Ndaa Ra Rinabadiidxaʼ
◼ Ñee jneza guni grabar ca testigu stiʼ Jiobá ca libana ca o gucaacabe ni lu ti guiʼchiʼ para gudiicabe ni xcaadxi binni la?
Ca libana ni biree lu Biblia nabé riguucani gana laanu ne ruquidxi cani fe stinu (Hech. 15:32). Nga runi, zándaca guiníʼ íquenu galán gucaadiaga xcaadxi binni ni qué ñé dxi gudiʼdiʼ ni para uguuni gana laacaʼ. Ne guiráʼ ca aparatu nuu yanna maʼ randa raca grabar ca libana ca ne nagueendaca gudiicabe ni sti binni. Nuu tu napa stale libana ni maʼ biʼniʼ grabar, ne stale de laacani gudiʼdiʼ cani raca stale iza, ne rutiiñecabe ni ca xhamígucabe o runi grabárcabe ni para laacaʼ purtiʼ riníʼ íquecabe zacá nga cayacanécabe laacaʼ. Xcaadxi maʼ bizáʼ sitiu lu Internet ne riguucaʼ libana luni para tutiisi binni ni gacalaʼdxiʼ gapa cani.
Gastiʼ naca guni grabar tuuxa ca libana ca para laa o para ca binnilidxi. Ca binnigola ca zanda gábicaʼ tuuxa guni grabar ca libana ca para ca xpinni Cristu ni huará ne qué zanda cheʼ ca guendaridagulisaa ca. Peru laaca nuu stale razón para cadi gudiʼnu sti binni ca libana ni gucaʼnu o ni guni grabarnu.
Ora ridiʼdiʼ ca libana ca ruuyacabe xii nga ni jma caquiiñeʼ ca binni ni chigucaadiaga ni, nga runi, pa gudiicabe ni gadxé gadxé binni la? zándaca gadxé modo guiénecabe caadxi de ca cosa ni bieeteʼ luni, purtiʼ qué gánnacabe xiñee zaqué gudiʼdiʼ libana ca dxi que. Laaca zaca nagana para gánnanu tu laa bidii ni ne padxí gúcani para gúʼyanu pa zándaruʼ gúninu ni bieeteʼ lu libana ca dede yanna ne pa biaʼsi ni (Luc. 1:1-4). Ne sti razón pur qué raca grabar cani o qué ricá cani lu guiʼchiʼ para guicaa sti binni ni nga, purtiʼ zándaca gucaani xcaadxi gusisaca binni ni bidii libana ca ne zándaca chuulaʼdxiʼ binni ni bidii ni ca gusisácacabe laa (1 Cor. 3:5-7).
Mozo ni nuu xpiaaniʼ ne ni runi jneza nabé runi dxiiñaʼ para gudii guiráʼ ni caquiiñenu ne órapeʼ naquiiñeʼ guicaanu ni ti ganda guizíʼdinu de Dios (Luc. 12:42). Lade guiráʼ cani rudiicabe laanu riʼ nuu ca libana ni ridiʼdiʼ lu ca guendaridagulisaa stiʼ ca testigu stiʼ Jiobá ne lu Internet lu www.jw.org. nuu stale ni maʼ guca grabar ni zanda guindétenu para laanu. Nanna dxíchinu zudii mozo ni nuu xpiaaniʼ ne Grupu ni Zaniruʼ stiʼ guiráʼ ni caquiiñenu para gaca fe stinu naguidxi (Hech. 16:4, 5).