Laguyubi Dios ti chuʼtu nayecheʼ lu xquendaxheelatu

Jiobáa Dios nga bicheelaʼ primé hombre ne primé gunaa. Biblia na laabe nga bizaʼbe primé gunaa ne «yenebe laa ra nuu hombre que». Nabé nayecheʼ biʼniʼ sentir Adán dede guníʼ: «Ndiʼ huaxa naca de dxita stiʼ ca dxita ladeʼ ne beela de beela ladeʼ» (Génesis 2:22, 23). Dede yanna racalaʼdxiʼ Jiobá guibani cani maʼ bichaganáʼ nayecheʼ.

Ora guichaganáʼ chupa binni, zándaca guiníʼ íquecaʼ qué ziuu dxi gápacaʼ guendanagana. Peru dxandipeʼ la? dede né ca guendaxheelaʼ ni jma nadxii zápacaʼ guendanagana (1 Corintios 7:28). Lu folletu riʼ zadxeʼluʼ principiu zeeda lu Biblia ne pa guʼnuʼ ni na cani la? zabanineluʼ xheeluʼ ne familia stiuʼ nayecheʼ (Salmo 19:8-11).

1 GUCUAA DXIIÑAʼ BISAANANÉ JIOBÁ LII

NI RUSIIDIʼ BIBLIA: Hombre nga xaíque stiʼ familia (Efesios 5:23).

Pa lii nga hombre ca la? ribeza Jiobá gápaluʼ xheeluʼ né guendarannaxhii (1 Pedro 3:7). Laabe bizaʼbe gunaa para gacané lii ne racaláʼdxibe gusisácaluʼ ne gannaxhiiluʼ laa (Génesis 2:18). Naquiiñeʼ gannaxhiiuʼ laabe dede gusihuinnuʼ jma risaca cani caquiiñebe que cani caquiiñuʼ (Efesios 5:25-29).

Pa lii nga gunaa ca la? ribeza Jiobá gápaluʼ respetu xheeluʼ ne gacaneuʼ laa guni dxiiñaʼ biaanané (1 Corintios 11:3; Efesios 5:33). Bidii náʼ laabe ora quixhe íquebe gúnibe xiixa ne gucané laabe sin quicheruaaluʼ (Colosenses 3:18). Pa guʼnuʼ nga la? guizáʼ zusisácabe lii ne zusisaca Jiobá lii (1 Pedro 3:1-6).

NI ZANDA GUʼNUʼ:

• Gunabadiidxaʼ xheeluʼ xiruʼ riaadxaʼ lii para guʼnuʼ guiráʼ ni runi ti hombre o ti gunaa ni maʼ bichaganáʼ. Bicaadiaga chaahuiʼ ni gábibe lii ne biʼniʼ stipa pur guʼnuʼ ni

• Gupa paciencia. Ridiʼdiʼ tiempu para guiziidiʼ binni guni ni riuulaʼdxiʼ xheelaʼ

2 BISIHUINNI DXANDÍʼ RIZAALAʼDXUʼ NI RUNI SENTIR XHEELUʼ

NI RUSIIDIʼ BIBLIA: Nabé risaca guʼyaʼ chaahuiluʼ xi caquiiñeʼ xheeluʼ (Filipenses 2:3, 4). Cadi gacuʼ naduxhuʼ né laa, bietenalaʼdxiʼ ribeza Jiobá gaca ca xpinni nachaʼhuiʼ guiráʼ ora (2 Timoteo 2:24). Guníʼ ique ximodo guiniuʼ, Biblia cayabi laanu: «Ca diidxaʼ riníʼ binni sin guiníʼ ique runiná cani casi runiná ti espada, diidxaʼ riníʼ ti binni nuu xpiaaniʼ zeeda gaca ni ti remediu» (Proverbios 12:18, La Biblia Latinoamérica, 2011). Zacané espíritu stiʼ Jiobá lii guiniuʼ diidxaʼ ni guiaba binni ne diidxaʼ nadóʼ (Gálatas 5:22, 23; Colosenses 4:6).

NI ZANDA GUʼNUʼ:

• Gunabaʼ Dios gacané lii ti cadi guidxiichiluʼ nagueenda ne gunabaʼ laabe gacanebe lii guieʼnuʼ xheeluʼ ora güitu de xiixa cosa risaca

• Guníʼ ique chaahuiʼ xi guiniuʼ ne ximodo guʼnuʼ ni

3 CADI GUIAANDAʼ LII TOBI SI LAATU

NI RUSIIDIʼ BIBLIA: Ora richaganáʼ chupa binni la? reeda gácacaʼ «tobi si» (Mateo 19:5). Peru qué zusaana de gácatu chupa binni ni riníʼ ique gadxé gadxé modo. Nga runi, naquiiñeʼ guiziiditu chuʼtu tobi si lu cani riníʼ íquetu ne lu cani runi sentirtu (Filipenses 2:2). Nabé risaca chuʼtu tobi si ora quíxhetu gúnitu xiixa. Ximodo zanda chuʼtu tobi si yaʼ. Biblia na: «Ratachaahuiʼ cani riguixhe ique binni guni ora ruyubi conseju» (Proverbios 20:18). Lagudii lugar gacané ca principiu zeeda lu Biblia laatu ora quixhe íquetu gúnitu xiixa cosa risaca (Proverbios 8:32, 33).

NI ZANDA GUʼNUʼ:

• Cadi guiniʼneuʼ xheeluʼ nisi cani maca biaatu güitu; gudxi laabe xi cayuni sentirluʼ

• Guniʼné xheeluʼ ante guʼnuʼ ti compromisu