Buza

Oni bingo nyanyakipa apai ane ue rogo gu Atambuahe du ari re: (1) Ruru aboro nagbiatiyo na akpakarapai. (2) Yekova nabatasa rani be gaani aˈasada. Waigu Yekova abatasa rani? Gene sa ko aundo rani ngbaha nga, ani du na ruru bipai tipa raka rogo gi zegino re. Wa vura duhe nga Yekova ima kido he nga ani nika du na ngbarago ti ngba irisoko, ko ayanga ani adunga zanga akpakarapai awere rogo gaani raka yo te te. (Yes. 66:14) Ko nangarasa rani tipa ani moiberãrani tipa gaani raka kumbatayo—nga gu regbo ani nikaa raka gu raka ko aaida ani gbia ngbarago ti ni nyeanye kindi. (2 Kor. 4:16-18) Wa du rago re, ko naundo rani ani naandu kindi kumbatayo kaa irisoko na aˈuru dũ. (Kpe 3:22-24) Ginipai rengbe ani ka wirika ha ti agu akpiapai nga ga ruru airisi Yekova, aguyo naadu ti agu aregbo i aake Ziazia Kekeapai ti ni na aguyo du ti gi gaani regbo re? A wa ani nika bihe, ani ima rengba ka gbiatirani na akpakarapai ni tunguotunguoho. Ono ho ani akido ni kuti Yekova, ko naundo rani ti aregbo dũ.—Tam. 55:22. w23.04 14-15 ¶3-4

Ani ima rengba ka wirikapai be aYosefa na Maria naadu regerege ka mangapai kuti agu andiko nga ga airangbii zavura ho si adu ni fuyo ni kpakarakpakaraha. (Rk. 2:1-6) Ho Maria adu ni na vuse adiwi ki ima da ribua, irangbii aaida ri gbiati Yosefa mangi gupai naadu ni kpakarakpakaraha. Auguseto, nga guko nangia bazogo gu Bariwara Ngbii Nga ga ARomo afu zinahe nga aboro naaba yo ndu kurogo gayo agbata ka ke rimo yo. Si aaida aYosefa na Maria ndu nunguro ku Betereme yo nga gu nunguro naadu tipa amairo 93 rogo gu rago naadu na dungu agangara. Gu nunguro re aadunga ni wenehe te, gbe fu Maria. Agu arogotise re aima bakabangiro yo tipa padu ri wenengai na gu wiriyo i aavunga nga ru re ya. Na ka si adunga gude atona ri ho i aandu ni? Ri adu na vuru gu Masiya i akidopa ko kumbatayo. Ya mo gipai re arengbe kadu fuyo ni gupai ka sa yo ka i ginga sangba irangbii ya? Wa vura duhe nga aYosefa na Maria aduadu na nduapai ka bakabangiriyo, i adu nagiasangba. Yekova aima fu maku kurii gayo giasangba. Maria andu ki da Betereme yo zanga pai mangi ri, ki vungu bawene gude na ki undo ka digiso gu sangbaanebi nga ga Baibiri!—Mika 5:2. w23.10 8 ¶9; 9 ¶11-12

Ginipai rengbe mo ka mangaha ka si du nga mo nagunde agunde tipa ka fu karagapai ba dunguratise yo? Mo ima rengba ka bihe ni pa undo ka mbakadi gamo karagapai wenengai. (Snz. 21:5) Ka si du nga mo inidi tiro wenengai na gupai i asakapai tipaha, si ima rengba kadu foro taata mo tumba bero ka fu karagapai. Na berewe a, si naida gamo akaragapai du ni wiri guruhe. (Snz. 15:23; 17:27) Ni fu mo gu karagapai du ni wiri guruhe kina wai mo naafura, si nika yugo gupai nga mo ima mbakada gamo karagapai wenengai na mo ima rugatiro nzunzu na gupai oni awisigoho. Ono ginipai rengbe mo ka mangaha ka si du nga mo asadi agi aberãpai re ono mo kidu kindi na gunde ka fu karagapai susi bara sa watadu ue? Mo du na gu kido nga, Yekova nika duadu na tambuahe tipa gu asadatise mo amangaha tipa ka manga gupai rengbe mo ka mangaha. (Rk. 21:1-4) Yekova asananga rani ani mangi gupai arengbanga omerani na ni ya te. (Frp. 4:5) Mo ini gupai rengbe mo ka mangaha, mo moi sasa tipa ka mangaha, na mo ki mangi kparakpee tipa kadu na zereda kpotose yo. Ti tonatonaha, mo ima rengba ka maa gu sasa nga ga fu wiri guru karagapai. w23.04 21 ¶6-8

Gu mokedi nangia Pauro naringbisa rani kuti abanzengere nga aguyo niima du regerege na ki ima vo tiyo tipa vura. Aboro naaida gupai be banzengere nga ni du regerege tipa ka sovura ti ai gu regbo du vura. Kina gu bangisapai re du tipa rani. Ani nadu regerege tipa ga Yekova uru nivo ani marã ngbaduse nga ga idapase na nyemuse na kpakpari nga ga maabangirise. Marã ngbaduse anaabanda ngbadu banzengere. Idapase na nyemuse nabanda gu ngbaduraniyo narukuba kurapai. Si nika undo rani ani naairiso Mbori na kini pekefuo Yesu. Idapase nafu gu kido furani nga Yekova nika fu mosoro afu furani tipa gbata ani ko na ngbaduraniyo dunduko. (Eb. 11:6) Si nafõngbadurani yo ani nye niruru rani fu gaani Bangbembatayo nga Yesu, zavura ka ani vura kaa gbiatirani na arungosiro vurũ. Ani ima rengba ka nyakasa gaani idapase tipa wa ka ani rengbe ka hi akpakarapai ni wirika ani pai ti ga agu aboro akpiapai du ti gi gaani regbo re nga aguyo nabanda gayo padu ni ruruse arungosiro watadu zingo mosoro ki vura du vurũ. Na ani ima rengba ka ne gu kerepai nga ga kpinyemu marã na nyemu ahe ni bakerehe ka ani wiriki agu aboro nasa gayo raka taata tipa ka peresa pa agu apai nga ga Kindo mbatayo rogo gayo raka. w23.06 10 ¶8-9

Zatise nga gu tandu du boro na ni kadu na zatise ti gani bipai namangaapai. Si nga gu sino si aidaha tipa si fõngbaduraniyo ani da ti gaani asasa, gbe, ka si du nga ani di gu sasa niima kpakara tipa ka da ti ni watadu ani na nyemu ka mangaha te. Mo tingidi gupai nga, zatise nga papara zuzu toro, sidu, mo sana Yekova ko fu gako ziazia toro foro tipa mo sonosi gi nyanyakipa sino re. (Rk. 11:13; Gara. 5:22, 23) Ka mo sungudi nga kinaho apai nika du ni wenengai ya. Rogo gi zegino re, regbo adu nga ho apai nika du ni wenehe dunduko te. Ka si du nga ani nika sungudo gu regbo apai nika du ni wenehe dunduko, ani ima rengba ka zanga da ti gaani sásá. Ani ima rengba ka zanga du na nyemupai mbiko gaani sásá ima rengba kaa ngera wa gu pai niima kpakara ka da ti ni. Ka singia gipai re nga rengo nibi gupai du tipa ro, ya mo mo rengbe ka kparaka gamo sásá ku rogo rukutu he yo? Ka si du nga gamo sásá nga mo naida ka sonosa kura sino, tipagine ka mo aatona nga yugo gu sino re ti ni rogo rukutu agene yo ya? Ka si du nga gamo sásá nabipa geda Baibiri, ya mo mo rengbe ka tona gedaha ni maa mo guru regbo kaa gedaha vuruhe yo? w23.05 29 ¶11-13

Vuru gi yangara arame yo re dunduko, Yekova ima mangasunge na gako riigbu tipa si naafu arugapai furani kindi rogo Fugo Mbori yo tipa si undo rani wa du ani dunduko ani naandu kindi ngba “Gene Ziazia Pai.” (Yes. 35:8; 48:17; 60:17) Ani ima rengba ka ya, ti ai gu regbo boro aida ka wisigo Baibiri, ni ima gbia gu momu nga ga tona nduge ngba “Gene Ziazia Pai.” Agu akurayo nandu ngba gi bagene re gbua tipa bete regbo na i ki mbu nduge ngbaha. Agu akurayo ima diaberã tipa kaa ndu kindi ngbaha daho i nika da ni rogo gu ba i andu ku rogoho. Gini ba du i andu ku rogoho? Tipa agu aboro du na gu maabangirise nga ga ngbangbaturũ, “Gene Ziazia Pai” nandu na yo ku “rogo ga Mbori paradiso” ngbangbaturũ yo. (Yugo. 2:7) Tipa agu aboro du na gu maabangirise nga ga raka auru kpotosende, gi bagene re nika ndu na yo kuti digido agarã 1,000 tipa i da ni rengberengbe yo. Ka si du nga mo nandu ngba gu bagene re awere, ka mo berẽnga pa agu ahe mo ambu paha tipa ka ndu ngba gu gene re ya. Na ka mo mbunga nduge ngbaha ya daho mo nika nyasa gamo nunguro ni ku rogo vovo zegino! w23.05 17 ¶15; 19 ¶16-18

Ho mo aberã ni kuriipa agu apai dunduko Yekova namangihe foro, mo nika du na bakere tambuahe fuko na mo kini idi ka kpara gamo raka fuko. (Tam. 116:12-14) Baibiri naya tipa Yekova ko nga Bafu “wene gamahe dunduko, na ziazia ũgamahe dunduko.” (Yak. 1:17) Gu gamahe nyakipaha kisusi agamahe dunduko nga gu gamahe nga ga motumo tumorii nga ga Wiriko nga Yesu. Mo berẽnga kurii wai du gu gamahe re ni bawenehe kisusi! Motumo tumorii ima saha foro taata mo du na mbembedi pagume na Yekova. Na ko ima fu gu maabangirise foro nga ga raka nyeanye kindi. (1 Yo. 4:9, 10) Pa kpara mo gamo raka fu Yekova nga gu bakerepa gene mo ayugo gupai ngbaha nga mo na bakere tambuahe tipa gu bakere mangaapai nga ga nyemuse re, kodihe na agu amaku dunduko Yekova nafuhe foro. Pa Rug. 16:17; 2 Kor. 5:15. w24.03 5 ¶8

Ho ani abi gu wasiwasi mangaapai ni nga ga aboro areme, si nasarani ani du kina wai Roto adu. Ko “arungo bakere be gu wasiwasi mangaapai nangia ga gbegberẽ aboro,” bambiko ko aima ino gupai nga, gu Barani du ngbangbaturũ yo ima soga gbegberẽ mangaapai. (2 Pet. 2:7, 8) Bambiko gupai nga Roto anaagunde ti Mbori na kini kpinyemuko, ko aima soga gu wasiwasi mangaapai nangia ga agu aboro naadu pati ko. Agu aboro ke rani kirikiri a na kina wiri bete irisa gbua tipa gu ga Yekova arugute du tipa wene mangapai watadu i na irisa tipaha te. Wa vura duhe wo, ani ima rengbe ka nye ni gigiri rani rogo gaani mangapai yo na ki banda gaani nyemuse gbiati wene gunde ti Mbori. Yekova naundo rani ani mangi gipai re vurube gu ngarasaro ani agbiaha rogo gu buku nga ga Asanza. AKristano dunduko nga akumba, adee, paranga aboro na sosono aboro ima rengba ka gbia undo nzunzu ti wisigo yo agu arugute nga ga tatamana du rogoho. Ho ani agunde ni ti Yekova, ani nadu na rubangirise ka zanga mbu gene fu gbegberẽ mangapai. w23.06 20 ¶1-2; 21 ¶5

Isoke, si rengbe kadu nga gamo aborokporo nasoga ro, watadu mo ima mbupa du na bakere marã gbiati kura ahe tipa ka peresa pa ga Mbori Kindo mbatayo rogo gamo raka. (Mt. 6:33) Ka si dunga wo duhe, mo ima rengba kadu na gu kido nga Yekova ima ino agu apai dunduko mo namangihe fuko. (Eb. 6:10) Si nawira wa, mo ima bi agu afugo Yesu si ni digisitihe nga: “Mi nagumba ha fu roni ni rengo, ka boro he gani bambu, na awirinani, na adawirini, na nani, na bani, na awirini, na gani aati, tipa re, na tipa wene pangbanga ni ka abambu du be ni na awirina, na adawiri, na ana, na awiri, na aati, na arungo, wa du rago re, ki susi gu naadu mbata bara 100; na nyenye unga rogo gu ngbi nikadu yo.” (Mk. 10:29, 30) Ni rengo, agu amaku mo nagbiaha ima kio kisusi pa agu apai mo nambupaha.—Tam. 37:4. w24.03 9 ¶5

Ho agu aKristano naadu Yuda yo agbiatiyo ni na bakere zingo riahe, agu awirina naadu rogo gu dungurati naadu Andiokia yo adiberã ka keda “ũgomoro fu agu awirina nadu Yuda yo, gu ni ki niringbisi gani na kina omeni.” (Amo. 11:27-30) Wa vura duhe nga agu awirina nadu nazingo tipa riahe re aaraka tuturũ, agu aKristano naadu Andiokia yo aima diaberã tipa ka undo yo. (1 Yo. 3:17, 18) Ani ima rengba ka yugo nunga areme a, ho ani naini gupai ni nga gu kura awirinarani aidipase gbiatiyo na gu gberãngo naye nisangbana gu mangaapai nga ga ome zegino. Ani nafu undo niipo—ti kura regbo, ni sana ani abaakumba singia pai ho rengba ani ka undo namangaha na nifu ani marã kurogo gu sanduki du tipa gu sunge namanga rogo zegino dunduko watadu ni manga ani kparakpee tipa agu awirina gbiatiyo na gberãngo. Awirinarani ima rengba ka ida naundo tipa ka gbia agu ahe nga gu i aida na ni tipa kaa raka. Ho gaani Bakindo nga Yesu Kristo nika ye ni ka sapangbanga, ani naida ko gbia rani ani niyugu nunga na ko ki fu gu yambahe furani nga “oni dí kumbo gu ngbi.”—Mt. 25:34-40. w23.07 4 ¶9-10; 6 ¶12

Yesu awiriki ga Yekova ruru bipai. I akedi ko ku auru kpotosende no ko tungusipai fu “gu ingiingi akandoro nga ngbatunga aYisaraere.” Ono ko aima yugo ruru bipai wa ko aamanga gu sunge re. Ti gu kura regbo sa, dee nangianga boro Yisaraere ya azungodi ko ko husi wiiri ‘daimona aamanga ri gbegberẽ.’ Yesu ayugu nunga ki mangi gupai ri asanako tipaha na ki husi wiiri. (Mt. 15:21-28) Oni bingo gu kura kpiapai. Ti tonatona ga Yesu tungusapai, ko aya: “Gu ni ka oro rimore . . . , mi aóra rimoni” a. (Mt. 10:33) Ono ya mo ko aoro rimo Petero, nga gu ko naoro rimoko bara biata? Oó. Yesu aberẽpa ga Petero saberã gbiati idapase. Tifuo i zingisi Yesu be kpio, ko akuru fu Petero na si nangera wa ko aima kido Petero na gupai nga ko ima mbupai fuko na ko ima kpinyemuko. (Rk. 24:33, 34) Yekova Mbori gbiati Yesu Kristo na ruru bipai. Na ginipai tigaha du tipa rani? Yekova naida gupai berani nga, ani du na ruru bipai. w23.07 21 ¶6-7

Ginipai rengbe ani ka pehe fu agu aboro du na kapa nga ga Mbori kidohe tipa Paradizo nika da ada nzunzu ti rengo? Ni bambataha, Yekova du mangi gu kidohe re nitiko. Gu buku nga Yugoti naya: “Gu ko nasungu auru mbatabakindo, ko ki ya, ‘Oni ngére, mi nambakada ahe dunduko ni vovo ho.’” Ko na kina gu tatamana, ome, gbiati nyemupai si aidaha tipa ka sa gako kidohe si da ti rengo. Uepai nga, Yekova ima ino gupai nga, gupai ko apehe du wa ka si mangi. Si nga ndu gupai ko aya ti ni wẽ: “Si nga ruru he nga rengo a. . . . Si ni mangimangi he!” Biatapai nga, pai ho rengbe ka rugusa Yekova ti digiso ko gupai ko natonaha te, si du nga ndu gupai ko aya ti ni wẽ: “Mi nga Arufa na Omega.” (Yugo. 21:6) Yekova nika yugo gupai nga Satana nga iraziree, na ka ko rugusinga Yekova ti digiso ko gako ringbisapai te. Sidu, ho boro nika pe gupai ni foro nga, “Agi apai re ima du ni bawenehe, ono ka mi idinga kuti gupai nga si rengbe ka da ti rengo te,” Mo ima rengba ka geda Yugoti 21:5, 6 funi na ki sakirogoyo. Mo yugu wai Yekova nakidohe tipa ka digiso gako kidohe si ki du wa ka i ya ko moi fuo beko ti ni.—Yes. 65:16. w23.11 7 ¶18-19

Yekova amangi gu kidohe re fu Abarayama ho ko aavunganga gude ni ya ho garãko adu ni nga 75. Ya mo Abarayama abi gu kidohe re si nadigisi tihe? Ko aabingo ho dunduko si nadigisi tihe te. Tifuo Abarayama si gu di nangia Ferata na ki sungudi tipa agarã 25, ko abi wai i avungu wiriko nangia Yisaka ngba iiriwo gene, na tifuo kura agarã 60 kusa, i avungu atitako nangia Esau na Yakobo. (Eb. 6:15) Ono Abarayama aabingo atitako i nada ni bakere rikaaboro na ki zi Ringara Mokido te. Wa si avura du wo, gu ruru kumba re aima du na mbembedi pagume na Bakusiko. (Yak. 2:23) Na ho i nika zingisa Abarayama ni be kpio, nairiwo wai ko nika du na bakere ngbarago ka bi gupai nga gako idapase gbiati gako zerangbaduse asa arikaaboro dunduko i gbia amaku! (Bam. P. 22:18) Ginipai ani awirikaha? Ani ima rengba ka zanga bi ga Yekova akidohe dunduko si ni digisitihe awere. Ono ka ani du na hipai wa Abarayama, ani ima rengba kadu na gu kido nga, Yekova nika fu mosoro furani awere na ki fu bakerehe furani rogo gu ga Ko vovo zegino ko nakido paha.—Mk. 10:29, 30. w23.08 24 ¶14

Ho Bakindo Uziya adu ni ni paranga, ko adu na umbasitise. Ko awiriki ka “gunde ti Mbori.” Ko araki tipa agarã nga 68 na vuru dungu agu agarã yo re, Yekova aima fu maku fuko. (2 Peka 26:1-4) Uziya aima diabe agu arikaaboro naasovura kuti aYisaraere na Yerusarema kidu ni banda bandaha. (2 Peka 26:6-15) Rago aima ngba ti Uziya tipa agu apai dunduko Mbori aundo ko tipa ko mangihe. (Batu. 3:12, 13) Bakindo Uziya anaagumba agu apai dedede fu aboro si aaida i mangihe. Ya mo gupai re asa ko ko berẽ gupai nga ko ima rengba ka manga ai gupai ko aaida ka mangaha? Sidu, rogo kura uru sa, Uziya arimi ku rogo ga Yekova yekaru ki di ngbiti apai na ki asadi ka zo fuõngua rii bamotumo nga gu sunge si aaidanga abakindo mangihe ya. (2 Peka 26:16-18) Gu Gbiamotumo nangia Azaraya aˈasadi ka za Uziya, ono ko azingi ni kerehe. Si ni pa gberãrago nga, Uziya aanyenga ni ruruko fu Yekova te na Yekova aukadi ko na ngbataka. (2 Peka 26:19-21) Nairiwo wai ka gako raka adu ni bawene he gbe ka ko anye ni boro umbasitise! w23.09 10 ¶9-10

Zavura tifuo Petero da ni mbedimbedi Kristano, si aaida gu mokedi re naasovura kindi kuti gako arungbura. Rogo gu garã nangia 36 Fuo Batikayo Kristo, Mbori akedi Petero fuo Korunerio nga gu kumba nangianga Yudo ya, na yo du Mbori ambedi Korunerio ni na ziazia toro nga gu gopai naayugoho ziazia nga “Mbori akpara nga aboro te” na agu aboro naangianga aYudo ya aima rengba kadu ni papara gu dungurati nga ga aKristano. (Amo. 10:34, 44, 45) Tifuo gure, Petero atona ka rihe na agu aboro nangianga aYudo ya, nga gupai ka ko aamanganga ha mbata kusayo ya. Ono tie, gu kura aYudo nangia aKristano abihe nga, si aidanga aYudo na agu aboro angianga aYudo ya naarihe wa sa te. Ho gu bete aboro naadu na gu bipai re aye ni ku Andiokia yo, Petero ambu ririahe na agu awirinako naangianga aYudo ya, si nawiraha wa, ko aagunde ti ba gberãrago ti agu aYudo nangia aKristano. Gu mokedi nangia Pauro abi gi biriki re na ki fu rugute fu Petero gbaiga. (Gara. 2:13, 14) Wa Petero avura manga gi ingahe re vurũ, ko aandu kindi kumbatayo kaa iriso Yekova. w23.09 22 ¶8

Mo wisigi tiro na ki bi gu bangiriba rengbe mo ka manga ariapai rogoho, ono ka rago gberẽnga tiro ya. “Gbia,” na wenesino tiko na ko nika undo ro aundo mo mangi ariapai. (1 Pet. 2:3) Gu mokedi nangia Petero akido roni nga: “Mbori . . . asá roni tigako oni du teketeke, ki nyakasi roni.” Ti kura regbo sa, Petero abi he nga ko arẽnga tipa kadu na Yesu te. (Rk. 5:8) Ono mbiko gu undo nga ga nyemuse Petero agbiaha be aYekova na Yesu, ko akakuti pekafuo Kristo. Ni sangbanaha, Yekova ambu Petero ko rimi “ku rogo gu nyenye ngbi nga ga gaani Gbia, nga Batasirani Yesu Kristo.” (2 Pet. 1:11) Nga gu riko bawene mosoro! Ka singia mo kpatakara kuti iriso Yekova wa gu Petero amangihe na ki mbu tiro Yekova raba ro, mo nika gbia gu mosoro agbia a nga ga nyenye unga. Mo nika ‘dia gu digida he nga ga gaani idapase, nga batasa mbisimorani.’—1 Pet. 1:9. w23.09 31 ¶16-17

Banye adu na bavurukporo rogoho sa—nga gu nadu na ndugu pati ni, yo aboromotumo anaamanga gayo sunge ni. Gu bakere ba zo motumo i ambakadihe rogo sirigi yo adu vurukporo, wa sa na gu kurungbu i ambakadihe rogo sirigi yo nga gu aboromotumo anaamangasunge na ni ka giriso tiyo mbata fu i mangi gayo ziazia sunge. (Gate 30:17-20; 40:6-8) Areme, gi ruru awirina Kristo nga mbedimbedi aKristano re namangasunge auru kpotosende rogo gu vurukporo du ku dimoyo rogo gu yekaru nga ga toro. Gu bakiki kurungbu nga ga ime nadu banye yo na yekaru yo, nga nyanyakipa tingidapai fuyo, nga i nye gigiri rogo mangapai yo na rogo toro yo na kinawo duhe fu aKristano dunduko a. Wari gu tie gu “bakere rimbasa,” nga agu yo nasongoda awirina Yesu ni ruruyo airiso Yekova ni? Gu mokedi nangia Yoane abiyo ‘i narundu barangba mbatabakindo,’ nga gu narukuba gu vurukporo du ku zegi yo auru kpotosende nga gu ba ‘i amanga pa Mbori rogoho uru na yuru rogo gako yekaru.’ (Yugo. 7:9, 13-15) Ani ima rengba kadu nzunzu na bakere tambuahe nga Yekova ima fu gu nyanyaki pa momu furani nga ka irisoko rogo gako bakere yekaru nga ga toro! w23.10 28 ¶15-16

Gu kura gene sa dagba agu akuraha yo Yekova anyakasa rani ngbaha nga vurube abaakumba. (Yes. 32:1, 2) Sidu, ka si du nga mo na bakabangirise, mo pepa agu apai nasa ro mo du na bakabangirise fu abaakumba. Ho i nika fu undo ni, mo dihe kugume na tambuahe. Yekova ima rengba ka nyakasaro vurube yo. Agu akidohe du rogo Baibiri yo—singia ka raka auru kpotosende ane rogo Paradizo watadu ka raka ngbangbaturũ yo—ima rengba ka fu ome furani. (Rom. 4:3, 18, 19) Gi gaani maabangirise re nanyakasa rani ani hi aˈasada, ani tungusi wene pangbanga, na ani undo awirinarani rogo dungurati. (1 Tesa. 1:3) Gu bangisa maabangirise re aima nyakasa gu mokedi nangia Pauro. I ‘agbisi ko,’ ‘pai ki gasi ko,’ i ‘ki rungosi ko,’ na ‘ki ba ko.’ Na zavura ti kura aregbo, gako raka anidu ngba kerepai. (2 Kor. 4:8-10) Pauro agbia ome tipa ka hipai ni maa ko berãko kuti gako maabangirise. (2 Kor. 4:16-18) Pauro amoiberãko tipa gako maabangirise nga ga nyenye unga ngbangbaturũ yo. Pauro aberẽkurii gu maabangirise re, na ni sangbanaha, ko abi tiko nga ‘i nambakada ko waragoagira.’ w23.10 15-16 ¶14-17

Ho mo amanga kparakpee ni, mo bingoho singia si nga ga Yekova regbo ko karagapai kuti gupai mo asanahe tipaha. Ani ima rengba ka bihe nga ani naida karagapai kuti gaani akparakpee ni kina boro ipo. Ono nirengo, Yekova ima ino gu bawene regbo si aida ko undo rani ti ni. (Eb. 4:16) Ho ani agbianga guhe ni ani nasanahe tipaha ni kina ipo ya, ani ima rengba ka berã gupai nga ga Yekova karagapai nga ‘Oó.’ Ono ga Yekova karagapai ima rengba kadu nzunzu nga ‘Awere te.’ Ni kpiapai, paranga wirina amangi kparakpee tipa ka hu be gako kaza. Ono ariapai aamanganga ti gako kaza te. Ka Yekova amangi iiriwopai ka husa ko, ka Satana aima rengba ka pe gupai nga gu wirina re nandu kindi kumbatayo kaa iriso Yekova mbiko Yekova ahusi ko. (Eyo. 1:9-11; 2:4) Kurigure, Yekova ima maa regbo tipa ka husa akaza dunduko ti ni. (Yes. 33:24; Yugo. 21:3, 4) Da kina ti gu regbo re, ani arengbanga ka berã gupai nga Yekova nika manga iiriwopai ka husa rani be gaani akaza te. Sidu, gu wirina re ima rengba ka sana Yekova tipa ome na zereda nga ga berãse yo tipa ko hi gako kaza na kini ndu kindi kumbatayo kaa iriso Yekova ni ruruko. w23.11 24 ¶13

Samusona aima manga kere ingahe, ono ko aambunga iriso Yekova te. Ko agbata gene tipa ka sovura kuti aFereseto nga gupai Yekova aaida ko mangihe. (Abasa. 16:28-30) Samusona akpari fu Yekova nga: “Mi íri bape bangire du ue ti aFereseto.” Ndikidi Mbori akaragapai kuti ga Samusona kparakpee na ko ki gbia gako kparakpara ome berewe. Ni sangbana gipai re, Samusona aimi aFereseto bara gere ni dunguyo susi gu nadu mbata. Wa vura duhe nga Samusona agbiatiko na gbegberẽ sangbana gako mangapai, ko aambunga asada ka manga gupai Yekova akpinyemuhe te. Ka si vura du nga ani mangi ingahe na i ki fu zahe furani watadu ani ki zanga gaani amamu, si aidanga ani mbu asada ka manga gupai Mbori akpinyemuhe te. Oni tingidi gupai nga, Yekova regerege ka mbupai furani. (Tam. 103: 8, 9) Ka ani vura manga ingahe, Yekova ima rengba ka fu ome furani ani mangi gupai ko aida ani mangihe kina wai ko amangihe fu Samusona. w23.09 6 ¶15-16

Ho mo ahipai ni, Yekova naida na gamo pai. Anga gere nayugo gupai nga rago nangba ti Yekova ho ani agbiatirani ni na akpakarapai te. Kuba gure, ko na ngbarago mbiko wai ani ahipai niruru rani. Si ni bakerepa ngarasaro ka ino gupai nga, ho ani ahipai ni, ani nasa Yekova ko du na ngbarago! (Tam. 5:12) Oni tingidi gupai nga, Abarayama agbia tiko na aasada ko ki hi he dunduko ni ruruko, na Yekova adu na ngbarago na ko. Yekova aabi ko ni bakureako na ki bi ko nga ruru boro. (Bam. P. 15:6; Rom. 4:13, 22) Kina gu bangisapai re rengbe kadu tipa rani a. Anga Yekova na ngbarago na ani mbiko gu bakio sunge ani amangaha watadu gu ba ani airisoko rogoho te. Yekova na ngbarago na ani ho du ani ni niruru rani ani ki vura kaa gbiatirani na aasada vurũ. Na ka garã rani vura du wai vurũ, na agu apai du tipa rani ki vura du wai vurũ, watadu gaani birĩ mangaapai, ani dunduko naima rengba ka hipai. Ya mo mo nahi asada awere niruru ro? Ka ngia wo duhe, mo tingidi gupai nga mo nasa ngbarago ti Yekova. Pa ino ani gupai nga Mbori na ngbarago na ani ima rengba kadu na bakere ome kurii rani. Si ima rengba ka nyakasa gaani maabangirise. w23.12 11 ¶13-14

Si naida gu Kristano nga kumba wiriki wai kaa fura na aboro wenengai. Gu kumba nafura na aboro wenengai nadegatuko na ki rugutiko na agu aberãpai na abipai nga ga kura aboro. (Snz. 20:5) Ni naˈasada ka ino wai du woro fugo boro ho ni afura ni, na wai du kpotoni. Ka si du nga mo adianga regbo na aboro te, mo arengbanga ka wirika wai ka manga gipai re te. Ka si du nga dedede, mo nafura na aboro nikeka mo apai kina rogo email, terefuni watadu gu kura aũfugo dagbase, si nika du foro ni kpakarakpakaraha mo fura na aboro ho mo nika gbiayo ni. Sidu, mo asadi ka ngera tipa agene tipa kaa fura na aboro mo nibiyo abi. (2 Yo. 12) Si naida gu Kristano nga kumba naima nyaka rogo toro yo duadu a na rengba ka ngerafuo ti ni na gani aborokporo. (1 Tim. 5:8) Si adu ni wenepai boro wiriki gupai nga gu rengbe ka undo ni ni gbia sunge marã. (Amo. 18:2, 3; 20:34; Ef. 4:28) Mo mangisunge nyanyaki na mo ki bi gupai nga mo ima nyasa gupai mo natona mangaha. Ka mo mangihe wo, si nangera wa ka i ya mo nika gbia sunge agbia na ki bandaha. w23.12 27 ¶12-13

Ho Baibiri afura ni tipa “rago Gbia,” watadu ga Yekova uru, si nayugopa gu regbo Yekova nika gbarasa avurako ti ni na ki ye na bata fu gako aboro. Mbata kusayo, Yekova afu mbusa fu bete rikaaboro. (Yes. 13:1, 6; Yeze. 13:5; Zef. 1:8) Ti gi gaani regbo re, “rago Gbia” watadu ga Yekova uru nika tona ho bangbembatayo rogo birĩ-zogarago nika gbarasa Babera Du na Bakere Ome Ti Ni ni, na i nika diaha kusayo ti regbo gu vura nga Aramegido. Tipa ka bata rogo gu “uru” re, si naida ani mbakadi tirani awere. Yesu ayugu gupai nga si aidanga ani du gbua kina regerege tipa “bakere gberãngbi” te, ono ani ‘mbákadi tirani’ a tipaha. (Mt. 24:21; Rk. 12:40) Rogo gu bambata waraga nangia ga gu mokedi nangia Pauro ga Mbori toro adu kugiiko ko kehe fu ATesaroniko, ko amangisunge na badungu akpiapai tipa ka undo aKristano i mbakadi tiyo tipa gu bakere uru nga ga ga Yekova sapangbanga. Pauro aima ino gupai nga ga Yekova uru ayengo ti gu regbo re ni basa te. (2 Tesa. 2:1-3) Wa si avura du wo, ko angarasi awirinako i mbakadi tiyo tipa gu uru re si kidu wa ka i ya si ni ka ye kina gba, ani ima rengba a ka mangapai kuti gi gako rugute re. w23.06 8 ¶1-2

Rogo gu garã nangia 1978, i adua bagbanga bambu Tokyo Japan yo. Agu aboro naabihe aabaka kina bangiriyo singia gi bambu re aru nyanyaki ti regbo gu bakere bazigizo ni naamanga rogo gu gbata re. Ginipai agu aboro naame gi bambu re amangihe tipa ka saha si ru nyanyaki? Aba me gi bambu re amehe ngba gu gene nadu ni nyanyakihe na si ki du a na rengba ka ru nyanyaki ti regbo bazigizo. AKristano wakina gu gbanga bambu re. Ngba gini gene? Si naida Kristano banda ruru bipai nibipa ru nyanyaki. Si naida ni du nyanyaki zanga wo ho daha ni tipa ka manga ga Yekova arugute na arugapai. Ni regerege ka ‘gia pai’ na ni akpakananga he te. Rogo kura gene, “ki du yee,” ho rẽarẽ ni tipa ka mangaha wo. (Yak. 3:17) Gu Kristano wiriki wai ka du na ruru bipai nika zanga mbu gene fu gu kura apai si gbe berãni. w23.07 14 ¶1-2

Yesu aká ga Satana Bakitingbanga pai, nga gu ko naya fuko gbaiga ka ko du nga ni ruruko fu Yekova ya. (Mt. 4:1-11) Satana aima diaberã tipa ka sa Yesu ko mangi ingapai tipa ka ko du nga na rengba kafu motumo tumorii ya. Ho Yesu aatungusapai ni auru kpotosende, ko ahi gu kura aˈasada berewe. Avurako arungosiko na i aˈasadi ka imo ko. (Rk. 4:28, 29; 13:31) Ko ahi agu azangarengba nga ga apefuoko. (Mk. 9:33, 34) Ho i aasarangbanga ko ni, i arungosiko na kini sawia ko. Na i aimi ko na ko kidu rogo kere igirã. (Eb. 12:1-3) Na si aaida ko hi yangada papara gako asada nitiko zanga ga Yekova bandahe. (Mt. 27:46) Si tie ziazia nga, Yesu ahi dungu apai tipa kafu motumo tumorii. Ho ani aberã ni kurii agu akpakarapai Yesu asusi rogoyo tipa rani, si nasa rani ani du na bakere nyemuse tipa ko. w24.01 10-11 ¶7-9

Tipa ani du na wene pagume na kura aboro, si naida ani du na zerangbaduse watadu hipai. Si nika undo rani ani degeturani wenengai ho kura aboro afura ni. (Yak. 1:19) Zerangbaduse naundo rani a ani du na zereda na yo. Du na zerangbaduse nabanda rani a ti mangapai niipo kuti pai na ti pe ani gupai du ni gbegberẽhe ho du ani ni na gberãrago. Na ho du ani ni na zerangbaduse, ani azinganga niipo ho boro naimisi rani ni te. Kuba gupai nga ka irobape, ani nikaa ‘hipai fu akuarani, nivu akuarani.’ (Koro. 3:12, 13) Hipai watadu zerangbaduse ima rengba ka undo rani a ani mangi wene adiaberã. Kuba gupai nga ani gu agu ka manga diaberã ni kina wiri ipo, ani nika manga wetekapai na ki bi agu asiapai du berani na ki mangi diaberã tipa gupai ngba gbe. Ni kpiapai, ka si du nga ani nangera tipa sunge, ani ima rengba ka bihe nga si naida ani di gu sunge ani nabihe ni bambataha. Ono ka ani du na zerangbaduse, si nika sa gupai nga ani berẽkurii pa gu sunge re na wai gu sunge re nika du na maapai kurii gaani aborokporo na gaani pagume na Yekova. Ka ani du na zerangbaduse, si nika sa gupai nga ka ani mangingo gbegberẽ diaberã ya. w23.08 22 ¶8-9

Mo ima rengba kadu na gberãrago bambiko si nika ida mo nasovura kuti gbegberẽ nyemuapai. Pa berã mo kurii gu kidohe mo amangihe fu Yekova ho mo akpara tiro ni fuko nika nyakasa ro tipa mo naasovura kindi kuti asada. Ngba gini gene? Ho mo amanga gamo kparatise ni fu Yekova, mo nambupa gamo apai. Gipai re nayugo gupai nga mo nasia ka ká gu gamo nyemuapai na asasa nga gu rengbe ka ba gberãrago ti Yekova. (Mt. 16:24) Sidu, ho mo agbia tiro ni na asada watadu ho mo asusa ni rogo kpakarakpakara regbo, mo abakanga bangiro tipa ginipai si aida mo mangihe te. Mo nika ima ino gupai si nika ida mo mangihe nga—ka nye niruru ro fu Yekova. Mo nika diaberã ka sa ngbarago ti Yekova. Mo nika du wakina Eyobo. Wa vura duhe nga ko aima gbiatiko na kere kpakarakpakara aasada, ko aya: “Mi ambu nga pa gi du ni irarengo te.”—Eyo. 27:5. w24.03 9 ¶6-7

Yekova, nga ‘Mbori nyemuse’ na kina rani! (2 Kor. 13:11) Ko naberãpa rani aberã wadu ani nibasasa dũ. Ani ima rengba kadu na gu kido nga gako ‘weneringise nake pati rani kirikiri.’ (Tam. 32:10) Kina wai ani kaa berãkuriipa wai ko nayugu gako nyemuse furani, kinawo a ani nikaa bi wai ko angerafuo rani. Ani ima rengba ka kpara fuko zanga gunde na kini pe pa wai fuko ani aida na gako nyemuse. Ani ima rengba ka pepa gaani abakabangirise fuko bambiko ani ima ino gupai nga ko ima gia tiko na gupai du tipa rani na ko regerege ka undo rani. (Tam. 145: 19) Kina wai ani naambeda kupati we ti regbo zere, kinawo a gako nyemuse agbe rani koyo du ko ni. Wa vura duhe nga ga Yekova nyemuse ni nyanyakihe, kinawo du gako nunga a. Sidu, mo du na ngbarago bambiko Yekova ima kpinyemuro. Sidu tie, ani dunduko karaganga pai akaraga kuti gako nyemuse ni pe ani gupai nga: “Mi nakpi nyemu Yekova”!—Tam. 116:1. w24.01 31 ¶19-20

Yesu aagumbanga kina gupai gbua nga rimo Mbori nga Yekova te. Agu aYudo Yesu ayugupai fuyo aima ino rimo Mbori. Ono Yesu angbembatayo ni ‘gu boro na gumba pa ko.’ (Yo. 1:17, 18) Ni kpiapai, Kuru Ndika nayugo gupai nga Yekova nga boro inapai na nunga. (Gate 34:5-7) Yesu ayugu gu rengo re ziazia ho ko ape gu sanza ni nga ga ingiingi paranga na bako. Ho ani agedapai ni tipa gu bagude nabi gu wiriko ni nga gu ko nasa berãko “wa ko adu tuturũ,” ko aoro ka ndu ka gbiako na ki dungo ko, na ki mbupai fuko kina boro kpotoko yo, ani nabi wai ane nzunzu du Yekova na inapai na nunga tiko. (Rk. 15:11-32) Yesu aundo kura aboro tipa i ini wai nzunzu du Yekova. w24.02 10 ¶8-9

Yekova naafu wasa fu agu aboro du rogo gberãrago. Waigu rengbe ani ka wirika Yekova na kidu na nunga tipa kura aboro na kini fu wasa fuyo? Gene sa rengbe ani ka mangaha ngbaha nga ni sonosa ani agu asino nika undo rani tipa ani du na nunga na kini fu wasa fu kura aboro. Bete agi asino re nga gine? Ginipai nika undo rani tipa ani banda gu nyemuse ani aidaha tipa ‘kaa ngarasa tirani’ na aˈuru dunduko? (1 Tesa. 4:18) Si naida ani sonosi agu asino nga, ka du na nunga akuarani, kini kpinyemu akuarani, na kidu na weneringise. (Koro. 3:12; 1 Pet. 3:8) Waigu rengbe agi asino re ka undo rani? Ka ani du na nunga awirinarani na kini kpinyemuyo nzunzu, ani nika du na bakere nyemu ka fu wasa fuyo ho i arungo ni. A wa Yesu apehe, “ngba boro nagumba gu pai du kpotoni yo. Gu wene boro du na wene kumuko ni nakusa wene ahe.” (Mt. 12:34, 35) Gu nyanyakipa gene ani ayugo gaani nyemuse fu awirinarani ngbaha nga, fu wasa fuyo ho i aidaha ni. w23.11 10 ¶10-11

Si naida ani sanahe tipa undo ka si du nga ani naida ka giarogo gu sangbaanebi yo nga ga Baibiri. Oni bingo gi kpiapai re. Mo berẽnga gupai nga mo ndu kurogo gu ba mo ainidonga tiro na ni wenengai ya, ono gu bakureamo oni andu na ni kurogo gu rago re ima ino gu rago re wenengai. Ni ima ino gu ba du oni rogoyo na ni ki ima ino agu aba agu agene du rogo gu ba re andu kurogo yo dunduko. Zanga kapa, mo ima rengba kadu na ngbarago nga bakureamo idi gupai nga oni ndu na ni wa sa! Wakina gure, Yekova wakina gu bakurearani re, ko ima ino gupai du kumbatayo wenengai. Sidu, tipa ka giarogo gu sangbaanebi yo nga ga Baibiri, si naida ani du na umbasitise na ki sana Yekova tipa undo. (Dan. 2:28; 2 Pet. 1:19, 20) Wakina wene vunguagude, Yekova naida awiriko du na ngbarago kumbatayo. (Yere. 29:11) Ono Yekova kia ti vungugude mbiko, ko ima rengba ka pe gupai ni kina ruruhe nika manga kumbatayo. Yekova asia akumba tipa i ke sangbaanebi kurogo Fugoko yo tipa gupai nga ani ini gu nyanyakipa pai nika manga mbata fu si mangi.—Yes. 46:10. w23.08 8 ¶3-4