Bidxiña Dios

«Zacaláʼdxiluʼ cani bizáʼ naluʼ»

NABÉ riuubaʼ ladxidoʼno ora gati tuuxa binni ni nadxiinu ne guirutiʼ zanda guiene pabiáʼ feu runi sentir binni ora riaadxaʼ ti binnilidxi. Nga runi, ratadxí ladxidoʼno gánnanu riene Jiobá, Dios ni bizáʼ laanu yuubaʼ ni cadídinu. Ne guizáʼ racaláʼdxibe iquiiñebe poder stibe para gusibánibe ca binni ni maʼ guti. Ngapeʼ nga cusiene Job 14:13-15.

Job, ti hombre ni nabé gupa fe, guníʼ ca diidxaʼ ca ora gudiʼdiʼ lu ti yuubaʼ nabé naná. Guti ca xiiñibe ni nabé nadxiibe, binítibe ca cosa risaca stibe ne dede guca huarabe. Cumu guizáʼ naná nuube ne cayuubaʼ ladxidoʼbe pur guiráʼ ni cadíʼdibe que la? gúdxibe Dios: «¡Pa ñanda nucaachiluʼ naa ndaaniʼ Seol[!]» (versículo 13). Diidxaʼ Seol ni cayeeteʼ lu versículo riʼ, zeeda gácani casi ti lugar ra rié guiráʼ binni ora gati. Nga runi, nanna Job zaziilaʼdxiʼ ndaaniʼ baʼ, purtiʼ racá nga guiluxe guiráʼ yuubaʼ ne ca desgracia stiʼ. Racá nga guilabe ne guiaapabe casi ti tesoro ni bicaachiʼ Dios.a

Ñee guníʼ ique Job qué ziuu dxi guiree de ndaaniʼ Seol la? Coʼ, purtiʼ laabe gunábabe Dios: «[¡]Niguíxheluʼ ti tiempu para naa ne ñetenaláʼdxiluʼ naa!». Laabe gúnnabe qué zusiaandaʼ Jiobá laabe ne biʼniʼ crebe ti tiempu si nga chiguiaanabe ndaaniʼ Seol. De racá bizeetebe zeeda gaca tiempu riʼ casi ti «dxiiñaʼ ni naquiiñeʼ gaca», ti tiempu ni naquiiñepeʼ cueza binni. Peru, pabiáʼ tiempu nga naquiiñeʼ cuézabe yaʼ. Laabe bicábibe: «Dede ora maʼ guireeʼ [o chuʼ tu gulá naa]» (versículo 14). Nga runi, Job zabeza dede ora guiree de ndaaniʼ Seol, nga nga dxi guiásabe lade gueʼtuʼ.

Ximodo nanna Job dxandíʼ zedandá dxi ca yaʼ. Laabe nanna dxíchibe xi runi sentir bixhózenu ni bizáʼ laanu pur ca xpinni ni maʼ guti. Gúdxibe Dios: «Lii zucaa riʼdxuʼ, ne naapeʼ zacabeʼ lii. Zacaláʼdxiluʼ cani bizáʼ naluʼ» (versículo 15). Job nanna laa nga tobi de ca cosa ni bizáʼ Jiobá né naʼ. Ne pur Dios nga gunda guyáʼ Job ndaaniʼ jñaa. Jiobá bidii laabe guendanabani ne laaca laa zanda gudiini laabe sti biaje (Job 10:8, 9; 31:15).

Xi rizíʼdinu de relatu riʼ yaʼ. Rizíʼdinu nadxii Jiobá ca binni casi Job ni rudiicaʼ lugar gábibe laacaʼ xi gúnicaʼ ne ximodo naquiiñeʼ gácacaʼ (Isaías 64:8). Laabe nabé rusisácabe ca xpínnibe ni qué rusaana laabe ne guizáʼ racaláʼdxibe guindísabe ca gueʼtuʼ ca. Ti hombre ni ruundaʼ de tema riʼ bisiene diidxaʼ ni riquiiñecabe lu hebreu para «zacaláʼdxiluʼ» sicaríʼ: «Ndiʼ nga tobi de ca diidxaʼ ni jma rusiene xi runi sentir binni ora nabé ribanaʼ tuuxa». Racá ridúʼyanu qué rietenalaʼdxiʼ si Jiobá de ca xpinni ni maʼ guti; sínuque laaca ribánabe laacaʼ ne racaláʼdxibe gúʼyabe guibánicaʼ sti biaje.

¡Nabé nachaʼhuiʼ Jiobá, ne bisihuínnibe zacá ni ra gudíxhebe guicá lu tobi de ca libru ni jma nayooxhoʼ stiʼ Biblia, ziasa ca gueʼtuʼ ca!b Laabe racaláʼdxibe guidúʼyanu sti biaje ca binni ni nadxiinu. Ora guietenaláʼdxinu ni maʼ bizéʼtenu ca racané ni laanu guni huantarnu yuubaʼ ni nápanu pur guti tuuxa binni ni nadxiinu. Cadi dxandíʼ galán nga ñunibiáʼ chaahuiluʼ Dios ni nabé nadxii binni riʼ la? Pa gudiiluʼ lugar gábibe lii modo naquiiñeʼ guibániluʼ la? zanda chuʼluʼ lade ca binni ni guʼyaʼ dxi guindisaʼ Dios ca gueʼtuʼ ca casi maʼ guniʼbe zúnibe ni.

BIAʼ NEXHEʼ GUIUUNDAʼ BIBLIA LU BEEU RIʼ:

◼ Job 16 dede Salmo 59

[Cani cá ñee yaza]