Joven, yenanda ejemplu stiʼ Marcos ne Timoteo

1, 2. ¿Xi ñándaca nucueeza Marcos ne Timoteo para maʼ qué ñúnicaʼ xhiiñaʼ Jehová?

PA NÁCALUʼ ti jovenhuiiniʼ zándaca racaláʼdxiluʼ gúniluʼ jma lu xhiiñaʼ Jehová ne gacaneluʼ congregación. Nabé riéchedu ora gúʼyadu nuu stale joven ni racalaʼdxiʼ gacané xcaadxi binni (Sal. 110:3). Peru nuu biaje nagana ni. Zándaca ridxíbiluʼ gúniluʼ jma lu xhiiñaʼ Jehová purtiʼ qué gánnaluʼ xi chiguidxagaluluʼ. O zándaca qué ninaluʼ ni caaluʼ xiixa dxiiñaʼ ndaaniʼ congregación purtiʼ guníʼ íqueluʼ qué zanda gúniluʼ ni. Pa huazaacaluʼ ni bizéʼtenu riʼ cadi chuʼluʼ xizaa, cadi lii si nga huazaacaluʼ ni.

² Zacá ga nga bizaaca Marcos ne Timoteo, neca qué gánnacabe xi chiguidxagalucabe qué nudiicabe lugar nucueeza ngue laacabe de ñacanécabe xcaadxi. Dxi biʼniʼ invitar apóstol Pablo ne Bernabé Marcos para chinécabe laa primé viaje casi misioneru zándaca nabeza Marcos ne jñaa ndaaniʼ ti yoo galán (Hech. 12:​12, 13, 25). Peru guná Marcos gusaana lidxi para guni predicar jma. Primé guyebe Antioquía ne despué yené Pablo ne Bernabé laabe xcaadxi lugar zitu (Hech. 13:​1-5). Zacá ga nga bizaaca Timoteo, zándaca nabezanebe bixhózebe ne jñaabe ora biʼniʼ invitar Pablo laabe chiguni predicárnebe laa. Ñándaca niníʼ ique Timoteo nahuiiniruʼ ne qué zanda chiné laabe (bichaaga ni né 1 Corintios 16:​10, 11 ne 1 Timoteo 4:12). Peru gudixhe íquebe chinebe Pablo, ne gucuaabe stale ndaayaʼ (Hech. 16:​3-5).

3. a) ¿Ximodo nánnanu nabé guyuulaʼdxiʼ Pablo modo naca Marcos ne Timoteo? (2 Timoteo 4:​6, 9, 11; laaca zanda gúʼyaluʼ ca imagen ca). b) ¿Xi pregunta zacábinu lu artículo riʼ?

³ Dxi nahuiiniʼ Marcos ne Timoteo biziidicaʼ gúnicaʼ stale dxiiñaʼ ndaaniʼ congregación. Nabé guyuulaʼdxiʼ Pablo modo nácacabe, ra gúnnabe maʼ zeeda guidxiña dxi gátibe gunábabe cheʼ Marcos ne Timoteo ra nuube (biindaʼ 2 Timoteo 4:​6, 9, 11). ¿Xi cualidad galán gupa Marcos ne Timoteo ni bicaa Pablo gannaxhii ne gapa confianza laacabe yaʼ? ¿Ximodo zanda chinanda ca joven ejemplu stícabe? ¿Ne xi conseju bidii Pablo zanda gacané ca joven?

YENANDA EJEMPLU STIʼ MARCOS: GUYUU LISTU PARA GACANELUʼ XCAADXI

4, 5. ¿Ximodo bisihuinni Marcos qué nusaana de ñacané xcaadxi?

⁴ Sicaríʼ ruzeeteʼ ti libru, gacanenu xcaadxi binni riniʼni cadi gusaana de gacanenu laacaʼ ne gúninu ni nagueendaca neca gácani nagana. Ne nga peʼ nga ni biʼniʼ Marcos. Dxi qué niná Pablo niné laabe lu guiropa viaje biʼniʼ, zándaca guyuube triste purtiʼ cadi cabézabe guni Pablo ni laabe (Hech. 15:​37, 38). ¿Ñee biree Marcos gana ne bisaana de gacané ca hermanu la? ¡Coʼ, que ñúnidibe ni!

⁵ Guyé Marcos ne Bernabé, xprimu, sti lugar para gacanecaʼ. Biaʼ 11 iza despué, dxi deguyoo Pablo ndaaniʼ guidxi Roma, Marcos nga guca tobi de ca ni nabé gucané laabe (Filem. 23, 24). Ne Pablo peʼ nabé bidii xquixe peʼ laabe pur gucanebe laa, ne guníʼ naca Marcos tobi ni riguixhedxí ladxidóʼ (Col. 4:​10, 11).

6. Ra bidxaaga Marcos ca xpinni Cristu ni maʼ biniisi lu Stiidxaʼ Dios, ¿ximodo gucaneni laa? (Laaca zanda gúʼyaluʼ nota ca).

⁶ Ti cosa ni nabé gucané Marcos nga bíʼninebe dxiiñaʼ ca xpinni Cristu ni maʼ biniisi lu Stiidxaʼ Dios. Despué de guyuube né Pablo ndaaniʼ guidxi Roma, guyebe ra nuu apóstol Pedro ndaaniʼ guidxi Babilonia. Nabé guca xhamígucabe ne dede gudxi Pedro laabe «xiiñeʼ» (1 Ped. 5:13). Zándaca gudxi Pedro laabe caadxi cosa risaca de Jesús ne de dxiiñaʼ ni biʼniʼ tiempu biʼniʼ predicar, ne despué bicaa Marcos ni lu libru ni ziné lá.a

7. ¿Ximodo yenanda ti hermanu ejemplu stiʼ Marcos? (Laaca zanda gúʼyaluʼ imagen ca).

⁷ Nabé biʼniʼ Marcos xhiiñaʼ Jehová ne bidxaagabe ca xpinni Cristu ni maʼ biniisi lu Stiidxaʼ Dios. ¿Ximodo zanda chinándaluʼ ejemplu stibe yaʼ? Pa naguixhe íqueluʼ ugaandaluʼ xiixa responsabilidad ndaaniʼ congregación peru caʼruʼ gudiicabe ni lii, cadi guireeluʼ gana biyubi xcaadxi modo gúniluʼ jma lu xhiiñaʼ Jehová ne gucané ca hermanu. Guzéʼtenu ni bizaaca Seung-Woo, yanna maʼ nácabe ancianu. Dxi nahuiinibe bichaagabe laabe né xcaadxi hermanu biaʼca xhízabe. Caadxi de laacaʼ gucuaacaʼ caadxi dxiiñaʼ ndaaniʼ congregación peru laabe coʼ, ngue runi biʼniʼ sentirbe cadi culabi ca hermanu que laabe. Guníʼnebe ca ancianu, ne tobi de ca ancianu que gudxi laabe gacanebe xcaadxi neca ruluíʼ guirutiʼ cayuuyaʼ ni cayúnibe. Ngue runi, gudixhe íquebe gacanebe ca hermanu ni maʼ huaniisi ne ca ni caquiiñeʼ tu chiné laacaʼ reunión. Ora guníʼ íquebe ni bizaacabe que, guniʼbe: «Biziideʼ xi riníʼ gacanenu xcaadxi ne bidieeʼ cuenta ra gucaniáʼ ca hermanu nabé nayecheʼ guyuaaʼ».

YENANDA EJEMPLU STIʼ TIMOTEO: BISIHUINNI RIZAALÁʼDXILUʼ XCAADXI

8. ¿Xiñee gulí Pablo Timoteo para chiné laa lu ca viaje ni chiguni? (Filipenses 2:​19-22).

⁸ Ora guyé Pablo yeganna ca lugar ra guzanándacabe laa, yenebe hermanu ni nadxibalú. Primé, gulibe Silas, ti xpinni Cristu ni maʼ ziné iza de cayuni xhiiñaʼ Jehová (Hech. 15:​22, 40). Despué, gulibe Timoteo. ¿Xiñee gulibe hombrehuiiniʼ riʼ para chiné laabe yaʼ? Primé la? purtiʼ nabé galán riníʼcabe de laa (Hech. 16:​1, 2). Ne guiropa, purtiʼ nanna Pablo nabé rizaalaʼdxiʼ Timoteo binni (biindaʼ Filipenses 2:​19-22).

9. ¿Ximodo bisihuinni Timoteo nabé rizaalaʼdxiʼ ca hermanu?

⁹ Dede primé biaje biʼniné Timoteo Pablo dxiiñaʼ, bisihuínnibe jma rizaaláʼdxibe ni cazaaca xcaadxi que ni cazaacabe. Ngue runi gupa Pablo confianza laabe ne bisaana laabe ndaaniʼ guidxi Berea para cuʼbe gana ca ni nacubi guca xpinni Cristu (Hech. 17:​13, 14). Cumu nuu Silas Berea la? zándaca biziidiʼ Timoteo stale de laabe. Peru despué, biseendaʼ Pablo Timoteo cheʼ stubi Tesalónica para guquidxi fe stiʼ ca hermanu ni nuu ndaaniʼ congregación que (1 Tes. 3:​2, nota). Ne 15 iza despué, bihuinni dxichi caʼruʼ gusaana Timoteo de gannaxhii ca hermanu, purtiʼ biinanebe ca ni cayuunaʼ (Rom. 12:15; 2 Tim. 1:4). ¿Ximodo zanda chinanda ca joven ejemplu stibe?

10. ¿Ximodo biziidiʼ ti hermanu guizaalaʼdxiʼ xcaadxi binni?

¹⁰ Ti hermanu ni láʼ Woo Jae biziidiʼ guizaalaʼdxiʼ xcaadxi binni. Dxi joven laabe, nabé raca nagana para laabe guiníʼnebe ca hermanu ni maʼ huaniisi. Ngue runi ora riebe reunión rugapadiúxisibe ca hermanu que. Para ganda guiníʼnebe ca hermanu que diidxaʼ yenándabe conseju ni bidii ti ancianu laabe, laa gudxi laabe zanda gábibe ca hermanu que xiixa ni riuuláʼdxibe de laacaʼ ne guiníʼ íquebe xi riuuláʼdxicaʼ. Ne bíʼnibe ni gudxi ancianu que laabe. Yanna maʼ nácabe ancianu ne laabe guniʼbe: «Jma maʼ qué raca nagana para naa guinieniáʼ binni biaʼ tiica si iza nápacaʼ. Jma rieneʼ ca guendanagana ni nápacaʼ ne nga racané naa ganda gacaniáʼ ca hermanu né ni caquiiñecaʼ».

11. ¿Ximodo zanda guiziidiʼ ca joven gusihuínnicaʼ rizaaláʼdxicaʼ ca hermanu ni nuu ndaaniʼ congregación? (Laaca zanda gúʼyaluʼ ca imagen ca).

¹¹ Joven, lii laaca zanda guiziidiluʼ gusihuínniluʼ rizaaláʼdxiluʼ xcaadxi binni. Ora cheluʼ reunión biʼniʼ stipa guiníʼneluʼ guiráʼ ca hermanu, biaʼ tiica iza nápacabe. Gunabadiidxaʼ laacabe ximodo nuucabe ne bicaadiagaʼ chaahuiʼ ni gábicabe lii. Pa gúniluʼ ni la? zánnaluʼ ximodo zanda gacaneluʼ laacabe. Zándaca gúʼyaluʼ caquiiñeʼ ti guendaxheelaʼ ni maʼ huaniisi chuʼ tu gacané laacaʼ para ganda iquiiñecaʼ aplicación JW Library^® o caquiiñecabe tu chiguni predicarné laacabe. ¿Ñee zanda gacaneluʼ laacabe guiziidicabe iquiiñecabe tableta stícabe o guni predicarneluʼ laacabe la? Pa guyúbiluʼ gacaneluʼ xcaadxi binni, zuuyaʼ ca hermanu ca nácaluʼ ti ejemplu galán ndaaniʼ congregación.

CA CONSEJU BIDII PABLO ZANDA GACANÉCANI LII

12. ¿Xi zanda guni ca joven para gacané ca conseju ni bidii Pablo Timoteo laacaʼ?

¹² Gunnaxhii Pablo Timoteo casi xiiñiʼ, ngue runi bidiibe laa conseju para guibani galán ne chuʼ nayecheʼ ra guni xhiiñaʼ Dios (1 Tim. 1:18; 2 Tim. 4:5). ¿Xi zanda gúniluʼ para gacané ca conseju ca lii yaʼ? Biindaʼ guiropaʼ carta ni bicaa Pablo ra nuu Timoteo ne biindaʼ cani casi ñaca para lii gucuácani ne biʼniʼ stipa chinándaluʼ ca conseju ni zeeda lúcani. Guidúʼyanu chupa chonna ejemplu.

13. ¿Xi zacané lii guibániluʼ modo ná Dios?

¹³ «Bicaa ique guibániluʼ modo ná Dios» (1 Tim. 4:7b). Guibáninu modo ná Dios laani nga cadi guixélenu de Jehová ne chuuláʼdxinu gúninu ni riuuláʼdxibe. Ne cumu qué ralenenu ni la? caquiiñeʼ guizíʼdinu gusihuínninu ni. ¿Ximodo zanda gúninu ni yaʼ? Pablo guníʼ: «Bicaa ique guibániluʼ». Lu diidxaʼ griegu, riquiiñecabe diidxaʼ riʼ para guiníʼcabe pabiáʼ nadipaʼ runi entrenar ca ni cheʼ lu ti carrera. Naquiiñeʼ gusiaacabe cuerpu stícabe ti guni entrenar ne guni ganárcabe. Zaqueca nga laanu naquiiñeʼ gusiaʼnu laanu gúninu ca cosa ni guchiña laanu gaxha de Jehová.

14. ¿Xii nga ni racaláʼdxinu gúninu ora maʼ cadúʼndanu Biblia? Biquiiñeʼ ti ejemplu para gusiéneluʼ ni.

¹⁴ Ti cosa ni caquiiñeʼ guiaaluʼ gúniluʼ nga gúʼndaluʼ Biblia guiráʼ dxi. Ne ora gúniluʼ ni bietenalaʼdxiʼ, ni racaláʼdxiluʼ nga chuʼluʼ jma gaxha de Jehová. Guidúʼyanu ximodo zanda gúniluʼ ni, quíxhenu ti ejemplu. Guníʼ ique cayuundaluʼ ra caniʼné Jesús ti joven ricu ni naca gobernante stiʼ ca judíu (Mar. 10:​17-22). Biʼniʼ cré joven que Jesús nga Mesías, peru huaxiéʼ fe nápabe para gácabe discípulo stiʼ. Neca zaqué, Biblia ná gunnaxhii Jesús laabe. Zándaca ridxagayaaluʼ pabiáʼ nachaʼhuiʼ guca Jesús ra guniʼné laabe. Rihuinni dxíchica racalaʼdxiʼ Jesús guicaa joven riʼ ti decisión galán. ¿Xi rusiidiʼ relatu riʼ lii de Jehová yaʼ? Cumu rusihuinni Jesús modo naca Bixhoze la? relatu riʼ rusiidini lii nadxii Jehová joven riʼ (Juan 14:9). Ne ora guiníʼ íqueluʼ ni ná relatu riʼ ne ni cayúniluʼ lu xquendanabániluʼ, guníʼ ique pregunta riʼ: «¿Xi caquiiñeʼ guneʼ para chuaaʼ jma gaxha de Jehová ne gacaniáʼ xcaadxi yaʼ?».

15. ¿Xiñee nabé risaca guni ca joven stipa gácacaʼ ti ejemplu para xcaadxi? (1 Timoteo 4:​12, 13).

¹⁵ Guca «ti ejemplu para ca hermanu fiel» (biindaʼ 1 Timoteo 4:​12, 13). Gudxi Pablo Timoteo gucaa ique guiziidiʼ guʼndaʼ chaahuiʼ ne gaca ti hombre ni nanna gusiidiʼ. Peru laaca bidiibe laa conseju ra gúdxibe laa gusihuinni cualidad galán casi gannaxhii binni, gusihuinni napa fe ne guibani jneza. ¿Xiñee gúdxibe laa zaqué yaʼ? Purtiʼ jma risaca ni runi binni que ni riníʼ. Guníʼ ique gunábacabe lii gutiidiluʼ ti discursu ra cuʼluʼ gana ca hermanu guni predicarcaʼ jma. Qué zatuí luluʼ gutiidiluʼ ni purtiʼ cayúniluʼ stipa guni predicarluʼ biaʼ gándatiʼ. Pa guʼyaʼ ca hermanu cayúniluʼ stipa pur guni predicarluʼ la? zucaani laacaʼ chinándacaʼ ejemplu stiluʼ (1 Tim. 3:13).

16. a) ¿Xi gaayuʼ cosa zanda gacané ca joven para gácacaʼ ti ejemplu galán para xcaadxi? b) ¿Xi zanda guni ti joven para gaca ti ejemplu pur modo riníʼ?

¹⁶ Lu 1 Timoteo 4:​12, guníʼ Pablo gaayuʼ cosa ni zanda guni ti joven para gaca ti ejemplu para xcaadxi. ¿Xiñee qué quixhe íqueluʼ gúʼndaluʼ ni lu estudiu personal stiluʼ? Guzéʼtenu ti ejemplu, racaláʼdxiluʼ gúniluʼ primé ni riete luni ca ne laani nga, «modo guiniʼluʼ». Guníʼ ique xi zanda guiniʼluʼ para cuʼluʼ gana xcaadxi. Pa nabezaneluʼ bixhózeluʼ ne jñaaluʼ, ¿ñee zanda gudiiluʼ xquixe peʼ laacabe gatigá pur guiráʼ ni rúnicabe pur lii la? Ne ora cheluʼ reunión, ¿ñee zanda gúniluʼ stipa comentariu né diidxaʼ stiluʼ la? Ne ora guiluxe ca reunión ca, ¿ñee zanda guidxíñaluʼ ti hermanu ni bitiidiʼ ti asignación ne gábiluʼ laa ni guyuuláʼdxiluʼ de laani la? Pa gúniluʼ stipa gácaluʼ ti ejemplu galán pur modo guiniʼluʼ la? zuuyaʼ xcaadxi pabiáʼ galán cayúniluʼ xhiiñaʼ Dios (1 Tim. 4:15).

17. ¿Gunáʼ nga caadxi cosa ni zanda gacané ca joven ugaandacaʼ meta ni naguixhe íquecaʼ ndaaniʼ xquidxi Dios? (2 Timoteo 2:22).

¹⁷ «Bixeleʼ de ca deseu ni rapa ca joven, biʼniʼ ni jneza» (biindaʼ 2 Timoteo 2:22). Gudxi Pablo Timoteo gucaanáʼ ca deseu ni zanda gucueeza laa de ugaanda ca meta ni naguixhe ique ne ni zanda guxheleʼ laa de Jehová. Zándaca gudiiluʼ cuenta rúniluʼ xiixa, neca cadi malu ni, peru ráxhani tiempu ni ñanda niquiiñeluʼ para ñúniluʼ cosa ni guchiña lii gaxha de Jehová. Guzéʼtenu ti ejemplu, guníʼ ique pabiáʼ tiempu riquiiñeluʼ para quíteluʼ xiixa deporte, pabiáʼ tiempu riuuluʼ lu internet o pabiáʼ tiempu riguíteluʼ xiixa videojuego. ¿Ñee zanda iquiiñeluʼ tiempu ca para gúniluʼ jma lu xhiiñaʼ Jehová ne gacaneluʼ ca hermanu la? Zanda gacaneluʼ ndaaniʼ congregación lu mantenimientu stiʼ Yoo stiʼ Reinu o guni predicarneluʼ exhibidor. Ra gúniluʼ ni zápaluʼ xhamíguluʼ ni gacané lii gápaluʼ meta ndaaniʼ xquidxi Jehová ne ugaandaluʼ cani.

ZÁPALUʼ STALE NDAAYAʼ RA GACANELUʼ XCAADXI

18. ¿Xiñee zanda guininu nabé nayecheʼ modo bibani Marcos ne Timoteo?

¹⁸ Nabé nayecheʼ bibani Marcos ne Timoteo purtiʼ gunacaʼ bichaacaʼ modo nabánicaʼ para gacanecaʼ xcaadxi (Hech. 20:35). Guyé Marcos stale lugar para gacané ca hermanu ne laaca bicaabe ti relatu ra bizeetebe modo bibani Jesús ni rucaa laanu guni sentirnu ni biʼniʼ sentir Jesús. Ne Timoteo la? gucanebe Pablo para gaca formar congregación ne cuʼbe gana ca hermanu. Rihuinni dxíchica nabé biechené Jehová Marcos ne Timoteo purtiʼ bichaacaʼ modo nabánicaʼ para gúnicaʼ xhiiñabe.

19. ¿Xiñee risaca chinanda ca joven conseju ni bidii Pablo, ne pa gúnicabe ni xi zabeendúcabe?

¹⁹ ¿Xi rusiidiʼ ca carta ni bicaa Pablo ra nuu Timoteo laanu yaʼ? Rusiidicani laanu pabiáʼ gunnaxhii Pablo xhamigu. Ne laaca rusiidini lii, joven, laaca nadxii Jehová lii, ne racaláʼdxibe guibániluʼ nayecheʼ. Nga runi risaca chinándaluʼ ca conseju bidii Pablo ne chuuláʼdxiluʼ gacaneluʼ jma ca hermanu stiluʼ. Pa gúniluʼ ni zabániluʼ nayecheʼ yanna ne despué zacaaluʼ «guendanabani, ni dxandíʼ guendanabani» (1 Tim. 6:​18, 19).