Jesús jma nadipaʼ que ca demonio ca

ÑEE rietenaláʼdxiluʼ xiñee tobi de ca ángel stiʼ Dios beeda gaca Binidxabaʼ la?... Purtiʼ guyuuláʼdxibe guni adorárcabe laasibe, ngue runi bicaalube Dios. Ñee bidxela Binidxabaʼ xpinni lade ca ángel stiʼ Dios la?... Ya, bidxélabe. Biblia ribee lá laacabe ca ángel stiʼ Binidxabaʼ, o demonio (Apocalipsis 12:9).

Runi cré ca ángel malu riʼ pa nuu Dios la?... Stiidxaʼ Dios na runi cré ca demonio ca nuu Dios (Santiago 2:19). Peru ca dxi stinu riʼ cadxíbicabe, purtiʼ nánnacabe zuniná Dios laacabe pur ca cosa malu ni huayúnicabe. Xi laacani yaʼ....

Biblia na bisaana ca ángel riʼ guibáʼ ne biétecabe lu Guidxilayú para guibánicabe casi binni. Bíʼnicabe ni purtiʼ guyuuláʼdxicabe gatanécabe ca gunaa sicarú ni nuu lu Guidxilayú riʼ (Génesis 6:1, 2; Judas 6). Xi nannuʼ de ora gatané ti hombre ti gunaa yaʼ....

Ti hombre ne ti gunaa ráʼtacabe ne maca nuu ximodo ridaagucabe, ne zacá riáʼ ti baʼduhuiiniʼ ni zaniisi ndaaniʼ jñaa chaahuidugá. Dios racalaʼdxiʼ ca binni si ni maʼ bichaganáʼ nga guidaagucaʼ zacá. Ne ora gale baʼduhuiiniʼ riʼ guirópacabe naquiiñeʼ gápacabe laabe. Peru ca ángel ca cadi bizáʼ diʼ Dios laacabe para gúnicabe zacá.

Despué de guca ca ángel riʼ casi binni de guidxilayú la? gutanécabe ca gunaa que, ne gúpacabe xiiñicabe ne biniisicaʼ dede gúcacaʼ gigante. Laacabe nabé malu gúcacabe ne bininácabe binni. Ngue runi bisaba Dios ti nisaguié roʼbaʼ para guinitilú ca gigante ne ca binni malu que. Peru gúdxibe Noé guni ti arca, o ti barcu ngola, para guilá binni nachaʼhuiʼ. Maestru Ni Jma Nanna Gusiidiʼ que guniʼbe naquiiñeʼ guietenaláʼdxinu ni guca ora beeda Nisaguié roʼbaʼ que (Génesis 6:3, 4, 13, 14; Lucas 17:26, 27).

Ñee nannuʼ xi biʼniʼ ca ángel malu que ora beeda Nisaguié roʼbaʼ que la? Gúcacabe espíritu ne bibiguétacabe guibáʼ. Peru maʼ qué ñanda diʼ ñácacabe ángel stiʼ Dios, ngue runi gúcacabe ángel stiʼ Binidxabaʼ, gúcacabe demonio. Yanna, xi gúcaxa de ca xiiñicabe, ca gigante que yaʼ.... Gúticabe lu Nisaguié roʼbaʼ que, laacabe ne ca binni ni qué nuzuubaʼ stiidxaʼ Dios.

Gudiʼdiʼ si Nisaguié roʼbaʼ que la? maʼ qué niná diʼ Dios ñaca ca demonio que casi binni de guidxilayú. Peru, neca qué randa rúʼyanu laacabe la? qué riaanadxídicabe de uquiindecabe binni guni ni cadi jneza. Yánnapeʼ nga jma cayuninácabe binni purtiʼ maʼ biábacabe lu Guidxilayú riʼ.

Ñee nannuʼ xiñee qué randa rúʼyanu ca demonio ca la?... Purtiʼ espíritu laacabe. Peru nánnanu dxandíʼ nuucabe. Biblia na cusiguii Binidxabaʼ guiráʼ binni guidxilayú riʼ ne ca demonio ca cayacané laabe (Apocalipsis 12:9, 12).

Ñee zanda gusiguii Binidxabaʼ ne ca demonio stiʼ laanu la?... Zanda, ne zúnicabe ni pa qué gápanu laanu. Peru cadi naquiiñeʼ guidxíbinu. Maestru Ni Jma Nanna Gusiidiʼ que guníʼ: Binidxabaʼ qué zanda diʼ guni mandar naa. Pa chuʼnu gaxha de Dios la? laabe zulabe laanu de Binidxabaʼ ne ca demonio stiʼ (Juan 14:30).

Naquiiñeʼ gánnanu xii ndiʼ cani riulaʼdxiʼ ca demonio ca gúninu. Nga runi guníʼ ique: xi guiráʼ cosa malu biʼniʼ ca demonio que dxi beedacaʼ lu Guidxilayú riʼ yaʼ.... Ante guiaba Nisaguié roʼbaʼ que gutanécabe ca gunaa que, ngue nda nga na Dios cadi gúnicabe. Ca dxi riʼ la? ca demonio ca riéchecabe ora gatané binni ni cadi xheelaʼ ne zacá cadi guzuubacaʼ stiidxaʼ Dios. Guidúʼyanu pa rietenaláʼdxiluʼ: tu si ndiʼ zanda gátacaʼ juntu yaʼ.... Ngapeʼ nga laani, binni ni maʼ bichaganáʼ si.

Ca dxi stinu riʼ, nuu hombrehuiiniʼ ne dxaapahuiiniʼ ráʼtacaʼ juntu ante guichaganacaʼ, ne nga cadi jneza diʼ ni. Biblia laaca riníʼ de ra naca binni hombre ne ra naca binni gunaa (Levítico 15:1-3). Jiobá bizaʼbe cani ti guni cani ti dxiiñaʼ risaca ne iquiiñeʼ ni ora si maʼ bichaganáʼ binni. Ca demonio ca riéchecabe ora tuuxa runi xiixa de ni na Dios cadi jneza diʼ, cásixa ora ca baʼduʼ ca quitesaacaʼ ra nácacaʼ hombre ne ra nácacaʼ gunaa. Cadi dxandíʼ qué racaláʼdxinu gúninu ni riulaʼdxiʼ ca demonio ca la?...

Nuu sti cosa ni riulaʼdxiʼ ca demonio ca peru Jiobá nanalaʼdxiʼ ni. Nannuʼ xi laani la?... Nga nga guendaridinde (Salmo 11:5). Binni ni nabé ridinde la? qué riadiʼ guirutiʼ ne runinacaʼ binni. Bietenalaʼdxiʼ, zacapeʼ nga biʼniʼ ca gigante, xiiñiʼ ca demonio que.

Ca demonio ca laaca riéchecaʼ ora guchíbicaʼ binni. Nuu tiru rúnicabe laacabe casi binni ni maʼ guti ne rúnicabe ridxi sticaʼ. Zacá riguítecabe stale binni para guni cré nabániruʼ ca gueʼtuʼ ca ne zanda guiníʼnecaʼ binni. Pur nga nuu stale binni runi cré nuu fantasma.

Nga runi, naquiiñeʼ gatananu para cadi quite Binidxabaʼ ne ca demonio stiʼ laanu. Biblia caguixhená laanu: Binidxabaʼ racalaʼdxiʼ tiidiʼ casi ti ángel chaʼhuiʼ, ne ca xpínnibe laaca rúnicaʼ zacaca (2 Corintios 11:14, 15). Peru ni dxandíʼ la? ca demonio ca malu laacaʼ. Guidúʼyanu xi riquiiñecabe para gácanu casi laacabe.

Paraa riziidiʼ binni de guendaridinde, de espíritu, de fantasma ne de guendaratané stobi de ti modo na Dios cadi jneza diʼ yaʼ.... Cadi dxandíʼ nga lu calle, lu tele, lu maquinita ne lu Internet la? Nouʼ ruchiña ca ndiʼ laanu jma gaxha de Dios, o de Binidxabaʼ ne ca demonio stiʼ la? Xi raʼbuʼ yaʼ....

Tuu ndiʼ racalaʼdxiʼ gunadiáganu ne gúʼyanu cani cadi jneza ca yaʼ.... Nga nga Binidxabaʼ ne ca demonio stiʼ. Nga runi, xi riquiiñeʼ gúninu yaʼ.... Naquiiñeʼ gúʼndanu, gunadiáganu ne gúʼyanu xiixa ni gacané laanu gúninu ni na Jiobá. Caníʼ íqueruluʼ xiixa la?...

Pa gúninu ni galán la? qué zadxíbidinu ca demonio ca, purtiʼ Jesús jma nadipaʼ que laacabe. Ti biaje, ca demonio que dede cadxíbicaʼ ora gunabadiidxacaʼ Jesús: «Ñee zeda unitilú lu laadu la?» (Marcos 1:24). Cadi ziéchenu nga ora gunitilú Jesús laacabe la?... Laga cabézanu gaca nga la? nannadxíchinu zapa Jesús laanu de laacabe pa chuʼnu gaxha de laabe ne de Bixhózebe ni nuu guibáʼ.