Gucuaa decisión ni riuulaʼdxiʼ Jehová

1. ¿Gunáʼ nga ti cosa ni rúninu guiráʼ dxi ne xiñee nuu biaje rácani nagana para laanu?

GUIRÁʼ dxi nga ricaanu decisión. Nuu de laacani cadi nagana, casi xi guidoʼno ne pora chigásinu. Peru laaca nuu decisión nagana casi ximodo chuʼnu nazaaca, ximodo chuʼnu nayecheʼ né familia stinu ne ximodo guni adorarnu Dios. Guiranu riuuláʼdxinu guicaanu decisión ni gacané laanu ne familia stinu, peru ni jma racaláʼdxinu nga chuulaʼdxiʼ Jehová ca decisión ni guicaanu (Rom. 12:​1, 2).

2. ¿Xi caquiiñeʼ gúniluʼ para guicaaluʼ decisión jneza?

² Lu artículo riʼ zaninu de chonna cosa ni zanda gacané lii guicaaluʼ decisión jneza: primé, gunabadiidxaʼ chaahuiʼ ante gúniluʼ xiixa, guiropa, biiyaʼ xi riníʼ ique Jehová de laani ne guionna, guníʼ ique chaahuiʼ ni chigúniluʼ. Laaca zadúʼyanu xi zanda gúninu para guizíʼdinu guiníʼ ique chaahuinu ante gúninu xiixa (Prov. 2:11).

GUNABADIIDXAʼ CHAAHUIʼ ANTE GÚNILUʼ XIIXA

3. Biquiiñeʼ ti ejemplu para gusiéneluʼ xiñee naquiiñeʼ ganna chaahuiluʼ xi chigúniluʼ ante guicaaluʼ ti decisión.

³ Primé cosa ni naquiiñeʼ gúniluʼ para guicaaluʼ ti decisión jneza nga gunibiaʼluʼ o guʼyaʼ chaahuiluʼ xi chigúniluʼ. ¿Xiñee risaca ndiʼ yaʼ? Guníʼ ique guyé tuuxa ra nuu doctor purtiʼ napa ti guendahuará malu. ¿Ñee casi zeʼ doctor ca zudii laabe ti tratamientu sin ante guinabadiidxaʼ laabe xi cayácabe la? Coʼ, ¿njaʼ? Zaqueca nga lii, zanda guicaaluʼ decisión jneza pa primé guiníʼ íqueluʼ ni cazaacaluʼ ne guyúbiluʼ información ni caníʼ de laani. ¿Ximodo zanda gúniluʼ ni yaʼ?

4. Casi ná Proverbios 18:​13, ¿xi zacané lii ganna chaahuiluʼ xiixa ni racaláʼdxiluʼ? (Laaca zanda gúʼyaluʼ imagen ca).

⁴ Ora guinabadiidxaluʼ racaneni lii gánnaluʼ xiixa ni racaláʼdxiluʼ gánnaluʼ. Guzéʼtenu ti ejemplu, guníʼ ique biʼniʼ invitárcabe lii ti reunión social. ¿Ñee zieluʼ la? Pa qué runibiáʼ chaahuiluʼ tu chigúnini o qué gánnaluʼ xi pur chigúnibe ni, galán guinabadiidxaluʼ laabe: «¿Paraa ne pora chigácani? ¿Panda binni zié? ¿Ñee ziuu tu guʼyaʼ guireeni jneza la? ¿Tu cheʼ pue? ¿Xi guiráʼ zaca racá yaʼ? ¿Ñee ziuu nisadxuʼniʼ la?». Ra gánnaluʼ respuesta stiʼ ca pregunta riʼ zanda gacaneni lii guicaaluʼ ti decisión jneza (biindaʼ Proverbios 18:13).

5. ¿Xi naquiiñeʼ gúniluʼ pa maʼ biʼniʼ investigar chaahuiluʼ?

⁵ Ora maʼ biʼniʼ investigar chaahuiluʼ ni maʼ bizéʼtenu riʼ, biʼniʼ stipa gúʼyaluʼ guiráʼ ni zándaca gueeda guizaaca. Laga pa ñánnaluʼ zié binni ni qué runi ni ná Jehová lu reunión social ca o zudiicabe nisadxuʼniʼ ne guirutiʼ tu zuuyaʼ guireeni jneza, ¿ñee zándaca guizaaca xiixa cosa malu luni ne gácani ti saa ra runi binni ni cadi jneza la? (1 Ped. 4:3). ¿Xi zúniluʼ pa gúʼyaluʼ pur laani maʼ qué zieluʼ reunión o maʼ qué ziguni predicarluʼ yaʼ? Pa guiníʼ ique chaahuiluʼ guiráʼ ni zándaca guenda guizaaca zacaneni lii guicaaluʼ ti decisión jneza. Ndiʼ nga primé cosa ni naquiiñeʼ gúniluʼ, peru laaca naquiiñeʼ gúniluʼ xcaadxi cosa. Lii maʼ nánnaluʼ xi chigúniluʼ, peru ¿ximodo ruuyaʼ Jehová ni yaʼ? (Prov. 2:6).

BIIYAʼ XI RINÍʼ IQUE JEHOVÁ

6. Casi ná Santiago 1:​5, ¿xiñee caquiiñeʼ guinábanu Jehová gacané laanu?

⁶ Gunabaʼ Jehová gacané lii gúʼyaluʼ ca cosa ca modo laabe ruuyabe cani. Zudiibe laanu guendabiaaniʼ de guidubi ladxidoʼbe ne qué zuchabe ni lunu (biindaʼ Santiago 1:5). Zacané guendabiaaniʼ riʼ laanu gánnanu pa riuulaʼdxiʼ Jehová xiixa decisión o coʼ.

7. ¿Ximodo zanda gánnaluʼ xi riníʼ ique Jehová de xiixa ni chigúniluʼ? Bizeeteʼ ti ejemplu.

⁷ Pa maʼ gunábaluʼ Jehová gacané lii la? guleza guicábibe lii. Guzéʼtenu ti ejemplu, guníʼ ique zeluʼ ti guidxi ne málasi binítiluʼ ne gunábaluʼ tuuxa gacané lii. Peru ¿ñee zieluʼ ante gábibe lii xi gúniluʼ la? Coʼ, ¿njaʼ? Sínuque zucaadiaga chaahuiluʼ laabe. Zaqueca nga laanu, pa maʼ gunábanu Jehová guendabiaaniʼ la? gucaadiaga chaahuinu laabe ra guyúbinu xiixa principiu stiʼ Biblia ni caníʼ de decisión chiguicaanu ca. Guininu sti biaje de reunión social que. Ante quixhe íqueluʼ cheluʼ, galán gúʼyaluʼ xi riníʼ Biblia de ca saa ra raca cosa malu, de ca binni ni runi cosa ni cadi jneza ne pabiáʼ risaca quíxhenu Reinu stiʼ Dios primé lu xquendanabáninu (Mat. 6:33; Rom. 13:13; 1 Cor. 15:33).

8. ¿Xi zanda gacané lii guidxélaluʼ xiixa información ni caquiiñeluʼ? (Laaca zanda gúʼyaluʼ imagen ca).

⁸ Zándaca caquiiñeʼ gacané tuuxa lii para guidxélaluʼ xiixa información. Zanda gacané ti hermanu o ti hermana ni napa experiencia lii, peru jma galán pa lii peʼ guni investigarluʼ. Nuu stale información ni zanda gacané lii, casi Ca tema ni huabee ca testigu stiʼ Jiobá ne libru Caadxi textu ni zacané ca xpinni Cristu. Cadi guiaandaʼ lii ni jma risaca nga guicaaluʼ ti decisión ni chuulaʼdxiʼ Jehová.

9. ¿Ximodo zanda chuʼnu seguru ziuulaʼdxiʼ Jehová ca decisión stinu? (Efesios 5:17).

⁹ ¿Ximodo zanda chuʼnu seguru ziuulaʼdxiʼ Jehová decisión stinu? Primé, caquiiñeʼ gunibiáʼ chaahuinu laabe. Proverbios 9:10 ná «ora maʼ runibiaʼnu Santísimo nga maʼ nácanu tobi ni riene». Para gácanu ti binni ni riene caquiiñeʼ gunibiaʼnu ca cualidad ni napa Jehová, ni naguixhe íquebe gúnibe para laanu, ni riuuláʼdxibe ne ni nanaláʼdxibe. Guníʼ ique: «Biaʼ maʼ runebiaʼyaʼ Jehová, ¿xi decisión ziuuláʼdxibe yaʼ?» (biindaʼ Efesios 5:17).

10. ¿Xiñee jma risaca para laanu ca principiu stiʼ Biblia que ca costumbre raca ndaaniʼ xquídxinu?

¹⁰ Para gusiéchenu Jehová nuu biaje caquiiñeʼ guicaanu ti decisión ni qué ziuulaʼdxiʼ familia stinu o ca xhamígunu. Guníʼ ique racalaʼdxiʼ bixhoze ne jñaa ti baʼdudxaapaʼ gucheelacaʼ laabe ti hombre ni napa bueltu peru huaxiéʼ runi ni ná Jehová. Rúnicabe ni para cadi guiaadxaʼ gastiʼ xiiñicabe ora maʼ bichaganáʼ ne purtiʼ zaguixe hombre ca laacabe pur baʼdudxaapaʼ ca. Peru ¿ñee zanda gacané hombre riʼ laabe chuʼbe gaxha de Dios la? ¿Ximodo ruuyaʼ Jehová ni yaʼ? Zadxélanu respuesta ca lu Mateo 6:​33, ra cayabi laanu cadi gusaana de guyúbinu Reinu stiʼ Dios primeru. Neca nadxiinu bixhózenu ne jñaanu ne runi respetarnu ca costumbre raca ndaaniʼ xquídxinu, peru ni jma risaca para laanu nga gusiéchenu ladxidóʼ Jehová.

GUNÍʼ IQUE CHAAHUIʼ NI CHIGÚNILUʼ

11. Casi ná Filipenses 1:​9, 10, ¿xi zacané lii guicaaluʼ ti decisión jneza?

¹¹ Pa maʼ bidxélaluʼ xiixa principiu stiʼ Biblia ni caníʼ de decisión ni nuuluʼ guicaaluʼ la? naquiiñeʼ guiníʼ ique chaahuiluʼ ni chigúniluʼ (biindaʼ Filipenses 1:​9, 10). ¿Ximodo zanda gúniluʼ ni yaʼ? Guníʼ ique xi zándaca guizaaca pa guicaaluʼ decisión ca. Nuu biaje nagueenda zacaaluʼ ti decisión, peru ziuu biaje qué zadxélaluʼ xi gúniluʼ. Nga runi, pa dede ante guiníʼ íqueluʼ xi chigúniluʼ, zacaaluʼ decisión jneza neca gácani nagana.

12, 13. ¿Xi zanda guiníʼ íqueluʼ ante guicaaluʼ ti dxiiñaʼ?

¹² Guníʼ ique nizaacaluʼ ndiʼ: cuyúbiluʼ dxiiñaʼ para gudiiluʼ ni caquiiñeʼ familia stiluʼ ne bidxélaluʼ chupa lugar. Galán guʼyaʼ chaahuiluʼ xi clase dxiiñaʼ cani, panda hora zúniluʼ dxiiñaʼ ne pa riaana cani gaxha o zitu. Guiropaʼ dxiiñaʼ riʼ cadi caníʼ diʼ Biblia cadi jneza guni ti xpinni Cristu cani. Ne zándaca caníʼ íqueluʼ cuiluʼ tobi de laacani purtiʼ jma riuuláʼdxiluʼ clase dxiiñaʼ ca o purtiʼ zaguíxecabe lii jma. Peru nuu xcaadxi cosa ni caquiiñeʼ guiníʼ íqueluʼ ante guicaaluʼ ti decisión.

¹³ Guníʼ ique ca pregunta riʼ: «¿Ñee zucueeza dxiiñaʼ riʼ naa para cadi chaaʼ reunión la? ¿Ñee pur laani maʼ qué zapaʼ tiempu para guuyaʼ xi caquiiñeʼ familia stinneʼ la?». Zacané ca pregunta riʼ lii gánnaluʼ xii nga ni jma risaca, guni adorarluʼ Jehová ne gudiiluʼ ni caquiiñeʼ familia stiluʼ ne cadi guyúbiluʼ gápaluʼ jma. Pa gúniluʼ ni, zacaaluʼ ti decisión jneza ni ziuulaʼdxiʼ Jehová.

14. ¿Xi zúninu pa dede ante guiníʼ íquenu ni chigúninu ne gannaxhiinu binni?

¹⁴ Pa dede ante guiníʼ ique chaahuinu ni chigúninu, zacané ni laanu gánnanu pa qué zuninanu sti binni pur decisión ni chiguicaanu ne laaca zacané nga laanu para cadi gúninu xiixa «ni gusirá fe stiʼ stobi» (Filip. 1:10). Nabé risaca gúninu ndiʼ jmaruʼ si pa chiguicaanu decisión de modo gácunu lari ne modo guzuchaahuinu. Yanna, zándaca nápanu ti modo riuuláʼdxinu guzuchaahuinu, peru ¿pa cadi jneza ruuyaʼ ca hermanu o xcaadxi binni ni yaʼ? Pa guiníʼ ique chaahuinu ni la? zándaca maʼ qué zúninu ni. Ne pa nadxiinu laacabe, zuyúbinu gacanenu laacabe ne qué zuyúbinu para laasinu (1 Cor. 10:​23, 24, 32; 1 Tim. 2:​9, 10). Pa gúninu ni, zacaanu ti decisión jneza ni gusihuinni nadxiinu ne runi respetarnu xcaadxi.

15. ¿Xi naquiiñeʼ guiníʼ íquenu ante guicaanu ti decisión risaca?

¹⁵ Pa chiguicaaluʼ ti decisión risaca, galán guiníʼ íqueluʼ xi caquiiñeʼ gúniluʼ para guireeni jneza. Bisiidiʼ Jesús laanu guni calcularnu ca gastu stinu (Luc. 14:28). Nga runi, guníʼ ique pabiáʼ tiempu ne bueltu zaquiiñeluʼ para ugaandaluʼ ni maʼ gudixhe íqueluʼ. Laaca galán gábiluʼ ni familia stiluʼ ti ganda gúʼyacabe paraa zanda gacanécabe lii. ¿Xiñee risaca gúniluʼ ndiʼ yaʼ? Purtiʼ zacá zanda gúʼyaluʼ pa caquiiñeʼ guchaaluʼ caadxi cosa o gánnaluʼ xi jma jneza gúniluʼ. Pa guyúbiluʼ gacané familia stiluʼ lii ne gucaadiágaluʼ laacabe la? ziuucabe jma dispuestu gacanécabe lii para ugaandaluʼ ni naguixhe íqueluʼ (Prov. 15:22).

GUCUAA TI DECISIÓN NI GUIREE JNEZA

16. ¿Xi caquiiñeʼ gúniluʼ para guiree ca decisión stiluʼ jneza? (Laaca zanda gúʼyaluʼ cuadru ni láʼ «Ximodo zanda guicaanu decisión jneza»).

¹⁶ Pa maʼ bíʼniluʼ ca cosa ni maʼ bizéʼtenu riʼ, maʼ nuuluʼ listu para guicaaluʼ ti decisión jneza. Maʼ guníʼ ique chaahuiluʼ decisión ca ne maʼ bidxélaluʼ principiu stiʼ Biblia ni zacané lii chuulaʼdxiʼ Jehová ni. Yanna huaxa maʼ zanda guinábaluʼ Jehová gacané lii guiree decisión ca jneza.

17. ¿Xi zacané lii guicaaluʼ decisión jneza?

¹⁷ Zándaca maʼ gucuaaluʼ stale decisión ni biree jneza. Neca zacá, cadi naquiiñeʼ guiaandaʼ lii, ni zacané lii guicaaluʼ decisión jneza nga guinábaluʼ Jehová guendabiaaniʼ stiʼ ne cadi gápaluʼ confianza laca lii. Laasibe nga zanda gacanebe laanu gánnanu, guiénenu ne guiníʼ ique chaahuinu xi chigúninu ne laacani nga racanécani laanu gácanu binni nuu xpiaaniʼ (Prov. 2:​1-5). Zacá, zacané Jehová lii guicaaluʼ decisión jneza ni chuuláʼdxibe (Sal. 23:​2, 3).