NI RINABADIIDXAʼ CA JOVEN
¿Xiñee rábiluʼ galán nga cheluʼ ca reunión ni raca ndaaniʼ Yoo stiʼ Reinu?
Raca reunir ca testigu stiʼ Jehová chupa biaje lu ti semana ne rúnicabe ni ndaaniʼ Yoo stiʼ Reinu. ¿Xi rúnicabe racá yaʼ? ¿Xiñee galán cheluʼ ca reunión ni rúnicabe ca yaʼ?
¿Xi rúnicabe ndaaniʼ Yoo stiʼ Reinu?
Ndaaniʼ ca Yoo stiʼ Reinu riziidiʼ binni ca ni dxandíʼ rusiidiʼ Biblia. Pa cheluʼ ca reunión riʼ zacané ca ni lii:
Gánnaluʼ ni dxandíʼ de Dios.
Guiéneluʼ xiñee cazaaca guiráʼ ca cosa malu riʼ ca dxi riʼ.
Gácaluʼ ti binni nachaʼhuiʼ.
Guidxélaluʼ xhamíguluʼ ni zanda gacané lii.
¿Ñee nannuʼ ni la? Runibiáʼcabe lugar ra raca reunir ca testigu stiʼ Jehová Yoo stiʼ Reinu, purtiʼ ni jma riníʼcabe lu ca reunión riʼ nga de Reinu stiʼ Dios (Mateo 6:9, 10; 24:14; Lucas 4:43).
¿Xiñee galán cheluʼ ca reunión riʼ?
Ni guiete racá zacané ca ni lii. Ca conseju stiʼ Biblia ni riete lu ca reunión stiʼ ca testigu stiʼ Jehová zacané ca ni lii gácaluʼ ti binni nuu xpiaaniʼ (Proverbios 4:5). Ndiʼ riníʼ zanda gacané Biblia lii guicaaluʼ decisión galán, ne laaca ricabi ni caadxi pregunta nabé risaca, casi:
Ndiʼ nga caadxi de ca tema stiʼ ca discursu ni rudiicabe lu ca reunión ni racá fin de semana:
¿Xiñee naquiiñeʼ gudiʼnu lugar gacané Biblia laanu?
¿Tu ra nuu zanda guidxíñanu ora nápanu guendanagana?
¿Xi cayuni Reinu stiʼ Dios pur laanu?
Brenda guníʼ: «Guyé ti compañera de ra scuela reunión. Gurínedu laabe ne bitiiñedu laabe ca libru ni riquiiñedu. Despué gúdxibe naa guizáʼ bidxagayaabe pabiáʼ galán runi comentar ca hermanu. Ne laaca gúdxibe naa yuʼduʼ ra riebe qué riquiiñeʼ guiráʼ ni riquiiñedu lu ca reunión stidu».
¿Ñee nannuʼ ni la? Qué riguíxecabe para chuucabe ndaaniʼ ca Yoo stiʼ Reinu ne qué rinábacabe bueltu.
Ca binni ni gunibiaʼluʼ racá zaguucaʼ gana lii. Biblia ná tobi de ca razón pur raca reunir ca xpinni Cristu nga para cúʼsaacaʼ gana laacaʼ (Hebreos 10:24, 25). Tiempu nabáninu riʼ stale binni ruyubi puru para laa, pur nga guizáʼ galán nga guidxaaganu binni ni runi ni ná Dios ne ni rizaalaʼdxiʼ xcaadxi.
Elisa ná: «Nuu dxi runeʼ sentir nuaaʼ triste ne guizáʼ maʼ bidxaagaʼ, peru ora chaaʼ ra Yoo stiʼ Reinu guizáʼ riuaaʼ gana. Ora guibiguetaʼ runeʼ sentir nayecheʼ ne maʼ nuaaʼ lista para guneʼ dxiiñaʼ sti dxi».
¿Ñee nannuʼ ni la? Lu guidubi Guidxilayú nuu jma de 120,000 congregación ne jma de 60,000 lugar ra raca reunir ca testigu stiʼ Jehová. Cada iza ribí biaʼ 1,500 Yoo stiʼ Reinu, purtiʼ zeʼ dxi jma stale binni rié reunión.a
a Pa racaláʼdxiluʼ gánnaluʼ paraa zanda gaca reunirluʼ, guyé lu sección ni láʼ «Reunión stiʼ ca testigu stiʼ Jehová» ne de racá guyuu ra ná «Biyubi paraa zanda cheuʼ».