¿Ñee zanda gunduuxeʼ binni ca guerra ne guendaridinde la?

CHUʼ BUELTU TI GAPA BINNI NI IQUIIÑEʼ

Ni racaláʼdxicabe gúnicabe: Gudii ca gobiernu ni caquiiñeʼ guiráʼ binni. Zacá maʼ qué ziuu peʼ binni pobre, laani nga tobi de ca razón ni rucaa chuʼ guendaridinde.

Xiñee qué ganda gúnicabe ni: Para ganda gudii ca gobiernu ca ni caquiiñeʼ binni la? napa xidé gúʼyacaʼ paraa nga jma jneza iquiiñecaʼ bueltu sticaʼ. Casi lu iza 2022 biquiiñecabe treinta y cuatro mil ti gayuaa millón de dólar para gacanécabe chuʼ paz lu guidubi guidxilayú. Peru guizáʼ huaxiéʼ bueltu riʼ que biaʼ bueltu biquiiñecabe para sícabe jma guiibaʼ ni biquiiñeʼ lu guerra.

«Jma stale bueltu binítidu lu ca guerra, que ni biquíʼñedu para chuʼ paz» (António Guterres, secretario general de las Naciones Unidas).

Ni rusiidiʼ Biblia: Ca gobiernu ne ca organización nuu lu guidxilayú riʼ zanda gacanecaʼ binni pobre, peru qué ziuu dxi cueecabe guendapobre lu guidxilayú riʼ (Deuteronomio 15:11; Mateo 26:11).

ACUERDU NI RUNI CA GOBIERNU

Ni racaláʼdxicabe gúnicabe: Nuu ca gobiernu ca güicaʼ diidxaʼ ne guni negociarcaʼ ti zacá guni chaahuicaʼ ca guendanagana ni nápacaʼ sin tíndecaʼ ne sin gacaná guirutiʼ.

Xiñee qué ganda gúnicabe ni: Nuu gobiernu qué riná guni negociar, guni compromisu o chindá ti acuerdu né stobi. Ne stale biaje neca maʼ bíʼnicaʼ ti acuerdu de paz peru qué rinándacaʼ ni.

«Nuu biaje cadi jneza riree ca acuerdu ni runi ca gobiernu ca. Zándaca ti acuerdu ni guni chupa guidxi para cuezadxí guerra, lugar de gacaneni chuʼ paz laga jma riuu guendaridinde» (Raymond Smith, American Diplomacy).

Ni rusiidiʼ Biblia: Guiráʼ binni naquiiñeʼ chinanda conseju riʼ: «Biyubi gapuʼ guendariuudxi» (Salmo 34:14). Peru tiempu riʼ stale binni rucheenecaʼ ne runi «traicionarcaʼ» xcaadxi binni ne qué rinacaʼ «chuʼcaʼ de acuerdu» (2 Timoteo 3:1-4). Ne pur nga, neca racalaʼdxiʼ ca gobiernu ca gacanecaʼ binni peru qué randa rucueezacabe ca guendaridinde ni nuu lu guidxilayú.

CADI CHUʼ GUIIBAʼ

Ni racaláʼdxicabe gúnicabe: Cuyubi ca gobiernu ca ximodo maʼ cadi chuʼ guiibaʼ jmaruʼ si ca guiibaʼ nadipaʼ ni zanda guuti stale binni.

Xiñee qué ganda gúnicabe ni: Stale guidxi qué rinacaʼ gusaanacaʼ ca guiibaʼ sticaʼ purtiʼ ridxíbicaʼ chuʼ tu guni ganar laacaʼ ne chuʼ tu guniná laacaʼ. Peru neca guyúbicabe cadi chuʼ guiibaʼ, qué zanda gucueezacabe ca guendanagana ni riuu ora ridinde binni.

«Lu iza 1991 biluxe si Guerra Fría, gudixhe ique ca gobiernu ca maʼ cadi chuʼ guiibaʼ naroʼbaʼ ni guniná binni, peru stale de laacabe qué ñuni cumplírcabe ni guníʼcabe. Lu ca acuerdu ni bíʼnicabe que bizeetecabe xi caquiiñeʼ gaca para cadi gapa binni guendanagana, cadi tinde ca guidxi ca ne zacá chuʼ paz lu guidubi guidxilayú» (Securing Our Common Future: An Agenda for Disarmament [Asegurar nuestro futuro común: una agenda para el desarme]).

Ni rusiidiʼ Biblia: Naquiiñeʼ gusaana binni ca guiibaʼ ca ne gúnicaʼ ni «cubu ni riuu ruaaʼ aradu» (Isaías 2:4). Peru cadi ngasi naquiiñeʼ gúnicabe, purtiʼ guendaquéiquiiñeʼ ca riáleni de ndaaniʼ ladxidóʼ binni (Mateo 15:19).

RIUU CA GOBIERNU CA TOBI SI

Ni racaláʼdxicabe gúnicabe: Riguixhe ique ca gobiernu ca chuʼcaʼ tobi si ora gúʼyacaʼ racalaʼdxiʼ tuuxa enemigu sticaʼ gucaalú laacaʼ. Riníʼ íquecabe pa chúʼcabe tobi si né xcaadxi guidxi la? jma zápacabe stipa ne jma nagana zaca para sti guidxi gucaalú laacabe.

Xiñee qué ganda gúnicabe ni: Cadi purtiʼ si chúʼcabe tobi si né xcaadxi guidxi ora gucaalú ca xhenemígucabe laacabe riniʼni zápacabe paz. Purtiʼ stale de ca guidxi ca qué runi cumplircaʼ ni riniʼcaʼ ne qué riuucaʼ de acuerdu ximodo ne pora gucaalucaʼ ca enemigu sticaʼ.

«Neca biyubi Sociedad de Naciones ne Naciones Unidas ximodo chuʼ ca guidxi ca tobi si ti ganda gucueezacabe ca guerra ca, peru neca zacá dede yanna cayácaruʼ guerra» (Encyclopedia Britannica).

Ni rusiidiʼ Biblia: Neca nuu biaje ora riuu binni tobi si jma nadipaʼ rácacaʼ, peru qué zanda gacané ca gobiernu ne ca organización ni ruyubi chuʼ paz gapa binni paz ne guibánicaʼ galán (Eclesiastés 4:12). «Cadi quíxhetu confianza stitu lu náʼ ca príncipe nin lu náʼ tutiica hombre, purtiʼ qué zanda gulacaʼ laatu. Riree espíritu stiʼ ne ribiguetaʼ raca yú; dxi ca nga riluxe guiráʼ ni riníʼ íquebe» (Salmo 146:3, 4).