Modo bizulú guiráʼ ni runi cré binni

GUDIʼDIʼ si biaʼ 50 iza stiʼ siglu I que, bicaa apóstol Pablu ti carta ra nuu ca xpinni Cristu para quixhenabe laacaʼ de ti cosa ni zazaaca. Sicaríʼ guniʼbe: «Laguuya gá laatu né cani canayuíʼ ni biree de xquenda biaani binni. Cadi dxandí ni, sínuque binni guidxilayú gudixhe ni» (Colosenses 2:8).

Neca gudixhená Pablu laacabe la? gudiʼdiʼ si biaʼ 50 iza stiʼ sti siglu que, bizulú caadxi xpinni Cristu biquiiñeʼ ni biree de xquendabiaaniʼ ca binni ni qué runi adorar Dios, para gusiénecaʼ ni runi crecaʼ. Xiñee bíʼnicabe ni yaʼ. Para gucaacabe ca binni nuu xpiaaniʼ ni nuu guidubi ra runi mandar Roma chuulaʼdxiʼ ni cusiidicabe, ne zaqué ganda guidale binni ni gaca xpinni Cristu.

Tobi de ca xpinni Cristu que nga Justino Mártir, laa biʼniʼ cré maca biseendaʼ Dios tuuxa ni guiníʼ pur laa (ngue nga tobi lucha Xiiñiʼ Dios) ra nuu ca filósofo griegu, stale iza ante gueeda Xiiñibe que ndaaniʼ Guidxilayú casi ti binni. Pur ni biʼniʼ crebe riʼ ne ni biʼniʼ cré xcaadxi teólogo la? guníʼ íquecabe zanda chuʼ ti religión para guiráʼ binni, pa guni cré ca xpinni Cristu que filosofía ne mitología.

Cani bisiidiʼ Justino Mártir que, bicaani stale binni gaca xpinni Cristu. Peru, para cadi gusaana binni de guni cré cani la? gupa xidé gudíxhecabe xcaadxi, zaqué nga para beeda guiaana guiráʼ ni runi cré ca binni ni nacaʼ zinándacaʼ Cristu. Ñuuláʼdxiluʼ ñánnaluʼ ximodo bizulú guiráʼ cani la? Cayuni invitardu lii gúʼndaluʼ xi caníʼ caadxi libru de laacani ne xipeʼ nga ni rusiidiʼ Biblia.

[Paraa gucuaacabe dibuju o foto ni zeeda lu yaza 3]

Binidxabaʼ: Barrators—Giampolo/The Doré Illustrations For Danteʼs Divine Comedy/Dover Publications Inc.; caadxi ángel: Art Resource, NY; Chonna dios: Museu Bardini (Florencia)