Ca labor de socorro ni guca lu iza 2023: «Biiyaʼ dxíchidu pabiáʼ nadxii Jehová laadu»

Maca bizeeteʼ Biblia, dxi mayaca guiluxe guidxilayú riʼ, «zadinde ti guidxi ne sti guidxi» ne zaca stale desastre natural (Mateo 24:3, 7). Ne guca cumplir profecía riʼ lu iza de serviciu 2023.a Guyuu guendaridinde ne desastre natural ndaaniʼ biaʼ ti gayuaa guidxi, peru neca zaca ca testigu stiʼ Jehová bisihuínnicaʼ guendarannaxhii ni zeeda de Dios. ¿Ximodo bíʼnicabe ni ya?

Lu iza de serviciu 2023, jma de chupa gayuaa desastre natural ne ra cadinde binni, bininá ca hermanu stinu. Biaʼsi bi’ni’ gastu ca testigu stiʼ Jehová lu ca labor de socorro que jma de chii millón de dólarb ni biree lu ca donación ni biaba para obra mundial. Ne aparte ni bi’ni’ gastu ca hermanu de xpuéltucaʼ para gacanecaʼ ca ni nabeza neza ra lídxicaʼ. Biiyaʼ ximodo biquiiñecabe ca donación ni maʼ bidiiluʼ para ganda gacanécabe guiráʼ ca ni gucaná lu chupa de ca desastre ni bininá ca hermanu stinu.

«Dxandíʼ nuu guendarannaxhii»

Nuu caadxi lugar stiʼ Nigeria ra maca rilaahua tiempu nisaguié. Peru maʼ raca biaʼ chii iza de qué hualaahuacabe casi guca ni lu octubre de 2022 que. Binitilú jma de xhoopaʼ gayuaa setenta y seis mil hectárea ra riguucabe siembra, ne jma de chupa millón de binni gupa xidé bisaanacaʼ lídxicaʼ. Nagueendaca, gulí sucursal stiʼ Nigeria caadxi Comité de socorro para ganda gacanecaʼ ca ni gucaná ne uguucaʼ gana ca hermanu.

Modo bininani ca hermanu

• 7,505 publicador gupa xidé bisaanacaʼ lídxicaʼ.

• 860 yoo gucaná o binitilú.

• 90 Yoo stiʼ Reinu ne ti Salón de Asamblea bilaahua.

Modo biquiiñecabe ca donación

Biquiiñedu jma de 250,000 dólar lu ca labor de socorro. Biquiiñeʼ bueltu riʼ para:

• Guidxela guendaró casi arroz, bizaa ne sopa.

• Gudiicabe ni caquiiñeʼ ndaaniʼ yoo casi colchón ne tela mosquiteru.

• Guca chaahuiʼ o gurí ca yoo ni gucaná.

¿Xi bi’ni’ ca hermanu que para biquiiñecaʼ ca donación que jneza yaʼ? Tobi de ca cosa bíʼnicabe nga biiyaʼ chaahuicabe cada yoo para gúʼyacabe pa caquiiñeʼ gaca chaahuiʼ cani o pa caquiiñeʼ cuíʼ ti nacubi. Ne ora gúʼyacabe caquiiñeʼ cuiʼ ti nacubi la? ruuyacabe gápani ni peʼ caquiiñeʼ binni.

Guizáʼ cudii ca hermanu ni gucanécabe que xquixe. Ti hermana guníʼ: «Dxi bilaahuadu que, bichaani xquendanabánidu, purtiʼ binitilú ca layú stidu ne lídxidu. Peru guizáʼ galán bi’ni’ sentirdu purtiʼ dxiqueca beeda ca hermanu para gacanecaʼ laadu ne bidiicaʼ ti lugar ra guiaanadu. Ne laaca gutadxí ladxidoʼdo ora gucuaadu ca guendaró ni biseendaʼ sucursal. Laapedu maʼ bíʼyadu ximodo guca cumplir ca diidxaʼ ni zeeda lu Juan 13:34 ne 35 lu xquendanabánidu. De maʼ nin ridxela tobi xi guiníʼ. Dxandíʼ nuu guendarannaxhii. Naa ne familia stinneʼ, de guidubi ladxidoʼdo racaláʼdxidu gábidu laatu: xquixe peʼ, xquixe peʼ laatu pur beeda gacanetu laadu ora peʼ caquiiñedu ni».

Stale binni maʼ bíʼyacaʼ ca dxiiñaʼ de socorro ni maʼ bíninu. Sicaríʼ guníʼ ti xaíque stiʼ comunidad Sabagreia, tobi de ca guidxi stiʼ Bayelsa: «Nuu stale organización ne religión lu guidxilayú riʼ peru ca testigu stiʼ Jehová si nga huayúnicaʼ sicaríʼ. Organización stitu nga tobi de ca ni jma galán nuu lu guidxilayú».

«Biiyaʼ dxíchidu pabiáʼ nadxii Jehová laadu»

Lu beeu febrero de 2023, guyuu jma de tapa gayuaa lugar ra gucuaguí ne bininá guidxi Chile. Guyaʼquiʼ jma de tapa gayuaa treinta mil hectárea, zaqueca stale lugar risaca stiʼ guidxi riʼ. Ne biaʼ xhono mil binni bisaanacaʼ lídxicaʼ. Gudiʼdiʼ si desastre que, gudixhe chaahuiʼ sucursal modo gaca ca labor de socorro que.

Modo bininani ca hermanu

• 222 publicador gupa xidé bisaanacaʼ lídxicaʼ.

• 20 yoo binitilú.

Modo biquiiñecabe ca donación

Biquiiñedu jma de chupa gayuaa mil dólar lu ca labor de socorro. Ne biquiiñeʼ bueltu riʼ para:

• Guidxela guendaró ne nisa.

• Bidxela gasolina, productu ni gusianécabe ra lídxicabe ne medicina.

• Para gaca chaahuiʼ yoo ni gucaná.

Qué guirá guidxagayaa ti familia ora gúnnacaʼ bixiá lídxicaʼ ne biníticaʼ negocio sticaʼ, nga runi maʼ qué ñápacabe dxiiñaʼ. Ca dxi despué de ni bizaaca que, guca nagana para laacabe gúʼyacabe layú ra guyuu lídxicabe que. Peru biéchecabe ora bíʼyacabe chaahuiʼ chaahuiʼ maʼ cabí lídxicabe stiʼ biaje. Cumu guizáʼ bisihuinni ca hermanu ni yegacané que, guendarannaxhii ne cariñu laacabe la? gucané ni laacabe guni huantárcabe ca guendanagana gúpacabe que. Bidxá tipa ladxidóʼ familia riʼ de guendanayecheʼ pur guiráʼ ni bi’ni’ ca hermanu que ne, pur ngue, dede né laacabe gucanécabe para gurí lidxi sti hermanu.

Stale hermanu bidxagayaa ca labor de socorro ni guca que. Ti hermanu guníʼ: «Naca ca Comité de Socorro ca ti regalu sicarú stiʼ Jehová. Sti dxi ca de guca desastre que, mápeca nuucabe para gudiicabe ni caquiiñedu. Riuu tobi gana ora guʼndaʼ modo cayaca ca labor de socorro ca xcaadxi lugar. Peru ora lii piouʼ guyuu ximodo raca cani la? jma rusisácaluʼ xquidxi Jehová. Laaca rudiiluʼ xquixe peʼ ora gú’yalu’ zinanda ca hermanu ejemplu stiʼ Jehová purtiʼ rizaaláʼdxicaʼ gápaluʼ ni iquiiñeluʼ, chuʼluʼ galán ne cadi guixéleluʼ de Jehová. Ruuyaʼ dxíchinu pabiáʼ nadxii Jehová laanu».

Ra jma zidxíñanu ra guiluxe guidxilayú riʼ, ziuuruʼ jma desastre natural (Lucas 21:10, 11). Peru, nápanu ti Rey ni nadxii laanu, Jesucristu, qué zusaana laanu ne «qué ziuu dxi guixeleʼ de laatu dede ora guiluxe guidxilayú riʼ», ne zaquiiñebe congregación para gúnibe ni (Mateo 28:20). Cada biaje gudiiluʼ donación para obra mundial, pa gúniluʼ ni lu sitiu donate.jw.org o de sti modo, ne gudiiluʼ de tiempu ne stipa stiluʼ zusihuínniluʼ cayacaneluʼ Rey riʼ ne Reinu stiʼ. ¡Xquixe peʼ laatu hermanu caʼ pur riuuláʼdxitu gudiitu de ni nápatu!