Ora rinabadiidxaʼ xiiñiʼ binni pa dxandíʼ cani runi cré bixhoze ne jñaa

NANNA dxíchiluʼ rusiidiʼ religión stiluʼ ni dxandíʼ de Dios ne laaca nánnaluʼ rusiidiʼ Biblia modo guibani binni jma galán. Nga runi, racaláʼdxiluʼ gusiidiluʼ cani xiiñiluʼ (Deuteronomio 6:6, 7).b Peru pa maʼ qué chuuláʼdxibe guiziidibe de Dios ora maʼ ziniisibe yaʼ. Xi gúniluʼ ora maʼ guzulú guinabadiidxabe pa dxandíʼ cani biziidiluʼ laabe dxi nahuiinibe yaʼ (Gálatas 5:7).

Pa cadxaagaluluʼ guendanagana riʼ, cadi guiníʼ íqueluʼ nácaluʼ ti xpinni Cristu ni qué ganna gusiniisi xiiñiʼ jneza. Raríʼ zadúʼyanu zándaca guyuu xcaadxi cosa ni bicaa laabe guinabadiidxabe pa dxandíʼ cani runi creluʼ. Peru cadi guiaandaʼ lii ti cosa, pur modo guiníʼneluʼ laabe zanda gacaneluʼ laabe chuuláʼdxibe ni caziidibe o chaahuiʼ chaahuiʼ gucaaluʼ laabe guixélebe de laacani. Bietenalaʼdxiʼ pa nisi maʼ cadindeneluʼ laabe la? qué zabeenduluʼ gastiʼ (Colosenses 3:21).

Ora guizaaca nga jma galán chinándanu conseju ni bidii apóstol Pablu riʼ: «Biʼni casi naquiiñe guni cani cayuni xhiiña Señor: cadi uyubu diidxaʼ, sínuque guca nachaʼhui ne irá binni, bisiidi laacabe jneza ne cadi iree lu gana» (2 Timoteo 2:24). Ximodo zanda gusihuínniluʼ rusiidiluʼ jneza ora guinabadiidxaʼ xiiñiluʼ pa dxandíʼ guiráʼ cani runi creluʼ.

Biyubi gánnaluʼ xi cucaa laabe gúnibe ni

Biyubi gánnaluʼ xiñee riníʼ ique xiiñiluʼ zacá. Guidúʼyanu chonna cosa ni zándaca bicaa laabe gúnibe ni:

• Ñee runi sentirbe nuube stúbibe purtiʼ qué gápabe xhamígube lade ca xpinni Cristu la? «Cumu racalaʼdxeʼ gapaʼ xhamiguaʼ la? ngue runi biyubeʼ gaca xhamiguaʼ cani riniáʼ scuela. Ne ca binni ni bidxaagaʼ ra scuela que nga cani jma bicaa naa guixeleʼ de Dios, ne xadxí guyuaaʼ zaqué. Yanna nabé riuubaʼ ladxiduáʼ pur ni bineʼ que.» (Leonor, de 19 iza.)

• Ñee riníʼ íquebe qué zanda guiniʼbe de cani runi crebe nezalú binni la? «Nabé nagana guca para naa guiniéʼ de cani runeʼ cré nezalú cani riniáʼ scuela. Bidxibeʼ ñuuyacabe gadxé naa que laacabe ne ñábicabe naa “hermanu”. Cumu rúnicabe menu cani naca gadxé para laacabe la? qué ñacalaʼdxeʼ ñúnicabe naa zaqueca.» (Ramón, de 23 iza.)

• Ñee ridxíbibe guibánibe casi naquiiñeʼ guibani ti xpinni Cristu la? «Para naa la? guendanabani ni qué zaluxe ca nuuni dede ique ti yoo ni napa stale pisu, ne nin ti escalón stini caʼruʼ gudxiibaʼ ñee lu. Guizáʼ cadxibeʼ quibaʼ lu escalera ca dede huaníʼ iqueʼ gusaana religión stinneʼ.» (Renee, de 16 años.)

Guniʼné laabe

Yanna xiiñiluʼ yaʼ. Xipeʼ nga guendanagana nápabe. Para gánnaluʼ xi laani la? jma galán guinabadiidxaluʼ laabe, ne biyubi ximodo guiníʼneluʼ laabe ti cadi tíndetu. Santiago 1:19 cudii laanu conseju riʼ: «Lachuu para ucaa diaga tu, peru cadi nisi undaa ruaa si tu xiixa, ne cadi casi ze tu idxiichi tu». Nga runi, «bisiidi [laabe] sin ixhacalaʼdxuʼ» cásica ñúniluʼ né sti binni ni cadi binnilídxiluʼ (2 Timoteo 4:2).

Pa qué náʼ xiiñiluʼ cheʼ ca guendaridagulisaa ni rapa ca xpinni Cristu, biyubi gánnaluʼ xiñee qué nabe chebe ne cadi guidxiichiluʼ ora guiníʼneluʼ laabe. Lu ejemplu ni chiguzéʼtenu riʼ zadúʼyanu qué ñanda ñacané ti hombre xiiñiʼ:

Xiiñibe gudxi laabe: «Maʼ qué riuuladxeʼ chaaʼ guendaridagulisaa».

Naduxhuʼ bicabi bixhózebe laabe: «¡Xii nga naluʼ pue!».

Para na hombrehuiiniʼ que rabi bixhoze: «Nabé rireeʼ gana».

Bixhózebe gudxi laabe: «Ñee rireeluʼ gana gunadiágaluʼ stiidxaʼ Dios nga nouʼ la? ¡Qué guirá guidxagayaaʼ! Biaʼ dxi guibániluʼ ndaaniʼ lidxeʼ la? zineluʼ laadu guiráʼ ra chuudu, neca qué chuuláʼdxiluʼ».

Biblia cayabi binni guiniʼné xiiñiʼ de Dios, ne laaca cayábini xiiñicabe guzuubacaʼ diidxaʼ (Efesios 6:1). Neca na Stiidxaʼ Dios naquiiñeʼ guzuubaʼ xiiñiluʼ diidxaʼ, ñee ñuuláʼdxiluʼ ñúnibe xhiiñaʼ Dios ne ñebe guendaridagulisaa ra rié ca xpinni Cristu, purtiʼ si cayábiluʼ laabe gúnibe cani la? Cadi dxandíʼ jma ñuuláʼdxiluʼ ñúnibe cani purtiʼ risaca cani para laabe ne riale de ndaaniʼ ladxidoʼbe gúnibe cani la?

Zanda gúnibe ni de guidubi ladxidoʼbe pa guyúbiluʼ gánnaluʼ xipeʼ guendanagana nápabe. Yanna, guidúʼyanu ximodo jma jneza niniʼné hombre ni bizéʼtenu que xiiñiʼ.

Hombrehuiiniʼ ca na: «Maʼ qué riuuladxeʼ chaaʼ guendaridagulisaa».

Né diidxaʼ nadóʼ gunabadiidxaʼ bixhózebe laabe: «Xiñee caniʼluʼ zacá yaʼ, xiiñeʼ».

Para na hombrehuiiniʼ que rabi bixhoze: «Nabé rireeʼ gana».

Óraque bicabi bixhózebe laabe: «Rieneʼ xiñee caniluʼ zacá xiiñeʼ, dxandíʼ riree binni gana cuí ti hora o chupa hora. Peru gudxi naa, xii nga ni jma ribee gana lii yaʼ».

Para na hombrehuiiniʼ que: «Qué gannaʼ diaʼ. Ñuuladxeʼ ñaaʼ stiʼ lugar».

Bixhózebe gudxi laabe: «Ñee zacaca runi sentir ca xhamíguluʼ la?».

Laabe bicábibe: «Laca xa napaʼ xhamiguaʼ. Dede dxi zeʼ hombrehuiiniʼ ni guizáʼ guca xhamiguaʼ que, maʼ qué gapaʼ tu güeniáʼ diidxaʼ. Guirácabe nayecheʼ ruuyaʼ laacabe ne naa coʼ. Guirutiʼ tu rulabi naa».

Ora rudii binni lugar guiníʼ xiiñiʼ xi nuu ndaaniʼ ladxidóʼ, rudii cuenta xipeʼ nga guendanagana napa xiiñiʼ, peru cadi ngasi, sínuque laaca zacanebe xiiñibe guiníʼ xi nuu ndaaniʼ ladxidóʼ. Ne zacá jma nagueenda zaníʼ xiiñiluʼ xi cayaca sti biaje (biiyaʼ cuadru ni láʼ «Cadi guireeluʼ gana»).

Stale hombrehuiiniʼ despué rudiicaʼ cuenta xi rizaaca pa gudxiilucaʼ guendanagana ni rucueeza laacaʼ chuʼcaʼ gaxha de Dios, zándaca jma guni sentírcabe nayecheʼ ne chuuláʼdxicabe religión stícabe. Guzéʼtenu sti biaje de Ramón. Hombrehuiiniʼ riʼ guizáʼ ridxíbibe gábibe cani rinebe scuela xpinni Cristu laabe. Peru despué bidiibe cuenta cadi naquiiñeʼ diʼ guidxíbibe neca guxídxicabe laabe.

Laabe bizeetebe xi bizaacabe: «Ti dxi, biʼniʼ burla ti hombrehuiiniʼ ni riniáʼ scuela naa pur religión stinneʼ. Guizáʼ bidxibeʼ ne ruluíʼ guiráʼ ca xcompañeruaʼ cayuuyadxicaʼ laadu. Ni binetiaʼ gunabadiidxaʼ laabe de religión stibe. ¡Guizáʼ bidxagayaaʼ ora biiyaʼ jma bidxíbibe que naa! Raqué bidieeʼ cuenta stale hombrehuiiniʼ qué liica riénecaʼ cani rusiidiʼ religión sticaʼ. ¡Peru naa randa rusieneʼ cani rusiidiʼ religión stinneʼ! Laacabe nga naquiiñeʼ guidxíbicabe, cadi naa diaʼ».

Bisiidiʼ laabe guiníʼ íquebe jneza

Ca binni ni napa xiiñiʼ ne zaqueca cani biʼndaʼ de tema riʼ, huayuuyacaʼ gadxé modo riníʼ ique ti xcuidihuiiniʼ ne gadxé modo riníʼ ique ti hombrehuiiniʼ ni maʼ ziniisi (1 Corintios 13:11). Ora nahuiiniʼ xiiñiʼ binni ricaa guiráʼ ni gabi bixhoze ne jñaa laa. Peru ora maʼ ziniisicaʼ jma maʼ riníʼ íquecaʼ ca cosa ca. Ti xcuidihuiiniʼ zándaca qué guinabadiidxaʼ gastiʼ ora gusiidicabe laa Dios biʼniʼ guiráʼ cosa (Génesis 1:1). Peru ora maʼ ziniisibe zándaca guinabadiidxabe stale cosa casi: «Ximodo zanda gannaʼ pa dxandíʼ nuu Dios. Pa nadxii Dios binni, xiñee rudiibe lugar guizaaca stale cosa malu. Ximodo zanda gannaʼ pa maca nuu Dios ante chuu guirá cosa» (Salmo 90:2).

Ora guinabadiidxaʼ xiiñiluʼ ca cosa riʼ, zándaca guiníʼ íqueluʼ maʼ qué riuuláʼdxibe guiziidibe de Dios. Peru cadi zacá diʼ ni, sínuque zándaca racaláʼdxibe gánnabe jma de Dios. Purtiʼ ora rinabadiidxabe cani la? rusihuinni nga racaláʼdxibe chuʼbe gaxha de Dios (Hechos 17:2, 3).

Ca hombrehuiiniʼ o ca dxaapahuiiniʼ caziidirucaʼ guiníʼ íquecaʼ jneza (Proverbios 3:21, 22). Nga zacané laabe guiénebe pabiáʼ «nalaga, ne ziuulaʼ, ne gueteʼ, ne nasoo» cani caziidibe ne jma ziénebe ni que dxi gúcabe xcuidi (Efesios 3:18). Yanna nga jma caquiiñeʼ gacaneluʼ laabe ti guiene chaahuibe cani runi crebe ne zacá iguidxi fe stibe (Proverbios 14:15; Hechos 17:11).

Gucané laabe guiénebe cani runi crebe

Lu Biblia rieeteʼ de ti xpinni Cristu láʼ Timoteu, laabe biziidibe stiidxaʼ Dios «dede dxi nahuiini[be]». Neca dede dxi nahuiinibe biziidibe stiidxaʼ Dios la? gudxi Pablu laabe: «Qué chi undaa lu ni ma biziidi luʼ, ni nanna dxichi lu dxandíʼ» (2 Timoteo 3:14, 15). Zándaca laaca dede nahuiiniʼ xiiñiluʼ biziidiʼ de stiidxaʼ Dios, cásica Timoteu. Peru yanna nga jma naquiiñeʼ gacaneluʼ laabe guiénebe xipeʼ nga naquiiñeʼ guni crebe.

Libru Lo que los jóvenes preguntan. Respuestas prácticas (volumen 1) na: «Pa nabeza xiiñiluʼ ralídxiluʼ la? nápaluʼ derechu gábiluʼ laabe chuʼbe ora rúnitu xiixa para chuʼtu gaxha de Dios, casi ora ruundaneluʼ binnilídxiluʼ Biblia. Peru ni naquiiñeʼ quixhe íqueluʼ nga gacaneluʼ laabe guiale de ndaaniʼ ladxidoʼbe gannaxhiibe Dios ni bizáʼ laabe, ne cadi gúnibe ni purtiʼ si cayábiluʼ ni laabe». Pa gúniluʼ zacá, zacaneluʼ xiiñiluʼ iguidxi fe stiʼ. Ne fe ni gápabe ca nga chigucaa laabe quixhe íquebe guni adorarbe Dios modo bisiidiluʼ laabe (1 Pedro 5:9).c