Xiñee nabé risaca lá Jehová para Jesús

1, 2. a) ¿Xi biʼniʼ Jesús gueelaʼ ante gati? b) ¿Xi zacábinu lu artículo riʼ?

GÚCANI ti jueves huaxhinni, casi peʼ bizulú 14 stiʼ nisán iza 33 ne maʼ cadi candaa para guni traicionárcabe, guni juzgárcabe, guni condenárcabe, guni búrlacabe, quíñecabe ne guuticabe Jesús. Nuube né ca apóstol stibe ndaaniʼ ti cuartu ni nuu luguiáʼ. Gudoxhísicabe guníʼ Jesús caadxi diidxaʼ ni nabé guluu gana ca apóstol stiʼ. Ne maʼ para guireecabe de raqué biʼniʼ Jesús ti oración nabé risaca. Ne apóstol Juan bicaa ni lu capítulo 17 stiʼ libru ni ziné lá.

² Lu artículo riʼ zadúʼyanu caadxi cosa ni zanda guizíʼdinu de oración ni biʼniʼ Jesús: ¿xii nga ca cosa ni naguu xizaa laabe óraque ne xii nga ni jma bisaca para laabe dxi guyuube lu Guidxilayú?

«MAʼ BISIIDEʼ LAACABE TU LALUʼ»

3. ¿Xi guníʼ Jesús de lá Jehová, ne xii ngue racaláʼdxibe guiniʼbe? (Juan 17:​6, 26).

³ Lu oración ni biʼniʼ Jesús, gúdxibe Jehová: «Maʼ bisiideʼ laacabe tu laluʼ». Rihuinni dxíchica nabé risácani para Jesús purtiʼ chupa biaje bizeetebe ni (biindaʼ Juan 17:​6, 26). ¿Ñee caníʼ Jesús maʼ bisiidiʼ ca discípulo stiʼ Jehová nga lá Dios la? Coʼ. Maca nánnacabe ni purtiʼ judíu laacabe ne lu Stiidxaʼ Dios ni gucuá lu hebreu stale biaje riete lá Dios luni. Ni caníʼ Jesús nga maʼ bisiidibe ximodo naca Jehová, ni naguixhe ique guni, ca cosa ni maʼ biʼniʼ ne ca cualidad ni napa. Cumu Jesús si nga ni jma runibiáʼ chaahuiʼ modo naca Jehová la? nga runi laasibe nga zanda gusiidibe modo peʼ naca Bixhózebe.

4, 5. a) ¿Ximodo reeda gaca lá ti binni ti cosa nabé risaca para lii? Biquiiñeʼ ti ejemplu para gusiéneluʼ ni. b) ¿Ximodo binibiáʼ chaahuiʼ ca apóstol que Jehová?

⁴ Guzéʼtenu ti ejemplu, guníʼ ique ndaaniʼ congregación ra rieluʼ nuu ti ancianu ni láʼ David ne nácabe doctor ni runi operar binni. Zándaca maʼ xadxí de runibiaʼluʼ laabe. Peru málasi ti dxi bizaacaluʼ xiixa ne caquiiñeʼ cheluʼ ra nuu doctor nagueendaca. Yenécabe lii ra hospital ra runi hermanu que dxiiñaʼ ne biʼniʼ hermanu riʼ guiráʼ ni nuu lu náʼ para gulá lii. Pur ni biʼniʼ hermanu riʼ pur lii jma gunnaxhiiluʼ laabe ne zándaca cada biaje gunadiágaluʼ labe rietenaláʼdxiluʼ ni bíʼnibe pur lii. Yanna ora ruuyaluʼ hermanu David maʼ qué ruuyaluʼ laabe casi ti ancianu si stiluʼ, sínuque laaca ruuyaluʼ laabe casi tuuxa ni bilá xquendanabániluʼ, ne yanna nabé risaca labe para lii.

⁵ Zacá ga nga bizaaca ca discípulo stiʼ Jesús que, maca nánnacabe lá Dios nga Jehová. Peru binibiáʼ chaahuicabe Dios ni ziné lá ca. Ne beeda gaca lá Jehová ti cosa nabé risaca para laacabe. ¿Ximodo gunda gúcani yaʼ? Pur dxiiñaʼ ni biʼniʼ Jesús lu Guidxilayú riʼ. Bisihuínnibe ximodo peʼ naca Bixhózebe pur guiráʼ ni bíʼnibe ne ni guniʼbe. Ora biʼyaʼ ca apóstol que modo rusiidiʼ Jesús ne modo runi tratarbe binni gucaneni laacaʼ gunibiáʼ chaahuicaʼ Jehová (Juan 14:9; 17:3).

«NOMBRE STILUʼ —NI BIDIILUʼ NAA—»

6. ¿Xii nga gucalaʼdxiʼ Jesús niníʼ ora gúdxibe Jehová «nombre stiluʼ» ni bidiiluʼ naa? (Juan 17:​11, 12).

⁶ Ra canabaʼ Jesús pur ca discípulo stiʼ gúdxibe Jehová lu oración ni bíʼnibe: «Gupa laacabe pur nombre stiluʼ —ni bidiiluʼ naa—» (biindaʼ Juan 17:​11, 12). ¿Ñee riníʼ nga laaca zanda gábicabe Jesús, Jehová la? Coʼ. Lu oración ni biʼniʼ Jesús ora bizeetebe de lá Jehová guniʼbe ni casi «nombre stiluʼ». Ngue runi qué nicaa diʼ Jesús lá «Jehová». Yanna, ¿xii nga gucalaʼdxiʼ Jesús niníʼ ora gúdxibe Jehová «nombre stiluʼ» ni bidiiluʼ naa yaʼ? Primé la? naca Jesús representante stiʼ Jehová ne ni riníʼ pur laa. Bixhózebe nga biseendaʼ laabe, ne bíʼnibe stale milagru lu lá Bixhózebe (Juan 5:43; 10:25). Ne lá Jesús riniʼni «Jehová nga ni rulá». Racá ridúʼyanu, zeeda lá Jehová lu ca diidxaʼ ni riníʼ lá Jesús.

7. Biquiiñeʼ ti ejemplu para gusiéneluʼ xiñee zanda guiníʼ Jesús lu lá Jehová.

⁷ Para ganda guiene chaahuinu ni la? guzéʼtenu ti ejemplu. Ti binni ni runi mandar ti guidxi la? zanda cuí tuuxa para gaca embajador stiʼ o representante ne gudiibe laa autoridad para guiníʼ lu labe. Ni guiníʼ embajador que laaca zasácani cásica risaca stiidxaʼ ni cayuni mandar que. Zacaca nga gulí Jehová Jesús para gaca representante stiʼ ne bidiibe laa autoridad para guiníʼ lu labe (Mat. 21:9; Luc. 13:35).

8. ¿Ximodo nga nuu lá Jehová luguiáʼ Jesús ante gueeda lu Guidxilayú riʼ? (Éxodo 23:​20, 21).

⁸ Lu Biblia ná, Jesús nga diidxaʼ purtiʼ huaquiiñeʼ Jehová laabe para gábibe ca ángel ne binni guidxilayú ni racalaʼdxiʼ Jehová gánnacaʼ ne xi gúnicaʼ (Juan 1:​1-3). Zándaca Jesús nga ángel ni biseendaʼ Jehová para gabi ca israelita que xi gúnicaʼ ne gápabe laacaʼ laga zecaʼ lu desiertu. ¿Xiñee naquiiñeʼ guzuubacabe stiidxaʼ ángel riʼ yaʼ? Purtiʼ Jehová guníʼ: «Nuu laʼyaʼ luguiabe» (biindaʼ Éxodo 23:​20, 21).a ¿Ximodo nga nuu lá Jehová «luguiabe» yaʼ? Nuu lá Jehová luguiabe purtiʼ nácabe representante stiʼ ne laabe nga ni jma runi defender lá Jehová ne ni jma rusisaca ni.

«BIXHOZEʼ, BISISACA LALUʼ»

9. ¿Ximodo nánnanu maca risaca lá Jehová para Jesús?

⁹ Casi maʼ bidúʼyanu dede ante gueeda Jesús lu Guidxilayú, maca risaca lá Jehová para laabe. Ne laaca bisihuínnibe ni pur guiráʼ ni bíʼnibe dxi guyuube lu Guidxilayú riʼ. Ne ra maʼ caluxe dxiiñaʼ ni bíʼnibe lu Guidxilayú riʼ, gunábabe Jehová: “Bixhozeʼ, bisisaca laluʼ». Oraqueca bicabi Bixhózebe laabe dede guibáʼ ne guníʼ: «Maʼ bisisacaʼ ni, ne laaca zusisacaʼ ni sti biaje» (Juan 12:28).

10, 11. a) ¿Ximodo bisisaca Jesús lá Jehová? (Laaca zanda gúʼyaluʼ imagen ca). b) ¿Xiñee caquiiñeʼ guni santificarnu ne gusianu lá Jehová?

¹⁰ Laaca bisisaca Jesús lá Bixhoze. ¿Ximodo bíʼnibe ni yaʼ? Ra guníʼnebe xcaadxi binni de ca cualidad ni napa Jehová ne de ca cosa ni maʼ biʼniʼ. Peru cadi ngasi nga ni biʼniʼ Jesús para gusisaca lá Jehová. Nánnabe caquiiñeʼ gaca santificar lá Jehová ne guiá lá Jehová de guiráʼ cosa ni cadi dxandíʼ ni guníʼ Binidxabaʼ de laa.b Ne bisihuinni Jesús risaca para laa ca cosa ni bizéʼtenu riʼ ora bisiidibe ca discípulo stibe guni orarcaʼ. Guniʼbe: «Bixhózedu ni nuu guibáʼ, gaca santificar laluʼ» (Mat. 6:9).

¹¹ ¿Xiñee caquiiñeʼ gaca santificar ne guiá lá Jehová yaʼ? Purtiʼ ndaaniʼ jardín de Edén que guníʼ Binidxabaʼ cosa ni cadi dxandíʼ de Jehová, guniʼbe rusiguii Jehová ne qué naʼ gudii cosa galán Adán ne Eva (Gén. 3:​1-5). Casi xa ñaca bicaa Binidxabaʼ laacabe guiníʼ íquecabe cadi jneza modo runi Jehová ca cosa ca. Pur ni bíʼnibe riʼ bicaalube lá Jehová. Ne tiempu bibani Job guníʼ Binidxabaʼ runi binni ni ná Jehová purtiʼ cudii Jehová laacaʼ cosa galán. Ne laaca guníʼ Binidxabaʼ nin ti binni qué zuni ni ná Jehová, ne ora guidxagalú guendanagana zusaana de guni ni nabe (Job 1:​9-11; 2:4). Caquiiñeʼ tidiʼ tiempu para guihuinni tuu nga caníʼ ni dxandíʼ: Jehová la? o Binidxabaʼ.

«CUDIEEʼ XQUENDANABANEʼ»

12. ¿Xi guyuu Jesús dispuestu guni pur nadxii lá Jehová?

¹² Guizáʼ nadxii Jesús Bixhoze ne racalaʼdxiʼ guni guiráʼ ni nuu lu náʼ para guni santificar ne gusiá lá Jehová. Ngue runi guniʼbe: «Cudieeʼ xquendanabaneʼ» (Juan 10:​17, 18). Ne dede guyuube dispuestu gátibe pur lá Bixhózebe.c Bidxiideche Adán ne Eva Jehová ne guyuucaʼ pur Binidxabaʼ. Peru Jesús maʼ gadxé ni biʼniʼ, guyuu dispuestu beeda lu Guidxilayú ne bisihuinni pabiáʼ nadxii Jehová ra bizuubaʼ diidxaʼ biaʼ tiempu bibani (Heb. 4:15; 5:​7-10). Qué nucheenebe Jehová dede dxi gútibe (Heb. 12:2). Pur guiráʼ ni bíʼnibe bisihuínnibe pabiáʼ nadxiibe Jehová ne lá Jehová.

13. ¿Xiñee Jesús si nga zanda gusihuinni rusiguii Binidxabaʼ? (Laaca zanda gúʼyaluʼ imagen ca).

¹³ Pur guiráʼ ni biʼniʼ Jesús dxi guyuu lu Guidxilayú riʼ bisihuínnibe Binidxabaʼ nga rusiguii ne cadi Jehová (Juan 8:44). Jesús si nga ni jma runibiáʼ chaahuiʼ modo naca Jehová lade guiráʼ ni bizáʼ Dios. Pa ñaca de lade guiráʼ ni guníʼ Binidxabaʼ de Dios neca tobi ñaca dxandíʼ la? ñanna Jesús ni. Peru Jesús gudixhe ique guni defender lá Jehová. Dede né ora ruluíʼ bisaana Jehová laabe guyuube dispuestu gátibe ne cadi gudxiidéchebe Bixhózebe ni guizáʼ nadxii laabe (Mat. 27:46).d

«MAʼ BINDUUXEʼ DXIIÑAʼ NI BIDIILUʼ NAA GUNEʼ»

14. ¿Xi premiu bidii Jehová Jesús pur qué nixeleʼ de laabe?

¹⁴ Lu oración ni biʼniʼ Jesús gueelaʼ ante gatiʼ, gúdxibe Jehová: «Maʼ binduuxeʼ dxiiñaʼ ni bidiiluʼ naa guneʼ». Nánnabe zudii Jehová laabe premiu purtiʼ qué nixélebe de laa (Juan 17:​4, 5). Ne biaʼsi ngue ni caníʼ íquebe. Qué nudii Jehová lugar ñaanabe ndaaniʼ baʼ (Hech. 2:​23, 24). Gundisaʼ laabe de lade gueʼtuʼ ne bidii laabe ti puestu ni jma risaca guibáʼ (Filip. 2:​8, 9). Ne gudiʼdiʼ si iza bizulú Jesús cayuni mandar casi Rey lu Reinu stiʼ Dios. ¿Xi zuni Reinu ca yaʼ? Bisiene Jesús ni ora bisiidiʼ laanu guinábanu Jehová: «Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mat. 6:10).

15. ¿Xiruʼ chiguni Jesús?

¹⁵ Maʼ cadi candaa, zadindené Jesús ca xhenemigu Dios ne zunitilube guiráʼ binni malu lu Armagedón (Apoc. 16:​14, 16; 19:​11-16). Ne zulaabe Binidxabaʼ ndaaniʼ «abismo», ti lugar ra ruzeeteʼ Biblia zadeguyoo Binidxabaʼ ne maʼ qué zanda guni gastiʼ (Apoc. 20:​1-3). Despué, zuzulú Jesús zuni mandar ti mil iza, zedanebe guendariuudxí ndaaniʼ Guidxilayú ne zacanebe binni gaca perfectu. Zandísabe ca ni maʼ guti ne zúnibe Guidxilayú riʼ ti paraísu. ¡Dxi ca nga gaca cumplir ni maʼ gudixhe ique Jehová! (Apoc. 21:​1-4).

16. ¿Ximodo zabani binni guiluxe si ti mil iza guni mandar Cristu?

¹⁶ ¿Ximodo zabáninu guiluxe si guni mandar Cristu ti mil iza yaʼ? Maʼ qué ziuu pecadu ne maʼ qué zácanu binni ruchee. Maʼ qué zanabaʼ diʼ binni guni perdonar Jehová laacaʼ pur rini ni bixhii Jesús. Laaca maʼ qué zaquiiñecabe tuuxa ni guiníʼ pur laacabe o ti mediador, nin sacerdote para ganda guidxíñacabe Jehová. «Ne últimu enemigu guinitilú nga guendaguti». Guiráʼ ca ni maʼ guti ziásacaʼ de lade gueʼtuʼ. Ne guiráʼ tu guibani ndaaniʼ Guidxilayú riʼ maʼ zácacaʼ binni sin donda (1 Cor. 15:​25, 26).

17, 18. a) ¿Xi zazaaca guiluxe si ti mil iza guni mandar Cristu? b) ¿Xi zuni Jesús guiluxe si guni mandar? (1 Corintios 15:​24, 28; laaca zanda gúʼyaluʼ imagen ca).

¹⁷ ¿Xiruʼ zazaaca guiluxeʼ si ti mil iza guni mandar Cristu? Zazaaca ti cosa nabé risaca: guiráʼ binni zanna naca Jehová ti Dios nayá ne runi ni jneza purtiʼ maʼ guca santificar labe. Ndaaniʼ jardín de Edén, guníʼ Binidxabaʼ rusiguii Jehová, cadi jneza modo runi mandar ne cadi nadxii binni. Dede tiempu que, ca xpinni Jehová huayuni santificarcaʼ o maʼ bisisácacaʼ labe. Ora guiluxe ti mil iza guni mandar Cristu, guiráʼ tu zanna dxandíʼ peʼ nadxii Bixhózenu ni nuu guibáʼ laanu.

¹⁸ Guiráʼ binni zanna puru cosa ni cadi dxandíʼ nga guníʼ Binidxabaʼ de Jehová. ¿Xi zuni Jesús ora guiluxeʼ ti mil iza guni mandar yaʼ? ¿Ñee zinándabe ejemplu stiʼ Binidxabaʼ ne zucaalube Jehová la? ¡Coʼ, qué zúnibe nga! (Biindaʼ 1 Corintios 15:​24, 28). Guizáʼ maʼ gadxé Jesús de Binidxabaʼ. Zudxiguétabe Reinu ca Bixhózebe ne zudiibe lugar guni mandar laabe. Ne zúnibe ni purtiʼ nadxiibe Jehová.

19. ¿Xi riníʼ lá Jehová para Jesús?

¹⁹ Yanna, maʼ cayénenu xiñee bidii Jehová lugar chiné Xiiñibe labe ne gaca representante stibe. Ne jneza peʼ modo cayuni Jesús dxiiñaʼ riʼ. Yanna, ¿ximodo ruuyaʼ Jesús lá Jehová yaʼ? Para laabe la? gástiruʼ sti cosa jma risaca que lá Bixhózebe. Guyuube dispuestu gátibe pur lá Dios ne ziuube dispuestu gudxiguétabe Reinu ca lu náʼ Jehová guiluxeʼ si ti mil iza guni mandarbe. ¿Ximodo zanda chinándanu ejemplu stibe yaʼ? Zacábinu pregunta riʼ lu sti artículo ca.