Xi riziidiʼ xcaadxi binni ora gúʼyacaʼ laanu
1. Xi biziidiʼ ca discípulo que ora bíʼyacaʼ guiráʼ ni biʼniʼ Jesús.
1 Jesús guníʼ: «Laudxiiba ayubu stinne xa yanni tu» ne «laudii lugar usiide laatu» (Mat. 11:29). Racá ridúʼyanu cadi guníʼ si Jesús xi naquiiñeʼ guni binni, sínuque laaca bíʼnibe cani guniʼbe. Guníʼ ique xi guiráʼ biziidiʼ ca discípulo stibe ora bíʼyacaʼ modo laabe. Gúcabe nadóʼ, nachaʼhuiʼ ne nabé gunnaxhiibe binni (Mat. 8:1-3; Mar. 6:30-34). Qué nudxiibabe laca laabe (Juan 13:2-5). Ora bicheechené ca discípulo que Jesús diidxaʼ la? biiyacaʼ qué liica nusaana de nusiidibe binni ni dxandíʼ ne jneza modo bíʼnibe ni (Luc. 8:1; 21:37, 38). Yanna, xi riníʼ ique binni de laanu ora gúʼyacaʼ canagucheechenu diidxaʼ yaʼ.
2. Xi zuni binni pa guʼyaʼ rácunu lari jneza ne galán xpiaʼnu.
2 Ca binni ni rinínenu. Nabé riníʼ binni galán de laanu ora ruuyacaʼ rácunu lari jneza, galán xpiaʼnu ne rizaaláʼdxinu laacaʼ (2 Cor. 6:3; Fili. 1:27). Laaca rudiicabe cuenta nabé riquiiñenu Biblia gatigá, ne ora maʼ caníʼcabe la? riuuláʼdxicabe gucaadiáganu laacabe ne respetu. Qué chuʼ dxi guiaandaʼ lii: pa gúniluʼ cani maʼ bizéʼtenu ca la? zacanécani binni gucaadiaga stiidxaʼ Reinu.
3. Xi zanda gúninu para gacanenu xcaadxi xpinni Cristu.
3 Xcaadxi xpinni Cristu. Laaca zanda guiníʼ íquenu pabiáʼ racanenu xcaadxi xpinni Cristu pur cani rúninu. Ora rucheechenu diidxaʼ ne stale gana la? rucaani xcaadxi guni zacaca. Ora guʼyaʼ cani rucheechenenu diidxaʼ pabiáʼ jneza modo rinínenu binni la? zucaani laacaʼ gúnicaʼ zacaca, ne zanda guininu zeeda gácani casi ora niquiiñeʼ tuuxa ti guiibaʼ para gutuxhu sti guiibaʼ (Pro. 27:17). Pa gúninu stipa pur gucaʼnu lá ca binni ni riuulaʼdxiʼ guiziidiʼ ne guibiguétanu nagueendaca ra nuucaʼ la? zaguʼnu gana xcaadxi para guni zacaca. Ora rucheechenu stiidxaʼ Reinu jneza, laaca racanenu xcaadxi xpinni Cristu (2 Tim. 4:5).
4. Xiñee galán cueenu tiempu gatigá para guidúʼyanu pa jneza ejemplu cudiʼnu.
4 Xiñee qué cueeluʼ tiempu gatigá para gúʼyaluʼ pa jneza cani rúniluʼ ne cani riniʼluʼ ti gánnaluʼ pa cayacaneluʼ xcaadxi. Pa gúninu guiráʼ cani maʼ bizéʼtenu lu tema riʼ la? zusiéchenu Jiobá ne zuni sentirnu casi biʼniʼ sentir apóstol Pablu, laa guníʼ: «Lachinanda ejemplu stinne casi zinanda ejemplu sti Cristu» (1 Cor. 11:1).