«Lacuí yannadxí tu racaláʼdxitu guni adorartu»

1. ¿Xi caquiiñeʼ gúninu para guibáninu nayecheʼ, ne xiñee? (Isaías 48:​17, 18).

GUIZÁʼ nadxii Bixhózenu ni nuu guibáʼ laanu ne racaláʼdxibe guibáninu nayecheʼ yanna ne despué (Ecl. 3:​12, 13). Bizaʼbe laanu para ganda gúninu stale cosa galán. Peru qué nuzáʼdibe laanu para guni mandarnu laca laanu ne laaca qué nuzáʼdibe laanu para cuinu xii nga ni jneza ne ni cadi jneza (Ecl. 8:9; Jer. 10:23). Nánnabe para guibáninu nayecheʼ caquiiñeʼ guni adorarnu laabe ne guzúʼbanu stiidxabe (biindaʼ Isaías 48:​17, 18).

2. ¿Xi racalaʼdxiʼ Binidxabaʼ guni crenu, ne ximodo rusihuinni Jehová cadi dxandíʼ ni nabe?

² Racalaʼdxiʼ Binidxabaʼ guni crenu zanda guibáninu nayecheʼ sin gúninu ni ná Jehová ne zanda guni mandarnu laca laanu (Gén. 3:​4, 5). Maʼ bidii Jehová lugar guni mandarsaa binni laca laa ti tiempu si. Ne ridúʼyanu ca cosa ni cadi jneza runi ca gobiernu ca. Peru lu Biblia zeeda stale ejemplu stiʼ hombre ne gunaa ni bibani nayecheʼ ra biʼniʼ ni ná Jehová, ne binni ni bibani jma nayecheʼ nga Jesucristu. Primé, zadúʼyanu chupa chonna razón ni gucané laabe quixhe íquebe gúnibe ni ná Jehová. Despué, zadúʼyanu xiñee runi merecer Bixhózenu ni nuu guibáʼ guni adorarnu laa. Ne últimu, zietenaláʼdxinu chupa chonna razón ni bicaa laanu quixhe íquenu gúninu ni ná Jehová.

XIÑEE GUDIXHE IQUE JESÚS GUNI NI NÁ JEHOVÁ

3. ¿Xi gudxi Binidxabaʼ Jesús, ne xi gudixhe ique Jesús guni?

³ Dxi guyuu Jesús lu guidxilayú riʼ gupa xidé gulibe tu gúnibe ni ná. Despué si de guyuunísabe, gudxi Binidxabaʼ laabe zudii laabe guiráʼ guidxi nuu lu guidxilayú pa guzuxíbibe xañee ti biaje si ne guni adorarbe laa. Peru bicabi Jesús laabe: «¡Biree de ra nuaaʼ, Binidxabaʼ! Purtiʼ cá lu Stiidxaʼ Dios: “Biʼniʼ adorar Jehová Dios stiluʼ ne laasibe nga naquiiñeʼ gúniluʼ ni ná”» (Mat. 4:​8-10). ¿Xiñee gudixhe ique Jesús guni ni ná Dios yaʼ? Guidúʼyanu chupa chonna razón.

4, 5. ¿Gunáʼ nga caadxi razón ni gucané Jesús quixhe ique guni ni ná Jehová?

⁴ Razón jma risaca ni gupa Jesús pur gudixhe ique guni ni ná Bixhoze, Jehová nga purtiʼ guizáʼ nadxiibe laa de guidubi ladxidoʼbe (Juan 14:31). Ne runi Jesús ni ná Jehová purtiʼ nanna nga nga ni jneza (Juan 8:​28, 29; Apoc. 4:11). Nánnabe Jehová nga bidii laanu guendanabani, naca Jehová ti Dios ni rudii de guidubi ladxidóʼ ne zanda gápanu confianza laa (Sal. 33:4; 36:9; Sant. 1:17). Siempre rabi Jehová laabe ni dxandíʼ ne nanna Jesús guiráʼ ni napa, Bixhoze nga bidiini laa (Juan 1:14). Peru maʼ gadxé si Binidxabaʼ que Jehová, purtiʼ maʼ bicaa Binidxabaʼ binni guidxilayú guchee ne gatiʼ, nabé rusiguiibe, nisi rica íquebe gápabe jma ne ruyúbibe puru para laasibe (Juan 8:44). Nabé runibiáʼ chaahuiʼ Jesús Jehová ne zaqueca runibiáʼ chaahuibe Binidxabaʼ, ngue runi qué nidiʼdiʼ ndaaniʼ íquebe ñácabe casi Binidxabaʼ ne nucaalube Jehová (Filip. 2:​5-8).

⁵ Sti razón ni bicaa Jesús guni ni ná Jehová nga qué ñaandaʼ laabe guiráʼ ca cosa galán zacaabe pa qué guixélebe de Jehová (Heb. 12:2). Nánnabe pa qué guixélebe de Dios zusisácabe lá Bixhózebe ne zabeebe pecadu ne guendaguti ni nuu luguiáʼ binni pur ni biʼniʼ Binidxabaʼ.

XIÑEE RUNI MERECER JEHOVÁ GUNI ADORARNU LAA

6, 7. ¿Xiñee stale binni qué runi ni ná Jehová? ¿Xiñee runi merecer Jehová guni adorarnu laa?

⁶ Ca dxi stinu riʼ, stale binni qué runi ni ná Jehová purtiʼ qué runibiáʼcabe laabe. Qué gánnacabe de ca cualidad sicarú nápabe ne xi rúnibe pur laacaʼ. Nga peʼ nga ni bizaaca ca binni ni biʼniʼ predicar apóstol Pablo ndaaniʼ guidxi Atenas (Hech. 17:​19, 20, 30, 34).

⁷ Bisiene Pablo laacabe pur Dios ni dxandíʼ «nápanu guendanabani ne ricaanu bi ne pur laabe nápanu guiráʼ cosa». Ne laaca gúdxibe laacaʼ «purtiʼ laabe bizaʼbe laanu, pur laabe nabáninu ne riniibinu». Ne laaca bizeetebe «de ti hombre si biree guiráʼ binni ni nuu ndaaniʼ guiráʼ guidxi». Ne cumu laabe nga Dios ni bizáʼ laanu la? laasibe nga naquiiñeʼ guni adorarnu (Hech. 17:​25, 26, 28).

8. ¿Xi qué ziuu dxi guni Jehová?

⁸ Cumu nácabe Dios ni bizáʼ laanu ne ni runi mandar guiráʼ xixé ni nuu ñanda nuucabe binni ñuni adorarcaʼ laabe. ¡Peru qué ziuu dxi gúnibe nga! Ni racalaʼdxiʼ Jehová nga pa ñanda guiráʼ xixé binni ñaca xhamígucaʼ laabe para siempre (1 Tim. 2:​3, 4). Nga runi maʼ bidiibe laanu stale prueba ni rusihuinni dxandíʼ nuube ne guizáʼ nadxiibe laanu. Ne pur nga rusiidiʼ Jehová laanu para gusíʼdinu xcaadxi binni ca cosa galán ni chigúnibe pur laacaʼ ne ximodo chigúnibe ni (Mat. 10:​11-13; 28:​19, 20). Ne maʼ gudíxhebe chuʼ stale congregación ne maʼ guluube caadxi pastor para gápacaʼ laanu né stale cariñu (Hech. 20:28).

9. ¿Ximodo rusihuinni Jehová nadxii binni?

⁹ Rusihuinni Jehová pabiáʼ nadxii binni purtiʼ rudiibe cosa galán dede ca binni ni qué runi cré laabe. Biaʼ dxi huabani binni lu guidxilayú riʼ stale binni maʼ gudixhe ique guibani modo racalaʼdxiʼ. Peru cumu guizáʼ nachaʼhui Jehová la? rudiibe laacaʼ guirá ni caquiiñecaʼ para guibánicaʼ galán (Mat. 5:​44, 45; Hech. 14:​16, 17). Neca stale binni nabani modo ná ique peru pur ni biʼniʼ Jehová zanda gápacaʼ familia, gápacaʼ xiiñicaʼ, gápacaʼ xhamígucaʼ ne cueenducaʼ ni galán pur dxiiñaʼ nadipaʼ ni rúnicaʼ (Sal. 127:3; Ecl. 2:24). Nuunu seguru guizáʼ nadxii bixhózenu ni nuu guibáʼ guirá xixé binni guidxilayú (Éx. 34:6). Yanna guidúʼyanu chupa chonna razón pur gudixhe íquenu gúninu ni ná Jehová ne ximodo riguu ndaayabe laanu.

XIÑEE GULINU GÚNINU NI NÁ JEHOVÁ

10. a) ¿Gunáʼ nga razón ni jma risaca para gúninu ni ná Jehová? (Mateo 22:37). b) Ra guiníʼ íqueluʼ paciencia stiʼ Jehová ¿ximodo huayacaneni lii? (Salmo 103:​13, 14).

¹⁰ Cásica Jesús razón ni jma risaca nápanu para gúninu ni ná Dios nga purtiʼ nadxiinu laabe de guidubi ladxidoʼno (biindaʼ Mateo 22:37). Ra jma gunibiaʼnu Jehová jma riuuláʼdxinu ca cualidad sicarú ni nápabe. Casi nabé nápabe paciencia laanu. Dxi qué nuzuubaʼ ca israelita stiidxabe, gúdxibe laacaʼ: «Canabaʼ laatu lagusaana ca cosa ni cadi jneza cayúnitu» (Jer. 18:11). Nanna Jehová nácanu yudé (biindaʼ Salmo 103:​13, 14). Ora riníʼ íqueluʼ paciencia ni napa Jehová ne ca cualidad stiʼ, cadi dxandíʼ rucaa nga lii cadi gusaana de gúniluʼ ni nabe la?

11. ¿Gunáʼ nga caadxi razón ni nápanu para gúninu ni ná Jehová?

¹¹ Sti razón nápanu para gúninu ni ná Jehová nga purtiʼ nánnanu nga nga ni jma jneza gúninu (Mat. 4:10). Ne purtiʼ nánnanu ribeendunu ni galán ora qué rixélenu de Dios: racanenu guiá lá Jehová, rusihuínninu rusiguii Binidxabaʼ ne rusiécheni ladxidóʼ Bixhózenu. Pa dede ca yanna quixhe íquenu gúninu ni ná Jehová, zápanu esperanza zedandá dxi zúninu ni nabe sin qué chuʼ dxi gátinu (Juan 17:3).

12, 13. ¿Xi rusiidiʼ ni bizaaca Jane ne Pam laanu?

¹² Dede nahuiininu zanda gannaxhiinu Jehová ne qué ziuu dxi guizuíʼ guendarannaxhii stinu ra tidiʼ iza cásica ti bele ni qué rudiʼnu lugar guizuíʼ. Guidúʼyanu ni bizaaca chupa hermana Jane ne Pam.a Napa Jane 11 iza ne Pam 10 iza dxi bizulú gucuaacaʼ estudiu. Neca bixhoze ne jñaacabe qué ninacaʼ nicaacaʼ estudiu peru bidiicaʼ lugar chiganna ca testigu laacabe xi si la? cadi naquiiñeʼ gusaana de chinécabe laacaʼ yuʼduʼ guiráʼ semana. Sicaríʼ guníʼ Jane: «Ni biziideʼ de lu Biblia né ca testigu gucaneni naa cadi guneʼ guiráʼ ni runi ca compañeru stinneʼ casi guiaba lu droga o gataniáʼ tuuxa».

¹³ Gudiʼdiʼ si chupa chonna iza, gúcacabe publicadora. Ne despué gucaacabe precursora ne laaca rápacabe bixhózecabe ne jñaacabe purtiʼ maʼ huaniisicaʼ. Ora rietenalaʼdxiʼ Jane guiráʼ ni bizaacaʼ, riníʼ: «Biiyaʼ dxicheʼ qué rusaana Jehová de gapaʼ ca xhamigu, purtiʼ casi ná 2 Timoteo 2:19: “Runibiáʼ Jehová ca xpinni”». Nanna dxíchinu rapa Jehová ca ni nadxii laabe ne runi ni nabe.

14. ¿Ximodo zanda guni defenderluʼ lá Jehová? (Laaca zanda gúʼyaluʼ ca imagen ca).

¹⁴ Racaláʼdxinu gacanenu guiá lá Jehová. Guníʼ ique ejemplu riʼ. Nápaluʼ ti xhamíguluʼ guizáʼ nachaʼhuiʼ, rudii de ni napa de guidubi ladxidóʼ ne guizáʼ riene lii. Málasi binadiágaluʼ caníʼcabe nabe malu xhamíguluʼ ne rusiguii. ¿Xi zúniluʼ yaʼ? ¿Cadi dxandíʼ, zuni defenderluʼ laabe la? Zaqueca nga rizaaca ora gunadiáganu guiníʼ tuuxa cosa ni cadi dxandíʼ de Jehová, ni rúninu nga runi defendernu laabe ne rininu ni dxandíʼ de laabe (Sal. 34:1; Is. 43:10). Pur ni guininu ne ni gúninu rusihuínninu racaláʼdxinu gúninu ni ná Jehová de guidubi xhiálmanu.

15. ¿Xi ndaayaʼ gucuaa apóstol Pablo ra bichaa ca meta ni gupa? (Filipenses 3:​7, 8).

¹⁵ Cumu racaláʼdxinu chuulaʼdxiʼ Jehová ni rúninu ne racaláʼdxinu gúninu jma lu xhiiñaʼ la? riuʼnu dispuestu guchaʼnu ca meta stinu. Ne nápanu ejemplu stiʼ apóstol Pablo, guná gusaana de gaca ti binni risaca lu guidxilayú riʼ para chinanda Cristu ne guni ni ná Jehová (Gál. 1:14). Pur ni gudixhe íquebe gúnibe riʼ bibánibe nayecheʼ ne gucuaabe ndaayaʼ de guni mandarnebe Cristu guibáʼ. Qué ñuudxí niníʼ ique Pablo cadi jneza decisión ni gucuaa que, laanu laaca qué ziuudxí guiníʼ íquenu cadi jneza decisión ni gucuaanu de gúninu ni ná Jehová (biindaʼ Filipenses 3:​7, 8).

16. ¿Xi rusiidiʼ ni bizaaca Julia laanu? (Laaca zanda gúʼyaluʼ ca imagen ca).

¹⁶ Pa quixhe íquenu gúninu ni ná Jehová, zudiibe laanu stale ndaayaʼ yanna ne despué. Guidúʼyanu ni bizaaca ti hermana láʼ Julia. Dxi nahuiinibe ruundabe lade coro stiʼ ti yuʼduʼ. Cumu guizáʼ galán ruundabe la? guyuulaʼdxiʼ ti binni ni ruundaʼ ópera modo ruundabe ne bisiidiʼ laabe. Qué nindaa maʼ binibiáʼ stale binni laabe ne biindabe ca lugar ra ruunda ca famoso ca. Ra scuela de música ra riebe bisiidiʼ ti compañeru stibe laabe, lá Dios nga Jehová. Qué nindaa bizulú Julia gucuaa estudiu chupa biaje lu ti semana. Ra gudiʼdiʼ tiempu gudixhe íquebe gúnibe ni ná Jehová lugar de gácabe cantante de ópera. Neca nagana decisión que. Laabe guniʼbe: «Stale tu gudxi naa cadi cusisacaʼ gracia ni napaʼ, peru naa ni racalaʼdxeʼ nga gudieeʼ xquendanabaneʼ Jehová para guneʼ ni ná». Ra maʼ gudiʼdiʼ jma de 30 iza ¿xi riníʼ ique Julia pur decisión ni gucuaaʼ que yaʼ? Sicaríʼ guniʼbe: «Guizáʼ nayecheʼ nuaaʼ ne nuaaʼ segura zudii Jehová naa guiráʼ ni rinabaʼ ladxiduáʼ» (Sal. 145:16).

CADI GUSAANA DE GÚNILUʼ NI NÁ JEHOVÁ

17. a) ¿Xi caquiiñeʼ guni ca ni caʼruʼ gaca xpinni Jehová ne xiñee? b) ¿Xi nanna ca ni maʼ gudixhe ique guni ni ná Jehová?

¹⁷ Guizáʼ maʼ gaxha nuunu de fin stiʼ guidxilayú riʼ. Apóstol Pablo bicaa: «Purtiʼ maʼ sti “tiempuhuiiniʼ si”, ne “zedandá ni zeeda que ne maʼ qué zandaa”» (Heb. 10:37). ¿Xi rusihuinni ca diidxaʼ riʼ yaʼ? Rusihuínnicani jma maʼ huaxiéʼ tiempu napa binni para cuí guni ni ná Jehová (1 Cor. 7:29). Pa maʼ gudixhe íquenu gúninu ni ná Dios, nánnanu, zudxíʼlunu guendanagana peru zácani ti «tiempuhuiiniʼ» si.

18. ¿Xi canabaʼ Jehová ne Jesús laanu gúninu?

¹⁸ Guluu Jesús gana binni gaca discípulo stiʼ ne cadi gusaana de chinándacaʼ laabe (Mat. 16:24). Nga runi, pa maʼ zinenu stale iza de cayúninu ni ná Jehová, cadi guireʼnu gana. Dxandíʼ rúninu stipa para cadi gusaana de gúninu ni ná Jehová, neca stale biaje rácani nagana para laanu. Peru ¿cadi dxandíʼ ricaanu stale ndaayaʼ ne guizáʼ nayecheʼ nabáninu ra rúninu ni ná Jehová la? (Sal. 35:27).

19. ¿Xi rusiidiʼ ni bizaaca Gene laanu?

¹⁹ Nuu binni riníʼ ique para guni tuuxa ni ná Dios caquiiñeʼ gusaana stale cosa ni riuulaʼdxiʼ guni. Pa joven lii, ¿ñee riníʼ íqueluʼ huaxiéʼ nayecheʼ zabániluʼ pa gúniluʼ ni ná Jehová la? Ti joven ni láʼ Gene bizeeteʼ: «Guníʼ iqueʼ pur nacaʼ Testigu stale cosa nga ni qué zanda guneʼ. Ruluíʼ jma galán nabani stale de ca baʼduʼ ni biniiseniáʼ purtiʼ riecaʼ saa, rápacaʼ novia, riguítecaʼ videojuego ra cadíndecabe, peru naa la? reunión ne predicación nga riaʼ». Pur modo riníʼ ique Gene, ¿xi bicaani laa guni yaʼ? Laabe guniʼbe: «Nagaʼchiʼ bineʼ caadxi cosa ni cadi jneza, ne ti ratu si bisiechecani naa. Ni dxandíʼ la? cadi nabaneʼ nayecheʼ. Ngue runi bizulú guníʼ iqueʼ guiráʼ ca conseju ni zeeda lu Biblia ni cadi cayuneʼ ne guníʼ iqueʼ xi zabeenduáʼ pa quixheʼ iqueʼ chinandaʼ cani. Ne óraque nga gudixheʼ iqueʼ guneʼ ni ná Jehová de guidubi ladxiduáʼ. Dede dxi que runeʼ sentir bicabi Jehová ca oración stinneʼ».

20. ¿Xi maʼ gudixhe íquenu gúninu?

²⁰ Sicaríʼ biindaʼ ti hombre bicaa Salmo para Jehová: «Nayecheʼ ziuu binni ni cuiluʼ ne gucaaluʼ laa guidxiña para cueza lu ca patiu stiluʼ» (Sal. 65:4). Cásica Josué, guininu né stale valor: «Naa né ca ni nabeza ra lidxeʼ la? zuni adorardu Jehová» (Jos. 24:15).