Napa ca testigu stiʼ Jehová ti lista ra cá xi película, canción o libru cadi iquiiñecaʼ la?

Coʼ. Qué ruuyaʼ organización stidu xi zeeda lu ca película, lu ca canción nin ni zeeda lu ca libru para gabi laadu gunáʼ ni cadi naquiiñeʼ guidúʼyadu o guidúʼndadu. Xiñee yaʼ.

Biblia ruzeeteʼ guiranu naquiiñeʼ gusíʼdinu xquendabiaaninu gacané ni laanu gánnanu gunáʼ nga jneza ne gunáʼ nga ni cadi jneza (Hebreos 5:14).

Lu Stiidxaʼ Dios zeeda principiu ni racané laadu gánnadu xii nga jma jneza gucaʼdiágadu, quítedu o guidúʼyadu.a Intiica gúnidu lu xquendanabánidu, rinándadu ni na ca diidxaʼ zeeda lu Efesios 5:10, ra na: «Lauyubi ganna tu xii nga riulaʼdxi Señor».

Maʼ bisaana Dios lu náʼ cani naca xaíque stiʼ ca familia guni mandarcaʼ ndaaniʼ lídxicaʼ, nga runi nápacaʼ derechu gucueezacaʼ binnilídxicaʼ de guni xiixa (1 Corintios 11:3; Efesios 6:1-4). Peru ndaaniʼ neza binni ridagulisaa guirutiʼ gapa derechu guiníʼ xi película, xi canción o artista cadi naquiiñeʼ guidúʼyadu o gucaʼdiágadu (Gálatas 6:5).