¿Ñee zándaruʼ guizíʼdinu de ca cosa ni cadi nagana zeeda lu Biblia la?

1. ¿Xi biʼniʼ sentirluʼ primé biaje biziidiluʼ ca cosa ni cadi nagana zeeda lu Biblia?

DXI bizulunu bizíʼdinu ca cosa ni cadi nagana zeeda lu Biblia gucanécani laanu guchaʼnu xquendanabáninu. Casi ora gúnnanu lá Dios nga Jehová gucaneni laanu para ganda gaca xhamígunu laabe (Is. 42:8). Ora bizíʼdinu ximodo nuu ca gueʼtuʼ gutadxí ladxidoʼno purtiʼ bizíʼdinu cadi cayacaná ca binni ni nadxiinu ni maʼ guti (Ecl. 9:10). Ne ora gúnnanu cayuni prometer Jehová laanu zaca Guidxilayú riʼ ti paraísu, gucaneni laanu cadi guicá íquenu xi zazaaca de laanu huidxe si purtiʼ bizíʼdinu zabáninu sin qué chuʼ dxi gátinu ne cadi casi ribani binni tiempu riʼ 70 iza ne nuu tu laa pa naguidxi nuu la? 80 iza (Sal. 37:29; 90:10).

2. ¿Xiñee nánnanu dede né ca ni maʼ xadxí de nácacaʼ xpinni Cristu zándaruʼ guiziidicaʼ de ca cosa ni cadi nagana zeeda lu Biblia? (2 Pedro 1:12, 13).

² Neca maʼ xadxí de nácanu xpinni Cristu, cadi guiaandaʼ laanu nabé risaca nga ca cosa ni cadi nagana zeeda lu Biblia. Bicaa apóstol Pedro guiropa carta stiʼ ra nuu ca xpinni Cristu ni maʼ zuhuaa chaahuiʼ lu ni dxandíʼ (biindaʼ 2 Pedro 1:12, 13). Racaláʼdxibe guzuhuaa dxíchicaʼ lu ni runi crecaʼ para cadi quiteʼ ca maestru falsu ni nuu ndaaniʼ congregación que laacaʼ ne zaqueca binni ni runi cosa malu (2 Ped. 2:1-3). Ne para gacanebe laacaʼ cadi guixélecaʼ de Jehová, bisietenaláʼdxibe laacaʼ chupa chonna cosa ni maʼ biziidicaʼ.

3. ¿Xiñee cadi naquiiñeʼ gusaana ca xpinni Cristu de guiníʼ íquecaʼ lu ca cosa ni cadi nagana zeeda lu Biblia? Bizeeteʼ ti ejemplu.

³ Ra jma maʼ ziniisinu lu Stiidxaʼ Dios, zándaruʼ gacané ca cosa ni cadi nagana zeeda lu Biblia laanu. Guzéʼtenu ti ejemplu. Ti gunaa ni maʼ xadxí de cayuni guendaró ne ti gunaa ni deruʼ caziidiʼ zándaca iquiiñecaʼ ngueca ingrediente para gúnicaʼ ti guendaró. Peru pur maʼ ziné gunaa que stale iza de runi guendaró jma nanna ximodo zanda iquiiñeʼ ca ingrediente que para guni xcaadxi guendaró nanixe. Zaqueca nga rizaaca ne ca binni ni caziidiʼ de lu Biblia zanda guiziidicaʼ xi ná ca cosa ni cadi nagana zeeda lu Biblia ne ximodo gacaneni laacaʼ, peru ca xpinni Cristu ni maʼ ziné stale iza ruuyacaʼ xiruʼ zanda guiziidicaʼ de ca cosa ni cadi nagana zeeda lu Biblia ne riziidicaʼ cosa nacubi de laacani ni zanda gacané laacaʼ. ¿Xiñee yaʼ? Purtiʼ dede dxi guyuunísacabe maʼ bidxaa modo nabánicabe o ca responsabilidad ni nápacabe ndaaniʼ xquidxi Jehová. Ora guiníʼ íquenu lu ca cosa ni cadi nagana ni maʼ bizíʼdinu ne guiníʼ íquenu modo nabáninu yanna, ridúʼyanu ximodo racaneruʼ cani laanu. Lu artículo riʼ, zadúʼyanu chonna cosa ni cadi nagana zeeda lu Biblia ne xiruʼ zanda guiziidiʼ ca xpinni Cristu ni maʼ ziné stale iza ndaaniʼ xquidxi Dios de laacani.

JEHOVÁ NGA NI BIZÁʼ GUIRÁʼ NI NUU

4. Ra bizíʼdinu Jehová nga Dios ni bizáʼ guiráʼ ni nuu, ¿ximodo huayacaneni laanu?

⁴ Nánnanu Guidxilayú riʼ ne guiráʼ ni nuu ndaanini, bizáʼ tuuxa guizáʼ nuu xpiaaniʼ ne napa poder cani. Lu Biblia ná: «Peru ni bizáʼ guiráʼ xixé cosa nga Dios» (Hebreos 3:4). Cumu Dios nga bizáʼ laanu la? runibiáʼ chaahuibe laanu. Ne laaca guizáʼ nadxiibe laanu ne nánnabe xii nga ni jma galán para cada tobi de laanu. Ra bizíʼdinu Jehová nga Dios ni bizáʼ guiráʼ ni nuu, ¿ximodo gucaneni laanu? Gucaneni laanu guchaʼnu xquendanabáninu ne racaneni laanu gánnanu xi pur nuunu ndaaniʼ Guidxilayú riʼ.

5. Ra maʼ nánnanu Jehová nga Dios ni bizáʼ guiráʼ ni nuu, ¿xiruʼ zanda guizíʼdinu de laani? (Isaías 45:9-12).

⁵ Ra maʼ nánnanu Jehová nga ni bizáʼ guiráʼ ni nuu laaca rusiidini laanu naquiiñeʼ gácanu humilde. Guiníʼ íquenu ni bizaaca Job. Laa nabé gucuá ique ni cazaaca ne ximodo gusiá lá nezalú xcaadxi binni. Bisietenalaʼdxiʼ Jehová laabe, laa nga Dios ni jma napa poder ne ni bizáʼ guiráʼ ni nuu (Job 38:1-4). Zaqué gucané Jehová laabe guienebe cadi jneza nga guiníʼ íquebe pa jneza guiráʼ ni runi, purtiʼ jneza ne galán guiráʼ ni runi. Ra gudiʼdiʼ tiempu bicaa profeta Isaías: «¿Zanda xa gabi beñe ca Alfareru ca “¿Xi cayúniluʼ pue?”?» (biindaʼ Isaías 45:9-12).

6. ¿Xiñee galán nga guiníʼ íquenu pabiáʼ nandxóʼ Dios ni bizáʼ guiráʼ ni nuu? (Laaca zanda gúʼyaluʼ ca imagen ca).

⁶ Ti xpinni Cristu ni maʼ xadxí nuu ndaaniʼ xquidxi Jehová zanda guzulú guiníʼ ique jma jneza modo riníʼ ique qué guyubi gacané Jehová laa ne Stiidxaʼ (Job 37:23, 24). Para cadi guizaacaluʼ nga, gulee tiempu para guiníʼ íqueluʼ gastiʼ ni zanda guchaagaluʼ guendanuuxpiaaniʼ ne guendanandxóʼ stiʼ Dios ni bizáʼ guiráʼ ni nuu (Is. 40:22; 55:8, 9). Ra cadi guiaandaʼ lii Jehová nga Dios ni bizáʼ guiráʼ ni nuu zacaneni lii gácaluʼ humilde ne guietenaláʼdxiluʼ jma jneza modo riníʼ ique Jehová que modo riníʼ íqueluʼ.

7. ¿Xi gucané Rahela chinanda ti cambiu nacubi ndaaniʼ xquidxi Dios?

⁷ Ora guníʼ ique ti hermana de guidxi Eslovenia ni láʼ Rahela Jehová nga Dios ni bizáʼ guiráʼ ni nuu. Gucaneni laabe chinándabe ti cambiu nacubi biʼniʼ xquidxi Jehová. Laabe guniʼbe: «Nuu biaje raca nagana para naa chinandaʼ ca decisión ni gucuaa ca hermanu ni zániru ndaaniʼ xquidxi Jehová. Neca maʼ biiyaʼ Informe xhono stiʼ Grupu ni Zániru de iza 2023, peru qué ñuuladxeʼ primé biaje biiyaʼ ti hermanu napa guicharuaa cudii ti discursu. Ngue runi bineʼ orar Jehová para gacané naa guiaaʼ cambiu ni maʼ biʼniʼ xquidxi». Biene Rahela Dios ni bizáʼ guibáʼ ne Guidxilayú, laa nga nanna ximodo jma jneza guni dirigir xquidxi. Pa laaca raca nagana para lii chinándaluʼ xiixa ni maʼ biene chaahuinu o chinándaluʼ xiixa instrucción nacubi la? galán cueeluʼ tiempu para guiníʼ íqueluʼ pabiáʼ nuu xpiaaniʼ Dios ni bizáʼ laanu ne pabiáʼ poder napa (Rom. 11:33-36).

XIÑEE RUDII DIOS LUGAR GACANANU

8. Ra gúnnanu xiñee rudii Dios lugar gacananu, ¿ximodo huayacaneni laanu?

⁸ ¿Xiñee rudii Dios lugar gacananu? Nuu binni ra qué guidxélacaʼ respuesta stiʼ pregunta riʼ stale de laacaʼ ridxichinecaʼ Dios o nuu de laacaʼ qué rinacaʼ guni crecaʼ pa nuube (Prov. 19:3). Peru lii, maʼ biziidiluʼ racaná binni ne rati, pur pecadu bisaanané Adán ne Eva laanu ne cadi Dios diʼ nga runi guiráʼ cosa malu nuu lu guidxilayú riʼ. Laaca maʼ biziidiluʼ nabé napa Jehová paciencia ne pur laani stale binni maʼ biziidiʼ de laabe ne maʼ nánnacaʼ xi zúnibe para gunduuxebe guiráʼ ca guendanagana ni nuu lu guidxilayú (2 Ped. 3:9, 15). Ra gúnnaluʼ xiñee rudii Dios lugar gacananu huaguixhedxini ladxidoʼloʼ ne huayacaneni lii chuʼluʼ jma gaxha de laabe.

9. ¿Pora nga jma galán guiníʼ íquenu xiñee rudii Jehová lugar gacaná binni?

⁹ Laga cabézanu cuee Jehová ca guendanagana nuu lu guidxilayú riʼ caquiiñeʼ gápanu paciencia. Ora guniná ca guendanagana ca laanu o tuuxa ni nadxiinu, ora gúnicabe laanu cosa ni cadi jneza o gueeda gati ti binni ni nadxiinu, zándaca guiníʼ íquenu xiñee candaa Jehová para cuee guiráʼ ca guendanagana ca (Hab. 1:2, 3). Óraca, ni jma galán gúninu nga guiníʼ íquenu xiñee rudii Jehová lugar gacaná ca binni nachaʼhuiʼ (Sal. 34:19).a Laaca galán guiníʼ íquenu ni naguixhe ique Jehová nga cuee guiráʼ ca guendanagana ni nuu lu guidxilayú riʼ.

10. ¿Xi racané Anne gatadxí ladxidóʼ pur guti jñaa?

¹⁰ Gánnanu xiñee rudii Jehová lugar gacananu racaneni laanu guni huantarnu. Ti hermana láʼ Anne, ni nabeza lu isla de Mayotte, lu océano Índico, guníʼ: «Raca chupa chonna iza, dxi guti jñaaʼ guizáʼ guyuaaʼ triste peru ni gucané naa nga guietenaladxeʼ cadi Jehová diʼ nga napa donda, racaláʼdxibe cueebe guiráʼ ca cosa ni runiná laanu ne guindísabe de lade gueʼtuʼ ca binni ni nadxiinu. Ora riníʼ iqueʼ lu ca cosa riʼ guizáʼ riguixhedxini ladxiduáʼ ne riguuni gana naa».

11. Ra maʼ nánnanu xiñee rudii Jehová lugar gacananu, ¿ximodo racaneni laanu cadi gusaana de guni predicarnu?

¹¹ Gánnanu xiñee rudii Dios lugar gacananu racaneni laanu cadi gusaana de guni predicarnu. Bisiene si apóstol Pedro pur paciencia ni napa Jehová, ca ni gaca arrepentir zanda guilacaʼ. Sicaríʼ bicaabe: «¡Laguiníʼ ique tu clase binni nga naquiiñeʼ gácatu! Naquiiñeʼ gaca conducta stitu nayá ne gúnitu cosa ni gusihuinni runi adorartu Dios» (2 Ped. 3:11). Ne tobi de ca cosa ni rúninu ni rusihuinni runi adorarnu Dios nga guni predicarnu. Cásica Bixhózenu, laanu laaca nadxiinu binni ne racaláʼdxinu guibánicaʼ ndaaniʼ paraísu. Cumu napa Jehová paciencia la? racaláʼdxibe gapa ca binni ni runi predicarnu oportunidad de guni adorarcaʼ laabe. Ne ti ndaayaʼ naroʼbaʼ nga gacaneluʼ Jehová lu dxiiñaʼ riʼ ne gacaneluʼ binni gunibiáʼ laabe ante gueeda fin (1 Cor. 3:9).

NABÁNINU «LU CA ÚLTIMU DXI»

12. Ra guidúʼyanu cayaca cumplir profecía stiʼ «ca últimu dxi», ¿xi nanna dxíchinu?

¹² Rusiene Biblia ximodo zaca xpiaʼ binni «lu ca últimu dxi riʼ» (2 Tim. 3:1-5). Ne zanda guidúʼyanu cayaca cumplir profecía riʼ pur modo naca binni. Ra guidúʼyanu zeʼ dxi jma feu ziyaca xpiaʼ binni, riuʼnu seguru dxandíʼ ni ná Stiidxaʼ Dios (2 Tim. 3:13-15).

13. ¿Xi galán guiníʼ íquenu? (Lucas 12:15-21).

¹³ Ra maʼ nánnanu nabáninu lu ca últimu dxi laaca racaneni laanu quixhe íquenu iquíʼñenu tiempu stinu jneza ne cadi gusaana de gúninu xhiiñaʼ Dios primé lu xquendanabáninu. Bizeeteʼ Jesús pabiáʼ risaca nga iquíʼñenu tiempu stinu jneza lu ejemplu ni zeeda lu Lucas 12:15-21 (biindaʼ ni). ¿Xiñee riete naca hombre que «binni huati»? Purtiʼ gadxé ni cá ique guni, caguu «chaahuiʼ stale cosa risaca para laa, peru cadi ricu laa nezalú Dios». ¿Xiñee risaca iquiiñebe tiempu stibe jneza yaʼ? Gudxi Dios laabe: «gueelaʼ riʼ zátiluʼ». ¿Xi rizíʼdinu de ni bizaaca hombre riʼ yaʼ? Cumu maʼ yaca guinitilú guidxilayú riʼ, galán guiníʼ íqueluʼ: «¿Ñee rusihuinni ca ni naguixhe iqueʼ xii nga ni jma risaca para naa la? ¿Xi meta rabeʼ ca xiiñeʼ quixhe íquecaʼ ugaandacaʼ? ¿Ñee riquiiñeʼ tiempu, bueltu ne stipa stinneʼ: para gapaʼ cosa risaca la? o para gutaleʼ tesoro guibáʼ?».

14. Cásica bizaaca Miki, ¿xiñee galán nga guiníʼ íquenu lu ca prueba ni rusihuinni maʼ nabáninu lu ca últimu dxi?

¹⁴ Ora guiníʼ íquenu lu ca prueba ni rusihuinni nabáninu lu ca últimu dxi riʼ racanécani laanu quixhe íquenu xi meta ugaandanu lu xquendanabáninu. Nga peʼ nga ni bizaaca ti hermana láʼ Miki. Sicaríʼ guniʼbe: «Biluxesiaʼ preparatoria, guizáʼ gupaʼ gana ñaaʼ universidad para ñuneʼ estudiar Zoología. Peru laaca napaʼ gana gacaʼ precursora regular ne chaaʼ chigacaniáʼ ra caquiiñeʼ gaca predicar. Caadxi hermanu ne hermana gúdxicaʼ naa guiníʼ iqueʼ chaahueʼ pa dxandíʼ racalaʼdxeʼ guneʼ estudiar ti carrera ne zaqueca hugaandaʼ ca meta ni naguixheʼ iqueʼ ndaaniʼ xquidxi Jehová. Bisietenaláʼdxicabe naa mayaca guinitilú guidxilayú riʼ ne ndaaniʼ paraísu zapaʼ stale tiempu para guneʼ estudiar ca manihuiiniʼ ni riuuladxeʼ. Ngue runi gudixheʼ iqueʼ chaaʼ ti cursu para guiziideʼ ti dxiiñahuiiniʼ. Pur ni gudixheʼ iqueʼ guneʼ que bidxelaʼ ti dxiiñaʼ ni gucané naa gacaʼ precursora regular ne despué guyaaʼ Ecuador para gacaniáʼ gaca predicar». Yanna, naca Miki ne xheelaʼ superintendente de circuito ndaaniʼ guidxi que.

15. ¿Xi rusiidiʼ ejemplu stiʼ Santiago laanu? (Laaca zanda gúʼyaluʼ ca imagen ca).

¹⁵ Cadi guireʼnu gana pa qué naʼ binni cucaadiaga ca noticia galán. Guietenaláʼdxinu zanda guchaa modo riníʼ íquecabe. Guiníʼ íquenu ni bizaaca Santiago biʼchiʼ Jesús. Biiyabe biniisi Jesús, beeda gaca Mesías ne biiyabe pabiáʼ galán rusiidiʼ. Guizáʼ bindaa Santiago para beeda gaca ti xpinni Cristu. Beeda gácabe discípulo stiʼ Jesús despué si de biasa de lade gueʼtuʼ ne beeda gácabe ti xpinni Cristu ni nabé biʼniʼ xhiiñaʼ Dios (Juan 7:5; Gál. 2:9).b Nga runi cadi guiníʼ íquenu qué zuchaa ca familia stinu purtiʼ si yanna qué nacaʼ guiziidicaʼ de Jehová. Ne laaca qué zusaana de chigánnanu ca binni ni qué naʼ gucaadiaga ca noticia galán, guietenaláʼdxinu nabáninu lu ca últimu dxi nga runi jmaruʼ si caquiiñeʼ guni predicarnu ca noticia galán. Ni gábiluʼ laacabe yanna zándaca nga gucaa laacabe guchaacabe despué, ne zanda gácani despué de guzulú gran tribulación.c

GUDIʼNU XQUIXE PEʼ JEHOVÁ PUR CA COSA NI CADI NAGANA ZEEDA LU BIBLIA

16. Guietenaláʼdxinu ca cosa ni cadi nagana zeeda lu Biblia, ¿ximodo huayacaneni laanu? (Laaca zanda gúʼyaluʼ cuadru ni láʼ «Biquiiñeʼ ni para gacaneluʼ xcaadxi binni»).

¹⁶ Guendaró espiritual ni ricaanu, caadxi de laacani maʼ gúcacani para ca binni ni qué runibiaʼcaʼ ca cosa ni cadi nagana zeeda lu Biblia. Guzéʼtenu chupa chonna ejemplu, casi ca discursu ni ridiʼdiʼ lu ca reunión ni rápanu fin de semana, caadxi artículo ne zaqueca videu ni nuu lu jw.org, ca revista ni rusaananenu binni gúcacani para ca binni ni cadi naca Testigu. Peru racaneni gannaxhiinu Jehová jma, guiroobaʼ fe ni nápanu lu Stiidxaʼ Dios ne gacaneni laanu para gánnanu ximodo gusíʼdinu xcaadxi ca cosa ni cadi nagana zeeda lu Biblia (Sal. 19:7).

17. Ca cosa ni cadi nagana zeeda lu Biblia ni maʼ bizíʼdinu, ¿pora zanda gacanécani laanu?

¹⁷ Ca ni maʼ zinenu stale iza ndaaniʼ xquidxi Jehová guizáʼ riéchenu ora xquidxi Dios gusiene chaahuiʼ xiixa ni maca runi crenu. Peru laaca guizáʼ riéchenu pur ca cosa ni cadi nagana zeeda lu Biblia ni bizíʼdinu dxi bizulú biʼniʼ estudiarnu Biblia. Casi maʼ bidúʼyanu, guiranu zándaruʼ guizíʼdinu de cosa ni cadi nagana zeeda lu Biblia. Pa raca nagana para laanu chinándanu xiixa instrucción purtiʼ riníʼ íquenu jma jneza modo maca rúninu xiixa cosa la? naquiiñeʼ gácanu humilde ne guietenaláʼdxinu Jehová, Dios ni bizáʼ guiráʼ xixé ni nuu, laa nga cayuni dirigir xquidxi ne guizáʼ nuu xpiaanibe ne nápabe stale poder. Ora laanu o tuuxa ni nadxiinu gudxiilú xiixa guendanagana, galán gápanu paciencia ne guiníʼ íquenu xiñee rudii Jehová lugar gacaná binni. Ra quixhe íquenu ximodo iquíʼñenu tiempu stinu ne ca cosa risaca ni nápanu cadi guiaandaʼ laanu nabáninu lu ca últimu dxi ne mayaca guinitilú guidxilayú riʼ. Cadi gusaana de guizíʼdinu de ca cosa ni cadi nagana zeeda lu Biblia para guicaanu decisión galán ne cadi guixélenu de Jehová.