼ de Dios de guidubi ladxiduáʼ
a Lu artículo riʼ, ora caninu de ca rey stiʼ Israel caninu de guiráʼ rey ni biʼniʼ mandar xquidxi Jehová. Caadxi de laacabe biʼniʼ mandárcabe lu reinu stiʼ Judá ra guyuu chupa tribu ne xcaadxi de laacabe lu reinu stiʼ Israel ra guyuu chii tribu, ne xcaadxi de laacabe biʼniʼ mandar luguiáʼ doce tribu que dxi guyuucaʼ tobi si.
b IDEA RISACA: Stale biaje riquiiñeʼ Biblia diidxaʼ ladxidóʼ para guiníʼ modo naca binni pur dentru ne luni nuu ca deseu stiʼ, ca ni riníʼ ique, ca ni racalaʼdxiʼ guni, modo naca, ni nanna guni, ni rucaa laa guni xiixa ne ca meta stiʼ.
c Tiempu que, costumbre ni gupa ca rey ni cadi naca israelita que nga guni adorarcaʼ ca dios stiʼ ca guidxi ni biʼniʼ ganarcaʼ.
d Biʼniʼ rey Asá pecadu nabé malu (2 Crón. 16:7, 10). Neca zacá, Biblia ná bíʼnibe ni jneza nezalú Jehová. Ca primé biaje guluu jnézacabe laabe qué nucaadiágabe, peru zándaca despué guca arrepentirbe. Ni jma biʼyaʼ Jehová nga ca cualidad galán gúpabe ne cadi ra bicheebe. Rihuinni dxichi biʼniʼ adorar Asá Jehová si ne biʼniʼ stipa gunitilú ca bidóʼ ni guyuu ra biʼniʼ mandar (1 Rey. 15:11-13; 2 Crón. 14:2-5).
e Primé ne guiropa mandamientu ni zeeda lu Ley stiʼ Moisés ná cadi naquiiñeʼ guni adorar binni tuuxa o xiixa, sínuque Jehová si (Éx. 20:1-6).
f NI RIHUINNI LU CA IMAGEN RIʼ: Caniʼné ti joven ni naca ancianu ti hermanu ne cayábibe laa nuube xizaa purtiʼ ruuyabe nabé riuulaʼdxiʼ gueʼ nisadxuʼniʼ. Guca hermanu que humilde, gucuaabe conseju que, bichaabe ra caquiiñeʼ gúnibe ni ne qué nusaana de ñúnibe ni ná Jehová sin gucheenebe laa.