ARTÍCULO DE ESTUDIU 23
CANCIÓN 2 Nabé risaca laluʼ, Jiobá
Xiñee nabé risaca lá Jehová para laanu
«Laatu nga ca testigu stinneʼ —ná Jehová—» (IS. 43:10).
TEMA
Xi zanda gúninu para guni santificarnu ne gusianu lá Jehová.
1, 2. ¿Ximodo nánnanu nabé risaca lá Jehová para Jesús?
NABÉ risaca lá Jehová para Jesús. Laabe nga binni ni jma runi defender lá Bixhoze. Casi bidúʼyanu lu artículo gudíʼdicaʼ, guyuube dispuestu gátibe pur nombre stiʼ Jehová, para gusiabe lá nezalú binni (Mar. 14:36; Heb. 10:7-9). Ne ra guiluxe ti mil iza de cayuni mandarbe, ziuube dispuestu gudxiguétabe Reinu ca Bixhózebe ti zacá gaca santificar lá Jehová (1 Cor. 15:26-28). Guiráʼ ni maʼ biʼniʼ Jesús ne guiráʼ ni chiguni pur lá Jehová rusihuínnicani pabiáʼ nadxiibe Bixhózebe.
2 Beeda Jesús lu guidxilayú riʼ pur lá Bixhoze (Juan 5:43; 12:13). Bisiidibe ca discípulo stibe lá Bixhózebe (Juan 17:6, 26). Bisiidibe ne bíʼnibe milagru lu lá Jehová (Juan 10:25). Lu ti oración ra caniʼbe de ca discípulo stibe, gunábabe Jehová: «Gupa laacabe pur nombre stiluʼ» (Juan 17:11). Yanna, pa nabé risaca lá Jehová para Jesús, ¿xiñee nuu binni neca ná naca xpinni Cristu qué runibiáʼ lá Dios ne qué riquiiñecaʼ ni?
3. ¿Xi zadúʼyanu lu artículo riʼ?
3 Laanu, ca ni dxandíʼ xpinni Cristu, rúninu stipa para chinándanu ejemplu stiʼ Jesús, nga runi laaca nabé risaca lá Bixhózebe para laanu (1 Ped. 2:21). Lu artículo riʼ, zadúʼyanu ziné ca ni runi predicar «ca noticia galán stiʼ Reinu» lá Jehová (Mat. 24:14). Laaca zadúʼyanu xiñee risaca lá Jehová para cada tobi de laanu.
«TI GUIDXI NI CHINÉ NOMBRE STIBE»
4. a) ¿Xi gudxi Jesús ca discípulo stiʼ ante guibiguetaʼ guibáʼ? b) ¿Xi pregunta zacábinu?
4 Ante guibiguetaʼ Jesús guibáʼ, gúdxibe ca discípulo stibe: «Zacaatu poder ora gueeda espíritu santu luguiatu. Ne zácatu testigu stinneʼ Jerusalén, guidubi Judea ne Samaria, ne dede ra jma zitu lu guidxilayú» (Hech. 1:8). Ngue runi, cadi ndaaniʼ si guidxi Israel nga zaca predicar ca noticia galán stiʼ Reinu, sínuque ra tidiʼ tiempu zanda gueeda gaca binni de guiráʼ guidxi discípulo stiʼ Jesús (Mat. 28:19, 20). Peru Jesús guníʼ: «Zácatu testigu stinneʼ». ¿Ñee riníʼ nga ca ni nacubi gaca discípulo zaca si ca testigu stiʼ Jesús la? o laaca caquiiñeʼ gunibiáʼcabe lá Jehová? Zacané Hechos capítulo 15 laanu guicábinu pregunta ca.
5. ¿Ximodo bisihuinni ca apóstol ne ca ancianu ni nuu Jerusalén nabé risaca gunibiáʼ binni lá Jehová? (Laaca zanda gúʼyaluʼ imagen ca).
5 Lu iza 49, guca reunir ca apóstol ne ca ancianu ni nuu Jerusalén para guiniʼcaʼ xi naquiiñeʼ guni ca ni cadi naca judíu para gueeda gácacaʼ xpinni Cristu. Ora biluxe reunión que sicaríʼ guníʼ Santiago, biʼchiʼ Jesús: «Maʼ gudxi Symeón [Pedro] laanu ximodo maʼ bietenalaʼdxiʼ Dios ca binni de xcaadxi nación ne de ládecaʼ cabibe ti guidxi ni chiné nombre stibe». ¿Tu stiʼ lá riete racá yaʼ? Óraque bizeeteʼ Santiago ni guníʼ profeta Amós: «Para guyubi ca binni ni guiaana Jehová ne gúnicaʼ ni de guidubi ladxidoʼcaʼ né ca binni de guiráʼ nación, ca binni ni chiné nombre stinneʼ. Zacá nga ná Jehová» (Hech. 15:14-18). Zaziidiʼ ca ni nacubi gaca discípulo que stale cosa de Jehová ne laaca zinecaʼ lá Dios. Ni caninu raríʼ nga zusiidicabe xcaadxi binni lá Dios ne zunibiáʼ binni laacabe casi representante stiʼ Dios.
Biene ca apóstol ne ca ancianu ni nuu Jerusalén, ca xpinni Cristu nga ziné lá Jehová ne zusiidicani. (Biiyaʼ párrafo 5).
6, 7. a) ¿Xi pur beeda Jesús lu guidxilayú riʼ? b) ¿Guná nga razón jma risaca pur beeda Jesús lu guidxilayú riʼ?
6 Guietenaláʼdxinu lá Jesús riniʼni «Jehová nga ni rulá». Ne zacá peʼ ni: biquiiñeʼ Jehová Jesús para gulá guiráʼ binni ni gapa fe. Beeda Jesús lu Guidxilayú riʼ para gudii xquendanabani ti guilá stale binni (Mat. 20:28). Ne pur gútibe zanda guilá binni, gaca perdonar ca pecadu sticaʼ ne gápacaʼ guendanabani ni qué zaluxe (Juan 3:16).
7 Yanna, ¿xiñee naquiiñeʼ gudii Jesús xquendanabani pur binni yaʼ? Pur ni bizaaca ndaaniʼ jardín de Edén que. Casi bidúʼyanu lu artículo gudiʼdiʼ que, cumu qué nuzuubaʼ Adán ne Eva stiidxaʼ Jehová la? maʼ qué ñanda nibánicaʼ sin qué ñuu dxi ñáticaʼ (Gén. 3:6, 24). Nga runi beeda Jesús lu guidxilayú riʼ, purtiʼ racalaʼdxiʼ gulá ca ni zeeda de Adán ne Eva de lu náʼ guendaguti. Peru laaca beedabe pur sti razón jma risaca, beedabe para gusihuínnibe cadi dxandíʼ ni guníʼ Binidxabaʼ de Jehová (Gén. 3:4, 5). Ne Jesús peʼ nanna ora maʼ biluxe guca santificar lá Jehová, ora ca nga maʼ zanda guininu dxandíʼ peʼ zalá binni de lu náʼ guendaguti. Ne cumu guca Jesús representante stiʼ Bixhoze ne jneza modo bisihuínnibe zinebe lá Bixhózebe la? nga runi laabe nga binni ni jma gucané gaca santificar lá Jehová.
¿Xiñee nuu binni neca ná naca xpinni Cristu qué runibiáʼ lá Dios ne qué riquiiñecaʼ ni?
8. ¿Xi naquiiñeʼ guiene guiráʼ ca ni gaca discípulo stiʼ Jesús?
8 Guiráʼ ca ni beedagaca discípulo stiʼ Jesús, gupa xidé biénecaʼ ni chigulá laacaʼ nga Jehová, Bixhoze Jesús (Juan 17:3). Ne zunibiáʼ binni laacaʼ purtiʼ zinecaʼ lá Dios cásica ziné Jesús ni. Laaca naquiiñeʼ guiénecabe pabiáʼ risaca nga gaca santificar lá Jehová. Pa gúnicabe ca cosa riʼ, zalácabe (Hech. 2:21, 22). Ngue runi ca ni maʼ naca discípulo stiʼ Jesús naquiiñeʼ guiziidicaʼ de Jehová ne zaqueca de Jesús. Nga runi, zanda guiénenu xi pur biluxe Jesús oración ni bíʼnibe Bixhózebe ni zeeda lu Juan capítulo 17. Sicaríʼ nani: «Ne maʼ bisiideʼ laacabe tu laluʼ, ne zusiideruaʼ ni, para gusihuínnicabe nadxiicabe xcaadxi binni cásica rusihuínniluʼ nadxiiluʼ naa, ti zacá chuaaniaʼ laacabe tobi si» (Juan 17:26).
«LAATU NGA CA TESTIGU STINNEʼ»
9. ¿Ximodo naquiiñeʼ guʼyaʼ ca ni dxandíʼ xpinni Cristu lá Jehová?
9 Casi maʼ bidúʼyanu, gaca santificar lá Jehová nga ti cosa nabé risaca para guiráʼ ca ni dxandíʼ xpinni Cristu (Mat. 6:9, 10). Para laanu, gástiruʼ sti lá jma risaca que lá Jehová. Ne naquiiñeʼ gusihuínninu zacá ni pur ca cosa ni gúninu ne ni guininu. ¿Xi zanda gúninu para gacanenu gaca santificar lá Jehová ne gusihuínninu cadi dxandíʼ ca cosa ni guníʼ Binidxabaʼ de laabe yaʼ?
10. ¿Xi juiciu riete lu libru stiʼ Isaías capítulo 42 hasta 44? (Isaías 43:9; 44:7-9; laaca zanda gúʼyaluʼ imagen ca).
10 Lu libru stiʼ Isaías capítulo 42 hasta 44, rusiéneni xi naquiiñeʼ gúninu para guni santificarnu lá Jehová. Lu ca capítulo ca riete gaca ti juiciu para guihuinni tuu nga Dios ni dxandíʼ. Rinabaʼ Jehová ca dios stiʼ ca binni ni qué runi adorar laa gusihuínnicaʼ dxandíʼ nuucaʼ. Laaca rinábabe guidxiña ca testigu stiʼ ca dios ca para guiniʼcaʼ pa dxandíʼ ca cosa ni ná ca dios sticaʼ. Peru guirutiʼ tu zanda gúnini (biindaʼ Isaías 43:9; 44:7-9).
Maʼ biseendacaacabe laanu para gácanu testigu lu ti juiciu. (Biiyaʼ párrafo 10 ne 11).
11. Casi ná Isaías 43:10-12, ¿xi cayabi Jehová ca xpinni?
11 (Biindaʼ Isaías 43:10-12). Cayabi Jehová ca xpinni: «Laatu nga ca testigu stinneʼ [ . . . ], ne naa nga Dios». Ne rinábabe laacaʼ guicábicaʼ pregunta riʼ: «¿Ñee nuu sti Dios, despué de naa la?» (Is. 44:8). Laanu, nápanu privilegiu de guicábinu pregunta ca. Pur ni rúninu ne pur ni rininu, rusihuínninu Jehová nga Dios ni dxandíʼ ne nombre stibe nga ni jma risaca lade guirá xixé lá. Ne pur modo nabáninu rusihuínninu nadxiinu Jehová de guidubi ladxidoʼno ne qué rixélenu de laa neca gacalaʼdxiʼ Binidxabaʼ gucueeza laanu. Zacá zanda gacanenu gaca santificar lá Dios.
12. ¿Ximodo guca cumplir profecía ni zeeda lu Isaías 40:3, 5?
12 Laaca guníʼ Isaías ziuu tu zusiá o zuni preparar «neza stiʼ Jehová» (Is. 40:3; nota). ¿Ximodo guca cumplir profecía ca yaʼ? Guca cumplirni ora biʼniʼ preparar Juan Bautista ti neza para Jesús, ni beeda casi representante stiʼ Jehová ne guníʼ lu lá Jehová (Mat. 3:3; Mar. 1:2-4; Luc. 3:3-6). Laaca guníʼ Isaías: «Zahuinni gloria stiʼ Jehová» (Is. 40:5). ¿Ximodo guca cumplir ca diidxaʼ riʼ yaʼ? Ora beeda Jesús lu Guidxilayú riʼ, beeda casi representante stiʼ Bixhoze ne bíʼnibe ni casi ñaca Jehová peʼ nga ñeeda lu Guidxilayú riʼ (Juan 12:45).
13. ¿Ximodo zanda chinándanu ejemplu stiʼ Jesús?
13 Rinándanu ejemplu stiʼ Jesús ora racanenu guiá lá Jehová. Cásica Jesús nácanu testigu stiʼ Jehová Dios, zinenu lá Jehová ne rábinu binni guiráʼ ca cosa galán ni huayúnibe. Peru para guni cumplirnu né privilegiu riʼ la? laaca naquiiñeʼ gábinu binni guiráʼ ni maʼ biʼniʼ Jesús ne ni chiguni para gaca santificar lá Jehová (Hech. 1:8). Jesús nga testigu stiʼ Jehová ni jma risaca ne rúninu stipa chinándanu ejemplu stibe (Apoc. 1:5). Yanna, ¿xiñee naquiiñeʼ guisaca lá Jehová para cada tobi de laanu yaʼ?
XIÑEE NABÉ RISACA LÁ JEHOVÁ PARA LAANU
14. Casi riete lu Salmo 105:3, ¿xi runi sentirnu pur lá Jehová?
14 Riéchenu purtiʼ zinenu lá Jehová (biindaʼ Salmo 105:3). Riuulaʼdxiʼ Jehová guininu sin guituílunu de nombre stibe ne guni presumirnu de laabe (Jer. 9:23, 24; 1 Cor. 1:31; 2 Cor. 10:17). Guni presumirnu de Jehová riniʼni cadi guituílunu naca Jehová Dios stinu. Ti privilegiu guizáʼ risaca nga gusisácanu lá Jehová ne gacanenu guiá labe. Cadi naquiiñeʼ guituílunu guininu nácanu testigu stiʼ Jehová ra dxiiñaʼ, ra scuela, ra nabézanu ne ratiica si nuunu. Racalaʼdxiʼ Binidxabaʼ gucueeza laanu para cadi guininu de lá Jehová (Jer. 11:21; Apoc. 12:17). Laabe ne ca xpínnibe, ca ni riníʼ cosa ni cadi dxandíʼ de Dios, racaláʼdxicabe gusiaandaʼ binni lá Jehová (Jer. 23:26, 27). Peru laanu, guizáʼ nadxiinu lá Dios, nga runi racaláʼdxinu gusisácanu ni «guidubi dxi» (Sal. 5:11; 89:16).
15. ¿Xi riníʼ iquíʼñenu lá Jehová?
15 Cadi gusaana de guinábanu gacané Jehová laanu (Joel 2:32; Rom. 10:13, 14). Cadi gusaana de guinábanu gacané Jehová laanu, qué riníʼ si ni gunibiaʼnu Dios ne iquíʼñenu labe. Laaca riniʼni gánnanu ximodo naca Jehová, gápanu confianza laabe, guyúbinu gacanebe laanu ne gudiʼnu lugar gábibe laanu xi naquiiñeʼ gúninu (Sal. 20:7; 99:6; 116:4; 145:18). Laaca naquiiñeʼ gusíʼdinu xcaadxi binni lá Dios ne ca cualidad ni napa ne gábinu laacaʼ gaca arrepentircaʼ ne guchaacaʼ ra naquiiñeʼ gúnicaʼ ni para ganda gusiéchecaʼ Jehová (Is. 12:4; Hech. 2:21, 38).
16. ¿Ximodo zanda gusihuínninu rusiguii Binidxabaʼ?
16 Nuunu dispuestu gacananu pur lá Jehová (Sant. 5:10, 11). Ora qué rixélenu de Jehová neca cayacananu, rusihuínninu rusiguii Binidxabaʼ. Tiempu bibani Job, guníʼ Binidxabaʼ de ca xpinni Dios: «Guiráʼ ni napa binni zudii ni para gulá xquendanabani» (Job 2:4). Ni caninu raríʼ nga, casi ñaca niniʼbe zuni binni ni ná Jehová ora si nabani galán peru zusaana de gúnicaʼ ni nabe ora guidxagalucaʼ xiixa guendanagana. Pur guca Job fiel bisihuinni cadi dxandíʼ ni guníʼ Binidxabaʼ. Laanu, laaca nápanu privilegiu gusihuínninu qué ziuu dxi gudxiʼdéchenu Jehová neca guyubi Binidxabaʼ cuee gana laanu. Nanna dxíchinu qué zusaana Jehová de gapaʼ laanu pur lá (Juan 17:11).
17. Casi ná 1 Pedro 2:12, ¿gunáʼ nga xcaadxi modo zanda gusisácanu lá Jehová?
17 Rusihuínninu runi respetarnu lá Jehová (Prov. 30:9; Jer. 7:8-11). Cumu nácanu representante stiʼ Jehová ne zinenu labe la? pur ni gúninu zanda gusisácanu o guni biidinu lá Jehová (biindaʼ 1 Pedro 2:12). Nga runi, racaláʼdxinu gúninu biaʼ gándatiʼ para gusisácanu Jehová pur ni guininu ne pur ni gúninu. Ne zacá neca nácanu binni ruchee racanenu guisaca lá Jehová.
18. ¿Xi sti modo rusihuínninu risaca lá Jehová para laanu? (Laaca zanda gúʼyaluʼ nota ca).
18 Jma risaca lá Jehová que ni guiníʼ binni de laanu (Sal. 138:2). ¿Xiñee rininu zacá? Purtiʼ cumu nadxiinu lá Jehová la? rúninu ca cosa ni riuulaʼdxiʼ. Peru pur laani riuu ora runi burla binni laanu ne riniʼcaʼ mal de laanu.a Guyuu Jesús dispuestu gacaná ne guuticabe laa casi rati ti binni qué iquiiñeʼ para gusisaca lá Jehová. Casi ná Hebreos 12:2-4, biʼniʼ Jesús ni «sin nituí lú», ni caninu nga, qué ñuu xhaatabe xizaa pur ni guiníʼ ique binni de laabe. Ni jma gucuá íquebe nga gúnibe ni racalaʼdxiʼ Dios (Mat. 26:39).
19. ¿Xi runi sentirluʼ pur lá Jehová, ne xiñee?
19 Guizáʼ riéchenu zinenu lá Jehová ne ti ndaayaʼ nabé naroʼbaʼ nga gunibiáʼcabe laanu casi testigu stiʼ Jehová. Nga runi, qué riuʼnu xizaa pa guni búrlacabe laanu o guiníʼcabe mal de laanu. Ni jma risaca para laanu nga guisaca lá Jehová ne cadi ni guiníʼ binni de laanu. Maʼ gudixhe íquenu cadi gusaana de gusisácanu Jehová neca gacalaʼdxiʼ Binidxabaʼ gucueeza laanu. Zacá zusihuínninu risaca lá Jehová para laanu cásica risácani para Jesús.
CANCIÓN 10 ¡Gusisácanu Jiobá, Dios stinu!
a Dede Job guyuu xizaa xi guiníʼ binni de laa ora chonna de ca ni ná xhamigu laabe guniʼcaʼ mal de laabe. Ora guti ca xiiñiʼ Job ne biniti guiráʼ ni napa, qué nuchee «ne qué niníʼ cadi jneza ni cayuni Dios» (Job 1:22; 2:10). Peru, ora guníʼcabe bíʼnibe cosa malu, bizulú guniʼbe cosa sin niníʼ íquebe. Jma guyuube xizaa pur ni guiníʼ binni de laabe que guni santificarbe lá Dios o gusiabe lá Jehová (Job 6:3; 13:4, 5; 32:2; 34:5).